Засгийн газар цар тахлын үед айл өрх, аж ахуйн нэгжүүдийн цахилгаан дулааныг тэглэснээс хойш жилийн хугацаа өнгөрч байна. Уг хөнгөлөлт энэ оны арванхоёрдугаар сарын 31-нд дуусгавар болж байгаа юм. Тэгвэл ирэх оноос дахин цахилгаан, дулааны төлбөрийг долдугаар сар хүртэл хойшлуулахаар болсныг Шадар сайд С.Амарсайхан мэдэгдсэн.
Энэ талаар Эрчим хүчний яамны өгч буй мэдээллээр одоогоор албан ёсны шийдвэр гараагүй байгаа гэв. Энэ тухай салбарын сайд Н.Тавинбэх хэлэхдээ “Засгийн газар өнгөрсөн оны арванхоёрдугаар сарын 1-нээс энэ оны арванхоёрдугаар сарын 31 хүртэл есөн төрлийн хэрэглэгчийн цахилгаан дулааны эрчим хүчний үнийг чөлөөлсөн. Өнөөдрийн байдлаар тогтоолыг албан ёсоор сунгаагүй. Энэ талаарх эцсийн шийдвэр гараагүй” гэлээ.
“Эрдэнэт” үйлдвэр ТӨҮГ-аас аж ахуйн нэгжийн тог цахилгаанын төлбөрт 800 орчим тэрбум төгрөгийг зарцуулжээ. Хэрэв ирэх оны нэгдүгээр сарын 1-нээс зөвхөн айл өрхийн 250-350кв цахилгааныг хөнгөлбөл 75 орчим тэрбум төгрөгийг “Эрдэнэт” үйлдвэр хариуцна гэдгийг Шадар сайд өмнө нь мэдэгдсэн билээ.