Өнөөдөр УИХ-ын үдээс өмнөх чуулганаар “Монголбанкинд хийсэн шалгалттай холбогдуулан авах арга хэмжээний тухай” УИХ-ын тогтоолын төслийг хэлэлцсэн билээ. Энэ үеэр Д.Тэрбишдагва гишүүн ийнхүү “зарга” хийсэн юм.
“Монгол банкны ерөнхийлөгчийн шийдвэр гаргах үйл ажиллагаанд хамтын удирдлагын зарчим нэвтрүүлэх, Монголбанкны засаглалын бүтэц, зохион байгуулалтыг олон улсын жишигт нийцүүлэх, хуулийн арга хэмжээ авахгүй бол Монголбанкны ерөнхийлөгч вант улсын эзэн шиг загнадаг юм билээ. Хууль эрх зүйн хувьд тэр хүн эрх мэдлээ ашигласан нэгдүгээрт, тийм эрхийг өөрт нь өгсөн юм билээ. Нөгөө талаасаа бол энэ өндөр албан тушаалд ажиллаж байгаа хүмүүс ёс зүйтэй байх ёстой. Ямар хууль зөрчиж байгаагаа ойлгосон байх учиртай. Гэтэл албан тушаалаа ашиглаад дураараа дургисан байгаа юм. Аж ахуйн нэгжүүдийг төрийн бодлогоор дэмжинэ гэдгийг манай намын гишүүд буруу гэж үзэхгүй байгаа юм. Хамгийн гол нь зээл авсан аж ахуйн нэгжүүд нь төчнөөн ажлын байр бий болгож, татвар төллөө гэсэн бол өөр асуудал. Гэтэл мөнгийг нь аваад, арилжааны банкинд хадгалаад, мөнгө угаах процесс явуулж байгаа нь ёс зүйгүй байтугай том гэмт хэрэг. Ийм мэтийг ялгаж үзэхгүйгээр аж ахуйн нэгж рүү дайраад байгаа мэтээр зарим хүмүүс ойлгоод байгаа юм. Аж ахуйн нэгжүүдийг төрийн бодлогоор дэмжээд, авсан хөнгөлөлттэй зээл олгож, татвар төлөөд, үр ашигтай байхыг бид эсэргүүцсэн юм байхгүй.