2014 онд Душанбе хотноо болсон гурван
орны төрийн тэргүүн нарын уулзалтаар Монгол Улсын Ерөнхийлөгч
Орос–Хятадыг холбосон дэд бүтцийн томоохон төслүүдийн багц болох “Талын
зам” санаачлагыг анх удаа дэвшүүлэн тавьсан. ОХУ-ын байгалийн баялагийн
нөөц, БНХАУ-ын өдөр тутам өсөн нэмэгдэж буй эрэлт хэрэгцээний үр дүнд
хийгдэх гадаад худалдааны хамгийн дөт зам нь Монголоор дайрах зам байх
нь ойлгомжтой юм.
ОХУ-ын Уфа хотод болох ШХАБ-ын дээд
хэмжээний уулзалтын үеэр ОХУ, БНХАУ, Монгол Улсын төрийн тэргүүн нар
Душанбегийн уулзалтаас хойш хийгдсэн бүтээн байгуулалтын төслүүдийн
талаар ярилцах юм. Мөн энэ уулзалтын үеэр “Талын зам” санаачилгын
хүрээнд хамтран ажиллах гурван орны бизнесийн томоохон группийн
уулзалт болох ба уг уулзалтад манай улсаас “Чингис Интернэшнл”-ийн
салбар групп болох “Чингис Энерж” группийн Ерөнхийлөгч С.Эрдэнэ, “Чингис
Лэнд Девелопмент” группийн ерөнхийлөгч Д.Амарбаясгалан, “Чингис Хайвэй”
Корпорацийн Гүйцэтгэх захирал Ц.Гантулга нар оролцох аж.
Сүүлийн хэдэн жил Ази-Европийг холбосон
эдийн засгийн томоохон төслүүдийг ярих болсон Чингис Интернэшнл Группийн
хувьд 2009 оноос эхлэн эдгээр мега төслийг хөгжүүлэх тооцоо судалгааг
хийж ирсэн байна. Энэ төслүүдээс хамгийн түрүүнд Алтанбулагаас Замын-Үүд
чиглэлд баригдах “Чингисийн зам” төслийг хэрэгжүүлэхээр ажиллаж байгаа.
Алтанбулагаас цааш Улаан-Үүд хүртэл ОХУ-ын томоохон компаниуд, Эрээнээс
урагшаа Бээжин хүртэл БНХАУ-ын бүтээн байгуулалтын том корпорациуд
ажиллах юм.
Чингисийн “Талын зам” төслийн хүрээнд
хурдны авто зам, төмөр зам, нефть дамжуулах хоолой, хийн хоолой,
цахилгаан дамжуулах шугамын том төслүүд багтаж байгаа ч Чингис
Интернэшнл Групп эдгээрээс гадна олон мега төслийг санаачлан
хэрэгжүүлэхээр хөрш орнуудын бизнесийн томоохон корпорациудтай ажиллаж
байгаа юм байна.
