УИХ-ын ээлжит бус чуулганы үдээс хойших хуралдаан өндөрлөлөө. Өнөөдрийн чуулганы хуралдаанаар Монгол Улсын 2016 оны төсвийн тухай хуульд нэмэлт, өөрчлөлт оруулах тухай, Хүний хөгжил сангийн 2016 оны төсвийн тухай хуульд өөрчлөлт оруулах тухай, Нийгмийн даатгалын сангийн 2016 оны төсвийн тухай хуульд өөрчлөлт оруулах тухай хуулийн төслүүдийн нэг дэх хэлэлцүүлгийг хийгээд дараагийн хэлэлцүүлэгт бэлтгүүлэхээр боллоо.
Чуулганы нэгдсэн хуралдаанаар УИХ-ын гишүүд Нийгмийн даатгалын шимтгэлийг 2,5 хувиар нэмж 12,5 хувь болгох шийдвэрийг эсэргүүцэж байсан юм. Мөн заавал хийх шаардлагагүй хойшлуулж болох зарим асуудалд хөрөнгө төсөвлөж оруулж ирсэн гэж шүүмжилж байлаа.
Чуулганы хуралдааны төгсгөлд УИХ-ын дарга М.Энхболд Засгийн газрын ирүүлсэн 51 хууль, тогтоолын төслийг татах саналыг танилцуулаад хуралдааныг өндөрлүүллээ.