Category: соёл-урлаг

Монгол Улсын төрийн шагналт, соёлын гавьяат зүтгэлтэн, Дорнын их яруу найрагч Бэгзийн Явуухулангийн мэндэлсний 88 жилийн ой энэ жил тохиож байна. Их найрагчийнхаа ойг төрсөн нутаг Завхан аймгийн Засаг даргын Тамгын газар энэ сарын 01-ээс 4-ний өдрүүдэд өргөн дэлгэр тэмдэглэжээ. Ойн хүрээнд Бэгзийн Явуухулангийн нэрэмжит “Оюуны жимс-2017” яруу найргийн наадмыг зохион байгуулсан байна. Мөн уншигч, зохиолчдын уулзалт, Явуу найрагчийн төрсөн тоонот Тасархайн бууцан дээр өдөрлөг зохион байгуулсан ажээ.

Дорнын их найрагчийн нэрэмжит “Оюуны жимс-2017” наадамд хот, хөдөөгийн 90 гаруй яруу найрагч шүлэг бүтээлээ ирүүлснээс 45 яруу найрагч тунаж үлдэн уралджээ. Ингээд уг яруу найргийн наадамд МЗЭ-ийн шагналт яруу найрагч О.Цэнд-Аюуш түрүүлж Бэгзийн Явуухулангийн нэрэмжит анхны шагналын эзнээр тодорчээ.

Цалин цагаан мөнгөөр их найрагчийн дүрийг дэлхийн бөмбөрцгийн наана товойлгон урласан, эрдэнийн очир зүүлт бүхий энэхүү нэр хүндтэй шагналыг Завхан аймгийн Засаг дарга Д.Батсайхан яруу найрагч О.Цэнд-Аюушт гардуулан өгсөн байна. Тэрээр энэ үеэрээ Завхан аймаг цаашид Бэгзийн Явуухулангийн нэрэмжит шагналаа уламжлал болгон жил бүрийн “Болор цом” наадмын үеэр шилдэг яруу найрагчдад олгож байхаар болсноо мэдэгджээ. Явуухулангийн нэрэмжит шагналыг таван сая төгрөг дагалдах юм байна.

“Явуу-88” ёслол хүндэтгэлийн үйл ажиллагааны хүрээнд зохион байгуулагдах “Оюуны жимс-2017” яруу найргийн наадмын хоёрдугаар шатанд тэнцсэн яруу найрагчдын нэрс тодорчээ. Энэхүү наадамд Монгол орны өнцөг булан бүрээс 92 найрагч бүтээлээ ирүүлсэн байна. Үүнээс хоёрдугаар шатанд 35 яруу найрагч шалгарчээ.

Тэд үлдсэн хоёр, гуравдугаар шатанд бүтээлээ өөрсдөө уншиж өрсөлдөх юм.

“Оюуны жимс-2017” яруу найргийн наадам Л.Ванганы нэрэмжит Завхан аймгийн Хөгжимт жүжгийн театрт ирэх зургадугаар сарын 3-нд болно.

Соёл урлагийн байгууллагуудын “Нээлттэй хаалганы өдөрлөг” өнөөдөр Сүхбаатарын талбайд болно. Тус өдөрлөгөөр УДЭТ-ын уран бүтээлчид

11:00-17:00 цагийн хооронд

• УДЭТеатрын талаар мэдээлэл танилцуулах, иргэдийн санал, хүсэлт авах, уран бүтээлчид иргэдтэй уулзах, дурсгалын зураг авахуулах

14:00-14:40 цагийн хооронд

• УДЭТеатрын захирал УГЗ Д.Цэрэнсамбуу мэндчилгээ дэвшүүлнэ

• Д.Нацагдорж “Миний нутаг ” шүлэг /УДЭТ-ын уран бүтээлчид/

• Орос дууны цоморлиг /СТА Б.Нармандах/

• Эрик Клиптон “Намрын навчис” ковер дуу /УДЭТ-ын жүжигчин Г.Алтангэрэл/

• “Ану хатан” жүжгийн дуу /СТА Ц.Баясгалан/

• “Макарена” ковер, “Шөнийн Вероны эзэд” ковер дуу /Драмын 3 хамтлаг/

• “Сарнай цэцэг” дуу /УДЭТ-ын Театр-Студын жүжигчин Ц.Жаргалсайхан/

• “Норовын намтар” жүжгийн дуу /УДЭТ-ын жүжигчин А.Чингүн болон Матрикс хамтлаг/

• “Чингис хаан дуу” /Драмын 4 хамтлаг/

Мөн тус театраас азтан шалгаруулж, УДЭТ-ын гарын бэлэг, тоглолтын урилгыг гардуулах юм байна.

УДБЭТ-ын 54 дэх улирлын шинэ уран бүтээл Ф.Херольдын “La Fille Mal Gardee” /Муу хамгаалагдсан охин/ буюу “Дэггүй Лиз” бүжгэн жүжиг тавигдана.

Удирдаачаар УГЗ Ц.Мөнхболд, найруулагчаар Ц.Чинзориг, ерөнхий зураачаар УГЗ Г.Ганбаатар, хувцасны зураачаар СТА Г.Оюун нар ажиллаж байна.

Гол дүрүүдэд Лизэд СТА Б.Саруул, О.Анужин, Коленд СТА А.Эрдэнэболд, Симонад МУГЖ Х.Мөнгөнхөлөг, СТА Э.Эрдэнэжаргал Аленд М.Нямтайван, Т.Хан-Очир, Томасд СТА Х.Чойжилсүрэн нар тус тус бүтээх юм.

Тариачин хатагтай Симона үзэсгэлэнт ганц охин Лизтэйгээ амьдардаг. Симона хатагтай өөрийн ганц охиноо хөрөнгө чинээтэй айлын хүүтэй суулгахаар тохирчээ. Лиз охин өөртэй нь суулгахаар тохирсон Аленд дургүй бөгөөд сэтгэлт залуу Колентайгаа хамт амьдрахыг мөрөөднө. Симона хатагтай охиноо бусдаас харамлан сүй тавих өдөр хүртэл гэрээсээ гарч орохыг нь цагдаж байгаагаар бүжгэн жүжиг өрнөнө…

Хайр сэтгэл, нандин харьцааны талаар өгүүлэх сонгодог балет нь бүх насныханд тэр дундаа хүүхдийн урлагийн боловсрол, нийгэмд байр сууриа олох алс ирээдүйн хүмүүжилд нь эерэгээр нөлөөлнө хэмээн уран бүтээлчид ярьж байна.

Нээлтийн тоглолт энэ сарын 27, 28-нд 17.00 цагаас болох ажээ.

Хөөрхөн эвлэгхэн дуулдаг Б.Бат-Энэрэл хүү урд хөршийг зорин эмчлүүлэхээр явжээ. Тэрээр Завханы дуучин С.Батсүхийн дуулсан “Орчлонг хайрлаарай”, “Хаан заяатай орчлон” зэрэг дуунуудыг дуурайн дуулж ард түмэнд өөрийгөө таниулсан юм. Тэрээр төрөлхийн хараагүй ч бага багаар хардаг болжээ. Гэвч түүнийг зургаан нас хүрэхээс нь өмнө хагалгаа хийлгэхгүй бол болохгүй гэсэн онош гарчээ.

Сайхан сэтгэлт хүмүүсийн буянаар тэрээр энэ сарын 20-нд хандивийн тоглолтоо амжилттай хийж БНХАУ-ын нийслэл Бээжин хотод нүдний оношлогоо,эмчилгээ хийлгэхээр өчигдөр эх орноосоо морджээ. Одоо тэрээр таван настай аж.

“Тов” романыг орчуулагч МҮОНТ-ийн “Цаг үе, үзэл бодол” нэвтрүүлгийн хөтлөгч Бүдрагчаагийн Оюунчимэг ийнхүү өгүүлжээ.

“ Улс оронд сонгуулиуд ар араасаа болж, сайд нар өөрсдийн багтайгаа ээлжлэн солигдож, санхүү, аж үйлдвэрийн том том нэгдлүүд яг л хөөсөн бөмбөлөг мэт хагарч, өчигдөрхөн Ерөнхийлөгчийн мөрийг алгадан “найрч” явсан олигархиуд хог шаар болон хувирч байлаа. Харин хэн ч таньдаггүй байсан, загас мэт чимээгүй нэгэн улс төр, санхүүгийн тэргүүн суудлыг эзэгнэж эхлэв…”
Энэ бол миний орчуулан хэвлүүлсэн “Тов” романы хэсэг. Зохиолч Марина Юденич социалист тогтолцоо нуран унасны дараах Оросын байдлыг зохиолдоо энэ мэтээр өгүүлсэн нь манайхтай, “бидэнтэй” дэндүү адилхан санагддаг. Тэрээр сэтгүүлч, дээр нь улс төрийн технологчийн хувьд: “Ардчилсан” нэртэй сонгуулиуд эцэстээ хүмүүсийн нүдэнд харагдаж, танигддаггүй “Хэн нэг”-ний хүсэл зоргоор яваад байгаа юм биш биз?!” гэсэн асуултыг уншигч өөртөө тавиасай гэж хүссэн гэж бас боддог. Би энэ асуултыг өөртөө олонтаа тавьсан. Ялангуяа өнөөдөр…

“Тов” романыг “Интерном”-ын салбаруудаар худалдаж байгаа гэнэ.

Монголын анхны кино наадам “Cinema awards” анх удаагаа амжилттай зохион байгуулагдаж, 2016 онд Монголын кино урлагийн тэнгэр мандсан оддыг тодрууллаа. Монголын урлагын зөвлөлөөс зохион байгуулсан уг наадамд 2016 онд нээлтээ хийсэн 46 МУСК өрсөлдсөн бөгөөд сүүлийн шатанд шилдгээр шалгарч үлдсэн 12 кино 14 номинацид өрсөлдсөн юм.

-ТУС НААДМААС ШАЛГАРСАН ШИЛГҮҮДИЙГ ТАНИЛЦУУЛЪЯ-

Шилдгийн шилдэг уран бүтээл- “Итгэл” УСК

Шилдэг эрэгтэй гол дүр-Б.Амарсайхан “Итгэл” УСК

Шилдэг хөгжмийн зохиолч-Б.Одбаяр “Итгэл” УСК

Шилдэг нүүр хувиргалт-Ц.Дэлгэр “Бүү март” УСК

Шилдэг зураач-Н.Батжаргал “Бүү март” УСК

Залуу үед үлгэр дууриал үзүүлсэн кино- “Цагаан хадаг” УСК

Шилдэг дууны найруулагч-Билгүүдэй “Үргээлэг-2” УСК

Шилдэг кино зохиол-Т.Бум-Эрдэнэ.”Үргээлэг-2” УСК

Шилдэг эрэгтэй туслах дүр-Ц.Төмөрхуяг “Ээж” УСК

Шилдэг эмэгтэй гол дүр- Ардын жүжигчин Д.Мэндбаяр “Ээж” УСК

Шилдэг найруулагч-Ж.Сэнгэдорж “Lovers” УСК

Шилдэг эмэгтэй туслах дүр-У.Уранчимэг. “Атганд үлдсэн эрдэнэ” УСК

Шилдэг зураглаач-Б.Ангараг “Атганд үлдсэн эрдэнэ” УСК

Шилдэг хувцас, дизайн-П.Бэрхээдэй “Өртөө” УСК

Монголын Оскар буюу “Cinema Awards” ёслолын үйл ажиллагаа өнөөдөр Корпорейт Конвеншн Центрт болох гэж байна. Уг наадамд 2016 онд үзэгчдийн хүртээл болсон 12 кино 14 номинацид өрсөлдөхөөр болжээ.

Кино наадамд 2016 онд бүтээгдсэн 46 киноноос шилдэг 25 киног нь олон нийтийн санал асуулгаар шалгаруулж тэдгээр 25 киноноос кино урлагийн зөвлөлийн шүүгчдийн саналаар 12 кино шилдэг уран бүтээлд шалгарч үлдээд байгаа аж. Тодруулбал “Өртөө”, “Бүү март”, “Ээж” УСК, “Атганд үлдсэн эрдэнэ”, “Итгэл”, “Үргээлэг-2”, “Шүүдэр дундуур”, “Аз жаргал”, “Цагаан хадаг”, “Lovers”, “Өвлийн тууж”, “6 дахь хүсэл” зэрэг кино багтжээ.

Мөн:

• Шилдэг эрэгтэй туслах дүр,

• Шилдэг нүүр будалт,

• Шилдэг дууны найруулагч,

• Шилдэг зохиол,

• Шилдэг эмэгтэй туслах дүр ,

• Шилдэг зураач,

• Шилдэг хөгжмийн зохиолч,

• Шилдэг хувцас дизайн,

• Шилдэг найруулагч,

• Шилдэг зураглаач,

• Залуу үед үлгэр дууриал болсон бүтээл,

• Шилдэг эмэгтэй гол дүр

• Шилдэг эрэгтэй гол дүр,

• Шилдгийн шилдэг уран бүтээл зэрэг 14 номинацид 60 гаруй уран бүтээлч өрсөлдөх юм байна.

“Cinema Awards” ёслолын үйл ажиллагааг “Өргөө” кино театр, Монголын кино урлагийн зөвлөл хамтран зохион байгуулж байгаа аж. Ёслолын арга хэмжээний улаан хивсний ёслол маргааш 16:30 цагт эхлэж, шагнал гардуулах ёслол 18:00 цагт эхлэх аж.

Жил бүр уламжлал болгон зохион байгуулдаг “Автомашингүй өдөр” маргааш буюу энэ сарын сарын 20-нд болно. Уг өдрийг тохиолдуулан “Play time” наадмын зохион байгуулагчдын зүгээс “Авто машингүй, амьд хөгжимтэй өдөр” өдөрлөгийг зохион байгуулахаар болжээ.

Өдөрлөгийн үеэр “Play time 2017” амьд хөгжмийн наадамд оролцох шинэ залуу хамтлагууд уран бүтээлээ толилуулахаас гадна “The Lemons” хамтлаг “Unplugged in UB” цомгийн гарын үсэгтэй худалдаа явагдах юм байна. Мөн “Playtime Festival 2017” наадамд оролцох бусад хамтлагийн цомгийг хямдралтай үнээр худалдах бөгөөд наадмын “EARLY BIRD” буюу гурван өдрийн 50 мянган төгрөгийн үнэтэй тасалбарыг 40 мянган төгрөгөөр худалдаалах юм байна.

Өдөрлөг УИД-н зүүн урд байрлах Hi-Fi Records-н урд талбайд болно.

Сүүлийн үед уран бүтээлийн арвин ургацтай байгаа дуучин Б.Аззаяа энэ сарын 27-нд “АСА” циркт анхны бие даасан “Сүүн далай ээж” тоглолтоо хийх гэж байна. Тогтолтод түүний хит болсон “Сүүн далай ээж”, “Амин хоёр эрдэнэ” гэх мэт олон сайхан уран бүтээл нь дуулагдах нь ээ. Тоглолтын ерөнхий зохион байгуулагчаар “2016 entertainment” ажиллаж байгаа бөгөөд хамтран дуулсан уран бүтээлчид амьд хөгжмийн хамтлаг бүжигчид гэх мэт нийт 60 хүний бүрэлдэхүүнтэй баг ажиллаж байгаа гэнэ.

Дашрамд дуулгахад дуучны маань 6 дахь клип болох “Амьдрал чамд хайртай” дууны клип тоглолтоос өмнө цацагдах юм байна. Мөн дуучин Б.Аззаяа маань үзэгчидддээ зориулж олон сюрприз бэлдэж байгаа аж.