Category: улс-төр

ЭЗХЯ-ны Төрийн нарийн бчигийн дарга Б.Шинэбаатар сэтгүүлчдэд мэдээлэл
хийлээ. Тэрбээр “Намайг өглөө ажилдаа ирэхэд миний өрөөний таазнаас шавар, шохой будаг
унасан байдаг байсан. Би үүнийг цэвэрлэгч дуудаад цэвэрлүүлдэг байлаа. Харин
өнгөрсөн баасан гаригт сэжиг төрөөд, энэ талаараа сайд Н.Батбаяртаа хэлсэн. Сайд
“наадах чинь ноцтой асуудал байна. 
Шалгуулах хэрэгтэй” гэсэн юм. Ингээд холбогдох байгууллагын хүмүүсийг
дуудан, ТЕГ-тай холбоо барьсан. Үзлэгээр чагнах төхөөрөмж, камер гарсан. Миний
хувьд чагнах төхөөрөмжийг мэдэхгүй. Би төрд насаараа зүтгэсэн. ОХУ-д ЭСЯ-д ч
ажиллаж байлаа.  Анх сургууль төгсч ирээд,
Гадаад эдийн засагтай харьцах улсын хороонд ажиллаж байсан. Төрийн өмчийн
хороонд бас ажилласан. Завсарт нь хувийн секторт 10 гаруй жил ажилласан. Энэ
хугацаанд миний хувьд ямар нэг асуудалд холбогдож байгаагүй. Надад янз бүрийн
эрүү үүсгэсэн түүх байхгүй. Төрийн албанд би шударгаар ажиллаж ирсэн. Гэтэл
өнөөдөр төрийн албанд ажиллаж байгаа хүмүүсээ ингэж чагнаж байгаад миний хувьд
гайхсан. Гомдолтой байгаа. Энэ талаар гомдлоо ТЕГ-т  гаргасан гэлээ. Б.Шинэбаатар мэдээлэл
хийснийхээ дараа сэтгүүлчдийн сонирхсон асуултад хариулав.

-Хаанаас тэр
төхөөрөмжийг тавьсан бол. Танд ямар нэг таамаглал байна уу?

-Хаанаас тавьсаныг нь би мэдэхгүй. Миний өрөөнөөс гарсан. Одоогоор яамны
хүрээнд үзлэг хийгээгүй байна.

-Өрөөнд чинь шохой шавар
унаад хэр хугацаа өнгөрсөн  бэ?

-Гурав дөрвөн сар болсон. Тэрийг би анзаардаггүй байсан юм. Тэр өдөр л
гэнэтхэн сайдтай зөвлөлдсөн.

-ТЕГ-аас танд ямар нэг
хариу өгсөн үү?

-Тэд миний гомдлыг шалгаж эхэлнэ гэсэн. Шалгаж байгаа.

Таныг АТГ шалгах уу?

-Би шалгуулах үндэслэл байхгүй гэж бодож байна. Төрд олон жил ажиллахдаа
улсын ажлыг унагаж байгаагүй.

-Ерөнхий сайд Төрийн
нарийн бичгийн дарга нарыг дуудаж уулзсан гэсэн. Бусад төрийн нарийн бичгийн
дарга нарын өрөөг шалгах үүрэг өгсөн болов уу?

-Би тэр уулзалтад байгаагүй. Өргөдлөө бичиж байсан үе.

-Таны өрөөнд улсын
нууцтай холбоотой ямар нэгэн яриа хэлэлцээ явагдсан болов уу?

-Миний өрөөнд ноцтой зүйл байхгүй гэж бодож байна. ЭЗХЯ бол улс орны хэтийн
төлөв, ойрын дунд болон урт хугацаанд төлөвлөх асуудал ярьдаг. Энэ утгаараа
ноцтой зүйл байхгүй. Бидний хийсэн журам, заавар, хуулийн төслүүд УИХ дээр
нээлттэй хэлэлцэгддэг.

-Хуулийн хугацаанд танд
хэдий үед эргэж мэдэгдэх бол?

-Үүнийг сайн мэдэхгүй байна. Иргэдээ нууцаар шалгах нь хууль бус гэж үзэж
байна.

Таны өргөдөлтэй
холбоотойгоор өөрийг тань шалгаж байгаа юу?

-Үүнтэй холбоотойгоор ТЕГ-ынхан надаас асуулт асуусан.

Л.МӨНХ

Монгол Улсын Ерөнхийлөгч Ц.Элбэгдоржид өнөөдөр Бүгд найрамдах Турк улс /БНТУ/-ын Үндэсний Их Хурлын дарга Жемил Чичек бараалхлаа.

Ерөнхийлөгч Ц.Элбэгдорж уулзалтын эхэнд хоёр орны харилцаа сайн хөгжиж байгааг дурдаад Монгол Улс гадаад бодлогодоо Турк улсыг гуравдагч хөршөө хэмээн үзэж харилцаагаа өргөжүүлэхийг эрмэлзэж байдгийг тэмдэглэлээ. БНТУ-ын Үндэсний Их Хурлын дарга Жемил Чичек тус улсын Ерөнхийлөгч Абдулла Гулийн чин сэтгэлийн мэндчилгээг Монгол Улсын Ерөнхийлөгчид дамжуулав.

Хоёр орны хооронд дипломат харилцаа тогтоосны 45 жилийн ой удахгүй тохиох гэж байгааг Туркийн Үндэсний Их Хурлын дарга дурдаад Монгол Улсын зүгээс тус улстай тогтоосон харилцаанд гуравдагч хөршийн бодлогын үүднээс чухал ач холбогдол өгч ханддагт талархал илэрхийлэв. Үүнээс гадна эртний өв соёлын түүхэн уламжлалаар хоёр орон холбогдож байдгийг тэмдэглэсэн юм.

Хоёр талын хооронд байгуулсан 100 орчим гэрээ, хэлэлцээр байдаг нь Монгол, Туркийн харилцаа хэрхэн өндөр түвшинд хөгжиж буйг харуулж байна гээд цаашид эдийн засгийн харилцаагаа өргөжүүлэх чиглэлд анхаарах болно гэлээ. Агаарын тээвэр, дэд бүтэц, эрчим хүчний салбарт хамтран ажиллах, Монголоос Туркт оюутан сургадаг уламжлалыг цаашид үргэлжлүүлэх, Туркийн хөгжлийн туршлагаас хурдацтай хөгжиж буй Монгол Улстай хуваалцахад бэлэн байгаа зэрэг сэдвийг мөн хөндөн ярилцлаа.

Монгол Улсын Ерөнхийлөгч Ц.Элбэгдорж хоёр орны улс төрийн дээд түвшний тогтмол сайн харилцаа хадгалагдаж байгаад баяртай байгаагаа илэрхийлээд хоёр орны эртний түүхэн уламжлалт харилцааг хүндэтгэж явдгаа онцлов. Мөн 2005 онд Монгол Улсын Ерөнхий сайдаар ажиллаж байхдаа Туркийн Ерөнхий сайд Т.Эрдоаны Монголд хийсэн айлчлалын үеэр хамтдаа Орхоны хөндийн цогцолборыг нээж, Хөшөө цайдамын замыг хүлээж авч байснаа дурслаа.

Туркийн зах зээлд хэрэгтэй, Туркээр дамжиж өөр зах зээлд гаргах боломжтой бүтээгдэхүүнийг Монголд үйлдвэрлэх боломжийг хамтран хайх талаар уулзалтын үеэр дурдаж, хүмүүнлэгийн харилцаа, ялангуяа Туркт Монголоос оюутан сургах харилцаа, батлан хамгаалах, хууль сахиулах салбарын хамтын ажиллагаа сайн байгааг тэмдэглэв. Орон сууц, барилгын салбарт Монгол Улсын Засгийн газар Туркийн талаас зээл авах ажлын талаар мөн хөндөж байв.

Уулзалтын төгсгөлд Ерөнхийлөгч Ц.Элбэгдорж “Таны энэ айлчлал хоёр орны түүхэн харилцааг шат ахиулахад чухал ач холбогдолтой байх болно” гээд Турк улсын Ерөнхийлөгч Абдулла Гульд чин  сэтгэлийн элэгсэг, халуун дотно мэндчилгээ дэвшүүлж буйг уламжилж өгөхийг  БНТУ-ын Үндэсний Их Хурлын даргаас хүслээ.

УИХ-ын  Төрийн байгуулалтын байнгын  хорооны хуралдаанаар  

Засгийн газраас  өргөн мэдүүлсэн Нийтээр тэмдэглэх баярын болон тэмдэглэлт өдрүүдийн тухай хуульд нэмэлт оруулах тухай хуулийг хэлэлцэж, хууль санаачлагчийн илтгэлийг Хууль зүйн сайд Х.Тэмүүжин танилцуулсан юм.

 Нийтээр тэмдэглэх баярын болон тэмдэглэлт өдрүүдийн тухай хуулиар Үндэсний их баяр наадмын өдрүүд болох 7 дугаар сарын 11, 12, 13-ны өдрүүдэд бүх нийтээр амардаг. Харин Засгийн газраас санаачлан боловсруулж өргөн барьсан энэхүү хуулийн төсөлд Нийтээр тэмдэглэх баярын болон тэмдэглэлт өдрүүдийн тухай хуулийн 4 дүгээр зүйлийн 4.1.1 дэх заалтын “13” гэсний дараа “, 14, 15” гэж нэмж, баярын өдрүүдэд нийтдээ таван өдөр амардаг байхаар тусгажээ.

  Хууль санаачлагчийн танилцуулгатай холбогдуулан байнгын хорооны гишүүд Засгийн газрын Хэрэг эрхлэх газрын дарга Ч.Сайханбилэгээс асуулт асууж тодруулан саналаа хэллээ. Тухайлахад Улсын Их Хурлын гишүүн Су.Батболд Нийтээр тэмдэглэх баярын болон тэмдэглэлт өдрүүдийн тухай хуулийн төслийг шинэчлэн боловсруулах асуудлаар байнгын хорооноос ажлын хэсэг гаргаж ажиллуулах гэж байгаа учраас энэ хуулийн төслийг буцааж бүхлээр нь харж өөрчлөн зохицуулах хэрэгтэй, Улсын Их Хурлын гишүүн С.Баярцогт Хөдөлмөрийн хуульд байгаа амралтын хоногийн тоог багасгах, нийтээр тэмдэглэх баярын өдөр нь амралтын өдөр таарсан нөхцөлд шилжүүлж тооцдог байх үүднээс хуулийн төслийг цогцоор нь авч үзэх нь зүйтэй юм гэсэн байр суурьтай байгаагаа хэлэв. Харин Улсын Их Хурлын гишүүн Д.Эрдэнэбат, С.Дэмбэрэл нар хуулийн төслийг дэмжиж буйгаа илэрхийлсэн юм. Ингээд хуулийн төслийг хэлэлцэхийг дэмжих санал хураалт явуулахад Байнгын хорооны хуралдаанд оролцсон гишүүдийн олонхын дэмжлэг авлаа.

Монгол Улсын Их Хурлын дарга Зандаахүүгийн Энхболд, манай улсад албан ёсны айлчлал хийж буй Бүгд Найрамдах Турк Улсын Үндэсний Их Хурлын дарга Ж.Чичек нар айлчлалын үеэр яригдсан асуудлаар хоёр орны сэтгүүлчдэд өнөөдөр / 2014.06.24 / мэдээлэл хийлээ. Мэдээллийн эхэнд Улсын Их Хурлын дарга Бүгд Найрамдах Турк Улсын Үндэсний Их Хурлын дарга Ж.Чичекийн Монгол Улсад хийж буй албан ёсны айлчлал амжилттай болж байгааг тэмдэглээд энэхүү айлчлал нь хоёр орны хооронд дипломат харилцаа тогтоосны 45 жилийн ойн хүрээнд болж байгааг онцоллоо. 

Тэрээр албан ёсны хэлэлцээ хийж, Монгол Улсын Их Хурал, Бүгд Найрамдах Турк Улсын Үндэсний Их Хурал хоорондын хамтын ажиллагааны протоколд гарын үсэг зурж, хоёр талын харилцаа, хамтын ажиллагааны өргөн хүрээтэй асуудлаар, түүний дотор парламент хоорондын хамтын ажиллагааны талаар санал солилцлсон талаар дуулгаад хоёр улс өнө эртний түүхийн хэлхээ холбоотой, ижил төстэй хэл соёл, өв уламжлалтай улсууд гэдгийг онцлон тэмдэглэв. Мөн Түргийн Билгэ хаан, Күльтэгин, Мэргэн Тоньюкук зэрэг хаад, ноёдын хөшөө дурсгал манай улсын нутагт хадгалагдан үлдсэн тухай дурдлаа.

Монгол Улсын “Гадаад бодлогын үзэл баримтлал”-д Турк Улстай “гуравдагч хөрш”-ийн бодлогын хүрээнд түншлэлийн харилцаа, хамтын ажиллагааг хөгжүүлнэ хэмээн тусгагдсаны дагуу хоёр улсын найрсаг харилцаа, хамтын ажиллагааг өргөжүүлэн хөгжүүлэхэд энэхүү айлчлал чухал ач холбогдолтой хэмээн УИХ-ын дарга З.Энхболд тэмдэглэв. Мөн тэрээр Турк Улсын Үндэсний Их Хурлын даргын айлчлалын гол зорилго нь хоёр орны уламжлалт харилцаа, хамтын ажиллагааг улам гүнзгийрүүлж, өндөр дээд түвшинд хийх харилцан айлчлал, яриа хэлэлцээний залгамж чанар, давтамжийг хадгалах, парламент хоорондын хамтын ажиллагааг өргөжүүлж үр ашгийг дээшлүүлэхэд оршиж байгааг илэрхийлээд албан ёсны хэлэлцээний үеэр бид хоёр талын харилцааг цаашид өргөтгөн хөгжүүлэх, манай талаас Туркийн хөрөнгө оруулалтыг орон сууц, дэд бүтэц, эрчим хүч, аялал жуулчлал зэрэг салбарт түлхүү оруулах сонирхолтой байна гэлээ.

Бүгд Найрамдах Турк Улсын Үндэсний Их Хурлын дарга Ж.Чичек энэхүү айлчлал нь хоёр орны хооронд дипломат харилцаа тогтоосны 45 жилийн ойн босгон дээр тохиож байгаа нь онцгой байр суурийг эзэлж байна гээд Турк болон Монголчууд түүхэн харилцаатай бөгөөд дэлхий дээрх олон жил оршин тогтнож байгаа цөөхөн үндэстнүүдийн нэг гэдгийг онцлон тэмдэглэв. Мөн тэрээр Турк, Монгол Улсын хооронд ямар нэгэн улс төрийн зөрчил байхгүйг онцлоод энэ нь цаашид хоёр улсын хоорондын харилцаа, хамтын ажиллагаа бүх талаар өргөжин хөгжих явдал юм гэдгийг тэмдэглэв. Түүнчлэн Бүгд Найрамдах Турк Улс өөрсдийн олж авсан арвин их туршлагаасаа ах дүүгийн найрамдалт харилцаатай Монгол Улсад хуваалцахад бэлэн байдгийг дурдаад боловсрол, гэр хорооллын дахин төлөвлөлт, бүтээн байгуулалт гэх мэт олон салбарт хамтран ажиллах боломж байгааг дуулгалаа хэмээн УИХ-ын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.

Монгол Улсын Их Хурлын дарга Зандаахүүгийн Энхболдын урилгаар зургадугаар сарын 23-26-ны өдрүүдэд манай улсад албан ёсоор айлчилж байгаа Бүгд Найрамдах Турк Улсын Үндэсний Их Хурал /ТУҮИХ/-ын дарга ноён Жемил Чичек, Монгол Улсын Их Хурлын дарга З.Энхболд нар өнөөдөр /зургадугаар сарын 24/ албан ёсны хэлэлцээ хийснийхээ дараа  Монгол Улсын Их Хурал, Бүгд Найрамдах Турк Улс /БНТУ/-ын Үндэсний Их Хурал хоорондын хамтын ажиллагааны протоколд гарын үсэг зурлаа.

 Гарын үсэг зурах үеэр Улсын Их Хурлын гишүүн, Гадаад харилцааны сайд Л.Болд, Монгол Улсаас БНТУ-д суугаа Онц бөгөөд Бүрэн эрхт Элчин сайд Б.Батхишиг, БНТУ-аас Монгол Улсад суугаа Онц бөгөөд Бүрэн эрхт Элчин сайд Мурат Карагез, Улсын Их Хурлын гишүүн, Улсын Их Хурлын Төрийн байгуулалтын байнгын хорооны дарга, Улсын Их Хурал дахь Монгол-Туркийн парламентын бүлгийн дарга А.Бакей, ТУҮИХ-ын гишүүн, ТУҮИХ-ын даргын дэргэдэх Удирдах зөвлөлийн гишүүн, Турк-Монголын парламентын найрамдлын бүлгийн дарга Фехми Күпчү нар болон хоёр талын албаны бусад хүмүүс байлцлаа гэж Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээллээ.

УИХ-ын Эдийн засгийн байнгын хороо Төрийн ордны “А” танхимд хаалттайгаар хуралдаан үргэлжилж байна. Энэ удаагийн хуралдаанаар Төрөөс төмөр замын тээврийн талаар баримтлах бодлогын хэрэгжилтийг хангах зарим арга хэмжээний тухай УИХ-ын тогтоолын төслийг хэлэлцэж байгаа юм. Хуралдааны эхэнд УИХ-ын гишүүн Д.Зоригт хаалттай хэлэлцэх санал гаргасан. УИХ-ын гишүүн Ц.Нямдорж “Нууцын зэрэглэлтэй асуудал ярих болоход хуралдаанаа хааж, бусад асуудлыг нь нээлттэй хэлэлцэх ёстой” гэсэн байр суурь илэрхийлснээр хуралдааныг нээлттэй байдлаар хийхээр болсон ч Зам тээврийн сайд А.Гансүх “Үндэсний аюулгүй байдлын зөвлөлийн хуралдаанаар асуудлыг хэлэлцсэн, зарим зүйл нууцын зэрэглэлд хамаарах учраас байнгын хороог хаалттай хийх шаардлага байна” гэснээр хаалттай хуралдаж байна.

Мөн дээрх байнгын хорооны хуралтай давхцан УИХ-ын Байгаль орчин, хүнс хөдөө аж ахуйн байнгын хорооны хуралдаан болж байна. Тус байнгын хороогоор Байгаль орчны төлөв байдлын 2013 оны тайлан сонсч байгаа юм.

Э.ЭНХ

“Эдийн засгийг эрчимжүүлэх 100 хоног” ажлын хүрээнд Ерөнхий сайдын дэргэд байгуулагдсан эдийн засгийн зөвлөлөөс мэдээлэл хийлээ.  ЭЗЭН-100 хөтөлбөрийн хүрээнд өнгөрсөн долоо хоногт зохион байгуулсан “Бизнесийн дээд хэмжээний уулзалт”-ыг Монгол Улсыг гадаадад сурталчлах, хөрөнгө оруулалт татахад чухал нөлөө үзүүлсэн арга хэмжээ боллоо гэж эдийн засгийн зөвлөлийнхөн дүгнэж байна. “Бизнесийн дээд хэмжээний уулзалт”-ын гол зорилго нь монголын компаниуд бизнесийнхээ боломжуудыг хөрөнгө оруулагчдад танилцуулах явдал байлаа. Монголын компаниуд хөрөнгө оруулалтын бэлэн болсон 18 төсөл танилцуулж, дээд хэмжээний чуулга уулзалт тавьсан зорилгоо биелүүлсэн гэж  Эдийн засгийн зөвлөлийн нарийн бичгийн дарга Б.Бямбасайхан хэллээ. Энэ 18 төслийн нийт хөрөнгө оруулалтын хэмжээ нь 15 орчим тэрбум доллар болж байгаа юм.

Эрчим хүчний салбар эдийн засгийн өсөлтийнхөө түрүүнд явж байх ёстой. Энэ салбарт ойрын үед том өөрчлөлтүүд гарч, хоёр том мега төсөл хэрэгжиж эхэлж байна. Гуравдугаар цахилгаан станц 50 Мвт-аар хүчин чадлаа өргөтгөж, тавдугаар цахилгаан станцын төслийн концесийн гэрээнд талууд гарын үсэг зурсан бол Таван толгойн 450 Мвт-ын цахилгаан станцын яриа хэлцэл удахгүй эхэлнэ гэж Эдийн засгийн зөвлөлийн нарийн бичгийн дарга  хэллээ  гэж Засгийн газрын хэвлэл мэдээлэл олон нийттэй харилцах албанаас мэдээллээ.

Монгол Улсын Их Хурлын дарга Зандаахүүгийн Энхболдын урилгаар Бүгд Найрамдах Турк Улсын Үндэсний Их Хурлын дарга ноён Жемил Чичек, түүний гэргий Гүлтен Чичек болон албаны бусад төлөөлөгчид өчигдөр Монгол Улсад хүрэлцэн ирлээ. Бүгд Найрамдах Турк Улсын Үндэсний Их Хурлын дарга ноён Жемил Чичек тэргүүтэй төлөөлөгчдийг “Чингис хаан” олон улсын нисэх онгоцны буудалд газардахад Улсын Их Хурлын гишүүн, Төрийн байгуулалтын байнгын хорооны дарга, Улсын Их Хурал дахь Монгол-Туркийн бүлгийн дарга А.Бакей, Монгол Улсаас Бүгд Найрамдах Турк Улсад суугаа Онц бөгөөд Бүрэн Эрхт Элчин сайд Б.Батхишиг, Улсын Их Хурлын Тамгын газрын Ерөнхий нарийн бичгийн дарга Б.Болдбаатар болон албаны бусад хүмүүс угтан авлаа. Айлчлалын хүрээнд Монгол Улсын Их Хурлын дарга З.Энхболд, Бүгд Найрамдах Турк Улсын Үндэсний Их Хурлын дарга Жемил Чичек нар хэлэлцээ хийж, Монгол Улсын Их Хурал, Бүгд Найрамдах Турк Улсын Үндэсний Их Хурал хоорондын хамтын ажиллагааны протоколд гарын үсэг зурна. Мөн ноён Жемил Чичек Монгол Улсын Ерөнхийлөгч Ц.Элбэгдоржид бараалхаж, Монгол Улсын Ерөнхий сайд Н.Алтанхуягтай уулзана.

Түүнчлэн Бүгд Найрамдах Турк Улсын Ерөнхий сайдын дэргэдэх Туркийн хамтын ажиллагаа, зохицуулах агентлаг /ТИКА/-ийн санхүүжилтээр Улсын Их Хуралд хэрэгжсэн “Цахим номын сан” болон “Хэвлэх цехийн тоног төхөөрөмжийн шинэчлэл” төслийн нээлтийн ажиллагаанд оролцохын зэрэгцээ Өвөрхангай аймгийн Хархорин суманд зочилж “Эрдэнэ зуу”, Орхоны хөндий дэх Түрэгийн үеийн хөшөө цайдам музей, бэсрэг наадам үзэж сонирхох юм.

Монгол Улсын Их Хурлын дарга З.Энхболд 2014 оны 6 дугаар сарын 24-ний 09.30 цагт хүндэт зочныг Эзэн Чингис хааны талбайд угтах юм.

Монгол Улсын Батлан хамгаалахын дэд сайд А.Баттөр Бүгд Найрамдах Франц Улсын Парис хотноо 2014 оны энэ сарын 12-17-нд айлчилж, “Евросатори 2014” олон улсын батлан хамгаалахын аж үйлдвэрийн үзэсгэлэнд оролцов.

Айлчлах хугацаандаа Дэд сайд А.Баттөр БНФУ-ын БХЯ-ны Төрийн нарийн бичгийн дарга Кадер Арифтай хоёр талын уулзалт хийж, хоёр улсын батлан хамгаалах салбарын харилцаа, хамтын ажиллагааны хэрэгжилт, хэтийн төлөвийн талаар ярилцаж, уулзалтын төгсгөлд батлан хамгаалах салбарт хамтран ажиллах тухай хоёр талын техникийн тохиролцоонд гарын үсэг зурав. Тус тохиролцоо нь Монгол Улс, БНФУ-ын хоорондын батлан хамгаалах салбар дахь харилцаа, хамтын ажиллагааны анхны баримт бичиг болов.

Түүнчлэн дэд сайд А.Баттөр БНФУ-ын БХЯ-ны ЗЕГ-ын Олон улсын хамтын ажиллагааны газрын дарга генерал С.Рэбтай уулзаж хоёр талын батлан хамгаалах салбарын харилцааны талаар санал солилцов.  Мөн тэрээр Ази Номхон далайн бүс нутгийн орнуудыг хариуцсан газрын дэд дарга адмирал П.Осёр, Японы Батлан хамгаалахын дэд сайд Рёто Такета нартай тус тус уулзав. 

Эрх зүйч мэргэжилтэй иргэн А. Гантамир “Авлигатай тэмцэх газрын дарга, дэд даргыг томилох тухай” тогтоол нь Монгол Улсын Үндсэн хуулийн холбогдох заалтыг зөрчсөн хэмээн үзэж Үндсэн хуулийн цэцэд ханджээ. Тэрээр Д. Хурцыг АТГ-ын дэд даргын албан тушаалд тавигдах шаардлагад туссан эрх зүйн мэргэжилтэй гэх шалгуурыг давахгүй гэж үзсэн байна. “Монгол Улсын дээд боловсролын тухай хуулинд Дээд боловсрол эзэмшүүлэх дипломын сургалт 90 багц цагаас доошгүй байх, өмнөх түвшиний сургалтын багц цагийг оролцуулан  бакалаврын сургалт 120-оос доошгүй багц байна гэж заасан аж. УИХ Б. Хурцын  эрх зүйч мэргэжлийг эзэмшсэн гэдгийг 1999-2000 онд ОХУ-ын Аюулгүй байдлын академид суралцаж төгссөнөөр үнэлсэн нь буруу гэнэ. Эрх зүйч мэргэжлийг 10 сарын хугацаатай курсээр эзэмших боломжгүй хэмээн иргэн А.Гантамир үзэж байгаа юм байна. Авлига, албан тушаалын хэргээр шалгагдаж байсан, ТЕГ-т ажиллаж байхдаа үйлдсэн гэмт хэрэг нь 2006 оны Өршөөлийн хуульд хамрагдан эрүүгийн хариуцлагаас чөлөөлөгдсөн гэх мэт тайлбарыг  иргэн А.Гантамир Үндсэн хуулийн цэцэд өгөөд байгаа аж. 

М.УНДРАЛ