Дэлхий даяар зорчих хязгаарлалтыг зөөлрүүлсээр байгаатай холбоотойгоор энэ оны эхний улиралд олон улсын жуулчдын тоо өмнөх оны мөн үеэс ойролцоогоор гурав дахин нэмэгдсэн байна.
Испанийн Мадрид хотод төвтэй Дэлхийн Аялал жуулчлалын байгууллагын /ДАЖБ/ мэдээлснээр, энэ оны эхний улирлын гурван сарын хугацаанд 117 сая жуулчин гадаадад аялсан нь өнгөрсөн оны мөн үеийн 41 саяас 182 хувиар өсжээ.
Энэ үзүүлэлт нь цар тахлын өмнөх 2019 оны эхний улирлынхаас 61 хувиар бага дүн юм.
Гэсэн хэдий ч ДАЖБ-аас хэлэхдээ, “хязгаарлалтууд буурч, итгэл сэргэж байгаа тул аялал жуулчлал маш хурдтай сэргэсээр байна. Энэ оны эхний улиралд нэмэгдсэн 76 сая жуулчны 47 сая орчим нь зөвхөн гуравдугаар сард аялсан нь сэргэлтийн хурд улам бүр нэмэгдэж байгааг харуулж байна” гэв.
Өсөлт нь ялангуяа Европ тивд тод ажиглагдаж байгаа ба Европын орнууд 2021 онтой харьцуулахад бараг дөрөв дахин олон хүн хүлээн авч байгаа нь 280 хувиар өссөн үзүүлэлт болсон байна.