УИХ өнөөдөр ээлжит бус чуулган зарлаж, Эрүүгийн хуулийн шинэчилсэн найруулгийн төслийн анхны хэлэлцэхээр товлосон байсан. Өнгөрсөн долоо хоногт уг асуудлыг хэлэлцсэн ч ажлын хэсгээс гаргасан зарчмын зөрүүтэй 100 саналаар санал хураалгах шаардлагатай болсон юм. Эрүүгийн хуулийн шинэчилсэн найруулгийн төслийн анхны хэлэлцүүлгийн талаар зарчмын зөрүүтэй асуудлыг хэлэлцэж эхлээд төсөлд заасан зорилт гэдэг үгийг зорилго гэдгээр өөрчилнө гэсэн ажлын хэсгийн саналыг олонх дэмжсэнгүй.
УИХ-ын гишүүн Д.Лүндээжанцан “Ажлын хэсгийн гишүүн гээд намайг үг хэлэхийг хязгаарлаад байна. Одоогийн орж ирж байгаа Эрүүгийн хуулийн зөрчлийн хэсгийн зорилт гэдгийг зорилго гэж өөрчлөх хэрэгтэй. Зорилт, зорилго хоёр өөр ойлголт шүү дээ. Зорилт нь зорилгоо хэрэгжүүлэхийн тулд тавьдаг зүйл шүү дээ” гэв.
Эрүүгийн хуульд тусгасан Үйлдэл, эс үйлдэхүйг шинээр гэмт хэрэгт тооцох зүйл заалтын талаар зарчмын саналаа гишүүд хэлэхэдээ өөр өөрийн саналаа тусгасан. Тухайлбал, Д.Бат-Эрдэнэ гишүүн “Эрүүгийн хуульд гэмт хэргийн чанартай тодорхойлолтыг маш нарийн гаргах ёстой. Эрүүгийн хуулийн зүйл заалтын талаар 100 гаруй асуудлаар санал авах юм байна. Эрүүгийн хуулиар ял эдэлж байгаа хүмүүсийг харахад ялихгүй асуудлаас болоод эрх чөлөөгөө хасуулсан хүмүүс олон байна. Эрүүгийн хуулийн шинэчилсэн найруулгыг харахад хуулиа хэт чангаруулаад явчихвал сөрөг үр дүн ихтэй байж магадгүй. Эрүүгийн ялыг чангатгахаасаа илүү гэр бүлийн хүрээнд соён гэгээрүүлэх ажлыг хийх хэрэгтэй. Нийгмийн ёс суртахуун, хүмүүжлийг ярихгүй байж алдаж эндэхээр нь бүгдийг нь яллаад байж болохгүй” гэв. Л.Цог гишүүн “Мэргэжлийн нарийн хуульд маш болгоомжтой байх ёстой. Гэмт хэрэг мөн биш үү гэдэг асуудлыг сайн бодох хэрэгтэй. Х.Тэмүүжин сайд байхдаа нэг зүйл ярьдаг байсан. Гэмт хэргийн обьект, субьект, обьектив, субьектив асуудлыг яаж тусгасан бэ. Одоогийн хуульд мөрдөгдөж байгаа заалтыг дэмжиж байна” гэлээ. Дараагаар нь Гэмт хэрэг үйлдсэн хүнд өөрт нь ял оноож, албадлагын арга хэмжээг хэрэглэнэ. Ял, албадлагын арга хэмжээг бусад хүнд нялзааж болохгүй. Нэг гэмт хэрэгт нэг л удаа ял онооно гэсэн зүйл заалтаар санал авлаа. УИХ-ын гишүүн Д.Тэрбишдавга “Компанийн захиралд ял оногдуулдаг, компанид ял оногдуулна гэсэн байна. Хуульд мөн компанийг нь татан буулгана гэсэн байна. Татварын хэргээр захирлыг нь шоронд суулгаад компанийг нь татан буулгана гэхээр энэ заалт зөвхөн монголчуудад үйлчилж магадгүй гэж болгоомжилж байна. Тухайлбал, Оюутолгой компанитай татварын маргаан үүсгэсэн. Оюутолгой татвараа төлөөгүй гээд компанийг нь татан буулгах уу? Цаашлаад Гэмт хэрэг үйлдсэн хүнд өөрт нь ял оноож, албадлагын арга хэмжээг хэрэглэнэ. Ял, албадлагын арга хэмжээг бусад хүнд нялзааж болохгүй. Нэг гэмт хэрэгт нэг л удаа ял онооно гэсэн зүйл заалттай чинь зөрчилдөөд байгаа юм биш үү” гэв. Дээрх заалтаар санал хураасан олонхын дэмжлэг авч чадсангүй.
-Гэмт хэрэг үйлдсэн хүнд шүүхээр ял оногдуулна. Хүний итгэл үнэмшлийн төлөө ял оноож болохгүй. Гэм бурууг нь тогтоогдоогүй бол албадлагын арга хэмжээ авахгүй гэсэн хуулийн төслийн заалтаар санал хураахад гишүүд мөн л дэмжсэнгүй.
Эрүүгийн хуулийн шинэчилсэн найруулгийн төслийн анхны хэлэлцүүлгээр гишүүд багагүй шүүмжлэл өрнүүлсэн. Хууль хэт чанга болж байгааг олон гишүүн Ажлын хэсэгт сануулж байсан юм. Ингээд уг төслөөр Монгол ардын намын бүлэг тав хоногийн завсарлага авснаар чуулганы хуралдаан өндөрлөв.