Орон нутгийн цэрэг татлагын комиссын даргыг буудсан хэрэг өнөөдөр Эрхүү мужийн Усть-Илимск хотод гарчээ.
Зэвсэгт этгээд цэрэг татлагын байранд ажиллаж байсан офицерын толгойд тулгаж буудсаныхаа дараа баривчлагдсан байна.
Буудуулсан офицер Александр Елисеев эмнэлэгт хүргэгдэж, биеийн байдал нь хүнд байгааг Эрхүү мужийн захирагч Игорь Кобзев мэдээлжээ.
Орон нутгийн эх сурвалжуудын мэдээлснээр зэвсэгт халдлага үйлдсэн этгээд нь 25 настай Руслан Зинин гэгч юм байна.
Эрх баригчид цэргийн бэлтгэл хүчийг дайчлахаа амласан ч цэргийн алба хааж байгаагүй Зининий сайн найзад зарлан дуудах хуудас ирүүлсэн нь ийм хэрэг гарахад хүргэсэн гэнэ.
Хэдийгээр өөрт нь зарлан дуудах хуудас ирээгүй ч найзыг нь дайчлах болсонд Зинин маш их бухимдаж байсныг түүний ээж Марина Зинина орон нутгийн хэвлэлд ярьжээ.
Мөрдөн байцаагчид Зининд хууль хүчний байгууллагын албан хаагчийн амь насанд халдсан, хууль бус зэвсэг эзэмшиж байсан зэрэг хэрэг үүсгэн шалгаж эхэлсэн байна.
Өнгөрсөн долоо хоногт ОХУ-ын ерөнхийлөгч Владимир Путин цэргийн хэсэгчилсэн дайчилгаа зарласан нь тус улсын нийгмийг цочроосон үйл явдал байв.
Дайчилгаанаас зугтсан иргэд гадаад руу дүрвэх, эсэргүүцлийн жагсаал цуглаан зохион байгуулах зэрэг элдэв арга сэдэж байна.
Путиний гэнэтийн мэдэгдлийн дараа Орос орон даяар хамгийн цөөндөө 20 цэрэг татлагын байрыг галдан шатаасан хэрэг гарсныг зарим хэвлэлүүд мэдээлжээ.
Эх сурвалж: The Moscow Times