Засгийн газрын бүтэц, бүрэлдэхүүнд өөрчлөлт оруулах тухай хуулийн төслийг Ерөнхий сайд өнөөдөр УИХ-д өргөн мэдүүлсэн тул УИХ дахь МАН-ын бүлэг өнөөдөр үдээс хойш хуралдлаа. Хэлэлцэх асуудалтай холбогдуулан бүлгийн хуралдаандаа Ерөнхий сайдыг урьсан юм байна. Гэвч Ерөнхий сайд тус хуралд оролцоогүй аж. Тиймээс УИХ дахь цөөнхийн бүлгийн дарга Ерөнхий сайд Н.Алтанхуягийг хэзээ бүлгийн хуралд хүрэлцэн ирж, Засгийн газрын бүтцэд оруулж байгаа өөрчлөлтийнхөө талаар тодорхой тайлбар өгөх вэ гэдгийг тодруулах үүргийг авчээ. УИХ дахь МАН-ын бүлгийн гишүүд эл асуудлыг судалгаанд үндэслэж, нухацтай ярилцах ёстой хэмээн үзэж, Ерөнхий сайдыг бүлгийн хуралдаандаа оролцуулахаас аргагүй гэжээ. Тиймээс тус бүлэг дахин энэ асуудлаар хуралдах болж буй аж.
УИХ дахь Ардчилсан намын бүлэг өнөөдөр мөн ээлжит бусаар хуралдсан. Уг хуралдаанаар Ерөнхий сайдын өргөн мэдүүлсэн Засгийн газрын бүтцэд оруулах өөрчлөлтийг хэлэлцэх үеэр бүлгийн гишүүдийн дийлэнх нь асуудлыг шийдэхдээ яарах шаардлагагүй гэсэн байр суурийг голлон барьжээ.