Өчигдөр өдрөөс баруун аймгуудын нутгаар цаг агаарын байдал тогтворгүй болж, сэрүүсч эхэллээ. Баян-Өлгий аймагт нойтон цас орж, Ховд, Говь-Алтай, Баянхонгор аймгийн нутгаар салхины хурд ширүүсчээ.
Харин өнөөдрийн байдлаар Архангай аймгийн зүүн, Өвөрхангайн хойд хэсэг, Улаанбаатар хот орчимд нойтон цастай байна. Мөн Булган, Сэлэнгэ, Төв аймаг бороотой байна. Өнөө шөнөдөө газар тариалангийн бүс нутгаар 0-5 хэм цочир хүйтэрнэ гэдгийг Цаг уур орчны шинжилгээний газрын Урьдчилан мэдээлэх хэлтсийн дарга Оюунжаргал хэллээ.
Гэхдээ цаг агаарын тогтворгүй энэ байдал өнөө маргаашдаа л үргэлжилнэ. Харин “жинхэнэ” цочир хүйтрэл 24, 25-ны өдрүүдээс эхэлнэ гэдгийг тэрбээр хэлсэн юм.
Жил жилийн есдүгээр сард гэнэтийн цочир хүйтрэх үзэгдэл ажиглагддаг байна. Тиймээс малчид, тариаланчдыг шаардагдах арга хэмжээнүүдийг эртнээс авч, сэрэмжтэй байхыг анхаарууллаа.