Category: соёл-урлаг

Морин хуурын чуулгын жил бүр тоглодог уламжлалт тоглолтуудын нэг болох “Novel Melody” 5 дах жилдээ тоглогдох гэж байна. Морин хуурын чуулгын уран бүтээлчдийн мэргэжлийн ур чадварыг харуулсан шинэ хөгжим, шинэ дуугаралт, шинэ өнгө аяс, агуулга гээд бүгд шинэлэг байдгаараа өвөрмөц тоглолт болдог. Харин энэ жилийн тоглолт өнгөрсөн 4 жилийн “Novel Melody” тоглолтоос үзэгчдийн таашаалыг хүртсэн шилмэл бүтээлүүдээс түүвэрлэн хүргэхээр боллоо. Мөн энэ удаагийн тоглолтыг Морин хуурын чуулгын залуу удирдаач Н.Жигжиддорж удирдан явуулах ба хөгжмийн зохиолч Х.Алтангэрэлийн “Төгсгөлгүй” танго сюитийг анх удаа морин хуурын чуулгад тоглож үзэгчдийн хүртээл болгох гэж байна.Тоглолт 2018 оны 04-р сарын 16-ны 19:00 цагт Улсын Филармонийн концертын танхим болно.

Пуэрто-Рикогийн поп дуучин Луис Фонсигийн “Despacito” дуу youtube-ийн хамгийн өндөр хандалттай дуугаар шалгараад байна. Өчигдрийн 18 цагийн байдлаар “Despacito” 4971026718 буюу 4.9 тэрбум гаруй хандалттай явж байлаа. “Gangnam style” дуугаараа шуугиан дэгдээж К-поп урсгалыг дэлхий даяар сурталчилж чадсан БНСУ-ын дуучин PSY ч мөн адил 2012 онд ингэж шуугиан дэгдээж Канадын алдарт дуучин Жастин Биберыг ардаа орхиж байсныг хөгжим сонирхогчид мэднэ. “Gangnam style” дуу одоогоор 3.1 тэрбум хандалттайгаар youtube-ийн жагсаалтын дөрөвдүгээр байрт явж байгаа юм.

“Despacito” дуу өнгөрсөн оны нэгдүгээр сард youtube-т байршсан цагаасаа дэлхий нийтийг байлдан байгуулж, энэ дуу цангинаагүй газар, тосгон, гацаа, сонсоогүй хүн гэж бараг үлдээгүй байх.

Дуучин Луис Фонси реппер Дэдди Янкитай хамтран энэ дууг анх дуулахдаа ингэж дэлхийг байлдан дагуулна чинээ мөрөөдөх байтугай төсөөлөөгүй аж. Гарсан даруйдаа Латин Америкийг байлдан дагуулж бусад орны хөгжим сонирхогчдын анхааралд өртжээ. Өнгөрсөн оны дөрөвдүгээр сард Жастин Бибер “Despacito”-г Луис Фонси, Дэдди Янки нартай хамтран ремикс хувилбарыг нь дуулсан нь энэ бүтээлийг англи хэлээр ярьдаг орнуудад түгэхэд маш их хувь нэмэр оруулсан байна.

“Despacito” гэх латин үгийг англиар “Slowly” буюу “Удаан” хэмээн орчуулдаг юм байна. Дууны шүлэг нь янаг тачаангуй, эрэгтэй, эмэгтэй хүний нэгнээ хүсэмжилсэн өнгө аясыг илэрхийлсэн бөгөөд романтикаар, зөөлнөөр, удаанаар тэмүүлэх гэсэн өнгө аясыг илэрхийлэхдээ эмэгтэй хүний гоо сайхныг магтан дуулсан утга агуулгыг гаргажээ.

Удаанаар…

Анхилхан хүзүүг чинь амьсгалаараа төөнөе

Амраг минь зөөлнөөр шивнээч

Чи надгүйгээр байж чадахгүй

Удаанаар…

Би чамайгаа удаанаар зөөлхөн үнсье

Хана, хэрмийг түшээд

Гоо сайхан биеийг чинь илбэхийг хүсэж байна

Дээш, дээшээ

Дээш, дээшээ

Чамайг үсээрээ наадан бүжихийг харахыг хүсэж байна

Аядуу зөөлөн хөдөлгөөн, хэмнэлийг чинь мэдрэхийг хүсэж байна

Хонгор минь чамайгаа дуу алдахад

Би нэрээ мартталаа мансуурсан байдаг

Удаанаар…

1996 онд “Макарена” дуу Billboard-ийн шилдэг 100 дууг тэргүүлснээс хойш уг жагсаалтад латин дуу багтаагүй байсан юм. Харин 21 жилийн дараа “Despac­ito” Billboard-д тэргүүлсэн нь латин дууны амжилтын буухиаг үргэлжүүлснээрээ онцлог.

Жил гаруйхан хугацааны дотор энэ дууны уран бүтээлчид олон шагналын эзэн болоод байна.

Өнгөрсөн оны арваннэгдүгээр сард Америкийн хөгжмийн авардст гурван номинацид нэр дэвшиж хоёрт нь шагнал хүртсэн бол Грэмми авардс, Латин Америкийн хөгжмийн авардст тус тус гурван номинацид нэр дэвшиж, “Latin Gram­my Awards”-ийн дөрвөн гол номинацийн шагналыг хүртсэн. Ингэснээр тус дууны уран бүтээлчид Америкийн дуу бичлэгийн холбооны “Di­amond” шагналыг хүртсэн анхны Латин Америк хүмүүс болжээ.

Луис Фонси 2015 оноос хойш дорвитой бүтээл гаргахгүй, уран бүтээлийн ажил нь зогсонги болоод байв. Ингээд хамтран ажилладаг дуу бичлэгийн студийнхэндээ “Хүмүүс сонсоод л өөрийн эрхгүй даган дуулдаг тийм гоё дуутай болмоор байна. Их эвтэйхэн, эвлэгхэн хөдөлгөчихөөр аядуухан хэрнээ хэмнэлтэй хөгжилтэй дуу хийцгээе” гэж санал гаргажээ.

Панамын дуучин, ая зохиогч Эрика Эндэр яг түүний сэтгэлд нийцэх бүтээлийн санаагаа гаргаад, хөгжмийг нь сонсгохоор Майами дахь Луис Фонсигийн гэрт очжээ. Луис сонсонгуутаа “Үүнийг далайн эрэг дээр хийцгээе” гэжээ. Ингээд Фонси дууны дундуур реппер дуулуулах шаардлагатай гэж үзээд Дэдди Янкид интернэтээр санал тавьжээ. Ингэж “Despacito” дуу бүтэж Пуэрто-Рикод төдийгүй Латин америкчуудын сонсох дуртай дуу болжээ. Удалгүй дуугаа дүрсжүүлж улмаар youtube-т байршуулсан нь энэ дууг бүтээсэн уран бүтээлчдийг хагас жил хүрэхгүй хугацааны дотор алдартай хүмүүс болгосон байна. Луис Фонси “Энэ дуу латин хүмүүсийг аз жаргалтай гэдгийг дэлхий нийтэд харуулж чадсан. “Despacito” дуунаас латин америкчуудын аз жаргал, эрч хүч, бас дур булаам тачаангуй, эрх чөлөөтэй байдал мэдрэгддэг” гэж тодорхойлжээ.

“Despacito” дуу 45 гаруй орны хөгжмийн жагсаалтыг тэргүүлсэн бөгөөд дэлхийн олон оронд уг дууг янз бүрийн арга техник, хөгжмийн зэмсгээр амилуулсан. Монголчууд хүртэл ятга, морин хуураар “Despacito”-г тоглож интернэтэд байршуулаад байгаа билээ.

Youtube-ийн хамгийн их хандалттай клипүүд

Гэгээн муза 14 дэх удаагийн олон улсын театрын наадам “Хүүхэд оролцооны бүтээл” болон “Драмын жүжиг”, “Хөгжимт жүжиг”, “Нэг хүний жүжиг” төрлөөр ирэх сарын 13-ны өдөр болно. Наадамд Монгол, ОХУ, Коссова, БНХАУ-ын ӨМӨЗО, АНУ, Аргентин, Украйн улсын уранбүтээлчид болон зочин шүүгчид оролцох юм байна. Энэ удаагийн наадмын “Нэр дэвшүүлэх комисс”-ийн нэгдүгээр шатны үзлэгт гадаад, дотоодын нийт 50 гаруй уран бүтээл бүртгэгдэж, 26 бүтээл шалгаран, хоёрдугаар шатны цомын төлөө өрсөлдөх аж. Шалгаруулалтанд оролцох 26 бүтээлд ойролцоогоор 500 гаруй уран бүтээлчид оролцох ба түүнээс 90 гаруй уран бүтээлчид дээрх 4 төрөлд нэр дэвшиж байгаа юм байна. Шалгаруулалтын тоглолт 2018.05.07-12-ны өдрүүдэд болох аж.

СУИС-ийн Радио Телевиз Медиа урлагийн сургуулийг үүсгэн байгуулагч, анхны захирал Бадраагийн Бадар-Ууганы нэрэмжит “Анхны бүтээл VIII” наадам энэ сарын 17-20-нд болно.

Тус наадмыг 2008 онд МУУГЗ, кино найруулагч Д.Хишигтийн санаачилгаар зохион байгуулж эхэлжээ. Үүнээс хойш жил бүр дотоодын их дээд сургуулиудын дунд Телевизийн шилдэг бүтээл, Радиогийн шилдэг бүтээл, Шилдэг богино хэмжээний кино бүтээл төрлөөр уламжлал болгон зохион байгуулж ирсэн бол 2012 оноос “Анхны бүтээл” наадам олон улсын наадам болон хүрээгээ тэлжээ. Түүнээс хойш Япон, Солонгос, Польш, Хятад зэрэг олон улсын уран бүтээлч бүтээлээ илгээдэг болсон.

Тус наадамд медиа урлагийн чиглэлээр суралцаж буй оюутнууд оролцох боломжтой.

Наадмын зохион байгуулах хорооны тэргүүлэгчээр СУИС-ийн захирал Э.Сонинтогос, бүрэлдэхүүнд “World” Телевизийн захирал “Пентатоник” наадмын тэргүүн Б.Долгион, “UBS” телевизийн дэд захирал Ж.Баяр, МУУГЗ кино найруулагч Д.Хишигт, МҮОНТ-ийн сэтгүүлч, СГЗ Г.Золжаргал, Урлаг судлаач Б.Наранзун нараас гадна гадаадын шүүгч багтжээ.

Тус наадмын Шилдгийн шилдэг бүтээл хоёр сая, Телевизийн шилдэг бүтээл, Радиогийн шилдэг бүтээл, Шилдэг богино хэмжээний кино бүтээл, Шилдэг гэрэл зургийн мультимедиа бүтээл, Шилдэг анимейшн, компьютер графикийн бүтээл тус бүр нэг сая төгрөгийн шагналтай байх аж.

Монголд “Хүүхдийн төв номын сан” үүссэний арван таван жилийн ой, дэлхийн хүүхдийн зохиолч Х.К.Андерсений мэндэлсний 203 жил олон улсын хүүхдийн номын өдөр тохиож байна. Энэ жил “Хүүхдийн төв номын сан” Монгол өв соёлоо таниулан суртчлах зорилгоор биет болон биет бус өвийн уламжлал болох морин хуур хөгжим, ардын аман зохиолоос дээжлэн хүргэх юм. Үүнд:

-Морин хуур хөгжмийн тухай “Хөхөө Намжилын домог”-ийг “Домог” хамтлагийн ахлагч СТА Б.Бат-Орших хуурдаж сонирхуулна.

-Монголын радиогийн хүүхэд залуучуудын редакцийн редактор Л.Мэндээхүү Монголын радиогийн “Үлгэрийн цаг”-ийг хэрхэн хөтлөн явуулдаг, үлгэрийн соёл, зан заншил, танин мэдэх, уламжлан хөгжүүлэх болон хүмүүжил, түүх, хэлзүйн зэрэг олон ач холбогдлыг тайлбарлан таниулна.

-“Шинэ Монгол” сургуулийн драмын дугуйлангийн багш, жүжигчин Б.Баттогтох хүрэлцэн ирсэн хүүхэд багачуудад “Могжоохон даагатай Жогжоохон хүү” үлгэрийг уншиж сонирхуулна.

-Хүүхдийн зохиолчид хүрэлцэн ирж шүлэг, уран бүтээлийн дээжээсээ уншиж өгнө.

-“Маамуу” зохион бичлэгийн уралдаанд шалгарсан хүүхдүүдийн шагналыг гардуулах юм байна.

Улсын Драмын Эрдмийн Театр энэ сарыг сонгодог жүжгийн сар болгон зарласан. Мөн дөрвөн сарын нэгэн инээдмийн баяр давхцаж байгаа тул хэд хэдэн инээдмийн жүжгийг мөн тавихаар болжээ. УДЭТ-ийн ерөнхий найруулагч

Н.Наранбаатар: Миний найруулсан хэд хэдэн жүжиг энэ сар тайзан дээр тоглогдоно. Үзэгчид жүжиг бүрээс өөр өөр ухаарал авч, өөр өөрийн онцлогийг харж, хэрэг болох зүйл байвал амьдралдаа хэрэгжүүлээсэй гэж хүсэж байна. Мөн инээдмийн баярыг тохиолдуулан инээдмийн жүжгийн өдрүүд үргэлжилж байгаа. Биднийг үргэлж дэмждэг эрхэм үзэгчид ирж алжаалаа тайлан инээд хөөртэй нэг үдшийг өнгөрүүлэх боломжтой юм.

Жүжигт тоглож байгаа жүжигчид болон тоглолтын талаарх товч танилцуулгийг хүргэе:

-Италийн алдарт зохиолч Нобелийн шагналт Дарио Фо “Чөлөөт хос” мюзикл инээдмийн жүжиг

Дүрүүдэд
СТА Ц.Баясгалан /Антония эхнэр/,
СТА Э.Тодгэрэл /Манбретто/,
Г.Дөлгөөн-Аюуш /профессор/ нар тоглоно.

Шекспирийн дайтай үнэлэгддэг Английн инээдмийн жүжгийн алдарт зохиолч Рэй Куни болон Ж.Чэпмэн нарын “Ор хөнжил ба ноёд хатагтай” зохиолоос сэдэвлэн бүтээсэн найруулагч Төрийн соёрхолт Н.Наранбаатарын найруулга“Эцсийн зогсоол зөвхөн чи” инээдмийн жүжиг

Алдарт зохиолч Н.Себастьяны зохиолоос сэдэвлэсэн Төрийн соёрхолт Н.Наранбаатарын найруулга “Нэргүй од” инээдмийн жүжиг.

Би эндээс явахгүй” уянгын драмын жүжиг.

Найруулагч: УДЭТ-ын ерөнхий найруулагч, Төрийн соёрхолт Н.Наранбаатар
Зураач: УДЭТ-ын ерөнхий зураач, Соёлын тэргүүний ажилтан Т.Ганхуяг
Зохиолыг шинэтгэсэн УДЭТ-ын утга зохиолын ажилтан Д.Мэндсайхан

Дүрүүдэд:
Дорлиг О.Гэрэлсүх СТА
Дулмаа Н.Баярмаа СТА
Сэржмаа Б.Одончимэг
Жамц Д.Баттөмөр СТА
Дэжид Ц.Баясгалан СТА
Цэвэг Г.Амгаланбаатар СТА
Должин Ж.Оюундарь МУГЖ
Лхамжав Ж.Пүрэвдорж СТА
Цэндмаа Г.Номуун
Батаа Ж.Ирмүүн
Осор Р.Адъяабаатар

Пүрэв Г.Алтангэрэл

СОНГОДОГ ЖҮЖГҮҮД

ТАСАЛБАРЫН ҮНЭ СУУДЛЫН ЗЭРЭГЛЭЛЭЭС ХАМААРАН: 10,000₮, 15,000₮, 20,000₮, 25,000₮

ИНЭЭДМИЙН ЖҮЖГҮҮД
ТАСАЛБАРЫН ҮНЭ СУУДЛЫН ЗЭРЭГЛЭЛЭЭС ХАМААРАН: 10,000₮, 15,000₮, 20,000₮
БАГЦЫН ТАСАЛБАР 3 ЖҮЖИГ 45,000₮ (15,000₮ ХЭМНЭЛТ) /03.26-НД ЗӨВХӨН УДЭТ-Н КАССААР ХУДАЛДААНД/

ТАСАЛБАРЫГ:
УДЭТ-ЫН КАСС
✔️WWW.TICKET.MN
✔️ҮНЭГҮЙ ХҮРГЭЛТ: 1900-1800

☎️ 70118187, 99026929, 99199794, 96117878, 89403070