АНУ-ын Ерөнхийлөгч асан Дональд Трамп технологийн томоохон компаниуд болох Фэйсбүүк, Твиттер, Гүүглийн эсрэг шүүхэд нэхэмжлэх гаргахаа мэдэгдлээ. Тэрбээр America First Policy Institute байгууллагатай нэгдэж хамтарсан нэхэмжлэх гаргахаа Нью-Жерсид хийлгэсэн хэвлэлийн бага хурлынхаа үеэр мэдээлсэн юм.
Америкийн экс Ерөнхийлөгч олон нийтийн сүлжээнүүдийн үйл ажиллагааг нэн даруй зогсоохыг, Америкийн ард түмэнд ичгүүртэйгээр хууль бусаар цензур тогтоож байгааг эцэс болгохыг шаардаж байгаагаа илэрхийлсэн юм. Тэрбээр мөн технологийн томоохон энэ компаниудад торгууль оноох шаардлагатай гэж үзэж байгаагаа мэдэгдээд дээрх компаниудтай зөвшилцлийн гэрээ байгуулахгүй, эцсээ хүртэл явах болно гэдгээ баталсан байна.
Өнгөрсөн нэгдүгээр сарын 6-ны өдөр Вашингтоны Капитол хилл рүү Трампыг дэмжигчид халдан дайрч Ерөнхийлөгчийн сонгуулийн үр дүнг Конгрессоор баталгаажуулахад саад учруулахыг чармайсан хэрэг гарсан билээ. Үүний дараа Ерөнхийлөгч Трампын Фэйсбүүк, Твиттер, Инстаграмм зэрэг олон нийтийн сүлжээн дэх хаягуудыг нь хаах шийдвэрийг дээрх компаниуд гаргасан юм. Тухайн үед Дональд Трампын Твиттер дэх дагагчдын тоо 89 сая, Фэйсбүүк дэх дагагчдынх нь тоо 35 саяд хүрсэн байсан юм.
Мөн Инстаграм дахь түүний хаягийг 24 сая хэрэглэгч дагадаг байсан юм. Тиймээс Ерөнхийлөгч асан Трамп олон сая дэмжигчдээс нь салгасан олон нийтийн сүлжээ эрхлэгч компаниудтай шүүхээр заргалдахаар төлөвлөөд байна.