Category: соёл-урлаг

“Зүй тогтол” уран бүтээлийн хамтарсан үзэсгэлэн энэ сарын 8-аас эхлэн 15-ныг хүртэл Монголын Урчуудын эвлэлийн үзэсгэлэнгийн танхимд үргэлжилж байна. Энэхүү үзэсгэлэнд залуу уран бүтээлч Б.Намуун, МУЭ-ийн шагналт А.Очирболд, Ц.Ган-Эрдэнэ нарын уран бүтээлүүд тавигдсан байгаа юм. Ц.Ган-Эрдэнэ, Б.Намуун нь ХБНГУ-д ажиллаж амьдардаг бөгөөд Ц.Ган-Эрдэнэ нь 2007 оноос хойш жил бүр НордАрт- Олон Улсын Үзэсгэлэнд оролцож буй уран бүтээлч аж. Харин МУЭ-ийн шагналт уран барималч А.Очирболд нь Монголын Урчуудын Эвлэлийн шагналт, НордАрт 2015-н үзэгчдийн шагнал хүртэн улмаар 2016 онд урилгаар оролцож байгаа юм. Залуу уран бүтээлч Б.Намуун нь НордАрт 215-д “Оньс” бүтээлээрээ анх удаа оролцсон ХБНГУ-ын Мюнстэр хотын Урлагийн Академийн төгсөх курсын оюутан аж.

О.ӨНӨР

ОХУ-ын Владивосток хотноо энэ сарын 19-нд “V-Rox-2016” буюу олон улсын амьд хөгжмийн наадам болох гэж байна. Жил бүр хүрээгээ тэлж байгаа тус фестивальд 2014 онд “Моханик”, 2015 онд “The colors” хамтлагууд Монгол Улсаа төлөөлж оролцож байсан. Энэ удаагийн фестивальд “Нисванис” хамтлаг гоцлон тоглохоор болжээ. Ийнхүү олон улсын наадамд оролцож буй гурав дахь Монгол хамтлагаар “Нисванис” тодорч байгаа юм.Тус хамтлаг 1996 оны дөрөвдүгээр сарын 9-нд байгуулагдсан билээ. Урт хар үстэй дөрвөн залуу орилж, ил задгай зүйлсийг дуулаад, бас амьд хөгжим сонирхогчдоо хөгжөөж чадсан энэхүү хамтлаг Монголын амьд хөгжмийн томоохон байр суурийг эзэлж чадсан юм. Энэ хамтлаг нь анх рок хөгжим сонирхогч залуус “гранж” урсгалын хамгийн том төлөөлөгч болох АНУ-ын Сиэтл хотын “Нирвана” хамтлагийн дууг сонсон Монголд энэ урсгалын хамтлаг байгуулахыг эрмэлзсэнээс үүдэлтэй. “Нисванис” хамтлаг нь жил бүр хамтлаг байгуулагдсан өдрөөрөө болон өвөл, зуны улиралд тоглолт хийж, “Coke’n Beat”, “Playtime” зэрэг наадмуудад оролцон ая дуугаа өргөдөг уламжлалтай.

Б.ЭРДЭНЭ-ОЧИР

Монголын моно жүжгийн хөгжлийн төвөөс “Ялагчдын цуваа-Улаанбаатар 2016” Олон улсын Моно жүжгийн фестивалийг энэ сарын 15-19-нд УДЭТ, Монголын хүүхэлдэй театрт зохион байгуулах болжээ. Хоёр дахь жилдээ зохион байгуулж буй уг арга хэмжээнд Олон улсын Моно жүгийн фестивалийн гранпри шагналт УДЭТ-ын жүжигчин Ц.Баясгалан “Би Эдит Пиаф байна” жүжгээ олны хүртээл болгох аж. Мөн Оросын Наталъя Носова “Би Нохой”, Польшийн жүжигчин Виолета Комар “Дива”, Армены Арам Ховханнисян “Үзэсгэлэнт Ара”, Английн Кэрил Свивт “Өгүүлэгч” уран бүтээлээрээ оролцох юм байна.

Энэхүү арга хэмжээг НЗДТГ, УДЭТ, Хүүхэлдэйн Театр, СУИС, Sound of Mongolia хамтран зохион байгуулах аж.

О.ӨНӨР

“Этюд 2016” буюу судалбар зургийн үзэсгэлэнг жил бүрийн наймдугаар сард зохиогддог уламжлалтай. Энэ удаагийн үзэсгэлэн маргааш буюу наймдугаар сарын 10-нд нээлтээ хийж нийт 14 хоног олны хүртээл болгох аж. Энэхүү үзэсгэлэн нь байгаль дээр хийсэн судалбар зургуудаас бүрдэх бөгөөд тухайн үеийн байгалийн агшин, уран бүтээлчийн сэтгэл хөдлөл, чадварыг онцлон харуулдгаараа онцлог юм. Үзэсгэлэнд 60 орчим судалбар зургууд тавигдах бөгөөд уг үзэсгэлэнгээс Монгол орны үзэсгэлэнт байгалийг уран бүтээлч бүр өөр өөрийн дүрслэлээр зурсныг харж болох ажээ.

Б. ЭРДЭНЭ-ОЧИР

Дэлхийд анх удаа 420 нугараач нэг дор уран нугарсан түүхт үйл явдал өчигдөр Монгол Улсын нийслэл Улаанбаатар хотын төв талбайд боллоо. Гиннесийн номонд “Хамгийн олон нугараач зэрэг уран нугарсан” хэмээн тодоор бичигдэх үйл явдлын гэрч нь Монгол Улсын иргэд боллоо хэмээн зохион байгуулагчид энэ үеэр онцолсон юм.

“Уул усны домог” уран нугаралтын чуулалд нийслэлээс гадна Эрдэнэт, Дархан, Хөтөл, Ханбогд, Дундговь, Дорноговь аймгийн уран нугараачид оролцлоо. Үндэсний циркийн дэргэдэх Уран нугаралтын дугуйлан, Шинэ цирк төвийн дэргэдэх “Отгоо” студи, Нугаралтын “X-Roses” студи, Хаан банкны дэргэдэх “Акработын төв”, Циркийн хөгжил төвийн нугараачид, Улаанбаатар чуулгын нугараачид, Дархан хотын “Шонхоодой” цирк, Эрдэнэтээс ““Эрдэнэс”, “Увидас” дугуйлан, Дундговь аймгаас “Сондор”, Дорноговь аймгаас “Дорнын уянга” гээд нийт уран нугаралтын 20 студийн 350 уран нугараач, жүжигчид оролцсон байна.

Тоглолт нэг цаг 30 минут үргэлжилсэн юм. Дарь эхүүд, ус, цэцэгс, могойн чуулган, Алунгоо хатан гэсэн хэсгүүдээс бүрджээ. Уран нугаралтын үзүүлбэрүүдийн дундуур Улаанбаатар чуулгын уран бүтээлчид тоглолтыг чимсэн юм.

Тоглолтын ерөнхий найруулагчаар МУСТА Р.Мөнхсайхан ажиллажээ. Тоглолтыг доорх бичлэгээс үзнэ үү.

АНУ-ын найруулагч Лорен Нэпп “Live from UB” буюу “Улаанбаатараас шууд дамжуулж байна” хэмээх баримтат киног бүтээсэн билээ. Уг кино Дэлхийн 17 хотод гарч, олон улсын кино наадмын гурван шагнал хүртсэн юм.

Тэгвэл өнөөдөр буюу наймдугаар сарын 6-ны өдөр Тэнгис кино театрт 18.00 цагт Монголдоо нээлтээ хийх гэж байна.

Энэхүү кино нь нүүдлийн соёл иргэншлээрээ дэлхийд танигдсан Монгол орны 21-р зууны дуу хоолой нь цөөн хэдэн рок хөгжимчид болж байна. “Live From UB” баримтат кино нь Монголын ирээдүйтэй залуу хамтлагуудын нэг болох Моханик хамтлагийн өнөө цагийн үндэсний соёлын илэрхийлэл болсон шинэ хөгжим бүтээх явцыг үзүүлсэн байна.

Энэхүү киноны нээлт нь АНУ-ын ЭСЯ-ны дэмжлэгтэйгээр үнэ төлбөргүй үзүүлж байгаа ба суудлын тоо хязгаартай, түрүүлж ирсэн дарааллаар оролцох юм байна.

Алс холын Унгар улсад жүжигчний мэргэжлээр суралцах зорилго тээж, мөрөөдөлдөө хөглөгдөн амжилттай ажиллаж яваа нэгэн бол Н.Цогтсайхан. Тэрээр Холливудын олон кинонд туслах дүр бүтээх болон орлон тоглогчоор ажиллаж ирснийг мэдэх хүмүүс цөөнгүй биз ээ. Өмнөх ярилцлагыг эндээс уншина уу.

Тэгвэл Н.Цогтсайхан өдгөө мэргэжлийн жүжигчний хэмжээнд хүлээн зөвшөөрөгдөж дэлхийн алдартай найруулагчдын овоо хараанд өртөж эхэлжээ. Тэрээр энэ сард Холливудын нэрт найруулагч Рон Ховард болон Япон, Швед, Унгарын алдартай найруулагчдын шинэ кинонд дүр бүтээгээд тун завгүй явна. Үүний зэрэгцээ Германы “Renault” автомашины брэндийн шинэ загварын нүүр царай болжээ.

Ингээд Н.Цогтсайхантай шинэ уран бүтээлийнх нь талаар цөөн хором ярилцлаа.

-Сайн байна уу. Ажил амжилтай юу. Уран бүтээлийн олз омог арвинтай байгаа бололтой. Ямар уран бүтээл дээр ажиллаж байна даа?

-Сайн. Сайн байна уу. Ажил маш сайн байгаа. Энэ жил нэг хуучны алдартай “Sci-fi” кинонд дүр авсан. Хүлээгээд бэлдээд байж байна даа. Одоо Шведийн “100 настай хүн” кинонд ажиллаад дуусч байна. Мөн Унгар, АНУ хамтарсан “Лаяка” нэртэй инээдмийн кино зураг эхлэхээр бэлтгэлдээ ороод байгаа.

-“Sci-fi” кино гэхээр уран зөгнөлт кино гэсэн үг үү ?

-Тийм ээ. Sci-fi гэдэг киноны төрөл нь Монголоор шинжлэх ухааны уран зөгнөлт кино гэсэн үг л дээ.

-Та саяхан гурван кинонд зэрэг ажиллаж байгаа талаараа мэдээлэл оруулсан байсан. Хэзээ гарах ямар уран бүтээлд ингэтлээ зав чөлөөгүй ажиллах болов оо?

-Унгар, АНУ-ын хамтарсан “Лаяка” гээд инээдмийн кино, “BladeRunner” болон “100 настай хүн” гэдэг Швед кинонд тоглохоор болсон. Зэрэг гэсэн учир нь гурвуулаа энэ наймдугаар сард зураг авалтаа хийж байгаа юм. Наймдугаар сарын сүүлээр Хариссон Фордын “BladeRunner”-ийн зураг авалт эхлэнэ. Харин азаар өдөр нь давхцаагүй. Ирэх жилээс үзэгчдийн хүртээл болох байх.

– Мөн та энэ жил Рон Ховардын “Марс” уран сайхны кинонд дүр бүтээсэн шүү дээ. Ямар дүр бүтээсэн бэ?

-“Марс” бол хагас драмын баримтат кино. Оскарын шагналт найруулагч Рон Ховардын шинэ бүтээл. 2033 онд анхны хүмүүсийн багийг Марс руу илгээж байгаа тухай өгүүлдэг. Би энэ агуу хүний бүтээлд Японы сансрын агентлагийн ажилтны дүр бүтээж байгаа. Кино маань ирэх арваннэгдүгээр сард 171 улсад 45 хэлээр “National Geographe” сувгаар цацагдана. Зураг авалт нь өнгөрсөн дөрөвдүгээр сард дууссан.

-Рон Ховард Холливудын шилдэг найруулагч төдийгүй жүжигчин хүн. Энэ хүнтэй хамтарч ажиллах боломж танд хэрхэн тохиов оо?

-Рон Ховардын “Давинчи код Инфэрно” кинонд түрүү жил ажилласан. Тэр үед нүдэнд нь өртсөн байх. Энэ жил түүний хийсэн “Марс” кинонд дахин сонгогдсондоо баяртай байгаа. Ер нь энэ жилээс Ази жүжигчнээр хүлээн зөвшөөрөгдөж чадсан болохоор Ази дүр болгоны шалгаруулалтад оролцох боломж нээгдсэн гэсэн үг..

-Мундаг найруулагчтай ажиллаж буй болохоор суралцах зүйл их байгаа болов уу. Найруулагчийн зэмлэл, магтаалыг хэр сонсч байна даа?

-Мундаг найруулагчид зэмлэх нь ер их ховор. Чадахгүй байсан ч “Чи сайн байсан. Одоо бүр илүү сайн хийж чадна” гэж сэтгэл санаагаар их дэмждэг. Эхэндээ аргаа олохгүй хааяа зэмлүүлэх үе гардаг байсан. Сүүлийн жилүүдэд магтаал их сонсох болсон. Үүнийгээ ур чадвар сайжирч байна гэж ойлгоод байгаа.

-Тэгэлгүй яах вэ. Туршлага ажиллах бүрт нэмэгддэг шүү дээ. Ингэхэд та киноноос гадна томоохон компанийн шинэ брэндийн нүүр царай болсон байна лээ. Энэ талаараа сонирхуулаач?

-Тийм ээ. Францын “Renault” машины компанийн шинэ загвар болох “CILO”-гийн зураг рекламанд тоглосон. Энэ жил ер нь ачаалалтай өнгөрөх шинжтэй байна. /инээв/

-Гол нь та жүжигчин мэргэжлээрээ ажиллаж эхэллээ шүү дээ?

-Тийм ээ. Гол амжилт маань жүжигчнээр хүлээн зөвшөөрөгдөж чадсан явдал. Одоо суралцах л үлдээд байна. Цаашдаа томоохон дүрүүдэд хүч үзнэ ээ.

-Гайхалтай, Та ч мөрөөдөлдөө хүрэх алхмаа шат шатаар ахиулж байгаа юм байна. Ямар нэгэн агентлагт харъялалтай болсон уу?

-Баярлалаа. Цаашдаа улам их хичээж ажиллана. Одоохондоо аль нэг агентлагт харьяалагдаагүй. Чөлөөт уран бүтээлчээр ажиллаж байгаа. Ямартай ч таван агентлагтай хамтарч ажиллаж байна.

Н.Цогтсайхан өмнө нь “47 ронин”, “Хатуу самар-5”, “Aurora borealis” зэрэг бидний мэдэх олон алдартай кинонд ази залуугийн баатарлаг дүрийг бүтээсэн юм. Мөн өнгөрсөн онд “Марко Поло” кинонд монгол жүжигчдийн хамтаар цэрэг эрийн дүрд ажилласан билээ. Тэрээр Унгарт жүжигчнээр суралцдаг монгол залуустай хамтран монгол жүжигчид Холливудтай шууд холбоотой ажилладаг агентлаг байгуулахаар төлөвлөж байгаагаа өмнө нь бидэнд өгсөн ярилцлагынхаа үеэр дурьдаж байсан юм.

Эх сурвалж:Eagle.mn

Монголын үзэгчдийг хоёр сарын турш байлдан дагуулсан “Яг түүн шиг” шоуны авьяаслаг оролцогч, загвар өмсөгч Э.Энхболд олон улсын томоохон загварын тэмцээн болох “International Fashion Super Model”-д оролцохоор бэлтгэж байна.

“International Fashion Super Model” тэмцээн ирэх сарын 8-наас 12-ны өдрүүдэд Хонг Конгт болох бөгөөд тус тэмцээнд “Монгол модель” агентлагийн нэг эрэгтэй, хоёр эмэгтэй модель сонгогдсон байна. Тэрээр саяхан ирэх есдүгээр сард болох тэмцээнийхээ рекламны зураг авалт болон Конгконгийн загварын долоо хоногийн сонгон шалгаруулалтад оролцох төлөвлөгөөтэй Хонг Конгийг зориод иржээ.

“International Fashion Super Model” тэмцээний шилдэг оролцогчдод зохион байгуулагчдын зүгээс Хонг Конгийн загварын зах зээлийн үүд хаалгыг нээж өгч байгаа аж. Түүнчлэн ирэх арваннэгдүгээр сард болох энэхүү тэмцээний дэлхийн хэмжээний том шалгаруулалтад оролцох боломж давхар нээгдэх гэнэ.

О.ӨНӨР

“Уул усны домог” тоглолт энэ сарын 6-нд Сүхбаатарын талбайд болно. Энэхүү тоглолтод орон нутгаас болон нийслэлийн дүүргүүдээс шалгарсан 350 уран нугараач оролцож монголын уран нугаралтыг геннисийн номонд бүртгүүлэхээр зорьж байгаа билээ. Тоглолтод оролцох 350 нугараач, 24 багшийн хамт уран нугаралтын мастер, Ардын жүжигчин, Төрийн соёрхолт, зууны манлай уран нугараач Г.Норовсамбуу гуайн удирдлаган дор Улаанбаатар чуулга, “Отгоо” студи, Аса цирк, Хаан банкны байранд бэлтгэл хийж байгаа юм байна. Тоглолтын ерөнхий найруулагчаар нийслэлийн “Улаанбаатар” чуулгын дарга, соёлын тэргүүний ажилтан Р.Мөнхсайхан ажиллаж байна.

Тоглолтонд нийт 20 гаруй студийн 350 хүүхэд нугараач оролцох бөгөөд цаг 30 минут үргэлжлэх аж.

“Уул усны домог” тоглолтод дэлхийд алдартай Нарны циркийн “O” шоунд оролцож байгаа уран нугаралтын одод оролцоно. АНУ-ын Лас Вегаст тоглож байгаа “О” шоуны дасгалжуулагч багш Монголын анхны хос нугараачдын нэг, “Монте Карло”-оос хамгийн анхны шагналыг эх орондоо авчирсан Ж.Эрдэнэчимэг, 1990 онд Парис хотоос Тагтаатай нугаралтаар мөнгөн медаль авчирч байсан Ундармаа, одоо АНУ-д ажиллаж амьдарч байгаа нугараач Н.Тунгалаг нар ирж оролцохоо албан ёсоор мэдэгджээ.

О.ӨНӨР

Өнгөрсөн сард АСЕМ-ын дээд түвшний 11 дэх уулзалт Улаанбаатар хотноо амжилттай зохион байгуулагдсан. Тэгвэл ирэх сард дахин олон улсын арга хэмжээ манай улсад болох нь ээ.

Дэлхийн хэмжээнд зохиогддог гоо бүсгүйн тэмцээнүүдээс эрэмбээрээ тавдугаарт бичигддэг “Face of beauty international” миссийн тэмцээн тав дахь жилдээ манай улсад зохион байгуулагдах гэж байна. Тус тэмцээнд оролцохоор дэлхийн 60 гаруй улсын гоо бүсгүй, тэдний гэр бүл, ойр дотныхон болон тэмцээний ерөнхий зохион байгуулагч Мила Мануел, “Missosology” сайтын тэргүүлэгч Павее Винтура, загварын агентлагын захирал, шүүгч гээд нийт 200-300 хүн манай улсад ирэх ажээ.

Иймд АСЕМ-ын уулзалтын үеэр хөдөөг зорьсон шигээ улс эх орныхоо төлөө дахин нэг удаа хотоо чөлөөлөх уриалгыг олон нийтийн цахим сүлжээгээр гаргаад байгаа аж.

Тус тэмцээн 14 хоногийн хугацаанд үргэлжлэх юм байна. Энэ хугацаанд олон улсын гоо бүсгүйчүүдийг Монголын түүхэн дурсгалт газруудаар болон Улаанбаатар хот дахь музейгээр аялуулах ажээ. Мөн авьяаслаг мисс, спортлог мисс, усны хувцастай хамгийн сайхан харагддаг бүсгүй гэх мэтчилэн урьдчилан шалгаруулалтыг зохион байгуулахаар төлөвлөсөн байна.

“Face of beauty international” олон улсын миссийн тэмцээн ирэх сарын 23-наас аравдугаар сарын 9-ны өдрүүдэд Улаанбаатар хотноо болно.

О.ӨНӨР