Category: соёл-урлаг

“Монголын Үндэсний кино урлагийн академи”-аас сүүлийн зургаан жил тасралтгүй зохион байгуулж буй “Mongolian Academy Awards 2016” кино наадам эхлэхэд бэлэн болжээ.

Кино урлагийн салбар дахь ололт амжилтыг 17 номинациар шалгаруулж, Академийн шагнал гардуулдаг энэхүү наадамд 18 уран сайхны кино, гурван баримтат кино, таван богино хэмжээний бүтээл нийт 26 кино өрсөлдөхөөр бүртгүүлсэн байна.

Энэ жилийн тухайд өнгөрсөн бүтэн жилийн хугацаанд дэлгэцнээ гарсан 33 бүтээлээс шилдэг бүтээлүүд бүгд өрсөлдөж буйгаараа онцлог гэнэ. Тодруулбал, “Үргээлэг-2”, “Маш нууц”, “Атганд үлдсэн эрдэнэ”, “Содура”, “Зангараг”, “Өртөө,” Босуул”, “Элэг нэгтэн”, “Lovers”, “Эр хүн болгож өгөөч”,“Өнөр бүл өнөө цагт” зэрэг бүтээлүүд багтжээ.

Ирэх зургадугаар сарын 4-нд “Mongolian Academy Awards 2016” наадмын ёслол хүндэтгэлийн арга хэмжээ болж, шилдгүүд тодрох юм.

Тун удахгүй Олон Улсын хүүхдийн эрхийг хамгаалах баярын өдөр болно. Тус баярыг тохиолдуулан хошин урлагийн “Маск” продакшны уран бүтээлчид “Үзэсгэлэнт охин жонон хоёр” бүрэн хэмжээний хүүхдийн жүжгийг тоглохоор болжээ.

Энэ талаар тус продакшны жүжигчин Д.дэлгэрсайхан “Манай хамтлагийнхан мартагдсан, мартагдах гэж байгаа хүүхдийн жүжгүүдийг бүрэн хэмжээгээр хүүхдүүддээ тоглож үзүүлэхийг зорьдог. Тиймээс Эх үрсийн баярт зориулж “Үзэсгэлэнт охин жонон хоёр” бүрэн хэмжээний хүүхдийн жүжгийг тоглох гэж байна. Энэ хүүхэлдэйн кино байдгийг бүгд мэдэх байх. Энэ жүжигт манай продакшны нийт залуу жүжигчид оролцон тоглох болно” хэмээн ярьсан байна.

Тус жүжгийн гол дүрүүдэд СТА, жүжигчин Ц.Ганзориг, А.Гэрэлцэцэг, Г.Золзаяа, Д.Дэлгэрсайхан нар тоглох аж. Жүжгийг энэ сарын 31-нд болон зургаадугаар сарын 1-нд МҮЭСТО-ны тайзнаа тоглох нь ээ.

Нийслэлийн Засаг Даргын Тамгын Газраас хэрэгжүүлж буй “Найрсаг Улаанбаатар” хөтөлбөрийн хүрээнд “Монгол цэргийн жавхаа” уралдааныг 4 дэх жилдээ зохион байгууулж байна. Наадмын хоёрдугаар шатнаас шалгарч үлдсэн шилдэг ангиудын үзүүлэх тоглолт, шагнал гардуулах ёслолын ажиллагаа буюу “Иргэн цэргийн бахархлын өдөр”-ийг энэ өдөр “Чингисийн талбай”-д тэмдэглэн өнгөрүүлнэ.

Энэхүү арга хэмжээ 11.30-23.00 цаг хүртэл үргэжлэх юм. Үйл ажиллагааг хааж “Хурд” хамтлаг “Монгол Улсынхаа төлөө зүтгэе” хэмээх 50 минутын тоглолтыг “Чингисийн талбай”-д тоглоно. Цэрэг эх орны сэдэвтэй олон уран бүтээлээ дуулах тухайгаа хамтлагийн ахлагч Ц.Ганбаяр хэлж байсан.

Тэрбээр “Энэ өдөр бол омогшил, бахархлын өдөр. Тийм учраас “Монгол цэргийн жавхаа 2016” уралдааны төгсгөл хэсэг дээр бүгдээрээ бут авна аа. Бид бэлтгэлээ маш сайн базаасан. Одоо харин энэ баярыг далимдуулан бүх он жавуудаа цуглаасай гэж би урьж байна. Ер нь цэргийн алба хаасан бүх ах, дүү, найз хэн боловч “Монгол цэргийн жавхаа” гэж энэ жилд нэг л өдөр болдог арга хэмжээний үеэр уулздаг болмоор байгаа юм. “Он жавуудын өдөр” болгосон ч болж л байна” хэмээсэн.

“Хурд” хамтлагийн тоглолт 22.00 цагт эхлэн хөтөлбөрийн дагуу 22.50 минутад дуусах юм байна.

Урлагийн салбарынхны шилдгүүдээ тодруулдаг “Мөнгөн мод” ёслолын арга хэмжээ УДЭТ-д өнөөдөр бол¬лоо. Тус арга хэмжээг найм дахь жилдээ зохион байгуулж тайз, дэлгэцийн зураач, найруулагч, тайз, дэлгэцийн жүжигчин, дуучин, хөгжимчин, бүжигчин, биет бус соёлын өвийг өвлөн уламжлуулагч гэсэн долоон төрлөөр шилдгүүдээ тодрууллаа. Монгол үндэстний уртын дууг 2500 гаруй хүнд зааж сурган, уртын дууг түгээн дэлгэрүүлэх үйлсэд оруулсан хувь нэмрийг нь үнэлж “Оны шилдэг соёлын биет бус өвийг өвлөн уламжлуулагч”-аар “Улаанбаатар” чуулгын уртын дуучин Б.Батболд тодрууллаа. Тэрээр “Миний хувьд СУИС-ийг 1996 онд төгссөнөөс хойш уртын дууны чиглэлээр бусдад зааж сургах, өөрөө уран бүтээлээ туурвих үйлсэд зүтгэж явна. 2013, 2014 онуудад үндэсний баяр наадмыг нээх 999 уртын дуучинд багшилсан, өнгөрсөн онд Баянхонгор аймагт 2224 хүүхдэд гурван уртын дууг зааж тус аймгийн баяр наадмыг нээсэн. Одоогоор СУИС-д уртын дууны багшаар ажиллаж байна. Мөн тусгай сургалт явуулж уртын дууг суръя гэсэн хүмүүст зааж сургаж явна. Залуу үеийнхэн уртын дууг сурах эрмэлзэл ихтэй болсон байна. Ер нь монгол хүн бүр уртын дуугаа сурах хэрэгтэй, бидний генд авьяас байдаг. Үүнийг л сэргээгээд өгвөл уртын дуу сурахгүй монгол хүн гэж байхгүй. Өвөг дээдсээс уламжлал болон ирсэн энэ биет бус өвийг цаашид олон хүүхдэд зааж сурган, түгээн дэлгэрүүлэх болно” гэв.

Түүнчлэн Францын нэрт найруулагч Жан Жак Анногийн “Чонон сүлд” уран сайхны киноны Галсмаагийн дүрийг мэргэжлийн өндөр түвшинд бүтээсэн хэмээн жүжигчин Р.Анхнямыг шилдэг жүжигчнээр тодруулав. Тэрээр өдий зэрэгтэй уран бүтээлч болоход түшиж тулж ирсэн эрдэмт багш нартаа, гэр бүлийнхэндээ маш их баярлаж байгаагаа илэрхийллээ. “Энэ сайхан нэр хүндтэй шагналыг хүртэж шилдэг жүжигчин болсондоо баяртай байна. Зах зээлийн үед кино урлаг уналтад орсон хэдий ч манай уран бүтээлчид өөрийн хүч чадал, бор зүрхээрээ давж туулж чадаж байгаа” гээд кино урлагт сэтгэл зүрхээ зориулдаг бүх хүмүүст амжилт хүссэн юм. “Босуул”, “Lovers” уран сайхны киног мэргэжлийн өндөр түвшинд найруулсан Ж.Сэнгэдоржийг “Оны шилдэг тайз, дэлгэцийн найруулагч”-аар, 2015 онд ҮДБЭЧ-ын тайзнаа тавьсан “Оройн дээд” үндэсний дуулалт жүжиг, “Мөнх тэнгэрийн Монгол” концертын тайз, зураг, чимэглэлийг мэргэжлийн өндөр түвшинд бүтээсэн ҮДБЭЧ-ын ерөнхий найруулагч, зураач Г.Ганболдыг “Оны шилдэг тайз, дэлгэцийн зураач”-аар шалгарууллаа. “Оны шилдэг дуучин”-аар дуучин Г.Ариунбаатарыг тодрууллаа. Тэрээр ОХУ-д зохиогдсон П.И.Чайковскийн нэрэмжит олон улсын XV уралдаанд амжилттай оролцож, онцгой амжилт үзүүлж, Гран-при шагнал хүртэж, “Маринский театр”, “Birmingham stage”, “Buckingham Palace”, “Carn­egie Hall”, “Mеtropolitan op­era” зэрэг нэртэй томоохон театруудад уригдан тоглож эх орныхоо нэрийг өндөрт өргөсөн билээ. Харин шилдэг хөгжимчнөөр АНУ-ын олон улсын залуучуудын оркестрт сонгогдон Карнеги Холлд болсон тоглолт, НҮБ-ын Ерөнхий ассамблейн олон улсын залуучуудын оркестрын “Энх тайвны төлөө” тоглолтод амжилттай оролцсон Улсын филармонийн хөгжимчин Х.Санчирыг шал¬га¬рууллаа. Шилдэг бүжигчнээр “Шелкунчик” “Франческо да Римини”, “Хунт нуур”, “Бахчисарайн оргилолт булаг”, И.Штраусын “Оргилуун дарс” балетын дүрийг мэргэжлийн өндөр түвшинд бүтээсэн ДБЭТ-ын балетчин Д.Саруулыг тодруулав. Шилдгээр шалгарсан уран бүтээлчдэд тус бүр гурван сая төгрөг, “Мөнгөн мод” цом гардуулсан юм.

Гэрэл зургуудыг Ц.МЯГМАРСҮРЭН

Каннын кино наадмын хүрээнд монгол контент олон улсын зах зээл дээр гарч эхэллээ. Тодруулбал, тавдугаар сарын 12-22-ны өдрүүдэд болж өнгөрсөн тус наадамд манай кино уран бүтээлчид анх удаа оролцож байгаа юм. Ингэхдээ “Дижитал агуулга” ХХК манай улсын орчин үеийн 100 гаруй уран бүтээлийг албан ёсны зөвшөөрөлтэйгөөр танилцуулж, борлуулсан юм. Тухайлбал, “Маш нууц”, “Содура”, “Үргээлэг 2”, “Элэг нэгтэн”, “Lovers”, “Босуул” зэрэг кино энэ наадмын маркетад багтжээ.

Тэгвэл эдгээр уран бүтээлээс найруулагч, жүжигчин Г.Эрдэнэбилэгийн “Үргээлэг 2” уран сайхны кино Каннын дэлгэцэнд гарлаа. Түүнчлэн Каннын кино наадамд оролцож байгаа кинонуудын мэдээллийг агуулсан “Pocket Guide” номонд “Үргээлэг 2”, “Lovers” киноны танилцуулга багтсан байна. Тус ном нь жил бүр 10 мянган хувь хэвлэгддэг аж.

Нийслэлийн Засаг даргын санаачилгаар дөрөв дэх жилдээ зохион байгуулж байгаа “Монгол цэргийн жавхаа-2016” уралдааны эцсийн шалгаруулалт, шалгарсан ангиуд оролцсон үзүүлэх тоглолт, шагнал гардуулах ёслолын ажиллагаа тавдугаар сарын 28-нд Чингисийн талбайд болно.

Мөн энэ өдрийн19:00 цагт Үлээвэр найрал хөгжим, цэнгээнт бүжгийн уралдаан, Цэргийн дуу бүжгийн эрдмийн чуулгын тоглолт, 21:00 цагт “Хурд” хамтлагийн “Монгол Улсынхаа төлөө зүтгэе” тоглолт болох юм байна.

“Найрсаг Улаанбаатар” хөтөлбөрийн хүрээнд гудамжны бүжгийн аварга шалгаруулах “UB dance festival”-ийг өнгөрсөн жил анх удаа зохион байгуулсан билээ. Тэгвэл энэ жил Нийслэлийн соёл урлагийн газар, “Улаанбаатар” чуулга хамтран хоёр дахь жилдээ зохион байгуулахаар болжээ. Энэхүү фестивал нь орчин үеийн хотын соёлыг дэмжих, түгээх, орчин үеийн бүжгийн урлагийг сурталчлах, бүжгийн хамтлагуудыг олон нийтэд таниулах мөн жуулчдад Улаанбаатар хотын соёлыг сурталчлах зорилготой арга хэмжээ юм.

Тус фестивалд бүх насны хүмүүс болон чөлөөт бүжгийн хамтлагууд оролцох боломжтой. Оролцогчид рэп, хип хоп, брэк, електро, гудамжны бүжиг зэрэг орчин үеийн чөлөөт бүжгийн төрлөөр өрсөлдөх аж. Шалгарсан хамтлагуудын тоглолт, аварга шалгаруулах тэмцээн зургадугаар сарын 19-нд “Чингисийн талбай”-д болно. Фестивалд оролцох хүсэлтэй чөлөөт бүжгийн хамтлагууд болон залуусыг энэ сарын 27-ныг хүртэл бүртгэх юм байна. Тэмцээний эхний шатны шалгаруулалт ирэх сарын 5-ны 13:00 цагт “Улаанбаатар чуулга”-д эхэлнэ.

Тэмцээнд Өмнөд Монголын Хөх хот, Шинжаан, ОХУ-ын Буриад, Тува улсаас хамтлагууд оролцох бөгөөд Солонгос, Япон, Монголын шүүгч нар хамтран шүүх юм байна. Түүнчлэн өнгөрсөн жил шилдэг гудамжны бүжигчинг 13 сая төгрөгөөр шагнаж байсан бол энэ жилийн хувьд таван сая төгрөгөөр урамшуулахаар болжээ.

“Хурд” хамтлагийн “Монгол Улсынхаа төлөө зүтгэе” тоглолт энэ сарын 28-ны өдөр буюу ирэх бямба гаригт болох гэж байгаатай холбогдуулан цэргийн штабын дарга, хурандаа Ж.Болдбаатар, орлогч дарга Ц.Анхбаяр, нийлэлийн Засаг даргын Тамгын газрын Хэвлэл мэдээлэл, олон нийттэй харилцах хэлтсийн дарга Б.Түвшинтөгс, “Хурд” хамтлагийн ахлагч Д.Ганбаяр нар мэдээлэл хийлээ.

Энэ үеэр нийслэлийн Засаг даргын Тамгын газрын Цэргийн штабын дарга, хурандаа Ж.Болдбаатар “Хурд” хамтлаг маань бидний саналыг таатай хүлээн авч, дэмжиж байгаад баяртай байна. Хурдыхан маань бүгд цэргийн алба хаасан, тэдний дуулсан эх орон, цэргийн тухай дуунууд иргэдийн зүрх сэтгэлд аль хэдийнээ хоногшсон байдаг. Тийм ч учраас нийслэлийн иргэддээ нэг өдрийг цэрэг, эрх орноороо бахархан өнгөрөөх сайхан үйл явдалд хүрэлцэн ирэхийг уриалж байна” гэлээ. Уг арга хэмжээг “Найрсаг Улаанбаатар” хөтөлбөрийн хүрээнд нийслэлийн Засаг даргын Тамгын газраас Батлан Хамгаалахын яам, Зэвсэгт хүчний Жанжин штаб, Хил хамгаалах Ерөнхий газар, Онцгой байдлын Ерөнхий газартай хамтран Улаанбаатар цэргийн хүрээний анги, байгууллагуудын дунд тэргүүний тохижилттой, жагсаалч анги, байгууллага шалгаруулах ”Монгол цэргийн жавхаа’’ уралдааныг дөрөв дэх жилдээ зохион байгуулж байгаа ба эхний гурван байранд шалгарсан ангийн захирагчийг уралдааны болзлын дагуу орон сууцаар шагнаж, ангид эмнэлгийн хэрэгсэл олгох ажээ.

Удахгүй болох гэж буй Олон улсын хүүхдийн эрхийг хамгаалах өдрийг угтан Улсын драмын эрдмийн театрын хамт олон хүүхэд багачуудынхаа хүмүүжил, мэдлэг оюунд нь хөрөнгө оруулалт хийх зорилгоор “Хүүхдийн жүжгийн өдрүүд” зарлажээ. Хүүхдийн жүжгийн өдрүүдээр С.Михалков “Бардам туулай”, Т.Габбе “Үнсгэлжин”, Д.Содномдорж “Норовын намтар” зэрэг УДЭТ-ын хүүхдийн шилдэг уран бүтээлүүдээ толилуулахаар багтаасан байна. Тухайлбал, 5-р сарын 30-нд 11:00 цагт С.Михалков “Бардам туулай” мюзикл инээдмийн жүжиг, 5-р сарын 31-нд 11:00 цагт Т.Габбе “Үнсгэлжин” инээдмийн жүжиг, 6-р сарын 1-нд 11:00 цагт, 14:00 цагт Д.Содномдорж “Норовын намтар” мюзикл инээдмийн жүжгийг тоглохооор болжээ. Жүжгийн тасалбар 10-20 мянган төгрөгийн үнэтэй ба УДЭТ-ын кассаар болон 1900-1188 үнэгүй хүргэнэ.

Боловсрол Соёл Шинжлэх Ухааны яам, “Соёльш өвийн төв”, “Хүннү цуурчдын холбоо” ТББ хамтарч, олон улсын цуурын наадам, симпозиумыг зохион байгуулахаар болжээ. Тус наадам ирэх сарын 3-6-ны өдрүүдэд Улаанбаатар хотноо болно.

Тус наадмыг “Монгол цуур” хөтөлбөрийн хүрээнд тус хөгжмийн уламжлалыг хадгалж, судалж, хойч үедээ өвлүүлэн, цуурчдыг дэмжих зорилгоор зохион байгуулж буй юм байна. Наадамд ӨМӨЗО, Буриад, Халимаг, Тува, Казахстан зэрэг 10 орчим орны судлаач, цуурчид оролцох аж.

Энэ үеэр судлаачид цуур ба цууртай төстэй хөгжмүүдийн үүсэл хувьсал, соёл уламжлал, урын сан, урлах технологи, тоглох арга барил, хөгжимчдийн ур чадварын талаар илтгэл тавьж, хэлэлцэнэ. Мөн түүнчлэн олон улсын цуурчид “Цуурын эгшиг” хамтарсан тоглолт толилуулах юм. Наадмын үеэр баримтат кино хийх аж.