“Найрсаг Улаанбаатар” хөтөлбөрийн хүрээнд нийслэлийн Засаг даргын Тамгын газар, нийслэлийн Соёл урлагийн газар, ДБЭТ хамтран зохион байгуулж байгаа “Бэст оф Классикс” сонгодог үдшийн цэнгүүний тайз заслын ажлыг хийхтэй холбогдуулан Чингисийн талбайн зүүн талын замын хөдөлгөөнийг түр хугацаагаар буюу 2016 оны 06 дугаар сарын 30-наас 07 сарын 03 өдөр хүртэл хаахаар болжээ.
Тодруулбал, өнөө өглөөний 06.00 цагаас долдугаар сарын 2-ны 00.00 цаг хүртэл Соёлын төв өргөөний баруун уулзвараас урагш “Централ тауэр”-ын баруун урд уулзвар хүртэл хөдөлгөөнийг хаалаа. “Найрсаг Улаанбаатар” хөтөлбөрийн хүрээнд Дэлхийн болон Монголын сонгодог урлагийн сор болсон бүтээлүүдийг дээжлэн хүргэдэг “Бэст оф Классикс” сонгодог урлагийн үдшийн цэнгүүн 07 сарын 02-ны өдөр буюу бямба гарагт 21:00 цагаас Чингисийн талбайд болно.
Цэнгүүнд Ж.Бизе “Кармен”, П.Чайковский “Нойрссон гүнж”, “Хунт нуур” Ж.Чулуун “Уран хас”, Д.Лувсаншарав “Шивээ Хиагт” Б.Шарав “Чингис Хаан” гэх мэт шилдэг бүтээлийн дээжээс тоглох юм. Тасалбарыг Улсын Дуурь Бүжгийн Эрдмийн Театрын кассаар борлуулна.