ШХАБ-ын өргөтгөсөн хуралдаан үргэлжилж байна- Монгол Улсын Ерөнхийлөгч Х.Баттулга тэргүүтэй албаны хүмүүс БНХАУ-ын Чиндао хотноо болох Шанхайн хамтын ажиллагааны байгууллага /ШХАБ/-ын гишүүн орнуудын Төрийн тэргүүн нарын зөвлөлийн өргөтгөсөн хуралдаанд оролцож байна. 2001 онд байгуулагдсан засгийн газар хоорондын олон улсын байгууллага болох Шанхайн хамтын ажиллагааны байгууллагын гишүүн орноор Казахстан, Кыргыз, Орос, Пакистан, Тажикистан, Узбекистан, Хятад, Энэтхэг гэсэн найман улс албан ёсоор багтдаг бол ажиглагч орноор Афганистан, Беларусь, Иран болон манай Монгол Улс байдаг. ШХАБ-ын өргөтгөсөн хуралдааны эхний өдөр буюу өнөөдөр Монгол Улсын Ерөнхийлөгч Х.Баттулга тэргүүтэй албаны хүмүүс Бүгд Найрамдах Беларусь улсын Ерөнхийлөгч А.Г.Лукашенкотой уулзсанаар албан уулзалтаа эхлүүлэв. Энэхүү уулзалтын дараагаар Ерөнхийлөгч Х.Баттулга Исламын Бүгд Найрамдах Иран улсын Ерөнхийлөгч Хассан Рухани нартай уулзав. Ерөнхийлөгч Х.Баттулга ОХУ-ын Ерөнхийлөгч В.В.Путинтай хоёр талт уулзалт хийсний дараагаар ОХУ-ын Ерөнхийлөгч, БНХАУ-ын дарга, манай улсын Ерөнхийлөгч нарын гурван талт дээд түвшний уулзалт болно. ШХАБ-ын гишүүн орнуудын өргөтгөсөн хуралдаан энэ сарын 9-10-ны өдрүүдэд үргэлжлэх юм.
Б.ОДМАА