Өнөөдөр Баянгол дүүргийн 20-р хорооны нутаг дэвсгэрт байрлах “ДЦС-4” ТӨХК-ийн хашаанд байрлах 3ТИ трансформаторт гал гарсныг Нийслэлийн онцгой байдлын газрын гал унтраах ангийн бие бүрэлдэхүүн бүрэн унтраалаа. Галын дуудлага Нийслэлийн онцгой байдлын шуурхай албаны утсанд 12:22 цагт ирсэн байна. Энэхүү дуудлагыг гал түймэр унтраах, аврах 10, 18, 14, 26, 30 дугаар ангийн бүрэлдэхүүн нийт зургаан автомашин, 80 хүний бүрэлдэхүүнтэй ажиллаж 12:50 цагт галыг бүрэн унтраажээ.
Одоогоор Дулааны дөрөвдүгээр цахилгаан станц хэвийн үйл ажиллагаандаа шилжин ажиллаж эхэлсэн байна. Албаныхны мэдээлж буйгаар, 3ТИ трансформаторт гэмтэл гарч, засварлан шалгаж байх явцад буудаж гал гарсан хэмээн мэдээлэл өглөө. Биднийг сурвалжлага бэлдэхээр тус станцад гал гарснаас хойш 1 цаг 30 минутын дараа очиход гал бүрэн унтарсан, ямар нэгэн саарал утаа суунаглахгүй байв.
Хэвлэлийнхнийг дотогш нэгдсэн журмаар оруулан сурвалжлуулсан юм. Гал гарсан трансформатор орчимд очиход цагдаагийн байгууллагынхан хэргийн газрын үзлэг хийхээр ирсэн байлаа. Ган төмөр хийц бүхий 3ТИ трансформаторт ямар нэгэн үйл ажиллагаа явуулаагүй гэмтэл гарсан, засварын ажил эхлээгүй тоггүй байхад гал гарсан хэмээн ДЦС-4-ынхан хэлэв. Өвлийн улирал эхэлж байхад ийнхүү дулааны станцад гал гарсан нь ачаалалд бага зэрэг нөлөөлөх ажээ.
Мөн энэ асуудлыг Засгийн газрын хуралдаанд яаралтай горимоор оруулан хэлэлцсэн бөгөөд урьдчилсан байдлаар дөрвөн тэрбум төгрөгийн хохирол амсаад байгаа гэсэн мэдээлэл байна.