Монгол Улс ОУВС-гийн “Стэнд бай” хөтөлбөрт хамрагдах талаар яригдаж байгаа билээ. Энэ талаар гадны мэргэжилтнүүд манай улсад хоёр удаа ажиллаж үнэлэлт, дүгнэлтээ өгсөн. Одоо гурав дахь удаагаа ирэх гэж байна. Энэ үеэр эцсийн яриа хэлэлцээрийг хийх аж. Энэ талаар УИХ-ын гишүүн Д.Тогтохсүрэнээс тодруулахад, “ОУВС-гийн мөнгө ирэх сарын 10-д хавьцаа ороод ирэх байх. Гэхдээ энэ бол ерөнхий таамаг төдий зүйл. Өрөө төлж чадах, чадахгүй тухай их асууж байна. 2017 оны төсвийг батлахдаа 1.3 их наяд төгрөгийг зээл, зээлийн хүүгийн төлбөрт төлнө гээд тусгачихсан. Төсөвт тусгачихсан байна гэдэг төлнө гэсэн үг. Үүнд ямар нэгэн байдлаар эргэлзэх хэрэггүй.
2017 оны хувьд манай улсын эдийн засгийг бага ч болов дээшлүүлэх салбар нь уул уурхай. Өөр гарц алга. Зэсийн үнэ гайгүй нэмэгдэж байна. Бид төсвөө батлахдаа нэг тонн зэсийг 4800 ам.доллараар төлөвлөж байсан бол одоо өсөөд 5700 ам.доллар болчихсон байна. Нүүрс, төмрийн хүдрийн үнэ мөн бага зэрэг өсөж байгаа. Үүнийгээ түшиглээд эдийн засгийн нөхцөл байдалд бага ч болтугай амьсгаа авах сөхөө өгөх байх” гэлээ.