Category: соёл-урлаг

Загварын шилдгийг тодруулдаг “Гоёл-2018” наадмын загварын долоо хоног үргэлжилж байна.
Тус наадамд 100 гаруй загвар өмсөгч бүртгүүлснээс 50 орчим нь шалгаран үзүүлбэр үзүүлж байгаа бол загвар зохион бүтээгчид өдөр тутам, үндэсний, гоёлын, уран сэтгэмж төрлөөр урласан загвараар өрсөлдөж байгаа юм.

Энэхүү наадмын Гала тоглолт, “Топ модел”-ийг тодруулах ёслолын ажиллагаа энэ сарын 29-нд Соёлын төв өргөөнд болно.

Дашрамд дурдахад, өнгөрсөн жилийн 29 дэх удаагийн “Гоёл” наадмаар топ моделийг тодруулаагүй. Учир нь топ моделийн шалгуур хангах оролцогч наадамд өрсөлдсөнгүй гэж шүүгчид үзсэн юм.

Монгол Улсаас Австрали Улсад суугаа Элчин сайдын яам Австрали Улсад суугаа Монголчуудын Холбоотой хамтран “Зүрхний хилэн” Монголын уран сайхны киноны нээлтийг Австрали Улсын Сидней хотноо 11 дүгээр сарын 22-нд хийв.

Энэ нь Австрали Улсад монголын уран сайхны киноны нээлт хийсэн анхны тохиолдол бөгөөд тус улсад сурч, ажиллан амьдарч буй монголчуудын талархлыг хүлээсэн үйл явдал болов.

Англи хадмал орчуулгатай уг киног Сидней хотод 3 өдөрт 2 удаагийн давталттайгаар гаргахад 2,000 орчим хүн үзэж сонирхсон бөгөөд үзэгчдийн 5 орчим хувь нь гадаадын иргэд байв. Нээлтэнд Австрали Улсад суугаа Элчин сайд Б. Чулуунхүү, Монголчуудын холбооны төлөөлөгчид болон тус киноны гол дүрийг бүтээсэн жүжигчин М.Баярбат нар оролцлоо.

Цаашид “Зүрхийн хилэн” киног Австралийн Канберра, Мелбурн, Брисбэн хотуудад тус тус гаргахаар төлөвлөж байна.

Оросын нэрт зохиолч Лев Толстойн мэндэлсний 190 жилийн ойг угтаж түүний “Холстомер” бүтээлээс сэдэвлэн бичсэн М.Розовскийн “Адууны түүх” хэмээх хоёр бүлэгт сонгодог жүжгийг энэ сарын 24-ний өдрөөс эхлэн Улсын драмын эрдмийн театрын уран бүтээлчид тайзнаа тоглож эхэллээ. Жүжгийн гол дүрийг Ардын жүжигчин Г.Мягмарнаран, Соёлын тэргүүний ажилтан С.Болд-Эрдэнэ, жүжигчин Э.Тодгэрэл нар бүтээжээ. Монголын театрын тайзнаа амилж буй 35 дахь сонгодог бүтээл болсон уг жүжгийн ерөнхий найруулагчаар Урлагийн Гавьяат зүтгэлтэн Б.Баатар ажиллаж байна. “Адууны түүх” жүжиг Азид анх удаа Монголын тайзнаа амилж байгаагаараа онцлог ажээ.

Дашрамд сонирхуулахад “АДУУНЫ ТҮҮХ” Холстомер хэмээх хоёр бүлэгт жүжиг Улсын дуурь бүжгийн эрдмийн театрт энэ сарын 24-өөс ирэх сарын 3-н хүртэл тоглогдох ажээ.

-Орчуулагч Н.Пүрэвдагва

-Ерөнхий найруулагч УГЗ Б.Баатар

-Ерөнхий продюсер УГЗ Д.Цэрэнсамбуу

-Уран сайхын удирдагч ТС, АЖ Н.Сувд

-Ерөнхий зураач О.Баярмагнай

-Хөдөлгөөний найруулагч СТА Г.Ган-Очир

“Корпрэйт энтертаймент” нь урлагийн салбар бүрээс шилдэг уран бүтээлчдийг сонгон шалгаруулж, Монгол үндэстний хэв маяг өв соёлоо шингээсэн урлагийн бүтээл, уран бүтээлчдийг олноо алдаршуулах, улмаар дэлхийд таниулах, тэдний бүтээлийг орчин цагийн хэлбэрт найруулан дэглэж олон түмэнд хүргэх гол зорилготой.

Тус баг нь “Наадам”, “Намар” тоглолтыг сүүлийн үеийн тоног төхөөрөмж, техник, технологиор тоноглогдсон концертын их танхимдаа, гэрэл, дуу, дүрс дуугаралтын онцгой шийдэлтэйгээр амжилттай гүйцэтгэж гадаад, дотоодын олон хүмүүсийн таашаалд хүрч, өндөр үнэлгээ авч байсан билээ. Тэгвэл энэ удаад “Өвөл” шоу тоглолтоо ирэх сарын 15,16-нд “Корпрэйт” зочид буудлын концертын танхимд хийхээр болжээ.

Энэ удаагийн “Өвөл” шоу тоглолтод Монголын авьяаслаг гоцлол хөгжимчид өөрсдийн авьяас, ур чадвараа гайхуулан хөгжимдөхөөс гадна, Өвөл цагийн өвөрмөц өнгө төрх дор, Өв уламжлал соёлоо харуулсан бүжиг, циркийн шилдэг үзүүлбэрүүдийг сонгон оруулжээ.

Мөн шинэ жилээ угтсан сюрприз болгоод дэлхийн алдартай кино дэлгэцийн бүтээлүүдээс санаа авч найруулсан гайхалтай шинэлэг бүтээлүүдээр “Өвөл” шоу тоглолтыг чимэх гэнэ.

СУИС-ийн Медиа урлагийн сургуулийн кино театрын тэнхим, Польшийн элчин сайдын яам хамтран 27-28-нд Польшийн кино өдрүүдийг найм дахь жилдээ зохион байгуулах гэж байна. Энэ тухай өнөөдөр тус тэнхимийн эрхлэгч Ц.Цэвэлсүрэн, орчуулагч, нэвтрүүлэгч М.Ундрам, Польшийн хүрээлэнгийн зохицуулагчдын төлөөлөл мэдээлэл хийлээ. Энэ жилийн кино өдөрлөгөөр дэлхийн II дайн болон тэр үеийн түүхэн хүмүүсээс сэдэвлэсэн кинонуудыг үзэгчдэд хүргэхээр ажээ. Өдөрлөгийн үеэр Ирена Сендлерийн амьдралаас сэдэвлэсэн “Бортогонд нуугдсан амь” киног үзэгчдийн хүртээл болгохоос гадна, номыг нь орчуулсан сэтгүүлч М.Ундрамын номын нээлт давхар болох юм байна. “Бортогонд нуугдсан амь” ном нь дэлхийн II дайны үед 2500 еврей хүүхдийг аварсан Польшийн хүмүүнлэгийн зүтгэлтэн Ирена Сендлерын тухай өгүүлдэг юм байна. Польшийн кино өдөрлөгийн хүрээнд кинонуудыг үнэ төлбөргүй үзэгчдэд хүргэнэ. СИУС-ийн Медиа урлагийн сургуулийн кино театрын тэнхимд киног гаргах юм байна.

2017.11.27-ны өдөр 13:00 цагаас “Ирена Сендлерийн амьдрал”

15:00 цагаас “Амьтны хүрээлэнгийн эзэгтэй”

2017.11.28-ны өдөр 16:00 цагаас “Амийг амиар”

УДБЭТ-ын хамт олон түүхт 55 жилийн ойгоо тохиолдуулан сар бүр сонгодог урлагийн аль нэг мэргэжлийг сурталчлах олон талт ажлуудыг зохион байгуулахаар зорьж байгаа билээ. Улмаар 11-дүгээр сарыг гоцлол дуучдын сар болгон зарласан байна. Тухайн сардаа зориулж УДБЭТ- ын үе үеийн гоцлол дуучдын зургаар үзэсгэлэн гаргаж, нэг гоцлол дуучин болон концертмейстер багшийг онцлон уран бүтээлийн тоглолтуудыг нь зохион байгуулжээ.

УДБЭТ нь гоцлол дуучдын мэргэжлийн онцлогийг сурталчлан таниулах зорилгоор Дэлхийн сонгодог төдийгүй Монголын шилдэг бүтээлүүдийг сайхан дүр төрх, уран сайхан хоолойгоороо чимж байдаг үе үеийн дуурийн дуучдын сор болсон ханхүү, үзэсгэлэнт бүсгүйчүүдтэй өнөөдөр сонгодог урлагийн үзэгчид уулзан, ярилцах нээлттэй өдрийг зохион байгууллаа.

Энэхүү өдөрлөгөөр сонгодог урлагийн үзэгчид уулзахыг хүссэн дуучинтайгаа уулзаж, өөрийн сонирхсон асуултаа асууж, хамт зургаа авхуулах боломжийг олгосон юм. Энэхүү өдөрлөгт ахмад уран бүтээлчид болох Ардын жүжигчин Н.Уртнасан, А. Дашпэлжээ, Монгол Улсын гавьяат жүжигчин Ц.Ерөө, Б.Цэцгээ, МУГЖ Д.Долгормаа, МУГЖ А. Бүтэд, МУГЖ Ганхуяг нар оролцлоо.

Харин одоо ажиллаж байгаа гоцлол дуучдаас МУГЖ С.Мөнгөнцэцэг, МУГЖ Ө.Уянга, Меццо-сопрано-СТА Р.Доржхорол, Тенор-СТА Ч.Түмэндэмбэрэл, Басс О.Хүрэлбаатар, концертмейстер багш МУГЖ Б.Солонго, сопрано- МУГЖ Б.Эрдэнэтуяа, СТА Ш.Наранчимэг, Меццо-сопрано- М.Дариймаа, Тенор-СТА Гомбо-очир, гоцлол дуучин Б.Батжаргал, концертмейстер багш Э. Намуун нар оролцож дуурийн урлаг сонирхогч залуустай илэн далангүй ярилцсан юм.

ОХУ-ын Москва хотод албан бус тоогоор мянга гаруй Монгол оюутан суралцдаг гэсэн тоо байдаг. Тэгвэл оюутнуудын чөлөөт цагийг зөв боловсон өнгөрөөх, монгол киногоо сурталчлан таниулах зорилгоор БСШУСЯ, ОХУ дахь Элчин Сайдын яам хамтран ОХУ-ын Соёлын яамны дэмжлэгтэйгээр Москва хотын “Иллюзион” театрт монгол киноны өдрүүдийг зохион байгуулах гэж байна.

Кино өдрүүд энэ сарын 30-аас эхлэн дөрөв хоног үргэлжлэх бөгөөд үзэгчид найруулагч Г.Эрдэнэбилэгийн “Аав”, найруулагч Ч.Хоролдоржийн “Шарга даага”, найруулагч С.Бямбын “Алсын удирдлага”, найруулагч М.Энхдалайн “Бид гурвын болзоо”, найруулагч А.Батбаатрын “Зангараг” зэрэг таван бүтээлийг үнэ төлбөргүй үзэж сонирхох боломжтой юм.

Монгол Улс, Япон Улстай дипломат харилцаа тогтоосны 45 жилийн ойн хүрээнд япон болон тус улсад ажилладаг монгол балетчид хамтран модерн урсгалын “Хязгаараас ангид” бүжгэн жүжгийг найруулж Корпорейт конвеншн төвийн тайзнаа энэ сарын 18-ны өдөр монголчуудад толилууллаа. Дипломат харилцааны ойн хүрээнд 20 гаруй соёл, урлагийн арга хэмжээг хоёр орны олон нийтэд дэлгэн толилуулсан бөгөөд энэхүү “Хязгаараас ангид” бүжгэн жүжиг 45 жилийн ойн соёлын арга хэмжээний отгон урлагийн арга хэмжээ боллоо.

Энэхүү тоглолтыг эх орондоо амжилттай тавьсан монгол балетчид А.Хангай, Б.Батболд, О.Лхагвасүрэн болон манай бүжигчдийг дэмжин хамтран ажилладаг японы алдартай бүжигчин, бүжиг дэглээч Фунааки Жо, нийт уран бүтээлчдэд ГХЯ-ны ТНБД Д.Даваасүрэн талархал илэрхийлж, уран бүтээлийн амжилт хүслээ.