Афганистан дахь “Шийдвэртэй дэмжлэг” ажиллагаанд оролцсон долдугаар ээлжийн энхийг сахиулагчид шинэ оны босгон дээр эх орондоо иржээ. Тэднийг Монгол Улсын Зэвсэгт хүчний бие бүрэлдэхүүний төлөөлөл болон АНУ-аас Монгол Улсад суугаад ЭСЯ-ны хэргийг түр хамаарагч Мануэл П.Микаллер угтан авч баяр хүргэжээ. Афганистан Улсад явуулж буй НАТО болон Эвслийн цэргийн хүчний II шатны ажиллагаа буюу “Шийдвэртэй дэмжлэг” ажиллагаанд Монгол Улсын цэргийн багийн бүрэлдэхүүн 2015 оны нэгдүгээр сарын 01-ний өдрөөс эхлэн үүргээ амжилттай биелүүлж байгаа юм. Өнгөрсөн 16 жилийн хугацаанд Монгол Улс НАТО болон олон улсын энхийг сахиулах дэмжих ажиллагаануудад нийт 16 мянга гаруй албан хаагчаа оролцуулжээ.
