Category: соёл-урлаг

“2016 оны шилдэг кино шалгаруулах IMAX AWARDS-ыг ирэх дөрөвдүгээр сарын сүүлээр зохион байгуулахаар болоод байна. Энэ арга хэмжээнд зориулан нэгдүгээр сарын 1-ний өдрөөс хоёрдугаар сарын 1-ний өдрийг дуустал цомын загвар зохиох уралдаан зохион байгуулжээ. Нийт арав гаруй бүтээл ирснээс “Эрдэнэт үйлдвэр”-ийн Инженерийн зураг төслийн төвийн зохион бүтээгч, инженер А.Соджаргалын бүтээл шалгарчээ.

IMAX AWARDS-ын талаар товч мэдээлэл өгөхөд 2016 онд Монгол улсад нийт 47 кино албан ёсоор нээлтээ хийсэн байна. Эдгээр шилдгүүдээс 25 киног шалгаруулан авч, түүнээс шилдэг 16-г шалгаруулахаар тов гарсан. Санал асуулгыг www.urgoo.mn гэсэн сайтаар ороход гарч ирэх пэйжээр дамжуулан 21 хоногийн турш авах аж. Олон нийтийн санал асуулга тун чухал байдаг тул үзэгч та бүхэн идэвхитэй оролцоорой хэмээн IMAX-н хамт олон уриалж байна.

“Эрдэнэт үйлдвэр”-ийн Инженерийн зураг төслийн төвийн зохион бүтээгч, инженер А.Соджаргал ярихдаа, “Дүрс бичлэгийн дамартай хальс надад маш сонирхолтой санагдаж байсан тул Монгол тулга болгон ашигласан. Ер нь цомын порпорц, хэлбэр, донж, харьцаа зэргийг Оскарын цомын үндсэн харьцаатай нилээд тулгаж, гарган ирсэн.

Энэ цом маань тойргийг тав хуваасан шийдэлтэй байгаа. Дээшээ харагдаж буй хэсэг нь дэвжиж буй багана нь нэг талаар хүний дүрс мэт харагдах ч нөгөөтэйгүүр, киноны таван амин сүнсийг бэлгэдэж байна. Үүнд зохиолч, найруулагч, продюсер, жүжигчид, техникчид орно” гэлээ.

“IMAX AWARDS” ёслолын арга хэмжээ дараах номинацаар шилдгүүдээ шалгаруулах юм байна.

1. Шилдэг дууны найруулагч
2. Шилдэг дуу
3. Шилдэг хөгжим
4. Шилдэг туслах эмэгтэй дүр
5. Шилдэг туслах эрэгтэй дүр
6. Шилдэг зураглаач
7. Шилдэг зураач
8. Шилдэг зохиол
9. Шилдэг найруулагч
10. Шилдэг эмэгтэй гол дүр
11. Шилдэг эрэгтэй гол дүр
12. Шилдэг кино
13. Шилдэг дизайн
14. Залуу үед үлгэр дуурайлал үзүүлсэн бүтээл
15. Монгол өв соёлоо дээдэлсэн бүтээл туурвисан хамт олон

• Шилдэг нүүр будалт

Нээлтээ хийгээд хэдхэн хонож байгаа “Миний нууц” киног үзлээ. Нэрнээс нь харахад жүжигчин У.Уранчимэгийн тоглосон Хандмаагийн дүрд ямар нэг нууц байна гэж төсөөлөгдөнө. Кино эхлэхэд ялдамхан, намбатай, 40 гаруй насны компанийн захирлын эхнэр Хандмаа нөхрийнхөө ажил дээр урт цагаан даашинз дэрвүүлэн орж ирэхэд цэвэрлэгч бүсгүйчүүд атаархаж, жиг жуг хийцгээж байгаа нь харагдана. Хоёр цэвэрлэгчийн залуу нь жүжигчин А.Ганчимэг, харин нөгөөх нь жүжигчин Д.Ганцэцэг. Киноны турш буланд нуугдаад бувар бувар хийх хоёр хулгана шиг л хогийн шүүрээ барьж, энд тэнд зогссоор дууссан даа. Хажуугаар нь бяцхан хов хутгах гэж үзнэ. Гэхдээ гэм хоргүй юм даа.

За ингээд киноны гол үйл явдал руу оръё. Киноны гол баатар нь мэдээж Хандмаа түүний нөхөр Түшиг буюу Ц.Цэрэнболд хоёр. Тэд бие биендээ хайртай. Хэдий эхнэр нь нэг хүний биед хоёр янзын хүн орших сэтгэлзүйн хүнд өвчтэй болсон ч нөхөр нь эхнэрээ жаргалтай байлгахын төлөө бүхнийг хийнэ. Кино эхлэхэд нэг залууг хэдэн хүн хөөж буй дүр зураг гарна. Өнөөх залуу нь яг Хандмаагийн хувцас үзэж байсан дэлгүүр рүү орж таараад, түүний амыг нь даран “Дуугүй бай, тэгвэл чамайг яах ч үгүй” гэж хэлнэ. Ингэснээр Алтангинж хэмээх залуугийн баян хүүхнээс мөнгө салгах ажиллагаа эхэлнэ дээ.

Нэг удаа Хандмаа ердийнхөөрөө сайн эзэгтэйн дүрд хувилан хоёр хүүгийнхээ сагсны бэлтгэл дээр очиход нь Алтангинж араас нь хүрч ирэн тэвэрч авна. Эхлээд тэр огт танихгүй царайлдаг ч багынх нь дурсамжийг нь сануулсан нэгэн нэрийг сонсоод нэгэн биеийн нөгөө хүн нь сэргэж “Алтангинж минь чи юу, би мөнгөн гинж чинь байна” гэснээр тэд яг л залуу хосууд шиг гадуур эрх дураараа зугаална. Гэвч маргааш нь сэрээд л энгийн уйтгартай гэрийн эзэгтэйн дүрд шилжин бүхнийг мартаж орхино. Түүний ээдрээтэй амьдралын багын хөндүүр дурсамж нь юу болоод насан туршид нь мартагдахгүй дагах сэтгэгдэл үлдээснийг та киногоо үзээд мэдээрэй. Ямартай ч багын найз Алтангинж хэмээх анхны хайрынх нь эмгэнэлтэй түүх түүний сэтгэлийг хоёр хувааж, хоёр өөр хүнийг бий болгочихсон нь үнэн.

Эцэст нь Хандмаагийн өвчин хүндэрч, хүнд хэлбэрт шилжсэнээр өөрийгөө сахиусан тэнгэр гэж итгэн, анхны хайр Алтангинжээ сэтгэлдээ ургуулан дүрсэлсээр өндөр байшингийн оройгоос нисч байгаагаар кино төгсдөг.

Гэхдээ киноны тайлбарт ийм өвчтэй хүн Монголд байхгүй гэсэн. Байхгүй юмыг юунд байгаа юм шиг хийсэн юм бол доо. Сүүлийн үед Монголд үйлдэгдэж байгаагүй гэмт хэрэг элдвийн хүнд сэдвээр кино хийх боллоо гэж Цагдаагийн ажилтны ярьж байсан нь санаанд орлоо. Эхлээд үе үехэн нулимс дуслуулж сэтгэл гэгэлзүүлэн догдлуулж бас хөгжөөж байсан кино маань сүүлдээ сэтгэцийн хүнд өвчтөний ердийн л нэгэн түүх мэт санагдсан нь харамсалтай. “Хувьсал”-ын өмнөх кинонуудыг бодвол хийсвэрлэл нь хэтэрчихэв үү л гэж бодогдохоор. Драмын жүжигчид болохоор драмаа л тоглох ётсой юм болов уу даа. Уг нь өөр төрөлд хүч үзвэл үзэгчдэд илүү сонирхолтой байхсан. Өмнө нь ч “Зэрлэг цэцэгсийн хүлэмж” кинон дээрээ галзуу солиотой шахуу эмэгтэйн дүрд тоглосон. Энэ удаад ч Хандмаа хэмээх бүр солиорсон эмэгтэйн дүрд тоглолоо. Түүнд үүнээс өөр дүрийг найруулагч Д.Галбаяр зохиогоод өгчихөж чадаагүй юм байх даа.

Монголын эмэгтэйчүүдийн хамгийн том баяр “Март-8” удахгүй тохиох гэж байна. Хайртай хосуудын баяр өмнөх сард болоод өнгөрсөн. Түүний дараа Цагаан сарын баяр болж хотол түмнээрээ сайхан шинэллээ. Харин одоо охид, эмэгтэйчүүдээ баярлуулах цаг хаяанд иржээ эрчүүд минь. Энэ өдөр урлагийнхан маань ч сэтгэл харамгүй баярын тоглолтоо хийхээр төлөвлөсөн байна. Та бүхэн доорх тоглолтуудаас дуртайгаа үзэж сонирхоорой!

“ҮЗЭСГЭЛЭНТ МИНЬ” ТОГЛОЛТ 3 САРЫН 8-НД КОРПОРАЙТ КОНВЭЙШН ЦЭНТР-VIP ТОГЛОЛТ

МУГЖ Харанга хамтлагийн дуучин Лхагвасүрэнгийн “Үзэсгэлэнт минь” тоглолт зохион байгуулагдах юм байна. Тоглолтод урилгаар Хар сарнай хамтлагийн ахлагч Амараа, Номин талст хамтлагийн дуучин Дэлгэрмөрөн нар оролцоно. Сүүлийн үед хит болсон “Үзэсгэлэнт минь”,”Найз” “Толин хул” зэрэг дуунуудаа хүргэх болно.

Билетийн үнэ: 108.000 төгрөг

“ЭХ ҮРИЙН ДУУ” ТОГЛОЛТ 3 САРЫН 6-НД “МОНГОЛ БӨХИЙН ӨРГӨӨ”-НД

МУГЖ дуучин Энхзул, хүү Чинбаярын хамтарсан “Эх үрийн элбэрэл” тоглолт тав дахь жилдээ зохион байгуулагдана.

Билетийн үнэ: 20.000 төгрөг

“ҮРТЭЙ ХҮН ЖАРГАЛТАЙ” ТОГЛОЛТ 3 САРЫН 7, 8-НД “МОНГОЛ БӨХИЙН ӨРГӨӨ”-НД

Монгол бөхийн өргөөнөөс жил бүр уламжлал болгон зохион байгуулагддаг “Үртэй хүн жаргалтай” тоглолт 3 сарын 7, 8-нд 2 өдөр дараалан тоглогдоно. Тоглолтод МУГЖ Чулуунхүү, МУГЖ Ширмэнтуяа, МУСТА Эрдэнэтунгалаг, Төрмандах Гансувд, Батмэнд, Чулуунчимэг нар оролцоно.

Билетийн үнэ: 15.000 төгрөг, 20.000 төгрөг

“УЯНГА ШАГЛАА” ТОГЛОЛТ МУСТА ДУУЧИН БУРМАА 3 САРЫН 7, 8-НД “АСА ЦИРК”

МУСТА дуучин Бурмаа 3 сарын 7, 8-ны өдрүүдэд АСА Цирк-д тоглоно. “Туулын урсгал шөнөдөө сайхан”, “Дууны сайхан Юндэн”, “Усны тунгалаг тамир” зэрэг дуунуудаа хүргэхнээ.

Билетийн үнэ: 20.000 төгрөг

“МИНИЙ ЭЭЖ ХӨӨРХӨН” ТОГЛОЛТ 3 САРЫН 9-НД ГАНЦХАН УДАА “УБ ПАЛАС”-Т

Энэ бол Монголын ээжүүдийн үзэх дуртай № 1 тоглолт. Тоглолтод урилгаар АЖ Самбуу, МУГЖ Батсүх, Чулуунхүү, Батбаяр, Вандан Дуламсүрэн, Сийлэгмаа, Ганзориг, Банрагч, Мөнхбат, Жавхаасайхан Үүрийнтуяа, Төрмандах Гансувд зэрэг зохиолын шилдэг дуучид оролцох юм байна.

“Миний ээж хөөрхөн” тоглолтын онцлог нь хүрэлцэн ирсэн 3000 ээж сэтгэлээ нийлүүлэн дуулах тэр торгон агшинд Таны ижийн зураг дэлгэц дүүрэн гарч гэнэтийн бэлэг барина. Та хөөрхөн ижийтэйгээ авхуулсан зургаа UB palace-ын касс болон 1900-1905-ын хүргэлтийнхэнд хүлээлгэн өгөөрэй гэж зохион байгуулагчид хэлж байна.

Энэ мартын баяраар ижийтэйгээ цуг үзэх хамгийн сайхан тоглолт “Миний ээж хөөрхөн”.

Билeтийн үнэ: 13.900 төгрөг, 18.900 төгрөг

“САЙХАН МОНГОЛ БҮСГҮЙ” 3 САРЫН 7, 8-НЫ ӨДӨР “УБ ПАЛАС”

“Сайхан Монгол бүсгүй” нийтийн дууны тоглолт. Тоглолтод урилгаар МУГЖ Бат-эрдэнэ, МУСТА Чинболор, Чулуунбаатар, Батсайхан, Чулуунчимэг нар оролцох ба билетийг УБ паласын билетийн касснаас захиалах боломжтой.

Билетийн үнэ: 15.000 төгрөг

---

“ХАМАГ МОНГОЛЫН ИЖИЙ” ТОГЛОЛТ ГУРАВДУГААР САРЫН 8-НЫ ӨДӨР УДБЭТ-Т

Улсын дуурь, бүжгийн эрдмийн театрын гоцлол дуучид болох Гавьяат жүжигчин С.Мөнгөнцэцэг, СТА Ш.Наранчимэг, Б.Энхнаран нарын хамтарсан “Хамаг Монголын ижий” тоглолт гуравдугаар сарын 8-ны 18.00 цагаас тоглогдоно.

• Хаана: УДБЭТ
• Хэзээ: 2017.03.08
• Тасалбарын үнэ: 50.000

3 САРЫН 7-НЫ ҮДЭШ УЛААНБААТАР ЧУУЛГАД “ХАЙР” ТОГЛОЛТ

Нийслэлийн “Улаанбаатар” чуулгын гоцлол хөгжимчин, “Авьяаслаг монголчууд” шоуны шүүгч, МУСТА хийлч Ч.Дэлгэрцэцэг энэ сарын 7-ны үдэш чуулгын тайзнаа Монголын сайхан ээж нартаа зориулан “Хайр” тоглолтоо хийх гэж байна. Тус тоглолтыг Нийслэлийн Гэр бүл, хүүхэд залуучуудын хөгжлийн газартай хамтран хийж байгаа бөгөөд ихэвчлэн Хайлааст, Чингэлтэйн ээжүүдийг хамарч байгаа аж.

УЛСЫН ДРАМЫН ЭРДМИЙН ТЕАТРААС ГУРАВДУГААР САРЫГ 6, 7, 8-НЫ ӨДРҮҮДЭД У.ШЕКСПИР “РОМЕО ЖУЛЬЕТТА” ЖҮЖИГ

Улсын драмын эрдмийн театраас гуравдугаар сарыг сонгодог жүжгийн өдрүүд болгосон. Үзэгчдээ дэлхийн сонгодог бүтээлээр амьсгалах болсон театрын уран бүтээлчдийн тоглолтын салхийг У.Шекспир “Ромео Жульетта” жүжиг хагалах юм. Тодруулбал, Олон улсын эмэгтэйчүүдийн баярын өдрийг тохиолдуулан тус жүжгийг өнөөдрөөс эхлэн гурван өдөр тоглох юм байна. Харин энэ жүжгийн гол дүр болох үзэсгэлэнт Жульеттад шинэ жүжигчин тоглохоор болжээ.

У.ШЕКСПИР “РОМЕО ЖУЛЬЕТТА”

• III.6-ны 19.00, III.07, III.8-ны 14.00, 19.00 цагаас

МУГЖ Д.Энхзул сүүлийн жилүүдэд хүүтэйгээ хөтлөлцөн тайзыг чимэх болсон. Ээж хүү хоёр хамтран дуулж, хэд хэдэн удаа хамтдаа тоглолтоо хийж сонсогч түмнээ баярлуулсан.

Тэгвэл энэ удаад ээж хүү хоёр дахин хамтарсан тоглолтоо хийхээр бэлтгэл ажлаа базааж явна. Тэд удахгүй тохиох олон улсын эмэгтэйчүүдийн эрхийг хамгаалах өдөрт зориулан “Эх үрийн дуу” нэртэй тайлан тоглолтоо хийхээр болжээ.

Тоглолт Монгол бөхийн өргөөнд гуравдугаар сарын 6-ны 19:00 цагт болох юм байна. Тоглолтод дуучдын шалгармал болсон дуунууд эгшиглэх бөгөөд ээжүүд, эмэгтэйчүүд, охид бүсгүйчүүдийг хүрэлцэн ирж нэг үдшийг хамтдаа дуулж өнгөрүүлэхийг урьж байна.4

МУГЖ, Г.Ариунбаатар, УДБЭТ-ын дуучин, Э.Батжаргал нар “BBC” телевизээс хоёр жил тутамд зохион байгуулдаг дуурийн дуучдын алдарт “Cardiff Singer of the World” тэмцээний финалын шатанд шалгарчээ. Тэмцээний эцсийн шалгаруулалт ирэх зургаадугаар сарын 18-25-ны өдрүүдэд зохион байгуулагдах аж. Уг тэмцээн хоёр жилд нэг удаа Их Британийн Уэльсийн нийслэл Кардиффид зохион байгуулагддаг бөгөөд тухайн газрынхаа нэрээр ихэд алдаршсан олон улсын тэмцээн юм. Дашрамд дуулгахад МУГЖ Э.Амартүвшин 2015 онд тус тэмцээний эцсийн шатанд шалгарч, улмаар үзэгчдийн нэрэмжит шагналыг хүртэж байсан билээ.

Удахгүй Олон улсын эмэгтэйчүүдийн эрхийг хамгаалах өдөр тохионо. Эл өдөр МУГЖ, “Харанга” хамтлагийн дуучин Х.Лхагвасүрэн “Үзэсгэлэнт минь” тоглолтоо хийхээр тов зарлалаа.

Тоглолтод дуучин, Х.Лхагвасүрэнгийн олон уран бүтээл дуулагдах аж. Мөн тоглолтод урилгаар “Хар сарнай” хамтлагийн дуучин С.Амармандах, “Номинталст” хамтлагийн дуучин Т.Дэлгэрмөрөн нар оролцох аж.

“Үзэсгэлэнт минь” тоглолт энэ сарын 8-нд “Корпорэйт” зочид буудлын концертын танхимд болно.

Үндэсний өв уламжлал, түүх соёлоо дэлхийд түгээн дэлгэрүүлэх зорилготой Монгол кино, контентын албан ёсны www.miye.mn вэбсайтаас санаачлан “Хөсөгтөн” хамтлагтай баг болон нэгдэж, “Хөсөгтөн баг дэлхийн тайзнаа-2017” аялан тоглолтыг хийхээр болсон. Тэгвэл тэдний тоглолт энэ сарын 03-нд буюу шинийн тавнаас Нью-Йорк хотноо байрлах НҮБ-ын танхимаас эхлэх юм байна.

Тус баг АНУ, Канадын 10 хотод тоглох юм. Энэхүү тоглолт нь Хөсөгтөн хамтлаг анх удаа монгол байгууллагатай хамтран ажиллаж байгаагаараа онцлогтой аж.

Монголын язгуур урлагийн гайхамшгийг толилуулан сурталчлах тоглолтын хуваарийг танилцуулж байна.

Аялан тоглолтын хуваарь:

III/5 Канад улс, Торонто хот

III/6 Канад улс, Монтреал хот

III/ 10 АНУ, Нью-Йорк хот

III/ 12 Вашингтон хот

III/18, 19 Чикаго хот

III/ /20 Сиатл хот

III/ /21 Ванкувер хот

III/ /24 Беркел хот

III/25 Милл Валлей

III/ /26 Лос Анжеллес

Аялан тоглолт энэ сарын 26-ныг хүртэл үргэлжилнэ.

МУСГЗ, хөгжмийн зохиолч Л.Галмандахын хүү Баттулга шинийн нэгний билэгт сайн өдөр Буриадын Төрийн шагнал хүртжээ. Буриадын Үндэсний дуу бүжгийн “Байгаль” чуулгын хөгжмийн уран сайхны удирдагч, хөгжмийн зохиолч, удирдаач тэрээр энэхүү хүндтэй шагналыг “Баргужин тукум” хэмээх бүжгэн жүжгийн хөгжмийн зохиолоор хүртсэн байна.

Энэ бол буриад ардын дуу билээ. Алтаргана буюу алтан харгана нь иш бөх, үндэс гүн ургах Монгол оронд хаашаагүй тааралдах сөөг ургамал юм. Буриад зон амь бөхтэй алтарганыг урт удаан оршихуйн бэлгэдэл хэмээнэ. Монгол даяар харин муу зүйлээс хамгаалахын бэлгэдэл болгон гэрийн тотго зэрэгт тогтоох нь бий.

Урьд нэг их номтой хүн чөтгөртэй дайралдаад хэн нь юунаас их айдаг талаар хэлцэж байж гэнэ. Тэр цагт чөтгөр хуврагт, “ За би алтан харганаас л их айдаг даа” гэж, харин хуврага, “ За би ч аагтай цай, өөхтэй махнаас л нүгэлгүй айдаг даа” гэж дээ. Төд удалгүй тэр хоёр эвдрэлцээд, хуврага чөтгөрийг их чадаад алтан харгана дунд орж хоргодсонд чөтгөр дэмий л ойртож чадалгүй баахан цай, мах овоолж хүлээж ядаад яваад өгч гэнэ. Хуврага ч сайхан цай ууж мах идэж аваад орон гэртээ харьж амь гарсан гэдэг домог бий.
Ара газара ургагшэ
Аса бүхэтэй Алтаргана
Алиган дээрээ тэнжээхэн
Аба эжий хоёрни
Эбэри газара ургагшэ
Ишэ бүхэтэй Алтаргана
Элигэн дээрээ тэнжээхэн
Эжий аба хоёрни
Ара газара ургагшэ
Аса бүхэтэй Алтаргана
Алиган дээрээ тэнжээхэн
Аба эжий хоёрни

Язгуур урлагийн Хөсөгтөн хамтлагийн Хөсөгтөн [2010] цомогт орсон хувилбар