ЭМЯ-наас ээлжит мэдээллээ хийлээ. Мэдээллийн үеэр ХӨСҮТ-ийн захирал Д.Нямхүү, “2020 оны VII сарын 18-нд нийт 113 хүнд шинжилгээ хийхэд коронавирус илрээгүй. Афганистанаас иргэн 31 энхийг сахиулагчийн давтан шинжилгээ, Алтанбулагийн боомтоор орж ирсэн ачаа тээврийн 38 жолоочийн шинжилгээ, ХӨСҮТ-д тусгаарлагдсан 13 хүний давтан шинжилгээ, Дорноговь аймгийн Замын-Үүд суманд тусгаарлагдсан 31 хүний шинжилгээ бүгд сөрөг гарлаа.
Өнөөдөр хоёр хүн ХӨСҮТ-ээс эдгэрч гарлаа. 26 настай эрэгтэй 26 хоног эмчлэгдээд гарч байгаа бол 24 настай эмэгтэй 20 хоног эмчлүүлээд дараагийн шатны сувилалд шилжлээ. Мөн гэрийн тусгаарлалтад байсан эх өнөөдөр ХӨСҮТ-д ирж, эсэн мэнд амаржлаа. Одоогоор ХӨСҮТ-д эмчлэгдэж байгаа 74 хүнээс 62 хүний биеийн байдал хөнгөн, 12-ийх нь биеийн байдал хүндэвтэр байна. Эмчилгээнд мөн нэг жирэмсэн эмэгтэй байгаа” гэв.