Category: соёл-урлаг

Удахгүй гэгээн хайрын баяр болох гэж байгаатай холбогдуулан УДБЭТ-т “BE MY VALENTINE” болон В.Красногоров “Би ч гэсэн жаргамаар байна” уянгын драмын жүжиг, Улсын Филармонийн тайзнаа “I love you” концертууд тоглогдох гэж байна.

Тоглолтонд УДБЭТ-ын бүх уран бүтээлчид оролцож, уран бүтээлийнхээ дээжсээс өргөн барих ба тасалбар нь 10000-20000 төгрөгний үнэтэй. Харин Улсын Филармоний тоглолтонд Баянмонгол жазз найрал хөгжим, Удирдаач С.Саруул-Од /СТА/, Л.Насанбуян /СТА/, П.Баярцэнгэл, С.Хишигжаргал, Г.Тэнүүн, Б.Маралжингоо нар оролцож тасалбар нь 25,000 ₮ борлуулагдаж байна.

Г.МӨНХЦАЦРАЛ

”Гэгээн Муза” арван дөрөв дэх удаагийн олон улсын театрын наадам 2018 оны тавдугаар сарын 7-13-ны өдрүүдэд Улаанбаатар хотноо болохоор товлогджээ. Энэ удаагийн наадмыг уламжлал ёсоор драмын жүжиг, дуулалт жүжиг, хүүхдийн жүжиг, нэг хүний жүжгийн төрлөөр зохион байгуулна. Одоогоор олон улсын театрын наадмын нэгдүгээр шатны үзлэг Сүхбаатар аймагт үргэлжилж байгаа аж.

Драмын жүжгийн төрөл

• Улсын драмын эрдмийн театр “Адууны түүх”, “Жаргаагүй нар”
• Улсын хүүхэлдэйн театр “Монгол ардын суут”
• Архангай аймгийн хөгжимт драмын театр “Би эндээс явахгүй”
• Сүхбаатар аймгийн Жаахан шарга театр “Далан худалч”
• Төв аймгийн Монгол туургатан театр “Ичгүүргүй хосууд”
• Баянхонгор аймгийн Тэмүүжин театр “Аав”
• Орхон аймгийн хүүхэд, залуучуудын театр “Хүний хүрэм”, “Миний ээж”
• Булган аймгийн хөгжимт жүжгийн театр “Дээд хэмжээ”
• Дархан-Уул аймгийн Залуучууд театр “Хар санаа хайр сэтгэл”
• Чөлөөт уран бүтээлч “Ричард ван” жүжгүүдээр тус тус өрсөлдөнө.

Дуулалт жүжгийн төрөл

• Дорнод аймгийн хөгжимт драмын театр “Манлайбаатар”
• Завхан аймгийн хөгжимт жүжгийн театр “Өндөр гэгээн”
• Дундговь аймгийн Төв Халхын дуулалт жүжгийн театр “Уяхан замбуу тив”
• Булган аймгийн хөгжимт жүжгийн театр “Итгэл даагаагүй эх оронч”
• Чөлөөт уран бүтээлч “Хайхуй” жүжгүүдээр тус тус өрсөлдөнө.

Хүүхдийн жүжгийн төрөл

• Улсын драмын эрдмийн театр “Царцаа Намжил”
• Улсын хүүхэлдэйн театр “Алтан залаат азарган тахиа”
• Сүхбаатар аймгийн Жаахан шарга театр “Их ид шидтэн”
• Дорнод аймгийн хөгжимт драмын театр “Ярьдаг мод”
• Говьсүмбэр аймгийн Боржигин чуулга “Шидэт Баянбүрд”
• Баянхонгор аймгийн Тэмүүжин театр “Хотын нохой”
• Хамелеон театр студи “Наран ээжийн эрэлд”
• Дархан-Уул аймгийн хөгжимт жүжгийн театр “Арслан хүлэгт баатар” жүжгүүдээр тус тус өрсөлдөнө.

Энэ сарын 17-ны өдөр буюу шинийн хоёрны 19:00 цагаас “Crocus Event Hall”-д “Татар” хамтлагийн “Хайрыг хүндэл” тоглолт болох юм. Тус хамтлаг энэхүү бие даасан тоглолтдоо үе үеийн хамгийн шилдэг дуунуудаа дуулах ажээ.

Тоглолтод дуучин Ука, Маралжингоо, A Cool болон “Люмино”, амьд хөгжмийн “Legos” хамтлагууд оролцож ая дуугаа өргөх юм байна. Энэхүү тоглолтын тасалбарын үнэ 45 мянган төгрөг бөгөөд Easyticket.mn сайтаар худалдан авах боломжтой ажээ. Ширээ захиалгыг 94741404 утсаар авч буй юм байна. Тоглолтын ерөнхий зохион байгуулагчаар “Монгол Контент” ХХК ажиллаж байгаа аж.

1999 онд Заяа, Жагаа, Мөөгий нар нийлж, гурван гишүүнтэйгээр 2001 оны наймдугаар сарын 7-нд албан ёсоор “Татар” хамтлагийг байгуулжээ. Хамтлагийн бүрэлдэхүүн хөрш айлынхаа нэгэн эвдэрсэн /trailor/ аяны чиргүүл дотор бэлтгэлээ хийж эхэлсэн байдаг.

Монгол Улсын гавьяат жүжигчин Э.Амартүвшин сүүлийн нэг жил хилийн чанадад гэрээгээр дэлхийн сонгодог дуурь дуулсан билээ. Тэрээр дуурийн өлгий Итали улсын Режио ди Парма хотын театрт 2018 оны нэгдүгээр сарын 12-ноос 21-ний хооронд Италийн нэрт хөгжмийн зохиолч Жузеппе Вердигийн алдарт “Риголетто” дуурийн гол дүрд дуулсан юм. Ингэснээр 2017 оны 11 дүгээр сарын 18-наас 2018 оны нэгдүгээр сарын 21 хүртэл Ж.Вердийн алдарт “Риголетто” дуурийг Италийн томоохон хотуудын дуурийн театруудад дөрвөн удаа дуулах гэрээгээ биелүүлсэн байна.

Монгол Улсын гавьяат жүжигчин, дуурийн дуучин Э.Амартүвшин “2018 International Opera Awards”-ийн “Оны шилдэг залуу дуучин” төрөлд нэр дэвшжээ. Дэлхийн “Opera Awards” нь ирэх дөрөвдүгээр сарын 9-нд дүнгээ танилцуулж, улаан хивсний ёслолыг зохион байгуулах аж.

Кино урлагийн “Оскар” наадмын шагналтай дүйцэхүйц дэлхийн дуурийн урлагийн “Opera Awards”-т эх орныхоо нэрийг өндөрт өргөж буй дуучин Э.Амартүвшинг дуурийн урлагийн нөлөө бүхий томчуудын санал хүсэлтээр энэхүү шагналд нэр дэвшүүлсэн байна.

“Гайхамшигт өв соёл-Монгол уран хатгамал” үзэсгэлэн Богд хааны ордон музейд нээгдлээ. Энэхүү үзэсгэлэн хоёр дахь жилдээ зохион байгуулагдаж байна. Өнгөрсөн жил “Хатгамал урлагийн гайхамшиг” нэртэйгээр дэлгэгдэж байсан тус үзэсгэлэн энэ жил “Гайхамшигт өв соёл-Монгол уран хатгамал” болон өргөжиж, нээгдлээ. Үзэсгэлэнд 20 гаруй уран бүтээлчийн 100 гаруй бүтээл тавигдсан байна.

Үзэсгэлэнд өнөө цагийн уран хатгамалчдын сор болсон бүтээлүүдээс гадна Богд хааны ордон музейн ховор нандин үзмэрүүд дэлгэгджээ. Уран хатгамалчдын энэ жилийн үзэсгэлэнд алт, мөнгөн утас дарж оёсон бүтээлүүдээ алтан сан хөмрөгөөсөө гарган үзүүлж байгаагаараа онцлог байв. Тухайлбал монголчууд үндэсний эрх чөлөө, тусгаар тогтнолоо сэргээн мандуулсны дараа өөрсдөө шинээр зохион бүтээж, хэрэглэх болсон фүс тэмдэг бүхий Богдын ёст хүрэм тавигдсан байлаа. Богд хааны хувцас хэрэглэлд нийт дөрвөн төрлийн фүс тэмдэг хадахаар хуульчилсан байдаг байна. Энгэрт нь найман хэгээст алтан хорол, баруун мөрөнд эь соёмбо үсгээр нар гэж бичсэн фүс , зүүн мөрөнд нь соёмбо үсгээр сар гэсэн бичигтэй фүс, ар нурууны хэсэгт төрийн сүлд хатгажээ. Монгол уран хатгамлын олон төрөл шингэсэн уран нарийн хийцтэй дээлний гадуур өмсдөг уг ёст хүрэм нь үзэсгэлэнгийн яахын аргагүй нэг чимэг болж байсан юм.

Мөн Дондогдулам хатны тоорцог, хантааз зэргийн эх загварыг нь дуурайлган бүтээснийг тухайн үзэсгэлэнгээс харах боломжтой юм.

Уран үйлчид маань Богд хааны хэрэглэж байсан уран нарийн хийцтэй даалингийн эх загварыг дуурайлган, том хэмжээтэйгээр урлан бүтээж, Гиннесийн номонд бүртгүүлхээр өнгөрсөн жил анхны учгаа хатгаж байсан билээ. Тэр даалингаа бүтээж дуусгаад, үзэсгэлэнгийн хойморт тавьжээ.Уг хүндэтгэлийн даалингийн эх загвар нь луун хээтэй, бор шар өнгөтэй, улаан торгоор эмжиж, шар цагаан туузаар давхар бэхэлсэн, хөх саарал зузаан даавуугаар хоёр буланг нь бэхэлсэн хийцтэй, монгол хээ угалз, зүү ороох оёдлын уран тансагийг харуулжээ.

“Гайхамшигт өв соёл- Монгол уран хатгамал” үзэсгэлэн энэ жилээс эхлэн “Хаан бүтээл”, Хатан бүтээл” шалгаруулах аж. Үзэсгэлэнгийн шилдгүүд энэ сарын 30-ны тодрох юм байна. Уран хатгамлын үзэсгэлэн өнөөдрөөс эхлэн ирэх хоёрдугаар сарын найман хүртэл үргэлжилнэ.

Б.ҮРЖИГ

Азийн сайд нарын бага хурлын нэг чухал хэсэг нь гамшгийн эрсдэлийг бууруулах чиглэлээр зохион байгууллагддаг дэлгэцийн шилдэг бүтээл шалгаруулах үйл ажиллагаа байдаг.Тэгвэл 2018 оны 07 дугаар сарын 16-19-ний өдрүүдэд Улаанбаатар хотноо зохион байгуулагдах Азийн сайд нарын II бага хурлын үеэр явагдах дэлгэцийн шилдэг бүтээл шалгаруулах уралдааныг өнөөдрөөс албан ёсоор зарлалаа.Тус уралдаанд Ази, Номхон далайн бүс нутгийн уран бүтээлчид хамрагдах боломжтой юм. Энэхүү уралдаан нь 29 сая төгрөгийн шагналын сантай бөгөөд энэ удаагийн Азийн сайд нарын бага хурлын үндсэн сэдэв болох “Гамшгийн эрсдэлээс урьдчилан сэргийлснээр тогтвортой хөгжлийг хамгаалах нь” сэдвийн хүрээнд зохион байгуулагдах юм.Өөрөөр хэлбэл, уран бүтээлчид маань “Гамшгийн эрсдэлээс урьдчилан сэргийлснээр тогтвортой хөгжлийг хамгаалах нь” сэдвийн хүрээнд баримтат кино, нийтлэл бэлтгэн уралдаанд ирүүлэх юм.Гамшгийн үр дагаварыг хохирол багатай даван туулсан бусад улс орны тэргүүлэх туршлагыг таниулах, гамшгийн эрсдэлийг бууруулах иргэд, олон нийтийн мэдлэг ойлголтыг дээшлүүлэх, өөрийгөө болон бусдыг хамгаалах дадалд сургах, гамшгийн боловсролыг бүх насны иргэдэд эзэмшүүлэхэд уг уралдааны ач холбогдол оршиж байгаа юм