Ерөнхийлөгчийн сонгуулийн хоёр дахь санал хураалт энэ сарын 7-ны өдөр болохоор товлогдсон. Үүнтэй холбогдуулан Сонгуулийн ерөнхий хорооноос Ерөнхийлөгчийн сонгуулийн саналын хуудас, санал тоолох төхөөрөмжийг санал авах байранд хүргүүлэх ажлыг төлөвлөгөө, хуваарийн дагуу эхлүүлсэн бөгөөд нэн түрүүнд гадаадад байгаа сонгогчдын саналын хуудсыг хүргүүлжээ. Алслагдсан аймгуудын саналын хуудсыг хүргүүлэх ажлыг ч мөн хийжээ. Саналын хуудсанд хоёр нэр дэвшигчийн цээж зураг болон сонгох тэмдэглэгээ байна. СЕХ-ноос өнөөдөр баруун таван аймгийн саналын хуудсыг тухайн орон нутаг руу илгээсэн ба маргаашнаас эхлэн зүүн аймгуудын саналын хуудсыг хүргүүлэх юм байна. Саналын хуудсыг долдугаар сарын 3-ны дотор бүх аймаг, сумдын санал авах байранд тагнуулын байгууллагын хяналт, цагдаагийн хамгаалалттайгаар хүргэнэ.