Category: улс-төр

Сонгинохайрхан дүүргийн Ардчилсан намын хорооны удирдлагаар шинээр сонгогдсон дарга Ш.Одгэрэл, бусад дэд дарга нарын хамт өнөөдөр Монгол ньюс мэдээллийн төвд мэдээлэл хийлээ. СХД-ийн АН-ын хорооны дарга Ш.Одгэрэл “Сонгинхайрхан дүүргийн АН-ын талаар ташаа мэдээлэл иргэдийн дунд нэлээд гарах болсон. Үүний цаана Сонгинохайрхан дүүргийн Ардчилсан намыг гэр бүлийн нам болгох гэсэн асуудал яригдаад байгаа юм. Тодруулбал, Н.Алтанхуяг болон түүний төрөл төрөгсөд, хамаатануудад үйлчилдэг болгох нь гэсэн хэл ам 2013 оноос л эхэлсэн. Өөрөөр хэлбэл, 2013 оны нэгдүгээр сард Ө.Пүрэвбаатар гэдэг хүн дүүргийн намын удирдлагыг авахын тулд оройн 22.00 цагт дүүргийн намын хорооны 105 гишүүний 40 орчим хүнийг Туулын хөвөөнд оройн хоолонд урьсан байдаг. Энэ үеэр дүүргийн намын хорооны даргыг солих талаар ярилцаж, өөрийгөө хууль бусаар намын даргаар сонгуулсан. Тухайн үед Н.Алтанхуяаг намын дарга байсан. Н.Алтанхуяаг ч үүнийг нь өөгшүүлэн дэмжсэн” гэлээ.

Тэрбээр энэ үеэр сэтгүүлчдийн асуултад хариулт өгсөн юм.

-Өчигдөр танай намын хорооны хүмүүс мэдээлэл хийж, та бүхнийг хууль бусаар эрх мэдлийг булаах гэж байна гэсэн шүү дээ?

-Ө.Пүрэвбаатар нар 2015 оны нэгдүгээр сарын 11-нд дүүргийн намын хороон дахь өөрсдийн эзлэх хувийг өргөтгөх буюу олонхи болгох зорилгоор дотоод сонгуулийг бий болгосон. Шалтгаан нь өөрсдийнхөө төрөл төрөгсөд, хамсаатан болсон нэг удирдлагаар дүүрсэн нам болгох санаа өвөртлөснөөс асуудал үүссэн. Тухайн сонгуулиар 38 хүнийг нөхөн сонгох ёстой байсан. Гэтэл 38 хүний нэр зааж сонгууль хийх гэсэн. Соц нийгмийн үед л ганц хүний нэр заагаад энэ хүнийг сонгоорой гэдэг байсан. Үүний адил 38 хүнийг сонгохын тулд 38 хүний нэр зааж байгаа зөрчил, дутагдалтай асуудлыг зогсоохын тулд Сонгинохайрхан дүүргийн АН-ын үүдэнд энэ оны нэгдүгээр сард ард иргэд жагсаал хийсэн. Үүнийг намын хорооны гишүүд эсэргүүцэн нийт гишүүний 61.5 хувийн ирцтэйгээр хуралдаж, намайг тус хорооны ардчилсан намын даргаар сонгоод явж байна.

-Хоёр сарын өмнө сонгууль болсон. Энэ хоёр сарын хугацаанд юу болсон юм бэ?

-Бид дээд шатны намын дарга болон нийслэлийн намийн дарга гэх бүх бүх дээд шатлалынхандаа хурлын тогтоол, дүрэм шийдвэрийг авчиж өгч хянуулсан. Тэд ч биднийг дүрмийн дагуу хуралдаж намын даргаа сонгосон байна. Тиймээс цаашид үйл ажиллагаа явуулах боломжтой гэж тогтоол шийдвэрээ гаргаж өгсөн. Гэтэл дээрх хүмүүс эсэргүүцэж хэл ам хийж, байраа суллахгүй намын үйл ажиллагаанд саад учруулж байна. Бидний харж байгаагаар энэ хэрүүлийг дан ганц Ө.Пүрэвбаатар хийгээгүй. Тэдний ард Н.Алтанхуяг байгаа. УИХ-ын гишүүн Н.Алтанхуягийг Сонгинохайрхан дүүргийн ард иргэд үе үеийн сонгуульд сонгосоноор төрийн өндөр албан тушаалыг хашсан шүү дээ. Гэтэл өнөөдөр ард иргэдээсээ нүүр бурууллаа. Иргэд улс орныхоо сайн сайхны төлөө сонгосон болохоос биш, зөвхөн хамаатнууддаа үйлчиддэг, намыг хаглан бутаргадаг, монголын ард түмнийг хоёр хуваадаг, талцуулдаг байлгах гэж итгэл хүлээлгээгүй.

“Улс төр ба популизм” сэдэвт эрдэмтэн судлаачдыг хамруулсан нээлттэй хэлэлцүүлгийг “Либерал хаус” бодлогын судалгааны хүрээлэнгээс зохион байгуулахаар болжээ. Энэхүү хэлэлцүүлэгт нийтлэлч Баабар, Улс төр судлаач, Стратегийн судалгааны хүрээлэнгийн захирал доктор Д.Ганбат, улс төр судлаач О.Чулуунбилэг, МУИС-ийн багш Ц.Батболд, Х.Амантай, МУБИС-ийн багш Ц.Мөнхцэцэг, хуульч Б.Ган-Очир зэрэг хүмүүс илтгэл танилцуулж, эрдэмтэн судлаачид, олон нийттэй хэлэлцүүлэг өрнүүлэх юм. Хэлэлцүүлгийн хүрээнд популистууд гэж хэн болох, популизмын хор уршиг нийгэмд хэрхэн нөлөөлдөг, түүнээс гарах сөрөг үр дагаврууд ямар байдгийг тодорхойлох зорилготой гэнэ. Мөн улс төрийн намуудын хөгжил, гадаадын орнуудын улс төрийн намуудын туршлага зэргийг монголын нөхцөлтэй харьцуулан ярилцах юм байна. Хэлэлцүүлэг энэ сарын 5-нд Ерөнхийлөгчийн Иргэний танхимд болох бөгөөд Ийгл телевиз олон нийтэд шууд дамжуулан хүргэх юм байна.

Нийслэлийн орон нутгийн хөгжлийн сангийн хөрөнгөөр 2014 онд нийт 14 тэрбум 662 сая төгрөгийн ажил гүйцэтгэжээ

НИТХ–ын Тэргүүлэгчдийн ээлжит хуралдаан болж, нийслэлийн орон нутгийн хөгжлийн сангийн хөрөнгөөр 2014 онд хэрэгжүүлсэн хөрөнгө оруулалтын төсөл арга хэмжээний тодотгосон жагсаалт батлах тухай асуудлыг хэлэлцэн баталлаа. Хуралдаанд асуудлыг нийслэлийн Засаг даргын Санхүү, эдийн засгийн асуудал хариуцсан орлогч Н.Батаа танилцуулав.

Нийслэлийн орон нутгийн хөгжлийн сангийн хөрөнгөөр 2014 онд хэрэгжүүлсэн хөрөнгө оруулалтын төсөл, арга хэмжээ, барилга байгууламжийн тодотгосон жагсаалтын төсвийг дүүрэг тус бүрээр авч үзвэл:

• Баянгол дүүрэг – 1 557 800 000
• Баянзүрх дүүрэг – 1 276 119 200
• Сонгинохайрхан дүүрэг – 1 082 200 000
• Сүхбаатар дүүрэг – 700 400 000
• Хан-Уул дүүрэг – 733 000 000
• Чингэлтэй дүүрэг – 992 100 000
• Багануур дүүрэг – 193 000 000
• Баганхангай дүүрэг – 29 100 000
• Налайх дүүрэг – 262 300 000
• Бусад – 7 836 600 000

Нийслэлийн орон нутгийн хөгжлийн сангийн хөрөнгөөр 2014 онд хэрэгжүүлсэн хөрөнгө оруулалтын төсөл арга хэмжээний тодотгосон жагсаалтын нийт дүн 14 тэрбум 662 сая 619.2 мянган төгрөг байгаа юм. Харин Хотын шуудын 2014 оны төсвийн жилд зарцуулах төсвийн нийт зарлагын хэмжээг 532 тэрбум 831 сая 729.8 мянган төгрөгөөр баталсан. Хотын шуудын 2014 оны төсвийн жилд нийслэлийн төсвийн хөрөнгөөр хэрэгжүүлсэн хөрөнгө оруулалтын төсөл, арга хэмжээний зардалд нийслэлийн төсвөөс 165 тэрбум 906 сая 191.8 мянган төгрөг, замын сангийн хөрөнгөнөөс 25 тэрбум 702 сая 22.4 мянган төгрөг, нийт 191 тэрбум 608 сая 214.2 мянган төгрөгийг зарцуулахаар баталсан гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Ерөнхий сайдын дэргэдэх Эдийн засгийн зөвлөл хоёр дахь удаагаа хуралдлаа. Тус зөвлөлийн анхны хурлаар бизнесийн орчныг сайжруулах, гадаад худалдаа, хөрөнгө оруулалтыг нэмэгдүүлэх, макро эдийн засгийн тогтвортой байдлыг бий болгох, бүтээн байгуулалтын том төслүүдийг урагшлуулах гэсэн дөрвөн чиглэлээр санал, зөвлөмж боловсруулан ажиллахаар болсон. Энэ удаагийн хурлаар эдгээр чиглэл бүрт дэд бүлэг байгуулах, УИХ-ын тогтоолоор батлагдсан Эдийн засгийн хүндрэлээс гарах арга хэмжээний хөтөлбөр, татварын бодлогоор эдийн засгийг дэмжих арга хэмжээний тухай гэсэн гурван асуудлыг хэлэлцлээ.

Ерөнхий сайд Ч.Сайханбилэг Улсын Их Хурлын 2015 оны 2 дугаар сарын 18-ны өдрийн 41 дугаар тогтоолоор батлагдсан Эдийн засгийн хүндрэлээс гарах арга хэмжээний хөтөлбөрийг хэрэгжүүлэх хүрээнд Засгийн газар Монгол банк, Санхүүгийн зохицуулах хороотой хамтран нарийвчилсан төлөвлөгөө боловсруулж байгааг хэлээд эдийн засгийн зөвлөлийн гишүүдийн саналыг хүлээн авч, нэгтгэхээ мэдэгдлээ. Ойрын хугацаанд Засгийн газрын хуралдаанаар хэлэлцүүлэн батлуулж, хэрэгжилтийг хангуулан ажиллах юм. Мөн Монгол Улсын сайд, ЗГХЭГ-ын дарга С.Баярцогт зөвлөлийн гишүүдэд Эдийн засгийн хүндрэлээс гарах арга хэмжээний хөтөлбөрийн талаар танилцууллаа.

Сангийн яамны Төсвийн бодлого, төлөвлөлтийн газрын дарга Ж.Ганбат Засгийн газраас Татварын ерөнхий хуулийн шинэчилсэн найруулгын төслийг боловсруулж, хуулийн нэр томъёог тодорхой, нэг мөр болгох, татварын өр төлөх хугацааг сунгах, хүчингүй болгох зохицуулалтыг оруулах, татварын байцаагчийн эрх, үүргийг нарийвчлан тусгах зэрэг өөрчлөлтийг оруулж байгаа гэлээ. Одоо хүчин төгөлдөр үйлчилж байгаа Татварын ерөнхий хуулийн хувьд хуулийн нэр томьёог татварын байцаагч, аж ахуйн нэгж өөр өөрөөр тайлбарлан хэрэглэдэг. Иймд нэр, томъёог ойлгомжтой, нэгдсэн болгох асуудал дээр анхаарч байгаа гэв. Мөн татвар төлөгчид татвар төлөхдөө цаг хугацаа бага зарцуулах боломжийг бүрдүүлж, цахимжуулна гэлээ.

Танилцуулгын дараа зөвлөлийн гишүүд голчлон татварын бодлогоор эдийн засгийг дэмжих асуудлын талаар байр сууриа илэрхийллээ. Хувь хүний орлогыг бодитой тодорхойлж, орлогын татвар ногдуулах, Эдийн засгийн ил тод байдлын тухай болон Өршөөлийн тухай хуулийг батласны дараагаар татварын шинэчлэлээ эхлүүлэх зэрэг саналуудыг хэллээ. Энэ хурал дээр хэлсэн болон бичгээр ирүүлсэн саналыг нэгтгэн хүлээн авахаар тогтлоо гэж Засгийн газрын Хэвлэл мэдээлэл, олон нийттэй харилцах албанаас мэдээллээ.

Монгол Улсын Шадар сайдын эрхлэх асуудлын хүрээнд Шударга өрсөлдөөн, хэрэглэгчийн төлөө газар, Оюуны өмчийн газар, Онцгой байдлын ерөнхий газар, Стандартчилал хэмжил зүйн газар, Худалдан авах үйл ажиллагааны газар, Мэргэжлийн хяналтын газар харьяалагддаг. Тус агентлагийн удирдлагууд өнгөрсөн хоёрдугаар сард хийж гүйцэтгэсэн ажлаа өнөөдөр Шадар сайд У.Хүрэлсүхэд тайлагналаа.

Хавар болж, барилгын салбарынхан ажилдаа гарах бэлтгэл хангаж байгаа энэ үед анхаарах асуудлын нэг нь хөдөлмөр аюулгүй байдлыг хангаж, чанартай барилга барих талд анхаарч, стандарт нормыг хангуулж ажиллах ёстойг Шадар сайд анхаарууллаа. Мэргэжлийн хяналтын газрын даргын үүрэг гүйцэтгэгчийн тайлбараар бол ашиг олох зорилгоор барилга барих тусгай зөвшөөрөл авсан аж ахуйн нэгж цөөнгүй байгаа нь хүний амь нас эрсдэх аюултай нөхцөл үүсгэж байна гэлээ.

Шударга өрсөлдөөн хэрэглэгчийн төлөө газрын хувьд нийслэлийн хэмжээнд газар өмчлөлийг цахимаар зохион байгуулахдаа кадастрын зураг гаргах компаниар нэр бүхий таван компанийг шалгаруулсан нь Өрсөлдөөний тухай хуулийг зөрчсөн гэж үзэж байна.

Мөн арилжааны банкууд иргэдэд зээл олгохдоо нэг хувийн шимтгэл авч байгаа нь хууль зөрчиж байна гэж үзэн шүүхэд хандсан. Анхан шатны шүүхийн шийдвэр Шударга өрсөлдөөн хэрэглэгчийн төлөө газрын тавьсан шаардлага үндэслэлтэй хэмээн гарсан ч Давж заалдах шатны шүүх хурал болох аж. Уг шүүх хурал өнгөрсөн сард зарлагдсан байсан ч шүүгч нарыг солих шаардлага байна гэж банкуудын зүгээс хүссэнээр шүүх хуралдаан хойшилсон аж. Анхан шатны шүүхийн шийдвэр Давж заалдах шатны шүүхээр баталгаажвал олон мянган иргэнд тустай зүйл болно гэж үзэж байна.

Оюуны өмчийн газрын хувьд интернэт орчин дахь оюуны өмчийг хамгаалах асуудал чухлаар тавигдаж буйг онцоллоо. Энэ асуудлыг шийдвэрлэхэд хууль эрх зүйг хангаж өгөх ёстой гэдгийг тус газрын удирдлага мэдэгдсэн юм.

Ийн агентлагийн газрын дарга нар хийсэн ажлаа тайлагнасны дараа Шадар сайд У.Хүрэлсүх “Асуудал шийддэг дарга энэ улсад хэрэгтэй. Тэгж байж улсын ажил явна. Юм бүхнийг Шадар сайд руу авчирах хэрэггүй, агентлагийн даргын эрх мэдлийн хүрээнд, газрын даргын эрх мэдлийн хүрээнд шийдэх боломжтой асуудлыг цаг тухайд нь шийдэх хэрэгтэй. Цаг алдаж таарахгүй.

Үнэхээр шийдэх боломжгүй, эрх мэдэл давсан асуудлыг Шадар сайдтай зөвлөж болно. Зарим асуудлыг нь Засгийн газрын хуралдаанд оруулж шийдүүлнэ. Мэргэжлийн хяналтын газар хяналт, шалгалт хийхгүй гэж ойлгож болохгүй. Салан задгай ажиллаж байгаа барилгын компанид хяналт тавьж, гарч болзошгүй эрсдэлээс урьдчилан сэргийлж ажиллах нь Мэргэжлийн хяналтын байгууллагын үндсэн үүрэг. Төр хяналтаа тодорхой хэмжээгээр тавьж байж, эмх замбараатай болно. Тэр хэрээр аюулгүй байдал хангагдана. Гэхдээ шалгаж байна гээд дарамталж болохгүй. Аж ахуйн нэгжүүд өөрсдөө сайн дураар ирээд зөвлөгөө авдаг амьд харилцааг бий болгох ёстой. Аюулгүй байдлыг хангаж ажилладаггүй маш олон аж ахуйн нэгж бий. Шалгах ёстойгоо шалга” гэсэн юм.

Канадын “Khan Resources” компани олон улсын арбитрын шүүхэд ялалт байгуулж, Монголын Засгийн газраас 100 сая ам.долларын нөхөн төлбөр гаргуулахаар болсон тухай “www.finanznachrichten.de” мэдээллээ. 2009 оны долоодугаар сард тус улсын Засгийн газар “Khan Resources” компанийн Дорнод аймагт эзэмшиж байсан ураны тусгай зөвшөөрлийг нь цуцалсан юм. Энэхүү үйл явдлын дараа тус компанийн удирдлагууд Монгол Улсын Засгийн газрыг Олон улсын арбитрын шүүх “International Arbitration”-д өгчээ. Олон жилийн турш үргэлжилсэн шүүх хурал эцэслэн шийдэгдэж, шийдвэрээ гаргасан байна. Эхний шүүх хурал 2012 оны тавдугаар сарын 12-ны өдөр Францын нийслэл Парис хотноо эхэлжээ. “Khan Resources” компанийн нэхэмжлэлийг Олон улсын арбитрын шүүх хүлээн авч Монгол улсын Засгийн газар “Эрчим хүчний гэрээ, Гадаадын хөрөнгө оруулалтын тухай хуулийн хэд хэдэн заалтыг зөрчсөн” хэмээн үзжээ. Арбитрын шүүх тус компанид учруулсан хохирлыг өнөөгийн ханшаар үнэлж, гаргасан байна. Тусгай зөвшөөрлийг цуцалснаас болж тус компани 83.3 сая ам.долларын хохирол амсчээ. Лондонгийн төв банк хоорондох зээлийн хүү буюу “LIBOR” нэмэх нь хоёр хувь төлөх ёстой гэж шийджээ. Шүүх, компанийн өмгөөллийн зардал болох 9.1 сая ам.долларыг тус компанид олгох шийдвэр гаргасан байна.

“Khan Resources” компанийн гүйцэтгэх захирал Грант Эди “Шүүхийн шийдвэр бидний талд гарсанд баяртай байна. Мөн Монгол Улсын хуулийг зөрчсөн гэх нэрнээсээ салсандаа баяртай байна. Монголын Засгийн газар компанийн дотоод асуудалд хөндлөнгөөс оролцож, нөхөн төлбөр шаардаж, эд хөрөнгө хураасан нь хууль бус үйлдэл. Засгийн газар шүүхийн шийдвэрийн дагуу нөхөн төлбөрийг шуурхай олгохыг хүсье” гэж хэлжээ.

Нийслэлийн Иргэдийн хурлын дарга Д.Баттулга, Улаанбаатар хотын Ерөнхий менежер С.Бадрал нар болон хотын захирагчийн албаны холбогдох хүмүүс Эрчим хүчний сайд Д.Зоригттой уулзаж, нийслэл хотын бүтээн байгуулалт, гэр хорооллын дахин төлөвлөлттэй холбогдуулан цахилгаан дулааны хангамжийг нэмэгдүүлж, сайжруулах талаар санал солилцож тодорхой асуудлуудаар хүсэлт тавьлаа.

Тухайлбал, гэр хорооллын дахин төлөвлөлтийн хүрээнд МҮОНРТ-ын болон Дэнжийн 1000 орчимд баригдах орон сууцны хорооллыг дулааны эх үүсвэрээр хангах асуудлыг шийдвэрлэх, хотын төвийн дулааны гол шугамыг өргөтгөх боломж, Их тойруугийн өндөр хүчдэлийн шугамын тасархай хэсгийг холбохын тулд Засгийн газрын хэмжээнд шийдвэр гаргах гэх асуудлуудыг хөндөж тавьлаа.

Эрчим хүчний сайд Д.Зоригт дээрх асуудлуудыг нухацтай авч үзэж, ойрын хугацаанд холбогдох шийдвэр гаргана гээд шаардллагатай Засгийн газрын хуралдаанд асуудлыг оруулж шийдвэрлүүлнэ гэв. Хотын удирдлагуудын хувьд зам, барилын ажил эхэлдэг дөрөвдүгээр сарын 1-нээс өмнө шийдвэр гаргаж өгөхийг Эрчим хүчний сайд Д.Зоригттоос хүслээ.

НИТХ-ын Тэргүүлэгчдийн ээлжит хуралдаан 3 дугаар сарын 3-ны өдөр буюу Мягмар гарагт болно. Хуралдаанаар дараахь асуудлыг хэлэлцэнэ. Үүнд:

• Нийслэлийн орон нутгийн хөгжлийн сангийн хөрөнгөөр 2014 онд хэрэгжүүлэх хөрөнгө оруулалтын төсөл арга хэмжээний тодотгосон жагсаалт батлах тухай
• Ой тэмдэглэх тухай / Сүхбаатар дүүрэг үүсэн байгуулагдсаны 50 жилийн ой /
• НИТХ-ын хуралдаанаар хэлэлцэх асуудлыг дэмжих тухай

Нийслэлийн 2015 оны төсөвт нэмэлт, өөрчлөлт оруулах тухай
Нийслэлийн 2015 оны Газар зохион байгуулалтын төлөвлөгөөнд нэмэлт өөрчлөлт оруулах тухай
Нийслэлийн өмчөөс 2015 онд нэмэлтээр хувьчлагдах хуулийн этгээд, эд хөрөнгийн жагсаалт батлах тухай
Улаанбаатар хотын хөгжлийн корпорацийн дүрэм батлах тухай
Нийслэлийн дагуул хот байгуулах тухай

• НИТХ-ын хуралдааныг зарлах тухай асуудлыг хэлэлцэнэ гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Хүн амын хөгжил, нийгмийн хамгааллын сайд С.Эрдэнэ тэргүүтэй төлөөлөгчид 2015 оны 02.22-27-ны өдрүүдэд АНУ-ын Төрийн Департментын урилгаар Америкийн Нэгдсэн Улсын хөгжлийн бэрхшээлтэй хүний хууль эрх зүйн орчин, түүний хэрэгжилттэй танилцах хүрээнд Вашингтон хотод албан томилолтоор ажиллаа.

Хүн амын хөгжил, нийгмийн хамгааллын яам нь хөгжлийн бэрхшээлтэй иргэдэд эрхээ эдлэх бүрэн боломж олгохоор “Хөгжлийн бэрхшээлтэй иргэний нийгмийн хамгааллын тухай хууль”-ийг шинэчилэн найруулж “Хөгжлийн бэрхшээлтэй хүний эрхийн тухай хууль”-ийн төслийг боловсруулан ажиллаж байгаа бөгөөд энэ ажлын хүрээнд хууль эрх зүйн зөвөлгөө авах чиглэлээр Америкийн Нэгдсэн Улсын Төрийн Департамент болон Америкийн Нэгдсэн Улсаас Монгол Улсад суугаа Элчин сайдын яамтай нягт хамтран ажиллаж байна.

Уг хамтын ажиллагааны хүрээнд өнгөрсөн онд АНУ-ын Төрийн Департментын Хөгжлийн бэрхшээлтэй иргэдийн олон улсын эрхийн зөвлөх, хатагтай Жудит Хьюман, 40 гаруй жил хөгжлийн бэрхшээлтэй иргэдийн хууль эрх зүйн орчинг сайжруулхаар ажилласан ноён Жон Уодач, АНУ-аас зөвлөх мэргэжилтэн Владимир Спэнсэр нар Монгол Улсад хүрэлцэн ирж, хуулийн төсөл боловсруулахад оролцож буй төрийн, төрийн бус байгууллагын төлөөллүүд болон хуулийн ажлын хэсгийн гишүүдтэй уулзаж, зөвлөгөө өгч хамтран ажилласан юм.

Энэхүү айлчлал нь уг хамтын ажиллагааны үргэлжлэл бөгөөд төлөөлөгчид АНУ-ын хөгжлийн бэрхшээлтэй хүний хууль, түүний практик хэрэгжилттэй танилцсанаар хуулийн төслөө илүү боловронгуй болгож, батлагдсаны дараа хэрэгжилтийг хэрхэн хангаж ажиллах талаар аргачлалаа гаргах юм.

Айлчлалын үеэр 2015 оны 02 дугаар сарын 23-ны өдөр ХАХНХ-ын сайд С.Эрдэнэ хатагтай Жудит Хьюман, ноён Жон Уодач болон АНУ-ын Төрийн департаментын Ази, Номхон далайн бүсийн асуудал хариуцсан товчооны Монгол Улсыг хариуцсан ажилтан хадагтай Аряани Манринг нартай уулзалт хийлээ.

Уулзалтаар АНУ-ын ХБИ-ийн хууль хэрхэн боловсруулагдсан, ямар асуудлуудтай тулгач байсан болон хуулийн хэрэгжилтийг хэрхэн ханган ажиллаж байгаа талаар ярилцсан. Түүнчлэн, АНУ-ын хөгжлийн бэрхшээлтэй иргэдийн байгууллагын төлөөлөлтэй уулзалт хийж, тэдгээрийн үйл ажиллагаа, бүтэц зохион байгуулалттай танилцаж, АНУ-ын Төрийн департаменын зарим төлөөлөгчидтэй Ажлын байран дахь ХБИ-ийн эрхийн асуудлаар хэлэлцүүлэг зохион байгууллаа.

Мөн АНУ-ын Эрүүл мэндийн яамны Эрүүл мэндийн үйлчилгээний газрын орлогч дарга хатагтай Мэрбэт Мусимэситэй ХБИ-ийн эрүүл мэндийн даатгал болон эрүүл мэндийн тусламж үйлчилгээний хүртээмжийн талаар дугуй ширээний ярилцлага хийсэн байна.

Тус айлчлалын зарим төлөөлөгчид 3 дугаар сарын 1-7-ны хооронд Сан Франциско хотод зочилж Бэй Эриа дахь хуулийн хэрэгжилттэй танилцаж, төрийн бус байгууллага, их дээд сургууль, нутгийн захиргааны төлөөлөгчидтэй уулзана. Мөн өдрүүдэд Эд Робертсын сургууль, Сан Франциско хотын захиргааны Хөгжлийн бэрхшээлтэй иргэдийн асуудал эрхэлсэн хэлтэс, Сан Франциско болон Беркли дэх Хөгжлийн бэрхшээлтэй иргэдийн боловсролын хамгаалах сантай танилцах юм.

Төлөөлөгчдийн бүрэлдэхүүнд: УИХ-ын гишүүн, УИХ-ын Нийгмийн бодлого, боловсрол, соёл, шинжлэх ухааны Байнгын хорооны дарга Д.Батцогт, УИХ-ын гишүүн, УИХ-ын Нийгмийн бодлого, боловсрол, соёл, шинжлэх ухааны Байнгын хорооны гишүүн З.Баянсэлэнгэ, ХАХНХЯ-ны Хөгжлийн бэрхшээлтэй иргэдийн хөгжлийн хэлтсийн дарга Т.Батдулам, Монголын Хөгжлийн бэрхшээлтэй иргэдийн Нэгдсэн Холбооны ерөнхийлөгч Д.Баатаржав болон Монголын Хөгжлийн бэрхшээлтэй иргэдийн байгууллагуудын үндэсний Холбооны ерөнхийлөгч Ц.Оюунбаатар нар багтаж байгаа юм.

2016 онд АЦЭМ-ийн дээд түвшний XИ уулзалтыг Улаанбаатар хотод зохион байгуулах болсонтой холбогдуулан үйлчилгээ, соёл урлагийн арга хэмжээ, хоол хүнс, түүний аюулгүй байдлыг хариуцан ажиллах нийслэлийн дэд Ажлын хэсгийг байгуулав. Ажлын хэсгийн даргаар нийслэлийн Засаг даргын Нийгмийн хөгжлийн асуудал хариуцсан орлогч Ц.Энхцэнгэлийг томилжээ. Уулзалтыг зохион байгуулах ажлын хүрээнд хариуцсан чиглэлээрх саналуудыг тухай бүрт нь Үндэсний зөвлөлд хүргүүлж байхыг түүнд даалгасан аж.