Спорт сонирхогчдыг 2022 оны зургаадугаар сард ямар онцлох тэмцээн уралдаан, үйл явдлууд хүлээж байгааг танилцуулъя.
ТЕННИС
2022.05.22-06.05. Талбайн теннисийн дөрвөн их дуулгын нэг 126 дахь удаагийн Францын нээлттэй тэмцээн буюу “Roland-Garros” тавдугаар сарын 22-нд эхэлсэн.
Шороон талбайд болдгоороо онцлог 2021 оны Roland-Garros-н эрэгтэй төрөлд Сербийн Новак Жокович, эмэгтэй төрөлд Чехийн Барбора Кречикова түрүүлсэн юм.
Испанийн Рафаэл Надаль тус тэмцээнд хамгийн олон удаа буюу 13 удаа түрүүлсэн амжилттай. Тэмцээнийг SPS телевиз шууд дамжуулж буй.
ЖҮДО
2022.06.03-05. Жүдо бөхийн дэлхийн цуврал тэмцээн Тбилисигийн их дуулгад 38 орны 285 тамирчин бүртгүүлээд байна.
2022.06.24-26. Жүдо бөхийн дэлхийн цуврал тэмцээн Улаанбаатарын их дуулга тэмцээн Монгол Улсад болно. Уг тэмцээн нь Парис-2024 олимпын оноо олгож эхлэх тул дэлхийн шилдгүүд цугларах юм.
АЗИЙН ЦОМЫН ТЭМЦЭЭНИЙ УРЬДЧИЛСАН ШАТ
Монголын шишээ багийн ахлах дасгалжуулагч Оцүка Ичиро болон зөвлөх дасгалжуулагч Алан Жиллет
2022.06.08-14. Азийн хөл бөмбөгийн холбооноос зохиодог Азийн цомын тэмцээний урьдчилсан шатны тоглолтууд зургаадугаар сарын 8-д эхэлнэ. Урьдчилсан шатны B хэсэгт Палестин, Филиппин, Йемен улсуудтай нэг хэсэгт багтсан Монголын шигшээ баг гурван тоглолтыг хийх юм.
Урьдчилсан шатны тоглолтууд Монголд болох бөгөөд 06.08-ны 17:00 цагт Палестинтай, 06.11-ний 12:30 цагт Филиппинтэй, 06.14-ний 17:00 цагт Йемений шигшээ багтай тус тус тоглоно.
Хэсгээ тэргүүлсэн баг 2023 оны Азийн цомын тэмцээнд оролцох эрхээ шууд авах бол хоёрт орсон багуудаас хамгийн өндөр оноотой 5 нь Азийн цомд оролцох боломжтой болно.
ЧӨЛӨӨТ БӨХ
2022.06.02-05. Чөлөөт бөхийн чансааны оноо олгох оны хоёр дахь тэмцээн “Болат Турлихановын цом” Казахстан улсын Алматы хотод болно.
2022.06.22-25. Чөлөөт бөхийн чансааны оноо олгох оны гурав дахь тэмцээн “Маттео Пелликоне”-ийн нэрэмжит тэмцээн Италийн Ром хотод болно.
NBA ФИНАЛ
2022.06.03. NBA-ийн финалын тоглолтууд зургаадугаар сарын 03-ны 09:00 цагаас эхэлнэ. Play-off-ын финалд Голден Стейт Уорриорс болон Бостон Селтик багууд шалгарсан бөгөөд долоон тоглолт гарвал зургаадугаар сарын 20-д дуусна.
FORMULA 1
-170128-1622413157.jpeg)
2022.06.10-12. Formula 1-ийн 72 дахь улирлын найм дахь гараа буюу Азербайжаны Гран-При тэмцээн Азербайжаны нийслэл Баку хотод байрлах “Baku City Circuit” зам дээр болно. 6.003 км урттай, 51 удаа тойрогтой зам дээр 10 багийн 20 нисгэгч хурд сорино.
2021 оны тус гараанд “Red Bull” багийн Сержио Перез түрүүлж “Aston Martin” багийн Себастиан Веттел аман хүзүүдэж байв.
2022.06.17-19. Formula 1-ийн 72 дахь улирлын ес дэх гараа буюу Канадын Гран-При тэмцээн Канадын Монреаль хотод байрлах “Circuit Gilles-Villeneuve” зам дээр болно. 4.361 км урттай, 70 удаа тойрогтой зам дээр 10 багийн 20 нисгэгч хурд сорино.
2019 оны тус гараанд “Mercedes” багийн Льюис Хэмилтон түрүүлж “Aston Martin” багийн Себастиан Веттел аман хүзүүдэж байв.
ХОЛИМОГ ТУЛААН БА Д.БАТГЭРЭЛ
2022.06.12. Холимог тулааны дэлхийн хамгийн том холбоо UFC-ийн Light heavyweight жингийн аваргын бүсийн төлөөх тулаан Гловер Тейшера, Жири Прочазка нарын хооронд болно.
Тулаан “UFC 275”-ийн үеэр болох бөгөөд эмэгтэйчүүдийн flyweight жингийн аваргын бүсийн төлөө Валентина Шевченко, Тайла Сантос нарын тулаан хоёр дахь оргил тулаан нь байх юм.
UFC 275-ын main card буюу гол тулаануудын нэгд Д.Батгэрэл багтсан бөгөөд тэрээр зургаа дахь тулаанаа Өмнөд Солонгосын тулаанч Кьюн Хо Кантай хийнэ.
Кьюн Хо Кан нь UFC 275-д Саймон Оливейратай тулалдах байсан ч цуцлагдаж Монголын тулаанчтай учраа таарчээ. 34 настай туршлагатай тулаанч хамгийн сүүлд 2021 оны арваннэгдүгээр сард Бразилын Рани Яахад ялагдсан.
Харин Д.Батгэрэлийн хувьд өнгөрсөн гуравдугаар сард АНУ-ын Крис Гутерезт ялагдаад буй. Хоёр тулаанч хоёул Брэндон Дэвис, Гуидо Каннетти нарыг ялсан удаатай.
CSGO
2022.06.15-19. CSGO тоглоомын “Blast Premier: Spring Finals 2022” тэмцээн зургаадугаар сарын 15-д эхэлнэ. OG, Natus Vincere, Faze Clan, ENCE зэрэг дэлхийн томоохон багууд оролцох тэмцээний ялагч нь 200 мянган ам.долларын шагнал авах бөгөөд оны төгсгөлд болох World Final-д оролцох эрхтэй болно.
ГОЛЬФ
2022.06.16-19. Мэргэжлийн гольфын дөрвөн том тэмцээний нэг АНУ-ын нээлттэй тэмцээн зургаадугаар сарын 16-д эхэлнэ. 122 дахь удаагийн АНУ-ын нээлттэй тэмцээн Массачусетс мужийн Брүүклайнд болно. 12 сая ам.долларын шагналын сантай тэмцээнд одоогоор 156 тамирчин оролцох тооцоотой байна.
ТЕННИС
2022.06.27-07.10. Талбайн теннисийн дөрвөн их дуулгын нэг 135 дахь удаагийн “Wimbledon” зургаадугаар сарын сүүлээр эхэлнэ.
Английн зүлэгтэй талбайд болдог тэмцээнд Швейцарын Рожер Федерер хамгийн олон буюу 8 удаа түрүүлсэн бол 2021 оны тэмцээнд Новак Жокович түрүүлсэн.