ОХУ-ын Москва хотод Олон улсын циркчдийн тэмцээн энэ сарын 2-5-ны өдрүүдэд зохион байгуулагджээ. Тус тэмцээнд манай улсын циркийн жүжигчид уран нугаралтын төрлөөр оролцсон. Улмаар мөнгөн цом хүртжээ.
Тус наадам энэ жил 15 дахь удаагаа ОХУ-ын алдарт жүжигчин Юрия Никулины 95 насны ойн хүрээнд зохион байгуулагдсан байна. Тэмцээнд БНАСАУ, БНХАУ, ОХУ зэрэг 20 гаруй орны циркчин уран нугаралтын үзүүлбэрээр өрсөлджээ. Үүнээс Буриад улсын төрийн шагналт, Урлагийн гавьяат зүтгэлтэн Ц.Сэлэнгэ багштай таван уран нугараач “Аватар” үзүүлбэрээрээ оролцож, мөнгөн цом хүртсэн байна.
Монголын залуу зохиолчдын холбоо анх 2015 онд “100 яруу найрагч-100 хайрын шүлэг” яруу найргийн наадмыг хоёр удаа зохион байгуулсан. Энэ жилийнхээ наадмыг “100 яруу найрагч-100 эх орны шүлэг” сэдвийн дор өнөөдөр буюу есдүгээр сарын 4-нд Үндэсний цэцэрлэгт хүрээлэнд болох гэж байна.
Холливүүдэд өндрөөр үнэлэгдсэн цөөн хэдэн Ази жүжигчдийн нэг Жеки Чанд Оскарын шагнал гардуулахаар болжээ. Өдгөө 62 настай жүжигчинг Америкийн кино академийн Ерөнхийлөгч “Тэр бол домог, анхдагчдын нэг яалт ч үгүй мөн” хэмээгээд шагналыг энэ сарын 11-р сарын 12-нд Лос Анжелес хотноо гардуулахаар болсноо мэдэгджээ. Жеки Чан 8 настайгаасаа эхлэн кино урлагт хөл тавьсан бөгөөд 120 гаруй киноны гол дүрийг бүтээжээ. Мөн тэрээр Мадаме Тюссогийн лааны тосон музейд заларсан цор ганц Ази үндэстэн бөгөөд Геннисийн аварга амжилтын номд дөрвөн удаа дурдагдаж, тэмдэглэгдсэн хүн юм. 
Төрийн хошой соёрхолт хөгжмийн зохиолч, Ардын жүжигчин, Н.Жанцанноров профессор цол хүртжээ. Тус шагналыг Монгол Улсын Соёл Урлагийн Их Сургуулийн Эрдмийн зөвлөлийн шийдвэрээр олгосон байна. Тэрээр урлаг судлалын ухааны доктор цолтой байсан юм. Эрхэм уран бүтээлч симфони, бүжгэн жүжиг, дуулаачийн болон дан хөгжмийн 300 орчим бүтээл, кино, драмын жүжгийн 30 гаруй хөгжим бүтээсэн байдаг байна. Н.Жанцанноров 1987 онд “Мандухай сэцэн хатан” киноны хөгжмийг бичихдээ морин хуурчдыг тэргүүн эгнээнд авчирч тавьсан нь тухайн үедээ цоо шинэ үзэгдэл болсон хэмээн Төрийн шагнал цол хүртсэн байдаг. Мөн 2000 онд морин хуурт зориулсан шилдэг бүтээлүүдээр Монгол Улсын Төрийн хошой шагнал хүртсэн, 2005 онд Монгол Улсын Ардын жүжигчин болсон билээ.
Улсын драмын эрдмийн театр намар цагийн үзвэрээ “Тэнгэрийн хүү” жүжгээр нээхээр болжээ. Уг жүжиг ирэх сарын 5,6-нд үзэгчдийн хүртээл болох ба мөн сонгодог жүжгүүд тоглохоор төлөвлөсөн байна. Тухайлбал, 9-р сарын 23, 24, 25-ны өдрүүдэд У.Шекспирийн “Ромео Жульетта” сонгодог жүжгийг шинээр тавихаар болсон ба уг жүжгийг УДЭТ-ын ерөнхий найруулагч Н.Наранбаатар өнгөрсөн жил шинэчлэн найруулж, үзэгчдийн хүртээл болгосон билээ. Харин 10-р сард уламжлалл ёсоор түүхэн жүжгүүд тайзнаа тоглогдоно
Монголын ууган хип хоп хамтлагуудын нэг болох “Ice Top” хамтлаг энэ жил 20 нас хүрч байна. Тэд 20 жилийн ойн баяртаа зориулан “Баярлалаа” бие даасан тоглолтоороо фенүүддээ бэлэг барих болсноо дуулгалаа. Гэнэтийн бэлэг дүүрэн тэдний 20 жилийн ойн тоглолт Төв цэнгэлдэх хүрээлэнд ирэх есдүгээр сарын 09-нд болох аж. МӨн монголдоо төдийгүй Азидаа дээгүүрт орох тоногт өхөөрөмжөөр хит дуунуудаа эгшиглүүлэхээр шийдэн хэдийнээ бэлтгэл ажлаа базаагаад байгаа гэнэ. Мөн энэ үдэш “Ice Top” хамтлагийнхны хамт нэгэн тайзнаа “Харсарнай”, “Хартас”, “Люмино”, “Эрхчөлөө”, “Дайнбаэнх”, “Татар”, “Дижитал”, “DJ Mr Dogs”, “Харанга” хамтлагийн дуучин Х.Лхагвасүрэн, поп дива Т.Ариунаа, “Хурд”, “Гурванохин”, “Киви”, “Лемонс”, “A Sound”, “Click click Boom”, реппер Gee, Genne, “Rokit Bay” зэрэг монголын рок поп, хип хоп урлагийн одууд тоглох юм байна. Дашрамд дурьдхад “Баярлалаа” тоглолтын тасалбар 5000 төгрөг гэж байгаа юм байна. 
Соёл, урлагийн ажилтны баярын өдрийг энэ жил “Чингисийн Хүрээ” цогцолборт ирэх сарын 10-нд тэмдэглэн өнгөрүүлнэ.
