Улсын нэгдүгээр төв эмнэлгийн элэг шилжүүлэн суулгах мэс заслын эмч нар 48 дахь хагалгаагаа өнөөдөр амжилттай дуусгажээ. Амьд донороос элэг шилжүүлэн суулгах 48-дах удаагийн тус хагалгаа дөрвөн настай хүүд хийгдсэн байна. Ш.Энхтөр даргатай Эх нялхсын хамт олон эмчилгээ, сувилгаанд хамтран ажилласан аж. Ийнхүү тус эмнэлэгт он гарснаас хойш хийгдсэн дөрөв дэх удаагийн элэг шилжүүлэн суулгасан хагалгаа болж буй юм.
Улсын нэгдүгээр төв эмнэлэг нь БНСУ-ын Асан төвийн элэг шилжүүлэн суулгах багтай хамтран ажиллаж, 2011 оны есдүгээр сард анх удаа амьд донороос элэг шилжүүлэн суулгах мэс заслыг амжилттай хийж гүйцэтгэж байсан аж. Манай улс элэг шилжүүлэн суулгах мэс заслыг 85 сая төгрөгийн өртөгтэйгөөр хийж ирсэн. Жилд дунджаар 30 орчим хүн санхүүгийн болон донорын хүртээмжгүй байдлаас болж мэс засалд орж чадахгүй байжээ. Харин элэг бөөр шилжүүлэн суулгах зардлыг төр хариуцдаг болсноор иргэдийн нуруунаас нэг ачааг авч, төр иргэдийнхээ эрүүл мэндэд анхаарч байгаагийн нэг илрэл болохыг эмч нар онцолсон аж.