Category: соёл-урлаг

Олон улсын нэр хүндтэй кино наадмын нэг Киотогийн олон улсын оюутны кино наадам энэ жил 19 дэх удаагаа 7 хоногийн турш үргэлжилж бямба гарагт шилдгүүдээ тодруулна.

Энэ жил тус кино наадамд дэлхийн оюутан залуусын 539 бүтээлээс 16 кино шилдгээр шалгарч дараагийн шатанд үлджээ. Сүүлчийн шатанд үлдсэн эдгээр бүтээлд Монголын залуу найруулагч Ц.Дэнсмаагийн “Зам” кино багтжээ. Уг кинонд малын хулгайтай тэмцэж байгаа цагдаа нарын үйл явдлыг кран ашиглан 360 градусын тойргоор, ямар нэг эвлүүлэггүй ганц планаар үргэлжлүүлэн авснаараа онцлог юм. Мөн дүрүүд нь дэлгэцэнд орж гарах мөч бүрийг урлагийн өндөр түвшинд, богино хэмжээний киноны стандартаар сонирхолтойгоор үзүүлж чадсан нь шүүгчдээс өндөр үнэлгээ авсан байна.

“Жаазлаб” хөгжмийн агентлаг Америкийн дуучин, төгөлдөр хуурч Чампиан Фултоныг Монголд урьжээ. Тэрээр ирэх сарын 8-нд ДБЭТ-т тоглох юм байна. Түүний тоглолтод Америкийн бөмбөрчин Стив Приут, Германы басс гитарчин Мартин Зенкер нар оролцох юм байна.

Чампиан Фултон нь багаасаа урлагийн гэр бүлд өсчээ. Түүний аав нь жазз хөгжимчин, ээж нь түүний авьяасыг багаас нь олж харсан нэгэн байж. Аавынх нь найзууд болох Clark Terry, Major Holley нар ч түүнд их нөлөөлсөн байна.Тэрээр таван настайдаа эмээгээрээ заалган төгөлдөр хуур тоглож сурчээ. 1994 онд тэднийх Лос Анжелес руу нүүж аав нь найз Clark Terry-н сургуулийн жааз хөгжмийн студийн захирал болсноос хойш тэрээр чөлөөтэй бэлтгэл сургуулилтаа хийх болжээ. Түүний анхны хөгжмийн гэрээ Clark Terry-н 75 насны ойн баярын өдөр хийгдсэн байна. Тэр үед Чампиан Фултон 10 настай байжээ. Анхны альбомоо тэрээр “For Those in Love” нэртэйгээр гаргасан.Тэрээр 2009 оны “Америкийн хөгжмийн шагнал гардуулах ёслол”-оос “Оны шилдэг жааз дуучин” шагнал хүртэж байжээ. Чампиан Фултоны талаар “New York music daly” хэвлэлд Дотоод сэтгэлийн гүнзгий мэдрэмжээ төгөлдөр хуур, хоолойгоороо хамгийн ойлгомжтой илэрхийлж чаддаг ховорхон чадвартай бүсгүй” хэмээн бичжээ.

О.ӨНӨР

Монголын Зохиолчдын эвлэлээс жил бүр уламжлал болгон зохион байгуулдаг оны шилдэг бүтээл шалгаруулах “Алтан өд-2016” наадмын бүртгэл эхэлжээ.

Энэ удаагийн наадмыг Монголын утга зохиолыг үндэслэгч, Их зохиолч Д.Нацагдоржийн мэндэлсний 110 жилийн ойн хүрээнд зохиох юм байна. “Алтан өд-2016” наадамд уран бүтээлчид яруу найраг, хүүхдийн зохиол, утга зохиолын орчуулга, хүүрнэл зохиолын богино хэмжээний бүтээл, хүүрнэл зохиолын томоохон хэмжээний бүтээл, жүжиг, киноны зохиол, баримтад уран зохиол, судлал, шүүмж гэсэн төрөлд өрсөлддөг билээ.

Өнгөрсөн жил “Алтан өд-2015” наадам Монголын хүүхдийн ордонд болж өндөрлөсөн билээ. Тус наадмаар Д.Нацагдоржийн, Г.Сэр-Одын нэрэмжит болон “Утга зохиолын төлөө” шагналыг зарим хүмүүст мөн олгосон юм.

Түрүү жилийн “Алтан өд-2015” наадмын шагнал хүртсэн уран бүтээлчид:
1. Яруу найргийн шилдэг бүтээл -Н.Мөнхбаяр -Дотоод цуурай
2. Хүүхдийн уран зохиолын шилдэг -Л.Мөнхбат- Амин зүрхний хайр буюу шидэт сарнай
3. Хүүрнэл зохиолын богино хэмжээний шилдэг бүтээл Д.Энхболд- Өвс ногоо аниргүй
4. Хүүрнэл зохиолын томоохон хэмжээний шилдэг бүтээл Д.Пүрэв -Зүс буруу салхи
5. Жүжиг, киноны шилдэг зохиол Д.Урианхай- Ханануудын амьдрал
6. Утга зохиолын судлалын шилдэг бүтээл Г.Бямбажав- Сэтгэлгээний эрх чөлөө ба ухамсрын урсгал
7. Утга зохиолын шүүмжийн шилдэг бүтээл Д.Хүү- Урлаг, утга зохиолын аман сэдвүүд
8. Утга зохиолын орчуулгын шилдэг бүтээл Н.Энхбаяр -Орчин үеийн Хятад яруу найраг
9. Баримтат уран зохиолын шилдэг бүтээл Ж.Баяржаргал- Монгол гарвалт суутан, цуутнууд

МЗЭ-ийн шагналыг:
1. Ч.Алтантүлхүүр – Есүй цагаан сарнаа уулс гэрэлтэнэ…
2. П.Анхтуяа-Дурлал яг дарс шиг
3. Ч.Наранцэцэг-Тунгалаг өнгө
4. Н.Өлзийбат-Оногдохуйн тавилан
5. Б.Хадбаатар-Чингүнжав дууль
6. Ш.Цоодол-Говь-Алтайн салбар
7. Ш.Энхбаяр-Сэтгэлийн хураангуй, Зүрхний хураангуй
8. Г.Даваасүрэн
9. Болдын Батхүү
10. Б.Цогнэмэх-Тэнгэрийн хүү /жүжиг/ бүтээлээр хүртсэн.
Г.Сэр-Одын нэрэмжит шагналыг:
1. Х.Чойдогжамц-Гүн хэлмэр-
2. Х.Алагаа-Эцэс үгүй төгсгөлд
3. Б.Алтанхуяг-Зурмал нүдэт хэрээ
Утга зохиолын төлөө зүтгэлтнээр
1.Б.Дагвадорж, Б.Бүргэд нар нэрлэгдсэн.
Д.Нацагдоржийн нэрэмжит шагналыг:
1. Ш.Бадарч-“Үд дундын уянга”
2. Д.Баянтунгалаг-“Зэлүүд сарны галбир”
3. Б.Баярсайхан- “Тэнгэрийн санаа”,”Хөх тэнгэр”
4. Л.Мягмарсүрэн-“Тэнгэрийн нутаг”
5. М.Эрдэнэбат-“Хүйтэн бороо”
6. Ш.Гүрбазар
7. Б.Батрэгзэдмаа-Их хаадын санаа
8. Сумъяа
Гурван мөрт шүлгийн уралдаанд:
1. Ардын уран зохиолч, Төрийн шагналт, соёлын гавьяат зүтгэлтэн, яруу найрагч Б.Лхагвасүрэн
2. “Болор цом”-ын эзэн, яруу найрагч А.Эрдэнэ-Очир
3. Яруу найрагч, зураач М.Амархүү
4. “Болор цом”-ын эзэн, яруу найрагч Х.Эрдэнэбаатар
5. Яруу найрагч, зураач Г.Мөнхбаатар
МЗЭ-д элссэн залуу яруу найрагчид:Л.Баясгалан, Я.Баяраа, Т.Есөн-Эрдэнэ, А.Төгөлдөр, Р.Улам-Оргих, А.Монголбаяр, Ц.Эрдэнэ, Э.Энхболд хүртэж байсан билээ.

Харин энэ жилийн хувьд дууны яруу найргийн төрлийг нэмэх талаар Монголын зохиолчдын эвлэлийн хорооны удирдах зөвлөлийн гишүүд ойрын хугацаанд хуралдах юм байна.

Гурван жилийн дараа УИХ-ын гишүүн С.Жавхлан тоглолтоо хийхээр болжээ. Тэрээр тоглолтоо “Хамаг Монголын халуун сэтгэл” гэж нэрлэсэн бөгөөд өөрийн найз ӨМӨЗО-ны дуучин н.Баясгаланд зориулан хийх гэж байгаа юм байна.

Хандивийн тоглолт Монгол бөхийн өргөөнд энэ сарын 29-30-ны өдрүүдэд болох аж. Эдийн засгийн хямралыг тооцон тасалбарын үнийг 15000 мянган төгрөгөөр тооцсон гэдгийг эх сурвалж хэллээ.МУГЖ цолоо УИХ-ын гишүүн гэх алдраар сольсон С.Жавхлан төрийн хар хүн болсноосоо хойш дуулахгүй байх гэсэн олон нийтийн эргэлзээг ийнхүү эвдлээ.

Гурван жилийн дараа тоглогдож буй“Хамаг Монгол” тоглолтод тус төслийн дуучид оролцох бөгөөд С.Жавхлан гишүүн голлон дуулах юм байна.

Буриад зон олныхоо өв уламжлалыг тээж яваа дуучин бүсгүй Ч.Энхзул нь 2016 оны “Алтаргана” наадамд зориулж өөрийн бие даасан анхны “Алтан шар нар” нэртэй буриад дууны цомгоо гаргаж байсан юм. Тэгвэл энэ удаа цомгийнхоо баярыг тохиолдуулаад 11 дүгээр сарын 27-ны 16:00 цагт “Алтан шар нар” нэртэй буриад дууны тоглолтоо хийх гэж байгаа юм байна. Тоглолтын хамгийн гол онцлог нь БУРИАД тоглолт гэдэгт орших юм байна. Энэхүү тоглолтод түүний “Алтан шар нар” цомогт багтсан бүх дуу дуулагдахаас гадна Монгол ардын үндэсний хөгжимтэй Буриад ардын дуунуудыг дуулах юм байна. Мөн амьд хөгжмийн хамтлагтай буриадын орчин үеийн дуунуудыг орчин үеийн хэв маягтай дуулахаар төлөвлөж байгаа бөгөөд тоглолтод урилгаар таван дуучин оролцох аж. Нэг нь “Алтаргана” наадмын тэргүүн байрын шагналт Г.Барсболд юм.

Тэрээр хэвлэлд өгсөн ярилцлагадаа “Мөрөөдөл дууссан газарт амьдрал дуусдаг гэдэг” үнэн үг юм байна. Би Буриад дуу дуулаад цомогтой болох юмсан гэж анх “Алтаргана” наадамд оролцож байхдаа мөрөөдөж байлаа. Тэр мөрөөдөл минь энэ жил биелэлээ орж байгаад баяртай байна. Би Улаан-Үд хотод ч юм уу, Шинэхэнд ч юм уу, Буриад улсад тоглолт хиие гэж бодож байгаагүй. Тухайн үед миний мөрөөдөл Улаанбаатар хотод тоглолтоо хийх байсан. Энэ дашрамд нэг зүйлийг хэлэхэд, надад Улаан-Үд, Москвад тоглолтоо хийгээчээ гэсэн санал ирсэн. Маш их баяртай байна” хэмээн ярьжээ.

О.ӨНӨР

Монгол Улсын Үндэсний урлагийн их театрын гоцлол дуучин, СУИС-ийн
багш, МУСТА С.Цогтсайхан хэдхэн хоногийн өмнө “Учиртай гурван толгой” аялгуут эмгэнэлт
жүжигт Нансалмаагийн дүрд тоглосон юм. Түүнтэй шинэ уран бүтээлийнх нь талаар ярилцсаныг
сонирхуулъя.

-Үндэсний дуу бүжгийн эрдмийн чуулга саяхнаас Монгол Улсын Үндэсний
урлагийн их театр гэгдэх болж нэрээ өөрчилсөн. Анхныхаа уран бүтээлээ ч үзэгчдийн
хүртээл болгосон. Шинэ уран бүтээлийн гол дүрд таныг тоглосон гэсэн?

-Чуулга маань саяхан арваннэгдүгээр сарын эхээр, Засгийн газрын шийдвэрээр
Монгол Улсын Үндэсний урлагийн их театр болж нэр маань өөрчлөгдсөн. Манай хамт олон
их зохиолч Дашдоржийн Нацагдоржийн 110 насны ойд зориулан 1934 онд Д.Нацагдорж,
Д.Намдаг нарын бүтээл “Учиртай гурван толгой” аялгуут эмгэнэлт жүжгийг яг тэр үеийн
дуулалт хэлбэрээр нь найруулан тавьсан. Найруулагчаар Н.Болд, уран бүтээлийн зөвлөхөөр
МУУГЗ А.Цэдэн-Иш ажиллаж, гол дүр болох Юндэнд СТА Б.Батмэнд, Балганд дуучин Д.Наранхүү,
Хоролмаад СТА Ц.Түмэнжаргал нар тоглож, миний хувьд Нансалмаагийн дүрийг бүтээх
эрхэм хариуцлагатай үүрэг ноогдсон. Энэ дүрийг бүтээхийн тулд тэр үеийн талаар нэлээд
ул суурьтай судалгаа хийж, их өвөрмөц Нансалмаагийн дүрийг бүтээлээ. Манай үзэгчид
Б.Дамдинсүрэнгийн “Учиртай гурван толгой” дуурийг сайн мэддэг бол бид энэ удаад
ардын дуунуудын аялгуунд оруулсан хэлбэрээр анх удаагаа бүтээлээ. Энэ нь Үндэсний
урлагийн их театрын урын сангийн бодлоготой нийцэж, уран бүтээлчдэд илүү ойр, сайхан
бүтээл болсон. Нээлтээ их зохиолчийн төрсөн өдрөөр нь, төрсөн нутаг болох Гүн галуутайд
хийж Багануур дүүргийн үзэгчдэдээ бэлэг барьж, амжилттай тоглоод ирлээ.

-Урлагийн их замд хөтлөгдсөн түүхээсээ дурсана уу?

-Хүүхэд байхаасаа би дуучин болно гэж мөрөөддөг байлаа. 1990 онд
Соёл урлагийн дээд сургууль байгуулагдахад анх уртын дууны ангид элсэн орж Зууны
манлай уртын дуучин, МУАЖ, Төрийн соёрхолт Н.Норовбанзадын анхны дээд мэргэжлийн
уртын дуучин шавь болох гавьяат багш Ц.Дэлгэрийн ууган шавь нь болж, энэ мундаг
хүмүүсийн заасан эрдмийг өвлөж суралцсандаа их бахархдаг. Сургуулиа төгсөөд
1996 онд УАДБЧуулгад дуучнаар орж байлаа. Намайг энд 20 гаруй жил ажиллах хугацаанд
чуулга маань ҮДБЭЧ, дараа нь Үндэсний урлагийн их театр гээд нэрээ гурван удаа сольж,
би ч уран бүтээлээ түмэн олондоо хүргэсээр явна.

-Тантай нэгэн цаг үед хамтарч уран бүтээлээ хийж байсан, одоо ч хамтран
ажиллаж байгаа дуучин яах аргагүй Б.Батмэнд. Та хоёрыг анхны дуэт дуучдын нэг гэдэг.
Хамтарсан уран бүтээлүүдийнхээ талаар уншигчдад сонирхуулаач?

-Тийм ээ, бид театрынхаа тайзнаа тавигдсан “Сүнжидмаа” дуулалт жүжгийн
Сүнжидмаа, Мянганы дүр, сая “Учиртай гурван толгой”-н Юндэн, Нансалмаа зэрэг гол
дүрүүдийг хамтдаа бүтээсэн. Түүнээс гадна 2000 оноос хөгжмийн зохиолчдын бүтээлүүдээс
А.Энхтайван, А.Байгалмаагийн “Санасан шүү чамайгаа” дууг анхны дуэт хэлбэрээр хослон
дуулж эхэлсэн тэр үеэс үзэгч түмнийхээ талархлыг хүлээсэн. Түүнээс хойш олон сайхан
дуу дуулсан. Хаана ч явсан үзэгч сонсогчдодоо хэдийнэ танил болж, дуугий минь аялах
нь уран бүтээлч хүний хамгийн том бахархал гэж боддог. Уран бүтээлч хүний хувьд
тайз дэлгэцийн бүтээлүүдэд ард түмний дунд домог болон ардын дуунд мөнхөрсөн Сүнжидмаа,
Нансалмаа, Хандармаа, Сийриймаа, Алгирмаа зэрэг олон сайхан Маагийн дүрүүдийг бүтээснээрээ
би их бахархдаг.

-Та бол дэлхийн улс орнуудаар явж ардынхаа урлагийг нэлээд сурталчилсан
дуучин. Гадаадын улс орнуудаар яваад уран бүтээлээ толилуулж байхад ямар бодол төрдөг
вэ?

-Үндэсний урлаг бол Монгол тусгаар тогтнолын баталгаа гэдэг. Тиймээс
Үндэсний урлагийн их театрын хувьд гадаад дотоодын үзэгчдэдээ ардын урлагаа сурталчлан
таниулах, өвлүүлэн үлдээх асар их үүрэгтэй. Миний хувьд дэлхийн 10 гаруй орноор
явж, уртын дуугаа түгээж сурталчлан таниулахаас гадна олон улсын ардын урлагийн
наадамд амжилттай оролцож байсан. Олон улсын болон улсын чанартай уралдаан тэмцээнд
дөрвөн удаа тэргүүн байр эзэлсэн юм байна. Хүмүүс намайг бөхөөр бол Дархан аварга
юм байна гэж хошигнодог.

-Та бол Үндэсний урлагийн их театрын гоцлол дуучин. Тэгвэл бие даасан
уран бүтээлийнхээ талаар манай уншигчдад сонирхуулаач?

-Би 2005 оноос хойш “Санасан шүү чамайгаа”, “Уяхан замбуу тивийн
наран дор”, “Хатан салхины аялгуу”, “Ээжийн үнэртэй сүүн аялгуу” зэрэг бие даасан
болон хамтарсан уран бүтээл хийж, үзэгч түмэндээ хүргэсэн. Их Монгол Улс байгуулагдсаны
800 жилийн ойд зориулан бүтээсэн “Их төрийн голомт” уран сайхны киноны Өүлэн эхийн
дүрд тоглосон. Мөн “Хөсөгтөн” хамтлагтай хамтран “Жаран цагаан адуу” хэмээх сайхан
бүтээлээ хийж, хамтдаа гадаад орноор аялан тоглосон.

-Та сайхан багшийн шавь, одоо өөрөө шавь нараа бэлтгэж яваа багш
хүн энэ талаар ярина уу?

-Би СУИС-д арав шахам жил уртын дууны багшаар ажиллаж, олон сайхан
шавьдаа өөрийн мэддэг бүхнээ зааж сургаж явна. Миний шавь нар ирээдүйд алдартай
сайхан дуучид болно гэдэгт итгэлтэй байдаг. Би шавь нараараа ч их бахархдаг.

-Та бол олны танил болсон уран бүтээлчээс гадна “Алдарт эхийн одон”-той
ээж хүн, гэр бүлийнхээ талаар яривал манай уншигчдад их сонин байх болов уу гэж
бодлоо?

-Уран бүтээлч хүнийг амжилтанд хүргэдэг хамгийн чухал зүйл бол хань
ижил, гэр бүл байдаг. Урлагийн хүний ажил цаг наргүй байдаг. Бүхий л цаг үед гэр
бүл, үр хүүхдээ анхаарах хань гэдэг чухал. Миний хань тийм л хүн. “Алдарт эхийн
одон”-гоо гардаж авахдаа ээжээрээ бахархаж, хайрлаж, их огшдог юм билээ. Уяхан Замбуутивийн
наран мандсан Монгол нутагтаа их урлагийн гэр бүлийн нэгэн үеийнхэнд багтаж гурван
цагийг холбох хувь заяанд төрсөндөө би баярлаж явдаг. Үндэсний урлаг үеийн үед дэлгэрэн
хөгжих болтугай хэмээн ерөөе!

Ю.ДЭЛГЭР

Ардын уран зохиолч Б.Лхагвасүрэнгийн “Тамгагүй төр” түүхэн жүжиг үзэгчдийн хүсэлтээр энэ сарын 23, 24-ний өдрүүдэд Улсын драмын эрдмийн театрын тайзнаа дахин тоглогдохоор боллоо.

Тус жүжиг нь гурван үзэгдэлт, зургаан бүлэгт эмгэнэлт жүжиг юм. Энэхүү жүжгийн найруулагчаар Ч.Найдандорж, тайзны зураачаар Т.Ганхуяг нар ажилласан бол Арчуг хааны дүрийг МУГЖ Б.Жаргалсайхан бүтээн үзэгчдийн хүртээл болгосон билээ.

Монгол Улсын Морин хуурын чуулгын хамт олон Гадаадын болон орчин цагийн сонгодог бүтээлүүдийн сор болсон аялгуунуудыг тоглох “Best of Classics” тоглолтоороо үзэгч олонтойгоо уулзахаар болжээ. Уг тоглолтыг Морин хуурын чуулга, “Цэцээ-Гүн” Ротаракт клуб хамтран энэ сарын 26-ны өдөр Соёлын төв өргөөнд зохион байгуулж байгаа ба тоглолтын орлого нь сайн үйлсийн төлөө зориулагдах юм.

Морин хуурын чуулга үүсгэн байгуулагдсаны 25 жилийн ой ирэх жил тохионо. Энэ хүрээнд ийнхүү нийгмийн сайн сайхны төлөө сор болсон бүтээлүүдээс дээжлэн сонордуулах юм байна. Уг тоглолтыг хоёр дахь удаагаа зохион байгуулж байгаа ажээ.

Өнгөрсөн жилийн өдийд зохион байгуулсан “Best of Best” тоглолтын орлогоор Монгол улсын ирээдүй болсон шилдэг 10 оюутанд нэг жилийн сургалтыг тэтгэлгийг олгож байсан бол энэ жил харааны бэрхшээлтэй оюутнууд болон хүүхдийн суралцах эрүүл орчинг бий болгох төсөлд дэмжлэг үзүүлэх юм.

Хэр олон үзэгч тоглолтыг үзэхээр зорьж ирнэ, тэр хэрээр бид нийгэмдээ хувь нэмэр оруулж чадах нь. Тийм учраас энэхүү санаачилга нь Морин хуурын чуулгын тоглолтыг үзэж, шилдэг бүтээлүүдийг нь дахин дахин сонсох дуртай үзэгчдийн дэмжлэгээр хэрэгжинэ гэсэн үг юм.

Дун цагаан өвлийн өнгийг эгшиг холбож зурсан Оросын алдарт хөгжмийн зохиолч Г.Свиридовын вальс, тройка, романс … Морин хуурын чуулгын “Best of Classics” тоглолт ингээд л эхэлнэ. Та гэр бүлээрээ, найз нөхөдтэйгөө хамт Хуурын чуулгынхаа тоглолтыг зорьж, нэгэн үдшийг гайхалтай өнгөрөөхийн зэрэгцээ нийгмийнхээ сайн сайхны төлөө хувь нэмэр оруулаарай.

Мэргэжлийн уран бүтээлчид оролцсонТөрийн соёрхолт, Монгол Улсын урлагийн гавьяат зүтгэлтэн Б.Шаравын нэрэмжит уралдаан энэ долоо хоногт эцсийн шалгаруулалтаа явуулж дуусна. Тодруулбал, мэргэжлийн дуучид, үндэсний хөгжим хөгжимдөгчдийн Олон улсын II уралдаан амжилттай үргэлжилж гуравдугаар шатанд 10 дуучин, зургаан хөгжимчин шалгарч үлдээд байгаа бөгөөд энэхүү сүүлчийн шатны хувьд хөгжмийн зохиолч Б.Шаравын бүтээлүүд эгшиглэдгээрээ онцлог болох ажээ. Дуучид “Чингис хаан” дуурийн дүр, дүрийн ари, хөгжимчид өөр өөрсдийн хөгжимд зориулсан концерт, сюитийг тоглох юм. Уралдаанд оролцож буй уран бүтээлчид ХБК-д тоглолтоо хийж байгаа юм. Ирэх лхагва гаригт энэхүү уралдаан эцсийн шалгаруулалтаа дуусгаж, гала тоглолтоо хийх ажээ.

Б.Шаравын нэрэмжит анхдугаар уралдааны гуравдугаар шатны хуучир хөгжмийн аялгууг хүргэе.

“Nomadic ballet” продакшны бүтээл “Цасан гоо ба долоон одой” бүжгэн жүжиг “Корпорайт” зочид буудлын концертын танхимд өнөөдөр тоглогдоно. Энэхүү бүжгэн жүжгийн балетмейстерээр Г.Батчимэг, тайзны зураачаар Б.Алтансүх нар ажиллаж байгаа аж. Мөн долоон одойн дүрд “Nomadic ballet” продакшны жүжигчид, харин ойн амьтад болон бусад дүрд “Шелкунчик” балетын сургуулийн сурагчид тогложээ.

“Цасан гоо ба долоон одой” балетыг дэлхийн олон театр тоглодог ба манай улс хөгжмийн зохиолч Б.Павловскийн хувилбараар ийнхүү анх удаа тайзнаа амилуулж байна.