УИХ-ын ээлжит бус чуулганы өнгөрсөн баасан гаригийн үдээс өмнөх хуралдааны үеэр УИХ-ын гишүүн, Хууль зүй, дотоод хэргийн сайд Ц.Нямдорж хэд хэдэн гишүүдийг нэр цохон шүүмжилсэн билээ. Тэрээр хэлсэн үгэндээ “Ганцхан удаа сонгогдчихоод Ерөнхий сайд болчихдог, бараг сонгогдоогүй байж сайд болчихдог атлаа улс орны амин чухал асуудал болон Үндсэн хуулийн нэмэлт, өөрчлөлт хэлэлцэж байхад яагаад ирдэггүй юм бэ. Ж.Эрдэнэбат нэг удаа сонгогдоод Ерөнхий сайд болсон. Хоёр Н.Номтойбаяр ганц удаа сонгогдоод сайд болсон. Энэ О.Содбилэг хааччихсан юм. Аав, ээж нь, өөрөө УИХ-ын гишүүн болсон. Монголын төр, МАН хоёр энэ гэр бүлд чадах чинээгээрээ тусалж, дэмжиж явсан. Энэ залуучууд албан тушаал болохоор би гээд давхидаг. Ард түмний эрх ашгийн асуудал ярихад яагаад алга болчихдог юм бэ. Зарим нь бүтэн гурван жил унтлаа, болоо юм биш үү. Д.Ганболд гишүүн Үндсэн хууль хэлэлцэнэ гэж мэдсээр байж гадагшаа явсан гэнэ. Энэ этгээдүүдээс ичиж байна. Хүмний өмнөөс ичих шиг адгийн юм байдаггүй юм байна. МАН-ын парламент ийм сахилга батгүй байсныг өнгөрсөн 30 жилийн хугацаанд үзээгүй” гэсэн юм.
Үүнтэй холбоотойгоор ямар шалтгааны улмаас чуулганы хуралдаандаа суулгүйгээр гадагшаа явсан талаар нь УИХ-ын гишүүн Д.Ганболдоос тодрууллаа.
-Таныг Үндсэн хууль хэлэлцэж байгааг мэдсээр байж гадагшаа явчихлаа гэж шүүмжилсэн. Та ямар шалтгааны улмаас чуулганы хуралдаандаа суулгүйгээр гадагшаа явсан юм бэ?
-Хэнд ч, ямар ч хүнд зовлон, жаргал тохиолдож болно шүү дээ. Ямар нэгэн шалтгаан байсан учраас л ном журмын дагуу чөлөө аваад явсан, ирсэн.
-Та одоо Үндсэн хуулийн нэмэлт, өөрчлөлтийг дэмжиж, санал хураалтуудад идэвхтэй оролцож байгаа юу?
-Тэгэлгүй яахав. Ер нь хэлэлцэнэ, хэлэлцэхгүй гэх асуудал энэ зунжингаа л үргэлжилсэн биз дээ.
Би эмчид яаралтай үзүүлэхээр цаг авчихсан байсан юм. Товлосон цаг хугацаандаа үзүүлэхээр л гадагшаа явсан хэрэг. Нэг өдөр явчихаад л хүрээд ирсэн юм.
-Таны хувьд Үндсэн хуулийн нэмэлт, өөрчлөлтийн ямар зохицуулалтыг илүүтэй дэмжиж байгаа вэ?
-Нэн тэргүүнд төрийн тогтолцооны асуудал. Мерит буюу чадавхаар нь сонгож төрд ажиллуулдаг зарчим ус, агаар мэт хэрэгтэй байна. Улсын үндэс төр. Төрөө ард түмэн эмхлэн зохион байгуулдаг.
Харин ард түмнийхээ өмнөөс төрийн тогтолцоо нь ард түмэндээ үйлчлэх ёстой. Гэтэл тэр нь өнөөдөр ганхчихсан. Ямар ч улс төрч гарч ирсэн бай ах, дүү амраг садангаа албан тушаалд тавьчихдаг. Энэ байж боломгүй зүйл. Үүнийг зохицуулах заалтыг Үндсэн хуульдаа онцгойлон зааж өгч байж бид улс шиг улс, төр шиг төр байна.