Монголын Мэргэжлийн Спорт Автомашины Холбооноос 09 сарын 19-ны өдөр зохион байгуулсан “Mongolian Drift Series Championship 2015” дрифтийн улсын аварга шалгаруулах тэмцээн Скайрезортын төв талбайд амжилттай зохион байгууллагдаж өндөрлөлөө.
Улсын аваргын тэмцээнд Мэргэжлийн төвшин болон сонирхогчдын төвшнөөс гарч ирсэн нийт 36 тамирчид олон улсын дүрэм, шүүлтийн дагуу өрсөлдсөнөөс тэргүүн байранд Д.Азбаяр /Toyota Mark II – 008 хувийн дугаартай/ орж Улсын аваргаар шалгаран шилжин явах цом, Тоyota Mark II Tourer S загварын автомашины эзэн болсон бол 2-р байранд Э.Мөнх-Эрдэнэ /Nissan Silvia S15 – 050 хувийн дугаартай/, 3-р байранд П.Ганболд /Toyota Mark II – 005 хувийн дугаартай/, тусгай байранд тамирчин Т.Бат-Очир /Mazda RX8 – 021 хувийн дугаартай/ нар тус тус орж ивээн тэтгэгч байгууллагуудын шагнал, гарын бэлгээр шагнуулсан юм.
Тус тэмцээний онцлог нь урьд өмнөх тэмцээнүүдэд байгаагүй том талбайтай замаар өрсөлдсөн ба тэмцээний зохион байгуулалт аюулгүй байдлыг дээд зэргээр хангаж олон улсын стандарт дүрэм, шүүлтийн дагуу шүүн анх удаа автомашинаар шагнасан зэрэг дрифтийн спортын хөгжилд дэвшил болсон тэмцээн боллоо.
Дашрамд дурьдахад ММСАМХолбоо тэмцээнээс олсон бүх орлого болох 8-н сая гаран төгрөгийг төрөлхийн сонсголгүй А.Мандуул хэмээх 3 настай бяцхан хүүд сонсгол бэлэглэх эмчилгээний зардал болгон хандивласан бол “АПУ Трэйдинг” компани хүүхдийн Маамуу брэндийн гарын бэлэг, “Хобби центэр”-ийн хамт олон удирдлагатай RC машин бэлэглэсэн юм.