ОХУ-аас Монгол Улсад суугаа Элчин сайд И.К.Азизов оноос өмнө нутаг буцахаар болсныг эх сурвалж батлав.
Тэрбээр 2013 оны есдүгээр сарын 23-наас Монгол Улсад суух ОХУ-ын Онц бөгөөд Бүрэн эрхт Элчин сайдаар томилогдон ирж, одоог хүртэл ажиллаж байна.
Өнгөрсөн гуравдугаар сард ОХУ-ын Элчин сайдын яам албан ёсны фэйсбүүк хуудсаар “Монголын Ардчилсан Намын гишүүд болон АНУ-ын либерал ноёрхлыг дэмжигчдийн анхааралд” гэсэн пост нийтлэгдэж иргэдийн шүүмжлэлийг дагуулж байв. Уг асуудлаар Гадаад Харилцааны сайд Б.Батцэцэг Элчин сайд И.К.Азизовыг дуудаж уулзан, учир байдлыг тайлбарлуулан иргэдийг бухимдуулах асуудал үүсгэснийг өөрт нь анхааруулсан үйл явдал болсон.
Түүнчлэн ГХ-ны сайд Б.Батцэцэг ОХУ-ын гадаад хэргийн сайд Сергей Лавровтой уулзаж, Элчин сайдын асуудлаар санал гомдлоо хэлсэн удаатай байна.