Монгол Улсын Ерөнхийлөгч Ц.Элбэгдорж гуравдугаар сарын 2-4-нд Герман улсад ажлын айлчлал хийхээр болжээ. Айлчлалын хүрээнд Монгол Улсын төрийн тэргүүн ХБНГУ-ын ерөнхийлөгч И.Гаук, Канцлер А.Меркельтэй тус тус уулзаж, Берлин хотноо зохиогдох Монгол, Германы бизнесийн форумд оролцоно. Мөн гуравдугаар сарын 4-8-нд ХБНГУ-ын Берлин хотноо болох олон улсын аялал, жуулчлалын “ITB Berlin 2015” үзэсгэлэнгийн нээлтийн ёслолын арга хэмжээнд түнш орны төрийн тэргүүний хувиар уригдан оролцож, үг хэлэх юм байна.
Category: улс-төр
МАХН-ын дарга Н.Энхбаярыг АТГ-аас шалгаж эхэлсэн тухай мэдээлэл өнгөрсөн пүрэв гаригт цацагдлаа. Мэдээлэл гарснаас хойш олон нийт асуудалтай холбоотой үзэл бодлоо уралдуулаад эхэлжээ. Товчхондоо олон нийт болон улс төрийн хашир ажиглагчид “Н.Энхбаярыг оролдоод хэрэггүй. Нэр хүнд нь өсөхийн нэмэр. Тэгээд ч одоо Н.Энхбаяр болсон шүү дээ. Бусдыг нь яагаад шалгадаггүй юм бэ. Газрын мафийн толгойлогч М.Энхболд, Т.Бадамжунай, Оюу толгойн С.Баяраас эхлээд өчнөөн хүн байна. Тэднийг шалгадаггүй юм уу” гэцгээж байна. Тэр бүү хэл уг мэдээллийг үнэн худал хэмээн талцаад эхэлжээ. МАХН-ынхан ч өөрсдөө өчигдөр хэвлэлийн хурал хийж асуудлыг тайлбарлав. Хэвлэлийн хурлын дараа МАХН-ын Ажлын албаны дарга Ц.Шаравдоржоос дараахь тодруулгыг авлаа.
-Н.Энхбаяр даргыг АТГ ямар хэргээр дуудсан юм бэ?
-МАХН-ын дарга, Монгол Улсын гуравдагч Ерөнхийлөгчийг хэрхэн яаж хэлмэгдүүлж, ял тулгаж шийтгэснийг монголчууд харсан.
Гэтэл Н.Энхбаярыг мөрдөн мөшгих, араас нь хууль хүчний ажиллагаа явуулах, зохиомол хэрэгт удаа дараалан гүтгэх оролдлого үргэлжилсээр байна. Үүний тод жишээ нь дахин зохиомол хэрэгт гүтгэж мөрдөн байцаах ажиллагааг цагдаагийн байгууллагаас эхлүүлж мөрдөн шалгах ажиллагаа одоо хүртэл явагдаж байна. Мөн өчигдөр (уржигдар) АТГ-ын хоёр ажилтан 13 цагийн үед МАХН-ын байран дээр ирж Н.Энхбаяр даргатай уулзахыг шаардаж өрөөнд нь орж өнөөдөр (баасан гариг)-ийн15 цагт АТГ-т ирэхийг сануулж зарлан дуудах хуудаст гарын үсэг зурахыг шаардсан. Н.Энхбаяр гэдэг хүн өнөөдөр зохиомол хэргийн улмаас биедээ учирсан эрүүл мэндийн хохирлоо арилгахын төлөө Солонгост эмчлүүлж байгаа. Харин цагаан сараар насан өндөр аав, ээждээ золгохоор ирээд байгаа ийм үе. Шинийн найманд буюу өчигдөр ээжийнх нь 80 насны ой тохиож байлаа. Н.Энхбаяр дарга ч ямар хэрэгт холбогдуулж дуудаж байгаа юм бэ гэдгийг тодруулахад тодорхой хариулт өгөөгүй. Энэ нь АТГ хууль бусаар ажиллаж байгаагийн тод илэрхийлэл. Хэдий тийм ч АТГ-ынханд шууд хариулт өгөх боломж байсангүй. Өмгөөлөгч маань Дорнод аймагт ажлаар явсан байсан. Тиймээс ч Н.Энхбаяр дарга “Би АТГ гэдэг ямар байгууллагыг мэднэ. Яаж хохироодог вэ, хэлмэгдүүлдэг вэ гэдгийг биеэрээ амссан хүн. Тиймээс өмгөөлөгчийн хамт очихоос өөр аргагүй учраас өнөөдөртөө хариу өгөх боломжгүй” гэдгээ тайлбарласан. Ер нь ямар хэргээр дуудсаныг нь олон талаар тодруулж байгаа ч мэдээлэл авч чадахгүй байна. АТГ энэ талаар ихэд нууцалж байна.
-Одоо яригдаж байгаа зарим хэрэгт холбоотой гэсэн таамаглал байна. Эсвэл шинээр хэрэг үүссэн гэх таамаглал ч гарч?
-АТГ-ын нөхдүүдийн харьцаж байгаа харьцаанаас харахад ихэд сэжигтэй байсан. Яагаад баасан гаригийг сонгож байгаа юм. Ер нь АТГ буюу хуулийн байгууллагуудын тогтсон уламжлал, арга барил бий. Баасан гаригт хүнийг баривчилдаг. Ямар арга хэмжээ авахыг нь ч мэдэхгүй байна. Ямар асуудалд холбогдуулаад байгааг мэдэхгүй. Түүгээр ч барахгүй байцаах уу, хөндлөнгийн гэрчээр асууж тодруулах гэж байгаа юу, хорьж цагдах уу гэдгээ огт хэлээгүй.
-Хэн хэн гэдэг хүн ирсэн юм бол?
-АТГ-ын ажилтан Эрдэнэсайхан, Ганбаяр гэдэг хүмүүс ирсэн.
-Заасан хугацаанд нь очих уу?
-МАХН-ын үйл ажиллагааг дэмжих хүмүүсийн тоо улам нэмэгдэж байна. Өнөөдөр 15 цагаас МАХН-д гишүүнээр элсэх өргөдлөө өгсөн хүмүүсийн батлахыг олгох ёслолын ажиллагаа болно. Ямартаа ч өмгөөлөгчтэйгөө уулзаад асуудлыг тодорхой болгох байх.
-Н.Энхбаяр дарга Солонгос руу буцах уу?
-Эмчилгээ нь үргэлжилж байгаа.
-Намын байртай холбоотой асуудлаар тодруулахаар дуудаад байгаа юм биш биз?
-Би хуульч хүний үүднээс хэлэхэд намын байртай холбоотой асуудал дээр ажиллаж, дүгнэлт хийж байгаа. Өнөөгийн дагаж мөрдөж байгаа хуулийн хүрээнд эл асуудал иргэний журмаар асуудлыг шийдэх ёстой. Яагаад гэвэл энэ байрыг худалдан авах гэрээг хийгээд төлөх ёстой 500 мянган ам.долларыг гурав хоногт төлчихсөн. Эрх зүйн харилцаа нь бүрэн дуусгавар болсон. Гэтэл заавал иргэний асуудлыг эрүү рүү шилжүүлж Н.Энхбаяр даргад нааж байгаа нь сонирхол татах асуудал гэж байв. Тэгвэл өчигдөр 15 цагт МАХН-д шинээр элсэгчдийг батламжлах ёслолын ажиллагааны үеэр МАХН-ын дарга Н.Энхбаяр биечлэн ирсэн юм. Тэрээр энэ үеэр хэвлэлийнхэнд тайлбар хийв. Тодруулбал, “Хүн өөрөө өөрийнхөө эсрэг мэдүүлэг өгдөггүй. Өөрийнхөө хамаатан садан, ах дүүсийнхээ эсрэг мэдүүлэг өгдөггүй. Хүний энэ эрх Үндсэн хуулиар хамгаалагдсан байдаг. Үндсэн хуулийн тэр зарчмын дагуу би хангалттай хэмжээнд мэдүүлгээ өгчихсөн. Хангалттай тайлбарлачихсан. Тиймээс би тэр эрхээ эдлээд өөрийнхөө эсрэг мэдүүлэг өгөхгүй гээд албан ёсны бичиг өгчихсөн хүн. Тийм байхад яагаад ч юм огт мэдүүлэг өгөхгүй байгаа юм шигээр тухайн үед мушгин ойлгуулж 600 цагдаа оруулж ирээд чирч гулдчаад аваад явсан. Би аль болох Монголдоо ирж очмоор байна. Хамаатан садантайгаа уулзмаар байна. Намынхан маань ч ирж бай гэдэг. Энэ үед ирж болохгүй шүү. Ирвэл баривчилна гэсэн мессеж хүртэл ирсэн. Тиймээс улс төр хийж байгаа нөхдөд хандаж энэ бол хоцрогдсон арга шүү. Энэ бол Африк арга. Энэ бол Латин Америкийн арга. Үүнээсээ болих хэрэгтэй. Монгол ардчиллаараа бахархъя гэж байгаа юм бол улс төрийнхөө өрсөлдөгчтэйгөө улс төрийн аргаар өрсөлддөг байх хэрэгтэй” хэмээлээ.
МАХН-ынхан ийм байр суурьтай байна. Харин асуудлын талаар АТГ-ынхнаас тодруулахад “Одоогоор энэ талаарх мэдээллийг өгөх боломжгүй байна. Удахгүй албан ёсны мэдээлэл гаргана” хэмээж байлаа.
Л.МӨНХӨӨ
УИХ-ын Аюулгүй байдал, гадаад бодлогын байнгын хорооноос өнөөдөр хэвлэлийн бага хурал хийж, УИХ-ын 2014 оны намрын ээлжит чуулганы хугацаанд хийсэн ажлаа тайлагнан сэтгүүлчдэд мэдээлэл өгөв. Хэвлэлийн бага хуралд тус Байнгын хорооны дарга Ж.Энхбаяр, УИХ-ын гишүүн С.Оюун нар оролцлоо.
Байнгын хорооны дарга Ж.Энхбаяр хийсэн мэдээлэлдээ, тус Байнгын хороо намрын ээлжит чуулганы хугацаанд 17 удаа хуралдаж, хуулийн төсөл 13, УИХ-ын тогтоолын төсөл 11, олон улсын гэрээ, хэлэлцээрийг зөвшилцөх 12 асуудал хэлэлцэж шийдвэрлэлээ. Түүнчлэн яам, агентлаг, харьяа байгууллагын танилцуулга, мэдээлэл гурав, Байнгын хорооны болон ажлын хэсгийн танилцуулга, төлөвлөгөө, тайлан зэрэг нийтдээ давхардсан тоогоор 40 асуудал хэлэлцэж тодорхой шийдвэр гаргалаа. Энэ хугацаанд Байнгын хорооны хуралдаанаас нийт 33 санал, дүгнэлт, зарчмын зөрүүтэй 23 саналын томьёолол гаргасан тухай дурдав. Мөн тус Байнгын хороонд харьяалагддаг Тусгай хяналтын дэд хороо намрын ээлжит чуулганы хугацаанд гурван удаа хуралдаж, зургаан асуудал хэлэлцэж шийдвэрлэснийг хэллээ.
Тус Байнгын хороо намрын чуулганы хугацаанд Засгийн газрын бүтцийн тухай, Засгийн газрын бүрэлдэхүүний тухай, Засгийн газрын тухай хуульд өөрчлөлт оруулах тухай хууль тогтоомжийн төслүүдтэй хамт өргөн мэдүүлэгдсэн Цөмийн энергийн тухай хуульд нэмэлт, өөрчлөлт оруулах тухай, Ашигт малтмалын тухай хуульд өөрчлөлт оруулах тухай хуулийн төслүүдийг УИХ-ын чуулганы нэгдсэн хуралдаанаар хэлэлцүүлж батлуулсан юм. Түүнчлэн намрын чуулганы хугацаанд Монгол Улсын Засгийн газар, Бельгийн Вант Улсын Засгийн газрын хооронд байгуулсан “Баруун бүсийн оношилгоо, эмчилгээний төвийг бэхжүүлэх төсөл”-ийн зээлийн хэлэлцээр, “Хүчээр алга болгохоос бүх хүнийг хамгаалах тухай”, “Эрүүдэн шүүх болон бусад хэлбэрээр хэрцгий, хүнлэг бусаар буюу хүний нэр төрийг доромжлон харьцаж, шийтгэхийн эсрэг НҮБ-ын конвенцийн Нэмэлт протокол”, Далайн хөдөлмөрийн тухай Олон улсын хөдөлмөрийн байгууллагын 2006 оны конвенц, Аврах ажиллагааны тухай 1989 оны Лондонгийн конвенц, Олон талын хөрөнгө оруулалтыг баталгаажуулах байгууллага”-ын конвенцийн нэмэлт, өөрчлөлт, Олон улсын хөдөлмөрийн байгууллагын “Хөдөлмөр эрхлэлтийн үйлчилгээний тухай” 88 дугаар конвенц, лон улсын хөдөлмөрийн байгууллагын “Хөдөлмөр эрхлэлтийн хувийн байгууллагын тухай” 181 дүгээр конвенц, ”Олон улсын худалдаа, хөрөнгө оруулалтын асуудлаар ил тод байдлыг хангах тухай Монгол Улс, Америкийн Нэгдсэн Улс хоорондын хэлэлцээр”, Эдийн засгийн түншлэлийн тухай Монгол Улс, Япон Улс хоорондын хэлэлцээрийг соёрхон батлах, нэгдэн орох тухай зэрэг 13 хуулийн төслийг хэлэлцүүлэгт бэлтгэн батлуулжээ.
Мөн авлигын асуудалд анхаарлаа хандуулж, авлигаас, тэр дундаа өндөр түвшний авлигаас урьдчилан сэргийлэх, эрх зүйн орчныг боловсронгуй болгох үүднээс Авлигатай тэмцэх газар, Үндэсний аюулгүй байдлын зөвлөлийн ажлын алба, МУИС, Азийн сан, Эмэгтэй удирдагч сан, Хуульч эмэгтэйчүүдийн холбоотой хамтран “Авлига үндэсний аюулгүй байдалд нөлөөлөх нь” сэдэвт онол-практикийн хурлыг яам, агентлаг, төрийн болон төрийн бус байгууллагуудын нийт 120 гаруй төлөөллийг оролцуулж зохион байгуулсныг онцлов. Энэхүү онол-прктикийн хурлын илтгэлүүд болон хурлаас гаргасан зөвлөмжийг эмхэтгэн хэвлүүлж, аймаг, нийслэл, яам, агентлаг, төрийн болон төрийн бус байгууллагуудад хүргүүлсэн байна.
Сар шинийн өмнөхөн эх орондоо ирсэн МАХН-ын дарга Н.Энхбаярыг өчигдөр намын байрандаа байхад АТГ-ын ажилтнууд ирж саатуулсан талаар өмнө нь мэдээлсэн билээ. Тэгвэл энэ асуудлаар дөнгөж сая тус намын байранд МАХН-ын Ерөнхий нарийн бичгийн дарга Ц.Шаравдорж нар мэдээлэл хийлээ.
Тэрбээр хэлэхдээ “Манай намын даргыг өчигдөр АТГ-аас н.Эрдэнэсайхан, н.Ганбаяр гэх хоёр залуу ирж саатуулсан. Мөн тэд ирэхдээ 2015 оны 02 сарын 27-ны өдөр буюу өнөөдөр 15 цагаас АТГ-т ирэх Зарлан дуудах бичиг өгсөн. Ямар шалтгаанаар дуудаж байгаагаа хэлээгүй. Намын даргаа маань энэ үеэр өмгөөлөгчгүйгээр ямар ч Зарлан дуудах бичиг авахгүй гэдгээ хэлсэн. Мөн дуудсан шалтгаанаа мэдэхгүйгээр очихгүй гэдгээ ч хэлсэн. МАХН-ын дарга, Монгол Улсын Ерөнхийлөгч асан, УИХ-ын гишүүн байсан хүнтэй ингэж харьцаж байгаа юм чинь жирийн иргэдийг яаж ч болохоор нийгэмд бид амьдарч байна.
Ардчилал нэрээр хүнийг хэлмэгдүүлж, эрхийг нь зөрчих үйлдэл улам бүр нэмэгдэх болсныг хэдхэн хоногийн өмнө болсон өлсгөлөн зарласан иргэдийг албадан саатуулсан бичлэгээс харагдаж байгаа.
Н.Энхбаяр дарга өнөөдөр 15 цагаас МАХН-ын төв байрандаа манай намд итгэл үзүүлсэн 350 гаруй шинэ гишүүндээ батламж гардуулах арга хэмжээнд оролцоно. Тиймээс АТГ-ын дуудсан цагт очих боломжгүй гэдгийг хэлмээр байна. Гэм буруугүй гээд Монгол Улсын Ерөнхийлөгч өршөөл үзүүлчихсэн хүнээс АТГ дахиад ямар мэдээлэл авах гээд байгааг мэдэхгүй байна” гэлээ.
Ирэх 2016 онд Ази, Европын уулзалт буюу ACEM-ийн дээд түвшний арваннэгдүгээр уулзалтыг Улаанбаатар хотноо зохион байгуулахаар болсон билээ. Үүнтэй холбогдуулан өнөөдөр Нийслэлийн Засаг даргын Санхүү, эдийн засгийн асуудал хариуцсан орлогч Н.Батаа Ажлын хэсэг байгуулах захирамж гаргажээ.
Тус нийслэлийн дэд ажлын хэсэг нь ACEM-ийн дээд түвшний арваннэгдүгээр уулзалтыг зохион байгуулахад үйлчилгээ, соёл урлагийн арга хэмжээ, хоол хүнс, түүний аюулгүй байдлыг хариуцан ажиллах ажлыг удирдан зохион байгуулах чиг үүрэгтэй байх аж. Ажлын хэсгийн даргаар Нийслэлийн Засаг даргын Нийгмийн хөгжлийн асуудал хариуцсан орлогч Ц.Энхцэнгэл нар ажиллах юм байна.
Япон Улсад албан ёсны айлчлал хийж байгаа УИХ-ын дарга З.Энхболдод өнөөдөр Японы Олон улсын хамтын ажиллагааны байгууллага /ЖАЙКА/-ын Ерөнхийлөгч А.Танака бараалхав.
Японы Олон улсын хамтын ажиллагааны байгууллага /ЖАЙКА/-ын Ерөнхийлөгч А.Танака УИХ-ын даргыг цаг зав гарган хүлээн авч уулзаж буйд талархаж байгаагаа илэрхийлээд “Таны энэ удаагийн айлчлал маш үр дүнтэй айлчлал боллоо гэж дүгнэж байгаа. Манай байгууллага олон жил Монгол Улсад үйл ажиллагаа явуулж байгаа бөгөөд бидний хамтын ажиллагааны түүх их юм” хэмээн хэллээ.
УИХ-ын дарга З.Энхболд уулзалтын үеэр Монгол орны эдийн засгийн хөгжилд сүүлийн 20 гаруй жил дорвитой хувь нэмэр оруулж буй Японы Олон улсын хамтын ажиллагааны байгууллагын удирдлагатай уулзаж байгаадаа баяртай байгаагаа илэрхийлэв. Мөн Япон Улсын Засгийн газрын зээл, тусламж нь Монгол Улсад ардчиллыг бэхжүүлэх, нийгэм эдийн засгийн шинэ тогтолцоог бүрдүүлж, орчин үеийн хөгжлийн суурийг тавихад чухал үүрэг гүйцэтгэж ирснийг Монгол Улсын Засгийн газар, ард түмэн өндөр үнэлж, талархаж байдгийг тэмдэглээд Япон Улсын Засгийн газраас манай улсад үзүүлж ирсэн зээл, тусламжийг хэрэгжүүлэхэд JICA байгууллагын гүйцэтгэж ирсэн үүрэг, роль, хувь нэмрийг онцлон тэмдэглэв.
Тэрээр хэлэхдээ “Хөгжлийн албан ёсны тусламжийн ерөнхий буцалтгүй тусламжаар бага, дунд сургуулийн барилгын өргөтгөлийн 4 шаттай тусламжийн төсөл амжилттай хэрэгжсэн болон ерөнхий буцалтгүй тусламжийн сүүлийн төслөөр “Монгол, Японы сургалтын эмнэлэг барьж, байгуулах” төсөл хэрэгжүүлж буйд талархал илэрхийлье. Өчигдөр би Япон, Монголын найрамдлын нийгэмлэг, хамтын ажиллагааны хүндэтгэлийн арга хэмжээнд оролцлоо. Саяхан хоёр орны Ерөнхий сайд нарын гарын үсэг зурсан Эдийн засгийн түншлэлийн хэлэлцээр /EPA/-ийг Монгол Улсын Их Хурал богино хугацаанд соёрхон баталсан. Энэхүү хэлэлцээр нь технологи шилжүүлэх, хоёр орны хувийн хэвшлийн харилцааг эрчимжүүлж хөрөнгө оруулалтыг нэмэгдүүлэх, харилцан ашигтай, бие биеэ нөхсөн худалдаа, эдийн засгийн харилцааны үндсийг тавихад чухал ач холбогдолтой юм” гэдгийг онцлов. Түүнчлэн “Монгол Улс нэг хүнд ногдох дотоодын нийт бүтээгдэхүүний хэмжээгээр хөгжлийн албан ёсны тусламжийн буцалтгүй тусламжаас хөнгөлөлттэй зээл авдаг орон руу шилжсэн боловч одоо бид хөнгөлөлттэй шатны зээлийн хэмжээнд байна. Мөн Монгол Улсын Ерөнхий сайдаас тус байгууллагын удирдлагад албан ёсоор тавьсан байгаль орчныг хамгаалах, жижг дунд үйлдвэрлэлийг дэмжих хоёр үе шаттай зээлийн дараагийн шатны төслийг хэрэгжүүлэхэд хөнгөлөлттэй зээл авах, Монгол Улсын Засгийн газар, Дэлхийн банк, АХБ, ОУВС-тай хамтран хэрэгжүүлэх хөтөлбөрт төслийн дэмжлэгийн зээл авах зэрэг хүсэлтийг судалж нааштайгаар шийдвэрлэнэ гэдэгт итгэлтэй байна. Зөвхөн бүтээн байгуулалт хийгээд орхих биш, сургалт явуулах, хүнд чиглэсэн баялаг бүтээх, ноу хау нэвтрүүлэх зэргээр дэмжин ажиллахыг хүсч байна” гэлээ.
Японы Олон улсын хамтын ажиллагааны байгууллага /ЖАЙКА/-ын Ерөнхийлөгч А.Танака хэлэхдээ, хоёр улс Эдийн засгийн түншлэлийн хэлэлцээр /ЕРА/ байгуулсан байна. Энэ нь Монгол, Японы харилцааг хөгжүүлэхэд асар чухал үүрэгтэй. Ер нь цаашдаа Японы Олон улсын хамтын ажиллагааны байгууллага /ЖАЙКА/ Монгол Улстай өнөөдөр хүрсэн харилцаагаа улам гүнзгийрүүлэн хөгжүүлэх сонирхолтой. Таны хэлсэн бодитой ажил хэргүүдийг би судлаад хэрэгжүүлэхийн төлөө ажиллах болно” гэдгээ илэрхийллээ. Мөн Япон Улсын хөнгөлөлттэй зээлээр баригдаж буй шинэ нисэх буудлын ажлын явц байдлын талаарх зарим асуудлаар санал солилцов хэмээн УИХ-ын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.
УИХ-ын дарга З.Энхболд өнөөдөр /2015.02.26/ Япон, Монголын найрамдал, хамтын ажиллагааны нийгэмлэгүүдийн удирдлагуудыг хүлээн авч уулзсаны дараа тус нийгэмлэгүүдээс зохион байгуулсан хүндэтгэлийн арга хэмжээнд оролцож үг хэллээ. Тэрээр хэлсэн үгэндээ,
Эрхэм хүндэт япон анд нар аа,
Хатагтай, ноёд оо
Монгол Улсын Их Хурлын дарга, түүнийг дагалдаж буй Монголын төлөөлөгчдийг хүндэтгэн энэхүү хүндэтгэлийн арга хэмжээг зохион байгуулж буй Япон, Монголын найрамдал, хамтын ажиллагааны нийгэмлэгүүдийн гишүүд, Монголыг дэмжигч Та бүхэнд хувиасаа болон төлөөлөгчдийнхөө нэрийн өмнөөс чин сэтгэлийн талархал илэрхийлье.
Монгол Улс ардчилал, шинэчлэл, зах зээлийн замд шилжсэн 1990-ээд оны эхэн үеэс манай хоёр орны харилцаа, хамтын ажиллагаа идэвхтэй хөгжиж, өнөөдөр Стратегийн түншлэлийн зарчмаар өргөжин гүнзгийрч байгаад баяртай байна.
Монгол оронд ардчиллыг хөгжүүлэх, орчин үеийн хөгжлийн суурийг тавихад Японы ард түмнээс үзүүлж ирсэн тусламж дэмжлэг дорвитой үүрэг гүйцэтгэснийг Монголын төр, ард түмэн өндөр үнэлж, гүнээ талархаж байдаг.
Энэхүү тусламж дэмжлэгийг санаачилж, хэрэгжүүлэхэд Япон Улсын Парламент дахь найрамдлын бүлэг, мөн найрамдал, соёлын нийгэмлэгийн гишүүд Та бүхний оролцоо, хичээл зүтгэл голлох үүрэг гүйцэтгэснийг энд онцлон тэмдэглэхийг хүсч байна.
Эрхэм хүндэт анд нөхдөө,
Монгол орны дотны түнш, манай гуравдагч хөрш Япон Улстай харилцаа, хамтын ажиллагаагаа өргөжүүлэн хөгжүүлэх нь Монгол Улсын гадаад бодлогын тэргүүлэх чиглэлийн нэг юм.
Монгол Улс Япон Улстай улс төр, худалдаа, эдийн засаг, соёл, боловсрол, олон нийтийн өргөн солилцоог хөгжүүлэх чиг шугамыг баримталж байна. Саяхан хоёр орны хооронд байгуулсан Эдийн засгийн түншлэлийн хэлэлцээр нь Монгол, Японы бүх салбарын харилцаа, хамтын ажиллагааг урагшлуулан хөгжүүлж, шинэ шатанд гаргахад чухал түлхэц болно гэж үзэж байна.
Монгол, Японы харилцаа, хамтын ажиллагааг өргөжүүлэн хөгжүүлэхэд хоёр орны олон нийтийн байгууллагуудын үүрэг санал санаачилга, иргэд хоорондын нөхөрлөл чухал хөшүүрэг болж ирсэн. Иймд бид цаашид хоёр орны ард түмний харилцан ойлголцлыг улам бүр нэмэгдүүлж, итгэмжилсэн харилцааг бэхжүүлэхэд Та бүхэнтэй нягт хамтран ажиллах болно.
Эрхэм хүндэт япон анд нөхөд Та бүхэнд дахин талархал илэрхийлж, эрүүл энх, сайн сайхныг хүсч, Монгол Улс, Япон Улсын найрсаг харилцаа, хамтын ажиллагаа улам бүр дэвжин цэцэглэхийн өлзийтэй ерөөл дэвшүүлье гэлээ.
Хүндэтгэлийн арга хэмжээнд Япон, Монголын найрамдлын үйл ажиллагаа явуулдаг Япон Улсын парламентын Төлөөлөгчдийн танхимын Япон-Монголын найрамдлын бүлэг, Япон Улсын парламентын Зөвлөхүүдийн танхимын Япон-Монголын найрамдлын бүлэг, Япон, Монголын эв найрамдлын нийгэмлэг, Япон, Монголын нийгэмлэг, Япон, Монголын эмэгтэйчүүдийн соёлын харилцааны “Солонго” нийгэмлэг, Япон, Монголын эдийн засгийн хороодын удирдлагууд болон Монголын талаас Улсын Их Хурлын гишүүн, УИХ дахь Монгол-Японы парламентын бүлгийн гишүүн Н.Батцэрэг, Улсын Их Хурлын гишүүн, Улсын Их Хурлын Байгаль орчин, хүнс, хөдөө аж ахуйн байнгын хорооны дарга, УИХ дахь Монгол-Японы парламентын бүлгийн дэд дарга Су.Батболд, Улсын Их Хурлын гишүүн, УИХ дахь Монгол-Японы парламентын бүлгийн дарга Д.Ганхуяг, Улсын Их Хурлын гишүүн, УИХ дахь Монгол-Японы парламентын бүлгийн гишүүн Ж.Батзандан, Монгол Улсаас Япон Улсад суугаа Онц бөгөөд Бүрэн эрхт Элчин Сайд С.Хүрэлбаатар болон албаны бусад хүмүүс байлцав хэмээн УИХ-ын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.
УИХ-ын Байнгын хороод ажлаа тайлагнасаар байна.
Аюулгүй байдал, гадаад бодлогын байнгын хороо өнөөдөр 12.00 цагаас Төрийн ордны Г танхимд хэвлэлийн бага хурал хийлгэж ажлаа тайлагнана.
МАХН үүсгэн байгуулагдсан болон Эх орончдын өдрийг тохиолдуулан МАХН-д шинээр гишүүн элсүүлэх, гишүүнчлэл сэргээх ёслолын арга хэмжээ өнөөдөр болох аж. Энэ удаа нийтдээ 350 гаруй хүн шинээр гишүүнээр элсч, намын гишүүнчлэлээ сэргээх юм байна. Тэдний дунд урлаг спортын алдартнууд багтаж байгаа гэнэ. Ёслолын арга хэмжээнд МАХН-ын дарга Н.Энхбаяр, намын дэд дарга Ц.Цолмон, Ерөнхий нарийн бичгийн дарга Г.Шийлэгдамба болон нарийн бичгийн дарга нар оролцоно.
МАХН-ын дарга Н.Энхбаяр Солонгос улсад удаан хугацаагаар эмчлүүлж байгаад цагаан сарын өмнө Монголдоо ирсэн. Тэгвэл түүнийг өчигдөр АТГ-аас саатуулахыг завдсан байна. Тодруулбал, эх орондоо ирээд удаагүй Н.Энхбаяр өчигдөр МАХН-ын байранд байх үеэр АТГ-ын ажилтан н.Эрдэнэсайхан, н.Ганбаяр нар ирсэн байна. Уг нь Н.Энхбаяр шинийн наймны билэгт сайн энэ өдөр 80 насны сүүдэр тохиож буй ээж Бүдхандтайгаа очиж уулзах байсан аж.