Эдийн засгийн байнгын хорооны өнөөдрийн хуралдааны үеэр Ерөнхий сайд Ч.Сайханбилэг малчны зээлийн хүүг бууруулах боломжтой гэв. Тэрээр “Хоёр долоо хоногийн өмнө энэ чиглэлээр Монголбанк болон бусад холбогдох байгууллагуудад үүрэг өгсөн. Төрийн банкны үйл ажиллагааг чиглүүлснээр жилийн 30 хувийн хүүг 10 хувь болгох бололцоо байгаа. Малчид 240 орчим тэрбум төгрөгийн зээлийг сарын 2,5 хувийн хүүтэй ХААН, Төрийн банкнаас авсан. 2,5 хувь гэдэг бол маш өндөр хүү. Авсан зээлээ ашиглаад малчид үйлдвэрлэл, мал аж ахуйгаа хөгжүүлэхэд хүндрэлтэй. Цагаан сарын өмнө энэ зээлийн хүүг 30-аас 10 руу оруулах асуудлыг шийдэх боломжийг Засгийн газар эрэлхийлж байна” гэв.
УИХ дахь МАН-ын бүлгээс тэтгэвэр, цалингийн, малчны зэрэг бүх төрлийн зээлийн хүүг нэг оронтой тоонд оруулахыг УИХ-ын дарга, Ерөнхий сайд, Монгол банкны Ерөнхийлөгчөөс шаардсан билээ.