Азийн алдартай парти брэнд болсон “TOUCH ME”-г монголд анх удаа зуны задгай шоу болгон зохион байгуулах гэж байна. “TOUCH ME-SUMMER 2016” задгай фестивал нь энэ сарын 22-ны баасан гаригт “Монгол шилтгээн” цогцолборт болно. Энэ удаад 5000 орчим монгол, 1000 гаруй гадаадын иргэд оролцох боломжтой гэлээ.
Түүнчлэн Монгол Улсад анх удаа зохион байгуулагдаж буй Ази, Европын 11 дэх удаагийн ASEM чуулганы хаалтанд зориулж БНСУ, ХБГУ, ОХУ, АНУ зэрэг орны залуусыг хамруулж байгаагаараа энэ удаагийнх илүү шинэлэг бас хамгийн өргөн хэмжээний том арга хэмжээ болно гэж зохион байгуулагчид онцоллоо.
Б.ЭНХМАА
Аймаг сумдын баяр наадам 14,15-ны өдрүүдээс эхэлсэн билээ. Өчигдөр Хөвсгөл аймгийн баяр наадам өргөн дэлгэр болж өндөрлөлөө. Аймгийн баяр наадамд Хөвсгөл аймгийн Шинэ-Идэр сумын харьяат аймгийн начин Ц.Сандагдорж түрүүлэн аймгийн арслан болж, Тосонцэнгэл сумын заан Н.Даваахүрэл үзүүрлэж, аймгийн заан болжээ. Түрүү бөх Ц.Сандагдорж , улсын харцага Ц.Содномдорж нартай шөвгийн дөрөвт үлдсэн, аймгийн начин Н.Жаргалбат Хөвсгөл аймгийн Цагаан-Үүр сумын харьяат Дарийн Дамдин аваргын удам дамжсан бөх ажээ. Харин улсын начин Л.Лха-Очироор тав давж, аймгийн начин Х.Тулгатай тунаж барилдаад зургаа давж, улсын харцага Ц.Содномдоржоор долоо даван, Ц.Сандагдоржтой барилдан үзүүрлэж, сумын заанаас, аймгийн заан болсон Н.Даваахүрэл Хангайн бүсэд хурдан халиун морьдоороо алдаршсан, Хөвсгөл аймгийн алдарт уяач Д.Ням-Очир агсны хүү ажээ.
Улсын дуурь бүжгийн эрдмийн театрын уран бүтээлчид энэ сарын 15-нд “Хунт нуур” балетыг олны хүртээл болгосон бол энэ удаад тус театрынхан 53 дахь улирлын хаалтын тоглолт болгон “Классик Дуэт” концертыг өнөөдөр орой тоглохоор болжээ. Тус тоглолтоор 2015-2016 оны 53 дахь улиралд дуурь бүжгийн театрын тайзнаа тоглосон бүтээлүүдээс хамгийн шилдэг дуэт бүтээлүүдийг тоглох аж. Тоглолтод тус театрын гоцлол дуучид, найрал дуучид, симфони найрал хөгжим оролцох ба тоглолл оройн 17:00 цагт Улсын дуурь бүжгийн эрлмийн театрын тайзнаа тоглогдоно.
Улсын дуурь, бүжгийн эрдмийн театрын тайзнаа энэ сарын 16-ны 17:00 цагаас Оросын алдарт хөгжмийн зохиолч П.И.Чайковскийн дэлхийн хамгийн алдартай театруудад тавигддаг “Хунт нуур” балетыг тоглоглох гэж байна.
Дэлхийн хүн төрөлхтний соёлын өвд бүртгэгдсэн монгол үндэстний бахархал болсон морин хуурын фестиваль өнөөдөр 21:00 цагт төв талбайд болно. Энэхүү фестивальд үндэсний их найрал, ардын урлагийн хамтлагууд, морин хуурын мастеруудаас гадна энэхүү хөгжмийг сонирхогч гадаадын уран бүтээлчид оролцох юм байна.
Тулгар төрийн 2225, Их Монгол Улсын 810, Ардын хувьсгалын 95 жилийн ой, Үндэсний их баяр наадмын үеэр болох соёл, урлагийн тоглолтууд үргэлжилж байна. 
“Найрсаг Улаанбаатар” хөтөлбөрийн хүрээнд Нийслэлийн Засаг даргын Тамгын газар, Нийслэлийн Соёл урлагийн газар, Улсын Дуурь бүжгийн эрдмийн театр хамтран Монголын анхны үндэсний сонгодог бүтээл “Учиртай гурван толгой” дуурийг Их эзэн Чингис хааны нэрэмжит талбайд 2 дахь жилдээ тоглов. Жил бүр тус дуурийн гол дүрийн жүжигчдийг сонгон шалгаруулдаг бөгөөд энэ жил гол дүрд шалгарсан УДБЭТ-ын гоцлол дуучин МУСТА Э.Бумхүү, УДБЭТ-ын гоцлол дуучин МУСТА Б.Энхнаран, УДБЭТ-ын гоцлол дуучин МУГЖ Ө.Уянга, УДБЭТ-ын гоцлол дуучин С.Бат-Эрдэнэ нарт Нийслэлийн Засаг даргын нэрэмжит шагнал 10 сая төгрөг, өргөмжлөлийг Нийслэлийн Засаг дарга бөгөөд Улаанбаатар хотын Захирагч С.Батболд гардууллаа. Шагнал гардуулах үеэр Засаг дарга “Соёл урлаг бол их хотын салшгүй нэг хэсэг. Тиймээс бид хотын соёлыг хэвшүүлэх, сонгодог урлагийг дэмжих тал дээр Соёл урлагийн байгууллагууд, уран бүтээлчдээ дэмжин, хамтран ажиллах болно” гэлээ. Мөн энэ үеэр Улсын дуурь бүжгийн эрдмийн театрын захирал Ч.Мөнхзул төрийн дээд шагнал “Алтан гадас” одонгоор энгэрээ мялаасныг НИТХ-ын дарга Ц.Сандуй гардууллаа гэж Нийслэлийн Засаг даргын Тамгын газрын Хэвлэл мэдээлэл, олон нийттэй харилцах хэлтсээс мэдээллээ.
Үндэсний их баяр наадмын арга хэмжээнүүд өчигдөр эхэлсэн. Энэ жил баяр наадмын амралт ес хоног үргэлжлэх билээ.
Чингис хааны морьт хөшөөний дэргэдэх “Ариг монгол хаад” жуулчны баазад нүүдлийн гэр театр үүдээ нээлээ.