Онон-Балжийн аялал жуулчлалын бүс Битүүгийн ар гэдэг газраас 11 дүгээр сард өөрөө идэш тэжээлээ олж идэх, өвөлжих боломжгүй, 4 хөл нь хөлдсөн байдалтай олдсон хүрэн баавгайг Хамгаалалтын захиргаа нь зориулалтын торонд байршуулан өвөлжүүлж байгаа тухай БОАЖЯамнаас мэдээллээ.
Баавгайг хооллон өвөлжүүлэх, байрыг дулаалах ажлыг хариуцах ажлын хэсэг байгуулж орчны бүсийн иргэдэд баавгайн талаарх мэдээллийг хүргэн хоол хүнс хандивлах уриалга гаргаж, эрүүл мэндийн ажиглалт хийж, дэвтэр хөтөлж байгаа аж.
Тус ажиглалтаар баавгай нь 1 өдөрт 3 кг мах, 2 л ус, 200 гр жимс, хүнсний ногоо буюу нийтдээ 7 хоногт 21 кг мах, 14 л ус, 1,4 кг жимс, хүнсний ногоо хэрэглэж, эрүүл мэнд, зан төрхийн хувьд хоолоо тогтмол идэж, хэвийн байна гэж мэдээллээ.