Category: соёл-урлаг

Олон Улсын эмэгтэйчүүдийн баярын өдрийг тохиолдуулан Кёкүшюзан Д.Батбаярын гэргийдээ зориулан зарласан хайрын шүлгийн уралдааны ялагчид тодорч, шагналаа гардаж авцгаалаа.

Одоогоос яг нэг сарын өмнө Кёкүшюзан Д.Батбаяр Японы Окинава арал дээр гэргийн хамт авхуулсан зургаа найман мөрт шүлгийн хамт өөрийн пэйж хуудсанд оруулсан нь олон нийтийн сүлжээгээр нэлээд тархсан юм. Харин олон нийтийн дэмжлэгт нэлээд урамшсан Кёкүшюзан Д.Батбаяр өнгөрөгч хоёрдугаар сарын 2-нд гэргийдээ зориулж хайрын шүлгийн уралдаан зарлаж, мэргэжлийн хүмүүсээр шүүлгүүлсэн нь өнөөдөр ийн ялагчаа тодруулж, тун амжилттай болж өндөрлөлөө.

Хайрын шүлгийн уралдаанд 1000 гаруй уран бүтээлчид шүлгээ ирүүлснээс шилдэг есөн оролцогчийг шалгаруулж, Улаанбаатар зочид буудлын “Хөх Асар” танхимд шагналыг гардууллаа. Шагнал гардуулах арга хэмжээнд Кёкүшюзан Д.Батбаяр, МУГЖ, дуучин Т.Баясгалан, Төрийн соёрхолт, “Болорцом”-ын эзэн яруу найрагч Ц.Бавуудорж, СГЗ С.Эрхэмбаяр, “Болорцом”-ын эзэн яруу найрагч Н.Гантулга, Яруу найрагч Р.Эмүжин болон тэмцээний шилдгүүд оролцсон юм.

Мөн тэмцээнд ирүүлсэн нийт оролцогчдоос 400 шүлгийг шүүж ариутган “Ханьдаа” хэмээх номыг бүтээснээ арга хэмжээнд оролцсон нийт зочдодоо бэлэглэсэн юм.Тэмцээний тэргүүн байрт Zindaa.mn сайтын сэтгүүлч, “Болорцом”-ын тавдугаар байр, яруу найрагч Л.Ганзул шалгарч, Япон улс руу зорчиж сүмо үзэх эрхээр шагнуулсан бол, удаах байранд яруу найрагч Л.Түмэнжаргал орж “iPhone X” утсаар, гутгаар байрт яруу найрагч Ш.Бадам орж Samsung J7 утсаар шагнууллаа.Харин тусгай байрт орсон яруу найрагчид болох МЗЭ-ийн шагналт яруу найрагч, СГЗ Д.Дашдондов, яруу найрагч Х.Мөрөн, Б.Болдсүх, С.Шүрэнцэцэг, Б.Баттулга, Э.Бат-Эрдэнэ нарыг 32 инчийн өнгөт зурагтаар шагнаж урамшууллаа.

Тэмцээний шүүгч, яруу найрагч Р.Эмүжин хэлэхдээ “Энэхүү тэмцээнд нэлээн өндөр түвшний яруу найрагчид хамрагдан оролцсоноороо их онцлогтой боллоо. Монгол орон даяар 3000 шахам хүн оролцсон нэлээн далайцтай, өргөн хүрээнд зүрхнээс зүрхэнд, сэтгэлээс сэтгэлд жигүүрлэн хүрэх хайрын шүлгийн уралдааны үр дүн бидний барьж байгаа энэ ном. Өнөөдөр бид нэгэн мөчид нэгэн дээвэр дор цуглаад сууж байгаа ховорхон алтан агшин юм гэдгийг хэлмээр байна. Оролцсон хүн болгоны шүлэг, хэдийгээр эхний байруудад ороогүй ч алмаз мэт гялтганаж чадах, алт мэт тунаж чадах хайрын сайхан мөртүүд байсан шүү. Энэ нь юуг хэлж байна гэхээр монголын ард түмэн хайрлаж чаддаг юм шүү гэдгийг илэрхийлж байгаа юм болов уу гэж шүүгч бид үнэхээр талархалтай хүлээж авснаа хэлмээр байна. Уралдаанд ирсэн шүлгүүдийг уншаад сууж байхад шүлэг бүхэнд өөрийн гэсэн амь байсан. Өөрийн гэсэн хайр оршиж байсан. Чухам юунаас үүдэлтэй юм бэ гэдгийг бодоод үзэхээр энэ бүхэн хайр юм, сэтгэл юм, дурлал юм. Хүний хайраас гарсан үг хайранд хүрдэг, сэтгэлд очиж жигүүрээ амраана. Зүрхнээс гарсан үг зүрхэнд очиж үүрээ засна шүү дээ. Монголчууд бол зөн билгийн, аман билгийн олон зуун мянган жилийн түүхтэй, ардын аман зохиолын хэдэн зууныг гаталсан арвин сан хөмрөгтэй ард түмэн. Тэгээд Кёкүшюзан Д.Батбаярын хайрын шүлгийн уралдаан бол монголчуудын аман билгийн, зөн билгийн сэрэл мэдрэмжийг сэрээж чадав уу даа хэмээн би хувьдаа бодсон” гэв.

---

Кёкүшюзан Д.Батбаяр ярихдаа “Ханьдаа зориулж бичсэн хэдхэн мөрт маань өнөөдөр олон мянга дахин үржигдэж, олон түмэнд хүрч байгаад их баяртай байна. Монголчууд маань бөхчүүдийг ер нь бол хээ хаагүй, ичимтгий, гэр бүл, найз нөхдөдөө хайртай ч гэж хэлж чаддаггүй, бүрэг улсууд гэсэн ойлголттой байдаг. Тэр ойлголтыг өөрчилье, мөн залуучууд маань хайртай хүндээ зөвхөн цэцэг, сарнай авч өгөх биш. Хайраа зоригтойнхон илчлээд, монгол хүний тэр сайхан яруу найрагч сэтгэлгээгээр сэтгэлийнхээ үгийг шүлэглээд хэлчихдэг байя гэж уриалах үүднээс энэ шүлгийн уралдааныг зохион байгуулсан. Шүлгийн уралдаанд маань маш олон хүн оролцсонд үнэхээр баяртай байна. Хамгийн гол нь 1000 гаран шүлгээс 400 орчим шүлгийг “Ханьдаа” зориулсан номд оруулж гаргаад байгаа маань их сайхан үйл явдал. Дээрээс нь хайртай ханьдаа 1000 сарнай биш 1000 шүлгээр бэлэг барина гэдэг миний хувьд их аз завшаантай зүйл л дээ. Нийт шүлгээ ирүүлж, оролцсон та бүхэндээ баярлалаа.

Тэргүүн байрын шагнал хүртсэн Яруу найрагч Л.Ганзулын шүлэг

Гэргийн гэгээ

Дэргээд өнгөрдөг өдөр хоногуудад

Дэргэд гийсэн энхрийхэн минь дээ

Дэлхийн саран үзэсгэлэн гоо ч

Гэргийн гэгээтэй яахан дүйх вэ

Хатираад оддог хоног саруудад

Хажууд мандсан танхилхан минь дээ

Хаан тэнгэрийн наран илчтэй ч

Хайрын дэргэд юухан ч билээ дээ

Галигуулж холддог улирал жилүүдийг

Хамтдаа элээсэн гэгээн тавилан минь дээ

Гараг одод нь тэнгэрийн тэртээд дээ

Харин чи минь миний л зүрхэнд дээ

Дахилт:

Сэтгэлийн тэнгэрээс зөөлсөн асгарсан

Энэрлийн цагаан бороо гэж боддог доо, чамайгаа

Итгэлийн энгэрийг түшиж нялхарсан

Ээлтэй цагийн цэцэг гэж хайрладаг даа, чамайгаа

2018.02.02 Улаанбаатар хот.

Дэд байрын шагнал хүртсээн яруу найрагч Л. Түмэнжаргалын шүлэг

Бурханы цэцэг

Эхнэр бид хоёр гэртээ гурван цонхтой

Ээлжлэн ээлжлэн нар дагуулж зөөдөг нэг цэцэгтэй

Цэцэг минь, нэгэн өнгөнд сул ууссан

Гоо үзэсгэлэнтэйгээр орших хоёр хос навчтай

Ургамалын зөгийг өөртөө урин дуудах Бадамлянхуа мэт

Учралт ханиар минь тэд,тоосоо арчуулах дуртай

Бодьсадва, Цагаан дарь эхийн, төгс нигүүсэлийг олсон

Бурхадын цэцэгчин гэж ханийгаа би магтах дуртай

Эхнэр бид хоёр гэртээ хоёр сандалтай

Ээлжлэн ээлжлэн эрхлүүлж суудаг нэг л цэцэгтэй

Тэр минь, мунхаглал шуналын энэ хорвоод өөрийн биеэр амьсгалж

Нарны туяанд дэлгэрэн баясах онцгой түмэн увидастай

Бурхан завилгаанаар ургаж амиралдаг, Бадамлянхуа мэт

Буй биеийг минь нялхамсуулж, надаар услуулах дуртай

Гэгээрлийн гэрэлт наранд, дэлгэрэх хүмүүний сэтгэлийг олсон

Гэргий минь, усны мандал дээр мацаг барин хөвөх дуртай

Эхнэр бид хоёр гэртээ, нэг ортой

Ээлжлэн ээлжлэн зүүдэлдэг үр ганцхан цэцэгтэй

Ариун үнэрт тэр минь, оюун билэгт,мөнх төлөвийг илэрхийлсэн

Асрал нигүүслийн Бодьсадва азийн уугуул чанартай

Найман адислалт эрхэм тэмдгийн нэг, Бадамлянхуа мэт

Нарны туяагаар өөрийгөө арцалж, туршлагын усыг туулан хөгжөөд

Төгөлдөр Лянхуа нэрийг гэгээрүүлэн дэлгэрүүлвээ

Эхнэр бид хоёр гэртээ нэг л хүсэлтэй

Энэ цэцгэндээ өгөх нэг л нэртэй

Сэтгэвээс

Сэрэл мэдрэхүйг оюун ухаан ялан дийлсэний тэмдэг

Манзушир бурханы цэцэг хэмээвээ.

Гутгаар байрын шагнал хүртсэн яруу найрагч Ш.Бадамын шүлэг

1. Тэнгисийн дундах цор ганц мод чинь би

Тэвэрт чинь борхон бүжингүүд бий!

Үнэр болоод сэтгэлийн чинь зайд

Үүднээс нь л замчилдаг борхон бүжингүүдэд

Үнэнийг заах, үгүй дээ л хөлөөс нь толгой хүртэл цэцэг зулаад

Хөөрхөн алганд нь

Хоёулаа багтах ёстой!

2. Алганы чинь хонхорхойд тольддог ганц л шувуу бий

Аашныхаа зоргоор амиа хорлодогийг нь чи мэднэ

Нисэх нисэхгүйн завсар тэлчлээд

Нэрээр чинь дуудаад уйлдгийг ч чи мэднэ

Тэртээ өндрөөс шунган унахдаа

Тэвэрт чинь багтаж л амьд үлддэгээ тэр шувуу мэднэ

3. Анхалж чиний минь зурсан бидний хөрөг

Амилчхаад зүрхэн дундуур минь нисэлдэнэ

Хөнжилдөө булхсан ч харагдахгүй гэдэгтээ итгэдэг

Хөөрхөн үрс минь

Нуруун дахь бяцхан далиараа

Нуугдаж тоглон байгааг хараач,

Тэмдэгт хуруудаа нийлүүлчихээд

Тэнгэрийн цүнхээлд хөлөө дүрэн суудаг

Амьдрал минь,

Аз жаргалын бүлээхэн арал минь!

“Би эндээс явахгүй” уянгын драмын жүжиг

Хаана : Улсын Драмын Эрдмийн Театр

Хэзээ : 03 сарын 07нд 19:00 цагт, 03 сарын 08нд 15:00, 19:00 цагт

Тоглолын төрөл : Жүжиг

Үргэлжлэх хугацаа : 120 минут

Насны ангилал : 16+

Тасалбарын үнэ : 10000₮-25000₮

“Бүсгүй минь инээмсэглэж яваарай”

Хаана : Улсын филармони

Хэзээ : 03 сарын 07нд 19:00 цагт

Тоглолын төрөл : Концерт

Үргэлжлэх хугацаа : 80 минут

Насны ангилал : 6+

Тасалбарын үнэ : 25000₮

Тоглолтонд :

• МУГЖ С.Эрдэнэцэцэг
• МУГЖ Б.Мөнхбаатар
• СТА С.Баттулга
• СТА Н.Наранбаатар
• СТА Ц.Хулан
• СТА Б.Дэлгэрбаяр
• СТА Л.Насанбуян
• Б.Монголхүү
• Т.Отгонбаяр, гоцлол хөгжимчид оролцоно
• МУГЖ Б.Дашдондог
• МУГЖ Б.Сарантуяа
• МУСТА С.Наран
• Хөгжмийн зохиолч, продюсер МУСТА Б.Чинбат болон амьд хөгжмийн хамтлагын хамт
• Мөнхийн рэп
• Мөнхбат, Үүрээ
• Дижитал
• Бооёо (Шинэ үе)
• Агиймаа
• Сайхнаа нар оролцоно

“Эгшиглэнт” хүндэтгэлийн тоглолт

Хаана : The Corporate Hotel & Convention Centre

Хэзээ : 03 сарын 08нд 16:00 цагт

Уран бүтээлч : МУАЖ А.Долгор

Тоглолын төрөл : Концерт

Үргэлжлэх хугацаа : 120 минут

Насны ангилал : 6+

Тасалбарын үнэ : 50000₮

“Эрхэмсэг” хүндэтгэлийн тоглолт

Хаана : Соёлын төв өргөө

Хэзээ : 03 сарын 08нд 16:00 цагт

Уран бүтээлч : СТА Ө.Уянга

Тоглолын төрөл : Концерт

Үргэлжлэх хугацаа : 120 минут

Насны ангилал : 6+

Тасалбарын үнэ : 25000₮ 30000₮

“Хайрын бэлэг” концерт

Хаана : The Corporate Hotel & Convention Centre

Хэзээ : 03 сарын 08нд 19:00 цагт

Зохион байгуулагч : Corporate Entertaiment

Тоглолын төрөл : Концерт

Үргэлжлэх хугацаа : 120 минут

Насны ангилал : 6+

Тасалбарын үнэ : 180000₮ 80000₮

Тоглолтонд :

“Бүсгүй” тоглолт

Хаана : Мишээл экспо төв

Хэзээ : 03 сарын 08нд 19:00 цагт

Зохион байгуулагч : Хурд хамтлаг

Тоглолын төрөл : Концерт

Үргэлжлэх хугацаа : 4 цаг

Насны ангилал : 6+

Тасалбарын үнэ : 70000₮ 50000₮

“Эх үрсийн элбэрэл” тоглолт

Хаана : Улсын дуурь бүжгийн эрдмийн театр

Хэзээ : 03 сарын 08нд 19:00 цагт

Зохион байгуулагч : Nuans хамтлаг

Тоглолын төрөл : Концерт

Үргэлжлэх хугацаа : 120 минут

Насны ангилал : 6+

Тасалбарын үнэ : 40000₮ 20000₮

“Хайрын тухай” тоглолт

Хаана : ONE event hall

Хэзээ : 03 сарын 08нд 19:00 цагт

Зохион байгуулагч : 2016 entertaiment

Тоглолын төрөл : Концерт

Үргэлжлэх хугацаа : 120 минут

Насны ангилал : 16+

Тасалбарын үнэ : 60000₮ 25000₮

Г. МӨНХЦАЦРАЛ

Жил бүрийн 03-р сарын 08-нд тохиодог Олон Улсын эмэгтэйчүүдийн баяраар олон гайхалтай уран бүтээлчид тоглолтоороо эмэгтэйчүүдээ бэлэг барьдаг. Баярын энэ сайхан өдрөө эмэгтэйчүүд маань хайртай гэр бүл, хамт олон, найз нөхөдтэйгөө сэтгэл баясгасан тоглолт үзэж, дурсамж дүүрэн өнгөрөөхийг хүсдэг. Тэгвэл олон мянган эмэгтэйчүүд дундаас “400” хүнийг онцлон, Монгол поп опера Увертюра хамтлаг “VIP” тоглолтоо толилуулахаар болжээ.

Түмэн олондоо “Жамаас”, “Тэнгэр ээж минь өршөө”, “Тэнгэрийн хүү”, “Ээж минь”, “Халуун элгэн нутаг”, “Тэмээн сүргийн говь” зэрэг олон арван гайхалтай уран бүтээлүүдээ хит болгон хүргэж, хайр хүндлэлийг нь хүлээсэн тус хамтлагийн “VIP” тоглолтод бүх хит дуунууд нь зуун хувь амьд эгшиглэж, тав тухтай тансаг орчинд хүндэтгэлийн зоог, хундага дарстай халуун дулаан уур амьсгалтайгаар болох нь дамжиггүй. Тус тоглолтод МУГЖ Г.Эрдэнэбат, МУГЖ Г.Ариунбаатар зэрэг олон гайхалтай алдар гавьяатаа уран бүтээлчид урилгаар оролцож, тоглолтын үзэгч эмэгтэйчүүдээ магтан дуулцгаах аж.

“VIP” тоглолтын хамгийн чухал нь үзэгч бүр сэтгэл хангалуун байх учир, Увертюра хамтлаг гайхалтай дуу хөгжим, тав тухтай орчин, хүндэтгэлийн зоогоор бэлэг барихын зэрэгцээ азтай үзэгчдийг Хайнань аралд аялах эрх, Монгол аялал компанийн 3-10 %-ийн хөнгөлөлтийн эрх, Flex gym фитнесс төвд 50% хөнгөлөлттэй үнээр явах эрх, Pc mall их дэлгүүрийн азтай худалдан авагч болох эрх зэрэг олон зүйлүүдийг бэлтгэсэн байна. Тус тоглолтын тасалбарын хувьд нэг хүний 100.000 төгрөгөөр үнэлэгдсэн бөгөөд нийт 10 хүн 1.000.000 төгрөгөөр багцалсан тасалбарыг авч, нэг ширээнд тухлан сууж хүндэтгэлийн зоог барингаа хундага дарс шимж, тав тухтай орчинд тоглолтоо үзэх ажээ. Ийнхүү өөрсдийн гайхалтай уран бүтээлүүдээ хит болгон эгшиглүүлж, төр, түмний хайр хүндлэлийг хүлээж, Монгол төрийн үндэсний их баяр цэнгэл наадмыг гурвантаа нээж, сүүлийн арав орчим жил уран бүтээлээ тасралтгүй туурвиж, од болон гялалзаж яваа Увертюра хамтлагийн “VIP” тоглолт энэ жилийн эмэгтэйчүүдийн баярын хамгийн “ТАНСАГ” тоглолт болох нь дамжиггүй юм.

Дашрамд дуулгахад энэ жилийн эмэгтэйчүүдийн баярын хамгийн дурсамж дүүрэн тансаг тоглолт бол “Увертюра” хамтлаг “VIP” тоглолт байх болно гэдгийг УДЭТ-ын Ерөнхий найруулагч, Төрийн соёрхолт Н.Наранбаатар, Монгол Улсын гавьяат жүжигчин, Чингис хаан одонт Г.Ариунбаатар, Андра академийн гүйцэтгэх захирал, Мисс, Топ модель Х.Бадамгэрэл нар онцолжээ. Тоглолт 2018 оны 03-р сарын 08-нд 18:00 цагаас “UB event hall”-д 400 хүнд зориулагдана тоглогдох ажээ.

Хавар ирэхүйд хүн бүрийн сэтгэлд хачин гэгэлзсэн, хөнгөн мэдрэмж төрөх нь буй. Тэр гэгэлзсэн мэдрэмжтэй, дууны ая шүлгийн мөртүүд цуг ирэх нь хачирхалтай. Хаврын эхний энэ өдрүүдэд, хайр дурлал, гуниглал баяслыг хөгжөөхөөр яруу найрагч Ц.Хулан шүлгэн цэнгүүнээ та бүхэнд өргөх гэж байна. Түүний дөрөв дэх удаагийн “Хулангийн үдэш” цэнгүүн нь Олон улсын эмэгтэйчүүдийн эрхийг хамгаалах өдрийг угтан тохиож байна. Энд тэндгүй улстөржсөн, үл итгэлцсэн, бүсээ чангалсан амаргүй энэ нийгэмд хурц тод, цангинасан хоолойгоороо үнэнийг өгүүлэн шүлэглэх найрагч бүсгүй маань эерүү сайхан өнгийг авчирах нь ээ. Түүний “Хулангийн үдэш” яруу найрагийн цэнгүүнийг үзэгчид хүлээдэг болоод удсан. Хоёр жил тутамд болдог энэ арга хэмжээгээ нэг алгассан байсан учраас улам их хүлээлт үүсчээ. 2010 онд зохион байгуулж байсан түүний уран бүтээлийн анхны цэнгүүнд Төрийн шагналт, Ардын уран зохиолч Д.Пүрэвдорж гуай оролцож байсан билээ. Тэрээр энэ цэнгүүнд тэр хүн, энэ алдартан оролцоно гэж зарладаггүй. Зүгээр л “Хулангийн үдэш” болно гэсэн зарыг түгээдэг. Харин тэнд хэн, хэн ирсэн бол гэдэг үзэгчдийн хувьд жинхэнэ хүлээлт байдаг. “Болор цом”-ын тайзнаа нэг дор үзэгдэхээ байсан өвгөн найрагчид Хулангийнхаа үдэшт ирж, шинэ цагийн өнгө болох залуусыг Ц.Хулан онцлон урьдаг. Бас өнөө жилийн хувьд гавьяат жүжигчин Төмөрийн Ариунаа “Хулангийн үдэш”-т ирэхээ цахим хуудсаараа дамжуулан зарласан нь тэдний хамтран бүтээсэн сайхан дуунуудаас нь эгшиглэх нь гэсэн хүлээлт бий болгож байна. Тачигнасан өвлийг давсан монголчуудад хаврын урийг салхилуулан мэдрүүлэхээр “Хулангийн үдэш” болох нь. Энэ боломжийг бүү алдаарай.

Яг одоо Лос Анжелес хотын “Долби” театрт кино урлагийн шилдгүүдийг тодруулдаг 90 дэх удаагийн “Оскар”-ын шагнал гардуулах ёслолын ажиллагаа үргэлжилж байна. Энэ жилийн “Оскар”-ын шагнал гардуулах ёслолыг нэрт хөтлөгч Жимми Киммел хөтөлж буй юм. “Оскар”-ын хамгийн олон номинацид Мексикийн кино найруулагч Гильермо Дель Торогийн найруулсан уран зөгнөлт, драм төрлийн “The Shape of Water” кино 13 төрөлд нэр дэвшсэн байна.

Өнгөрсөн оны Оскарын шагнал гардуулах ёслолын үеэр шагналын эзний нэртэй дугтуйг сольж, уран бүтээлчдийг эвгүй байдалд оруулж байсан юм.Тодруулбал Уорен Бэтти, Фай Данэвэй нар шилдэг киноны шагналыг “Moonlight” бүтээлд олгох байсныг “La La Land” хэмээн алдаатай зарлаж байв. Дараах зурган дээр алдааг залруулж байгаа агшныг харуулж байна. Тэр үед дугтуй үнэхээр будилахуйц, тодорхойгүй нэр хаягтай байсныг харж болно.

Ёслолын ажиллагааг зохион байгуулагчид энэ удаад алдаагаа дахин давтахгүйн тулд өвөрмөц арга хэмжээ авсан байна. Шагналын эзний нэртэй дугтуй дээр Оскарын шагналын төрлийг маш том үсгээр бичдэг болжээ.Хамгийн эхний шагнал болох шилдэг хувцасны шагналын дугтуйг Эва Мэри Сэйнт барин тайзнаа гарч ирэх үед хүмүүс энэ өөрчлөлтийг анзаарч, сошиал сүлжээнд мэдээлж эхэлсэн байна. Мэргэжилтнүүд дугтуйн дээрх төрлийн нэрийг 72pt хэмжээтэй фонтоор бичсэн гэж тодорхойлжээ.

---

“Оскар”-ын хамгийн анхны шагналын эзнээр жүжигчин Сэм Рокуэлл тодорлоо. Тэрбээр “Three Billboards Outside Ebbing, Missouri” киноны дүрээрээ “Шилдэг туслах эрэгтэй” номинацийн эзэн болов. Харин “Шилдэг туслах эмэгтэй” номинацийн эзнээр “I, Tonya” кинонд тоглосон дүрээрээ жүжигчин Эллисон Жейнни хүртлээ. Тэрбээр анх удаагаа алтан хүний эзэн болж буй юм.

---

“Шилдэг дууны найруулга” төрөлд “Dunkirk” киноны дууны найруулгыг хийсэн Ричард Кинг, Алекс Гибсон нар ялалт байгууллаа. Ричард Кинг өнгөрсөн оны “Оскар”-ын шагнал гардуулах ёслолд мөн уг төрөлд ялагч болж, алтан хүний эзэн болж байсан юм.

“Шилдэг баримтат кино” номинацид “Icarus” баримтат кино тодорч, “Оскар”-ын эзэн боллоо. Уг уран бүтээлд тамирчид сэргээш хэрэглээд карьертээ хэрхэн хар толбо үүсгэж буй талаар гардаг юм.

“Шилдэг богино хэмжээний анимейшн” номинацийн эзнээр бүх цаг үеийн хамгийн шилдэг сагсчдын нэг Коби Брайнтын бүтээсэн “Хүндэт сагсан бөмбөг минь” анимейшн ялалт байгууллаа.

Б.АМАРТҮВШИН

“Цагаан дара эх оршвой” нээлттэй хэлэлцүүлэг өнөөдөр Богд хаан ордон музейд болж байна. Хэлэлцүүлэгт СУИС-ын Уран зургийн тэнхмийн Монгол зургийн багш, магистр С.Ганзам, Гурван шүтээн бурхан урлагийн төвийн урлаач Ч:Батзориг, МУИС-ийн багш, Доктор профессор С.Янжинсүрэн,, Буман ханд эмэгтэйчүүдийн холбооны тэргүүн Ч.Гүнээ нар оролцож байна. Тэд Монгол зурагт шүтээн урлагийн эзлэх байр суурь, бурхан бүтээх уламжлал, Дара эхийн дүрийн тухай ярилцахаар төлөвлөжээ. Энэ хэлэлцүүлэгт ирж Цагаан дарь эхийн үзэсгэлэнг сонирхох боломжтой юм.

Урин дулаан цаг ирж аялал зугаалга эхлэх гэж байгаатай холбогдуулан Монгол улсын 21 аймгуудын гайхамшиг болсон заавал очиж үзэх учиртай үзэсгэлэнт газруудын зарим хэсгийг танилцуулж байна.

АРХАНГАЙ АЙМАГ

1.Чулуутын гол

Хангайн нурууны Гурван Ангархай уулын баруун хэсгийн араас эх авч Даваатын гол нэртэйгээр урсан хэд хэдэн гол горхиудыг нийлүүлэн авч Чулуут гол болон 415 км урсаж Идэр голын баруун гарт очиж нийлнэ.

Усаа цуглуулах талбай нь 10750 ам.дөр.км, усны уналт нь 2000 м, гулдралын өргөн нь 80 м, гүн нь 3 м, урсгалын хурд нь 2 м/с ,усны жилийн урсан өнгөрөлт нь 25 шоо м хүрнэ. Хөндий, гулдрал нь хад чулуу ихтэй учраас Чулуут гол гэдэг нэртэй болжээ. Чулуут гол нь Тээлийн голын (их замын гүрнээс доош) адгаас доош Ацатын горхины адаг хүртэл 100 орчим км газарт 40-60 орчим м гүн хүрмэн чулуун хавцал үүсгэж урсана.

2. Хоргын тогоо

Хорго хэмээх газар Архангай аймгийн Тариат сумын төвд оршдог. Хэн ч саатан хоргодом энэхүү үзэсгэлэнт нутгийг 1965 оноос дархан цаазат газрын, 1994 оноос байгалийн цогцолборт газрын зэрэглэлээр улсын тусгай хамгаалалтад авчээ. Одоогоос 9 мянга орчим жилийн өмнө дэлбэрч байгаад унтарсан галт уул юм гэдгийг манай газар зүйн эрдэмтэд тогтоожээ. Өөрөөр хэлбэл энэ нь манай орны унтарсан галт уулуудын дотроос хамгийн сүүлд унтарсан галт уул юм. Хорго уул нь далайн төвшинөөс дээш 2240 метрийн өндөр бөгөөд Хорго уулаас оргилон гарсан халуун хайлмал бодис магма нь газрын уруу даган зүүн тийшээ Суман, Чулуут голын хөндийгөөр зуугаад километр урссан байдаг. Энэ замаар барагцаалбал 10-20 километр өргөн хөндийгөөр урссан магма нь 40-50 метр зузаан хүрмэн чулуун хучилга болон царцсан байж магад гэж эрдэмтэд таамагласан байдаг. Мөн Хорго уулыг 2 удаа дэлбэрсэн гэж ч ярилцдаг. Уулын тогооны амсар нь 50 градус орчим налуу, 100 орчим метр гүнзгий 300-400 метр диаметртэй дугуй хэлбэртэй. Хоргын тогоон дотор нь сандал, ширээ шиг том том хүрмэн чулуу ундуй сундуй хөглөрч байдаг учир явахад бэрхтэй. Тогоон дотор зөвхөн баруун талаас нь л маш болгоомжтой орж болно. Хорго уулаас урагш зургаан километр орчимд Суман голын зүүн гар талд Тариат сумын төвөөс баруун урагш 3 орчим километр зайтай газарт чулуун гэр гэж сонирхолтой үзмэр бий.

3.Тэрхийн цагаан нуур

Хангайн нуруунаас эх авсан Хойд, Урд Тэрхийн голын урсгал Хорго галт уулын халуун хайлмал бодист боогдон үүссэн цэнгэг уст нуур юм. Урт нь 16 км, өргөн нь 4-10 км, 61 ам дөр.км талбайтай, Гүн нь 20 гаруй метр, д.т.д 2060 м өндөрт оршино. Цурхай зэрэг Сэлэнгийн савын загастай. Мөн ховор шувууд амьдардаг. Нуурын Толгой нь Хоргын дархан газарт багтдаг. Дундуур нь гол урсдаг бөгөөд Суман гол гэсэн нэртэй

4.Суварга хайрхан уул

Суварга хайрхан уул нь Архангай аймгийн Цэнхэр сумын нутагт орших бөгөөд хангайн уулархаг мужийн савд багтах байгалийн өвөрмөц тогтоцтой үзэсгэлэнт сүрлэг уул юм. Энэ уулыг галт уулын гаралтай гэж үздэг. Энэ хайрхан нь Завхан аймагт байдаг Отгонтэнгэр хайрхантай өөд өөдөөсөө харсан байдаг. Хайрханы суга бэлээр адуу мал бэлчиж, өвс ногоо сайхан ургадгийн дээр суга бүхэн нь алт мөнгө зэрэг эрдэс баялгаар арвин байдаг. Тийм учраас бусдын гарт эвдүүлэхгүйн тулд Төрийн тахилгат хайрхан болгосон. Нөгөө талаас энэ хайрхан усны ундарга, усны эцэг болсон хайрхан ажээ. Тамирын гол, Цэнхэрийн гол, Орхон голын эх болсон уул хэмээн нутгийн иргэд ярьдаг. Хэрвээ байгалийн зүй тогтоцыг алдагдуулбал баруун зүгийн амйгууд нь усгүй болох аюул нүүрлэнэ гэж үздэг. Уулын ноён оргилоос доош энгэр талд тунгалаг устай нуур бий. Энэ нууранд сүсэгтэн олон сүүгээ өргөж, алт мөнгө шидэн ирээдүйн амьдралаа даатгадаг байна. Нууранд хүрэхийн тулд зөвхөн мориор 8 километрийн бартаатай зам туулдаг. Нууранд нь хүрэх амаргүй боловч зорьж очсон хүний хэрэг зориг бүтдэг хэмээх домог бий.

5.Тамирын гол

Хангайн нурууны салбар Гурван ангархай, Цохиотын нуруунаас эх авч урсдаг. Хойд, урд Тамир голууд нийлж Тамир гол нэртэй болно. Энэ нь заримдаа Гурван тамир гол гэж нэрлэгддэг. Урд Тамир гол 165 километр урт, дээд хэсэгтээ Хошгот, Архошгот голуудыг нийлүүлэн авч урсдаг. Хойд Тамир голын урт 180 километр,нь дээд хэсгээрээ эгц хажуу бүхий нарийн хөндийгөөр, унал ихтэй, хурдтайгаар урсдаг. Баруун гарын эрэг нь хар модон ойтой. Тамир голын хөндий доошлох тусам өргөснө. Голын өргөн нь 40-70 метр, гүн нь 2-3 метр, урсгалын хурд нь 2 метр секунд байдаг. Хоёр Тамир гол нийлж 52 километр урсаад Орхон голын зүүн гарт цутгадаг. Тамир голын ус цуглуулах талбай нь 13100 хавтгай дөрвөлжин километр. Тамир гол түргэн урсгалтай уулын гол бөгөөд хур борооны үед усны төвшин богино хугацаанд огцом дээшилж, түргэн татардаг. Хоёр Тамир гол нийлсэн бэлчирээс доошхи голын хөндийгөөр улиас, бургасан шугуй шигүү ургасан байдаг. Өвөлдөө ёроолгүй бүрэн хөлддөг.

6.Булган уул

Булган уул нь Архангай аймгийн Цэцэрлэг суманд оршдог бөгөөд байгалийн үзэсгэлэнт байдал, түүхийн дурсгалт зүйлсийг нь хамгаалах зорилгоор 1965 онд улсын тусгай хамгаалалтанд авсан. 1995 онд УИХ-ын 26 дугаар тогтоолоор байгалийн дурсгалт газрын ангилалд шилжүүлсэн. Булган уул нь урсгалт газрын дундуур зүүн хойш чиглэн тогтох бөгөөд хоёр Тамирын голын усны хагалбар болдог.

Булган уул нь ой мод, хадлан бэлчээрийн ургамлаар нэн баялаг бөгөөд тус орны ой хөвч, ойт хээрийн бүсэд тохиолддог ургамлын ихэнх зүйл ургадаг. Гүзээлзгэнэ, хад, тошлой, самар, таван салаа, тарваган шийр, сөд, царван, алтан гагнуур, бамбай, ганга, нохойн хошуу, гишүүнэ, хунчир зэрэг эмийн ургамалтай. Мөн цагаан төмс, мэхээр, бүүргэнэ, гоньд зэрэг хүнсний ургамалтай. Булган ууланд хангайн бүсэд ургах хар мод, хуш зэрэг шилмүүст мод, хус, улиас, улиангар, хайлаас зэрэг навчит модод ургана.

Булган уул нь хүн ам олонтой, хөл хөдөлгөөн ихтэй Цэцэрлэг хотод ойрхон байдаг учир ан амьтад нь дүрвэн зайлсан байдаг. Буга, бор гөрөөс, хүдэр, шилүүс, гахай, мануул, хэрэм, жирх, үен солонго, чоно, туулай зэрэг амьтад мэр сэр үзэгдэнэ. Ятуу хөтүү, бүргэд, ууль, шар шувуу, харцага зэрэг жигүүртэн шувууд бий.

7. Тайхар чулуу

Архангай аймгийн Их тамир сумын нутагт Тамирын голын хөвөөнд орших, бүдүүн ширхэгт боржин чулуун цохио. VII–IX зууны бичээс дурсгалын зүйл ихтэй.

Энэхүү чулуун хөшөөний тухай олон домог, шинжлэх ухааны тайлбарууд байдаг. Тайхар чулуу нь газрын байрлалын хувьд урдуур хойгуур нь өндөр дэнж (Хар эрэг)-тэй, харалдаа ард нь Тайхар чулуу руу харсан хадан хясаа бүхий намхавтар уултай (Улаан толгой) бөгөөд олон жилийн өмнө урд хойд хоёр эргийн хооронд их хэмжээний ус урсдаг, арын уул нь Тайхар чулууг хүртэл урагшаа үргэлжилсэн байрлалтай байсан. Гэвч он цагийн аясаар уул элэгдэж, ус ширгэж үгүй болох үед уулнаас үлдсэн хэсэгхэн чулуу нь өнөөдөрийн Тайхар чулуу хэмээх байгалийн үзэсгэлэнт нэгэн бүтээл болон үлджээ.

8. Хар балгас

МЭ YIII-IX зуунд оршин тогтнож байсан Уйгурын хаант улсын нийслэл Орду-балык буюу Хар балгас хэмээх Монголын төдийгүй дэлхийн түүх соёлын үнэт өв-их хотын үлдэгдэл нуранхай Архангай аймгийн Хотонт сумын нутагт Хархориноос зүүн хойш 40 км-т Орхоны хөндийд бий.

Энд Уйгурын хааны төрийн өргөө, төрийн яамд, гар үйлдвэр, худалдааны хороод, шашны сүм бүхий 25 орчим км үргэлжилсэн их хот байсныг судлан тогтоосон байна. Хар балгас хот нь төдийлөн удаан оршин тогтнож чадалгүй 840 онд Киргизүүдийн дайрантанд өртөн түймэрт шатаж,сүйдсэн ажээ.

9. Билгэ хааны цогцолбор

Билгэ хааны цогцолбор Архангай аймгийн Хашаат сумын Цайдам бригадын нутагт Өгий нуураас баруун урагш 36 км, Хархориноос хойш 47 км зайд Хөгшин Орхон голын зүүн эрэг, Цайдам нуурын баруун өмнө оршдог. Эл дурсгал нь Хөшөө цайдмын дурсгал, Орхоны хөндийн дурсгал, Культегины бичээс, Билгэ хааны дурсгал гэх мэтээр нэрлэгдэн 100 гаруй жилийн турш судлагдсаар иржээ.

Билгэ хаан болон Культегины эдгээр цогцолбороос шавар сав, төмрөөр хийсэн аж ахуйн болон гоёл чимэглэлийн зүйлс, вааран дээврийн хэсэг, тосгуур зэрэг 2000 орчим эд өлгийн зүйл олджээ. Вааран дээврийн хагархай дээр нүүдэлчид морин давхиан дунд харвалдаж буй дүрс байсан нь судалгааны чухал дурсгал болдог. Чулуун хашлага бүхий дөрвөлжин булшны ор олдсоныг судлаачид жинхэнэ булш биш харин эзний оршуулгыг бэлгэдэн хийсэн зан үйлийн шинжтэй гэж дүгнэжээ. Хүн хөшөөд нь тухайн үеийн хүмүүсийн дүр төрх, хувцас хэрэглэл, гоёл чимгийг бодитойгоор илэрхийлжээ. Хөшөө цайдмын эдгээр дурсгалууд мянга гаруй жилийн түүхэндээ ихээхэн эвдэрч гэмтсэн боловч ЮНЕСКО “Дэлхийн гайхамшигт үнэт зүйл болох нь” гэдэг зэрэглэлээр дэлхийн соёлын өвд 1996 онд бүртгэн авсан байна. Монгол улс 20.8 км.кв талбайг 1961 онд улсын хамгаалалтанд авчээ.

БАЯН-ӨЛГИЙ АЙМАГ

1. Ёлтын сав газар

Ёлтын сав газар нь Алтай суманд байрладаг. БНХАУ-тай хиллэдэг бөгөөд Алтай таван богдын байгалийн цогцолборт газрын үзэсгэлэнт газруудын нэг. Уг газар нь унаган төрөхөө харьцангуй хадгалсан, дэлхийд ховордсон амьтан, ургамлын тархсан нутаг, ойгоор бүрхэгдсэн үзэсгэлэнт байгальтай юм.

Энэ бүс нутаг нь байгальд гарч буй хувьсал, байгалийн иж бүрдэлийн өөрчлөлтөд уур амьсгалаас үзүүлэх нөлөө хамгийн чухал байр суурийг эзэлдэг байна. Алтай сумын нутаг дэвсгэр нь дэлхийн бөмбөрцөгийн хойд хагасын дундад өргөрөгт багтдаг учир эх газрын эрс тэс уур амьсгал зонхилно.

2. Алтай таван богдын байгалийн цогцолборт газар

Монгол орны хамгийн баруун зах, хамгийн өндөр цэг бүхий Алтай Таван Богд нь Монгол Алтайн нурууны “хоймор” юм. Хүйтэн /4374 м/, Найрамдал /4192 м/, Бүргэд /4068 м/, Малчин /4051 м/, Өлгий /4050 м/гэсэн таван үндсэн оргилтой. 1996 улсын тусгай хамгаалалтад авч Байгалийн цогцолборт газруудын нэгээр бүртгэсэн. Тус аймгийн алал жуулчлалын томоохон чиглэлүүдийн нэг бөгөөд олон орны уулчид авиралт хийхээр байнга ирдэг. Авиралт хийхэд хамгийн тааламжтай үе нь намар.

Цаг агаарын хувьд хамгийн тогтворгүй газруудын нэг.Нэг өдрийн дотор нар шарж, цас, бороо орж, шуурга тавих нь энгийн үзэгдэл. Алтай Таван Богд ууланд Монголын хамгийн том гурван мөсөн голууд буюу Потанинын мөсөн гол, Александрын мөсөн гол, Гранегийн мөсөн гол байдаг.

Аймгийн төвөөс 200 км.

3. Потаны мөсөн гол

Монгол Алтайн нурууны Алтай Таван Богд ууланд Потанин, Александр, Гране гэсэн 10 гаруй том мөсөн голууд байдгаас хамгийн том, хамгийн урт Потаниний мөсөн гол юм. Мөсөн голын урт нь 20 км, өргөн нь 5 км, эзлэх талбай нь 53.5 ам/км гэж гэсэн газарзүйн тодорхойлолт байдаг ч үнэн хэрэгтээ Потанин мөсөн гол бидний үед урт нь 10.4км, талбай нь 24.3 ам/км болсон байна. Урсах явц нь 4365 метрээс 2873 метрт явагдагдана.

Энэ мөсөн голыг 19-р зууны сүүлч 1876-1880 онуудад Монгол нутгаар хоёр удаагийн газарзүйн судалгааны экспедици зохион байгуулж байсан Оросын судлаач эрдэмтэн Потанины нэрээр нэрлэсэн. Мөсөн гол гэдэг нь уулархаг, налуу газарт олон мянган жилийн мөс, цас, хуримтлагдан нягтарснаас болж бий болдог, мөсөн голууд ихэнхдээ мөстлөгийн үед үүссэн байна. Мөсөн гол нь өндөр уулын бүст хүндийн хүч, тал газарт мөсний зузаан буюу өндрөөс хамаарах даралтаас шалтгаалан урсдаг, аварга том мөсний бөөгнөрөл гэж ойлгож болно.

Сүүлийн жилүүдэд дэлхийн дулаарлын нөлөөгөөр мөсөн гадаргын талбай эрс багасч, олон мөсөн голууд хайлж устах аюулд ороод байгаагийн нэг Потанины мөсөн гол болж байна. Потаниний мөсөн голын хайлах үйл явц нь 20 зууны эхээр эхэлсэн бөгөөд мөстлийн хайлах хэмжээ нь 2005 онд мөсөн голын хайлах бүсэд дороос дээшлэх тутам багасаж 378-242 см болжээ. Уур амьсгалын өөрчлөлт, дэлхийн дулаарлаас шалтгаалан монголын болон гадны судлаач эрдэмтэд монголын мөсөн голууд энэ хурдаараа хайлбал 2090 он гэхэд хайлж дуусна гэж тооцоолсон байдаг.

4. Бага Ойгарын цагаан салаагийн хадны сүг зураг

Баян-Өлгий аймгийн Улаанхус сумын нутагт Алтай таван богдын Бага Ойгар, Усайн Цагаан салаагийн голын савд байдаг. Өргөн нь 500 метр, урт нь 15 километр үргэлжлэх нутагт тархсан хадны сүг зураг бөгөөд шинэ чулуун зэвсгээс хүрэл зэвсгийн үе хамарсан нийт 8000 жилийн түүхийг агуулдаг.

5. Бага Түргэний хүрхрээ

Алтай Tаванбогдын байгалийн цогцолборт газрын үзэсгэлэнт газруудын нэг нь Цэнгэл сумын Хотон, Хурган нуурын хөндийн Бага түргэнийн хавцалд орших Бага түргэний хүрхрээ юм. Уг хүрхрээ мөнх цаст уулсаас эх авч урсаж байгалийн үзэсгэлэнт гайхамшигийг цогцлоосон онгон зэрлэг байгаль дунд оршдогоороо онцлог юм.

Хүрхрээний өндөр нь 15 метр бөгөөд энэ нь тус аймагт оршиж буй хүрхрээнүүдийн хамгийн өндрөөс унан урсаж буй хүрхрээ болж тооцогддог. Эргэн тойрон дахь уулсаараа Сибирь гацуур, шинэс мод, хонин аарц ургадаг болБага Түргэний голын хавцал нь бор бургас, бутлаг ургамлаар баялаг.

6. Толбо нуур

Баян-Өлгий аймгийн төв Өлгий хотоос урагш 45 км-т, Өлгийгөөс Ховд хот орох төв замын дагууд Толбо нуур оршино. Энэ нуур нь зүүн өмнөөс баруун хойш сунаж байрлана. Нуурын хотгор тектоник гаралтай, цэнгэг устай, мөстлөгийн гаралтай нуур – хамгийн урт 21,5 км, өргөн 6 км хүрч усны мандал нуурын зүүн урд 2089м бол баруун хойд хэсэг Түргэний голын хавьд 2079м байна. Толбо нуур 1000-1500 метрийн харьцах өндөртэй хад асга бүхий нүцгэн уул нуруугаар хүрээлэгдэнэ. Нуурын эргэн тойрны уулсад эртний мөстлөгийн ул мөр тод ажиглагддаг, одоо хир нь Хүнгүй нуруу, Хатуугийн уулс /3820 м/ зэрэг зарим уулын оргилд бага зэрэг үлдэгдэл мөс цас харагдана. Толбо нуурт хэд хэдэн жижиг арал байдгаас хамгийн том нь усны мандлаас дөнгөж цухуйх 4 м өндөр Гичгэний толгой юм. Нуурын ус хуралдуулах сав газрын талбай 1980 хавт.дөр.км юм.

7. Ачит нуур

Алтайн уулархаг нутаг нуур нилээд олонтой боловч Хангайн, Хэнтийн уулсыг бодвол харьцангуй цөөн юм. Ачит нуурын усны ил талбай 311 хавт.дөр.км, хамгийн урт хойноосоо урагш 30 км, өргөн 16 км хүрэх ба 1464 метрийн үнэмлэхүй өндөрт оршино. Ачит нуур 10500 хавт.дөр.км талбайгаас усжиж байгаа нь Ховд голын ус хуралдуулах сав газрын 21 хувьтай тэнцүү байна.

Монгол Алтайн нурууны томоохон салбар Сийлхэм, Түргэний нурууны хур цас, мөсөн голоос эх авч урсах Цагаан нуурын гол, Хатуугийн гол, Бөхмөрөн, Улиастай зэрэг хэд хэдэн гол горхийн усаар тэжээгдэж илүүдэл усаа Усан хоолой нэртэй ганц голоор Ховд голд өгнө. Нуурын гүн, усны нөөц тодорхойгүй. Э.М.Мурзеавын тэмдэглэснээр хойт талдаа 10 метр гүн байсан бөгөөд өмнөд эрэг хавьд үүнээс гүн байж болох юм.

БАЯНХОНГОР АЙМАГ

1.Цагаан агуй

Баянхонгор аймгийн Баянлиг сумаас зүүн хойд зүгт 40 км зайтай оршино. Агуйн үүд нь баруун урд зүгт харсан байрлалтай, агуй нь хоорондоо холбоотой гурван үндсэн том тасалгаатай. Агуй нь өндөр хэсэгтээ 10 м, өргөн хэсэгтээ 8 м хүрэх бөгөөд нийт урт нь 32 метр байна. 700000 жилийн тэртээд хүн амьдарч байсан ул мөрийг 1987, 1989, 1995, 1996, 1997, 1998 онуудад хийсэн малтлага судалгааны үр дүнд тогтоожээ. Эдгээр судалгааны үр дүнд Монгол болон Төв Азийн энэ бүс нутаг дөрөвдөгч галавын сүүл үед урин дулаан уур амьсгалтай байсныг судлаачид тогтоожээ.

2.Бичигт хад

Баянхонгор аймгийн Баянлиг сумын нутаг Их Баян уулын Бичигтийн амны хаданд эртний хүмүүс олон зуун хүн, амьтан, тамга тэмдгийн зураг цоолборлон сийлж үлдээжээ. Бичигтийн амны орчим хүн нутаглахад одооныхоос илүү тохиромжтой, байгаль газарзүй, цаг уурын нөхцөл бүрэлдсэн нутаг байсан нь тодорхой. Тиймээс энд наад зах нь хүрэл зэвсгийн үеэс буюу ойролцоогоорХ.Т.Ө 3000жилийн тэртээгээс дундад эртний үе буюу манай эриний наймдугаар зууныг хүртэлх түүхийн олон үеийн туршид энэ амны хадны зургийг дахин дахин нэмж цоолборлосоор ирсэн ажээ.

Энд хамгийн олон зурсан амьтан бол янгир, дараа нь буга орно. Тэдгээрийг ганц хоёроос авахуулаад бүхэл бүтэн сүргээр нь цоолборлосон байдаг. Янгир, бугыг анчид ганц нэгээрээ буюу хэсэг бүлгээрээ нум сумаар харван намнаж буй байдлыг үзүүлсэн сэдэвтэй зураг олон байгаа нь тэр үеийн хүний амьдралд ан агнуур хичнээн чухал байсныг харуулах чухал баримт юм.

3.Шатар чулуун хөшөө

МЭӨ 3000 жилийн тэртээх хүмүүсийн оюуны соёлын гайхамшигт өв бол Баянхонгор аймгийн Эрдэнэцогт сумын нутагт байрлах Шатар чулууны хөшөө дурсгал юм. Энэ чулууны хөшөө дурсгалын цогцолбор нь буган чулуун хөшөөн сийлбэр хээтэй, дөрвөлжин чулуун хашлага бүхий оршуулгатай, Монгол шатрын дүрстэй янз бүрийн амьтны чулуун сийлбэрүүд бүхий хиргэсүүрүүдээс бүрдэнэ. Манай эриний 450-550 оны үед Монголчуудын өвөг дээдэс Хүннү нар шатар тоглодог байсныг Английн эрдэмтэн Г.Мэрэй “Шатрын товч түүх” номондоо бичсэн байдаг. Энэ сурвалжаас үзвэл Хүннүгийн үеийн уг хөшөө нь Монголчууд эрт үеэс шатар тоглодог байсныг илтгэсэн дурсгал ч байж болох юм.

4.Түрэгийн үеийн бичээс

Баян-хонгор аймгийн Галуут сумын нутагт VII-VIII зууны үед Монгол нутагт төрт улсаа цогцлоон байгуулсан Хөх Түрэгийн хаант улсын үед холбогдох язгууртны тахилын онгон байдаг. Энэ нь дөрвөн хавтан чулуугаар хашлага хийж дээрээс нь голдоо нүхтэй чулуугаар тагласан онгон бөгөөд хавтангийн гурав нь сийлмэл хээтэй, нэг хавтан дээр эртний Түрэгийн гурван мөр руни бичээс сийлээстэй.

5.Бүгийн цавийн хоолой

Бүгийн цавын хоолойд зочлох үед өөр гариг ертөнцөд хөл тавьсан мэт сэтгэгдэл төрж, одоогоос 150 гаруй сая жилийн тэртээх амьдрал төсөөлөгддөг. Тэнд ертөнцийн гайхамшиг хэмээгдэх 50-иас 80 тонн жинтэй, 20 шахам метр урт, 1.5-аас 30 метр жижиг болон аварга том үлэг гүрвэлүүдийн бүхэл саланги холилдож чулуужиж хоцорсон яс, дун хясаа зэрэг цэнгэг усны амьтадын чулуужсан яс, далайн ёроол байсныг илтгэх шавар хэрмэн цавуудыг үзсэнээр монголын говь нутаг нь 200-100 сая жилийн тэртээ гадагшаа урсгалгүй цэнгэг усны ай сав газар байсныг мэдэх болно.

6.Шаргалжуутын халуун рашаан

Шаргалжуутын халуун рашаан нь 108 төрлийг өвчнийг анагаах чадвартай, 108 төрлийн халуун, хүйтэн рашаануудаас бүрддэг. Хамгийн халуун нь +96 хэмийн халуун байдаг. Шаргалжуутын рашаан бүр нь хүний бие эрхтнүүдийн байгалиас урлан бүтээсэн хэлбэр дүрс бүхий хад, чулуунаас ундран гардаг. Тухайлбал, хоолой өвчнийг анагаах рашаан гэхэд хүний хоолойн хэлбэр дүрстэй хаднаас, шүдний рашаан гэхэд шүдний хэлбэр дүрс бүхий хаднаас оргилон гарч байдаг нь байгалийн сонин хачин гайхамшгийн нэг юм.

7.Их Богд уул

Говь-Алтайн нурууны ноён оргилуудын нэг, мөнх цаст Их Богд уул нь далайн түвшнээс дээш 3957 метр өргөгдсөн, Монголын их говьд орших атлаа хангайн байгалийг санагдуулам номин ногоон хөвд ургамал, өнгө алаглах цэцэгсийн хүрээлэн, хүрхрэн шуугих өндөр уулын түргэн урсгалт гол горхи, газар хөдлөлтөөс тогтсон байгалийн өвөрмөц сонин тогтоц, нуур, дэлхийд ховордож дархлагдсан аргаль, янгир, ирвэс зэрэг ховор ан амьтад, вансэмбэрүү, алтангагнуур, лидэр зэрэг эмийн ургамлуудыг үзэж болох юм.

Ууланд аялах дуртай аялагчдын сонирхлыг татдаг бүс нутгийн нэг нь их Богд уул юм. Их говийн дархан газар, байгалийн сонин тогтоц олонтой. Их Богд уул, Ичээтэй жарангийн нуруу, Өлзийт, Ноён, Тариат, Бургалтай зэрэг хараа булаам үзэсгэлэнт сайхан уулсаар чимэглэгдсэн болно. Хулан, хавтгай, аргаль, янгир, тэр ч байтугай Монголын улаан номд бичигдсэн олон олон ан амьтад бий.

Г.МӨНХЦАЦРАЛ

Монгол Улсын Үндэстний цөөнх болсон Казах түмний бүргэдээр ан хийх уламжлал, зан заншлыг сэргээх, хойч үеийнхэнд өвлүүлэн үлдээх зорилго бүхий “Хаврын бүргэдийн баяр” арга хэмжээ өнөөдөр “Чингисийн хааны хүрээ” жуулчны баазад эхэлнэ.

Бүргэдээр ан хийх уламжлалыг төв Азийн нүүдэлчдийн дунд 6000 жилийн өмнө үүсэж, өдгөө хүртэл хадгалагдаж ирсэн гэж үздэг бөгөөд энэхүү уламжлалыг хамгийн сайн хадгалж үлдсэн орон бол Монгол Улс юм. Тиймээс баялаг түүхтэй энэ арга хэмжээг дэлхий дахинд сурталчилж, Монгол Улсыг зорих жуулчдын урсгалыг нэмэгдүүлэх зорилгоор “Бүргэдийн баяр” арга хэмжээг жилд хоёр удаа буюу намар Баян-Өлгий аймагт, хавар Улаанбаатар хот орчимд зохион байгуулдаг уламжлалтай юм.

Өнөөдөр бүргэдээр ан хийх, Көкпар буюу тулам булаацалдах тэмцээн эхлэх юм.Бүргэдээр ан хийх тэмцээнд Н.Айшолпан, Д.Айгерим, Р.Нургайв, Б.Далайхан нарын 20 бүргэдчин оролцохоор бүртгүүлсэн байна. Харин маргааш Хамгийн сайхан үндэсний хувцас, морь, бүргэдийн тоноглолтой оролцогчийг шалгаруулахаас гадна бүргэдээр ан, тулам булаацалдах, газраас зоос шүүрэх тэмцээний шилдгүүдийг тодруулна.

БНМАУ-ын Төрийн хошой шагналт, анхны Ардын зураач, УГЗ, XX зууны манлай зураач О.Цэвэгжавын “Азарганы ноцолдоон” зургийг хөшөө болгон мөнхлөхөөр болжээ. Энэхүү төслийн ажлыг Улаанбаатар хот дахь Дорнод аймгийн залуучуудын холбооноос санаачлан Дорнод аймагт босгох аж. Өвгөдийнхөө агуу бүтээлийг хойч үедээ сурталчлан таниулах гол зорилгыг агуулсан гэдгийг хэлж байлаа.

Цаг хугацааны эргэлтэд баларч, бүдгэрэлгүй мөнхөрч чадах намтар түүхээ бичих хувь хүн бүхэнд заяадаггүй. Харин Очирын Цэвэгжав авьяас билгээрээ Монголын дүрслэх урлагийн түүхэнд өөрийгөө алтан үсгээр мөнхөлж чадсан бахархалт хүн.

Дэлхийн энтэй найрагч Долгорын Нямаагийн дурсамжийн номыг МУСГЗ, сэтгүүлч И.Рэнчинханд хэвлүүлжээ.
Уг номонд түүнтэй хамт ажиллаж байсан зохиолч, сэтгүүлчид, ойр дотно явсан 55 хүний хөрөг дусамж гол байрыг эзэлсэн байна. Мөн түүний өөрийн бичсэн нийтлэл, орчуулгын шүлгүүд, гэрэл зургийг багтаасан нь номыг уншууртай болгожээ. Төрийн шагналт, Ардын уран зохиолч Д.Цоодол, Б.Догмид, МУСГЗ сэтгүүлч Б.Ганчимэг, Г.Аким, Ц.Дашдондов нарын уран бүтээлчид их зохиолчийг хүн чанартай, зөөлөн дөлгөөн, даацтай уран бүтээлч байсныг нь дурсан бичжээ.