Мэргэжлийн холимог тулааны дэлхийн хамгийг шилдэг холбоо болох UFC-д тулалдаж буй анхны Монгол тамирчин Д.Батгэрэлийн ээлжит тулаан цуцлагдлаа.
Тэрбээр Америкийн нэгдсэн улсын тулаанч Монтел Жексонтой тулалдах байсан ч визний асуудал үүссэн аж.
Түүнийг төлөөлдөг “Phoenix MMA & K1 Management” байгууллагын гаргасан мэдэгдэлд “АНУ виз авах хугацаа нь хойшилсон тул Д.Батгэрэлийн Жексонтой хийх тулаан цуцлагдлаа. Шинэ өрсөлдөгч болон тулааны товыг удахгүй зарлана” гэжээ.
Мэргэжлийн сумо бөхийн Аки башё буюу есдүгээр сарын барилдаан Токио хотын Рёогокү Кокүгикан ордонд тав дахь өдрөө үргэлжилж байна.
Энэ удаагийн башёг Хакухо болон түүний Мияагино дэвжээнийхэн цар тахлын улмаас өнжиж байгаа бол шинэхэн ёкозүна Тэрүнофүжи Г.Ган-Эрдэнэ өчигдөр нутгийн бөх маэгаширагийн 2-оос барилдаж байгаа Кирибаяама Б.Лхагвасүрэнтэй барилдаж давлаа.
Улмаар таван даваатай болж башёг ганцаар тэргүүлж байгаа бол өнөөдрийн түүний өрсөлдөгч маэгаширагийн 3-аас барилдаж байгаа Вакатакакагетэй барилдана. Харин түүнд өвдөг шороодсон Кирибаяама Б.Лхагвасүрэнтэй дөрвөн даваа нэг унаатай болсон.
Энэ башед комүсүби цолтойгоор барилдаж байгаа Ичиножо А.Ичинноров өчигдөр секиваки Мэйсэйтэй барилдаж давлаа. Улмаар хоёр даваа, гурван унаатай болсон бөгөөд өнөөдөр түүний өрсөлдөгч комүсүби Такаяасү байх болно.
Аки башёгийн дээд макүүчи зиндаанд дараах Монгол бөхчүүд зодоглоно.
Ёкозүна Тэрүнофүжи Г.Ган-Эрдэнэ 5-0
Комүсүби Ичиножо А.Ичинноров 2-3
М-1 Хошорюү С.Бямбасүрэн 1-4
М-2 Кирибаяама Б.Лхагвасүрэн 4-1
М-4 Тамаваши Б.Мөнх-Оргил 2-3
М-5 Чиёошома Г.Мөнхсайхан 0-5
Холимог тулааны UFC холбоонд тулалдаж буй Данаагийн Батгэрэлийн тулаан цуцлагджээ. “Шуурга” хочит Данаагийн Батгэрэл энэ сарын 18-нд АНУ-ын тулаанч Монтел Жексонтой тулалдах байсан юм.
Phoenix MMA & K1 Management компанийн албан ёсны фэйсбүүк хуудастаа нийтэлсэн мэдээллээс үзвэл манай тамирчны виз гарч амжаагүй бололтой. Манай тамирчны тулааны дараагийн товыг удахгүй зарлах гэнэ.
Манай Д.Батгэрэл UFC холбоонд хийсэн анхны тулаандаа БНХАУ-ын Алтанхилд хожигдсон ч түүнээс хойш Гуидо Канетти, Кевин Нативидад нарыг нэгдүгээр үед зүүн гарын цохилтоор нам унагаж ялаад байгаа билээ. Энэ тулаан цуцлагдаагүй бол ялсных нь чансаа жингийнхээ шилдэг 15-д нэлээн дөхөх байсан юм.
Монгол Улсын сагсан бөмбөгийн 3х3 төрлийн эмэгтэй шигшээ баг “FIFA 3×3 U23 Nations league” тэмцээнд Ази/Африкийн конференцид өрсөлдөж авсан оноогоороо финалд оролцохоор шалгараад байгаа билээ.
“FIFA 3×3 U23 Nations league” тэмцээн буюу U23 насны шилдгүүдийн тулаан өнөөдөр, маргааш Румын Улсын Бухарест хотноо болно.
Тус тэмцээнд өрсөлдөж буй Монголын баг өнөөдөр 19:15 цагт Чех, маргааш 01:15 цагт Египет, 16:20 цагт Францын багтай тоглоно.
Олон улсын сонирхогчдын боксын холбоо Сербийн Белград хотноо болох гэж буй ДАШТ-ий медальтнуудад их хэмжээний мөнгөн урамшуулал олгохоор болжээ. Шагналын нийт сан 2.6 сая ам.доллар байх бөгөөд алтан медаль хүртсэн тамирчин 100 000, мөнгөн медаль хүртсэн тамирчин 50 000, хүрэл медаль хүртсэн тамирчин 25 000 ам.доллар долларын урамшуулал олгох юм байна.
“ОУСБХ 75 жилийн түүхэндээ анх удаа ДАШТ-ийг мөнгөн урамшуулалтай болгож байгаа бөгөөд энэ нь зүй ёсных юм. Тэмцээнд оролцохын тулд удаан хугацаанд бэлтгэсэн тамирчдын хөлдөлмөрийг үнэлэх ёстой. Тэд рингэнд амжилт гаргахаас гадна биеэ дааж, өөрийгөө хөгжүүлэх ёстой юм” гэж ОУСБХ-ны ерөнхийлөгч Умар Кремлев хэлсэн байна. Тус холбооны ерөнхий нарийн бичгийн дарга Иштван Ковач ДАШТ-д оролцохоор шаргуу бэлтгэл хийж байгаа богсчдод энэ мэдээ маш чухал. Бид тамирчдадаа амьдралаа авч явах, урам зориг өгөх ажил санаачиллаа. Боксчдын маань хувьд энэ ямар чухал болохыг би мэдэж байна. Энэ бол бидний тавьсан том зорилго руу дөхөх том алхам байлаа“ хэмээн онцолжээ.
Монголын Үндэсний Олимпын Хорооноос гавьяат тамирчин Э.Цэндбаатарыг сорил тоглолтод оруулахаар болсныг мэдээллээ. Мэдэгдэлд “Гавьяат тамирчин Э.Цэндбаатарыг ёс зүйн хариуцлага алдсаны улмаас шигшээ багаас хасаж, ДАШТ-д оролцуулахгүй байх шийдвэрийг Монголын боксын холбооны Удирдах зөвлөлөөс гаргасан билээ. Гэхдээ Э.Цэндбаатар буруугаа хүлээн уучлалт гуйж, өөрт нь дахин нэг боломж олгох хүсэлтийг Монголын боксын холбоо болон МҮОХ-нд гаргасан.
85 настай Ц.Раднаа гуай Австрали улсад зохиогдож буй далайн орнуудын ахмад мастеруудын хөнгөн атлетикийн аврага шалгаруулах тэмцээнд оролцлоо. Тэрээр 60м, 200м, 400м гүйлт болон 3-ын харайлт, саадтай гүйлт зэрэг таван төрөлд оролцож тус бүрт түрүүлж мөн тус бүрт шинэ рекорд шинэчлэн тогтоосон амжилт гаргалаа.
Дэлхийн аварга шалгаруулах тэмцээний хүрэл медальт, Азийн наадмын аварга, Ази тивийн аварга, Олимпийн наадмын IV байрын шагналт Монгол Улсын гавьяат тамирчин Эрдэнэбатын Цэндбаатартай ярилцлаа.
–Таныг удаа дараа сахилга батын алдаа гаргасан гэх үндэслэлээр шигшээ багаас хасах шийдвэрийг монголын боксын холбоо гаргажээ. Дээрх шийдвэрийг хэрхэн хүлээж авав?
-Эхлээд үе үеийн боксчидоосоо уучлалт хүсье. ДАШТ-ий сорил тулж ирсэн үед архи, согтууруулах ундаа хэрэглэсэн нь миний буруу. Миний тухайд сорил тэмцээний бэлтгэлээ базааж байхад дээрх үйл явдал боллоо. Жингээ хасаад л байж байсан юм. Би сахилга бат алдсан нь үнэн. Хувийн зүгээс холбооны шийдвэрийг буруутгах арга алга. Холбооны удирдах зөвлөлд 19 хүн байдаг. 100 хувийн саналаар намайг шигшээ багаас хөөсөн байна лээ.
–Тэр өдөр архи уухад Боксын холбооны удирдах зөвлөлөөс хүн байсан уу?
-Тамирчдын багийн ахлагч Б.Чинзориг ах л хамт явж байсан. Хүндэлдэг шигшээ багийн ах минь юм. Удирдах зөвлөлийн хурал дээр “Цэндбаатарыг эрхлүүлж, толгойг нь илээд байна. Одоо болсон, хөөе” гэх санал өгсөн байна лээ. Нүд рүү хараад гэмгүй сайхан инээмсгэлдэг ах маань л цаагуураа ийм зүйл ярьсан байна лээ. Амжилт гаргаад ирэхэд тэнгэрт тултал хөөргөдөг хүмүүс намайг өмгөөлсөн ганц үг амнаасаа унагаагүйд нь жаахан гомдох л юм. Өндрөөс унахад хүмүүсийн хандлага харагдаж байна. Өөртөө гомдохоос яах билээ. Одоо урагшаа хараад л зүтгэнэ дээ.
–Тухайн өдөр боксын гэр бүл шинэ ерөнхийлөгчөө сонгосон. Орой нь тамирчид дарвиж яваад л асуудалд орж. Хурлын дараа юу болсон юм бэ?
-Тэр өдөр холбооны хурал болж Хууль зүйн яамны сайд Х.Нямбаатарыг холбооны ерөнхийлөгчөөр сонгосон. Шинэ ерөнхийлөгч тамирчидтай хамт оройн хоол идсэн. Тухайн үед архи дарс уулгүй тарсан. Үүний дараа гавьяат тамирчин П.Сэрдамба, Д.Отгондалай, Б.Чинзориг гээд холбооны удирдах зөвлөлийн гишүүдтэй хамт баяраа тэмдэглэсэн юм. Тэдний найзууд ч хамт байсан. Ингээд л согтууруулах ундаа хэрэглэсэн. Тарах болоход гаднаас Ц.Мөнхчулуун, Д.Идэрбат гээд дээд үеийн хоёр ах ороод ирсэн.
–Тэгээд?
-Би Д.Идэрбат ахтай юм яриад зогсож байсан юм. Цаана Мөнхчулуун ах хүн амьтантай муудалцаад түжигнэж байсан. “Ах нар яагаад муудалцаад байгаа юм бэ” гэхэд л үгийн зөрүүгүй намайг цохиод унагасан. Би ч гайхаад явах гэтэл Идэрбат ах надаас зуураад явуулаагүй. Ингээд түлхэлцээд л асуудал үүссэн. Миний уур ч их хүрсэн. “Би муу ч үгүй гавьяат шүү. Зүгээр явуулаач” гэсэн юм. өөдөөс “Чам шиг гавьяат байдаг юм уу” гэж хэлээд миний нүдэн дээр тэмдгийг маань тас татаад хаячихсан. Зодоон ингэж л эхэлсэн. Тэр том хүн миний дээрээс дараад л унасан. Тэнд хамт явсан хүмүүсийн хэн нь ч намайг зодуулж байхад ирээгүй. Ах нар зөрж өнгөрөхдөө л цохиж аваад байсан. Гурван ч удаа ухаан алдсан. Би тэр өдөр болсон бүх үйл явдлыг тод санаж байна. Тэгж их согтоогүй. Зодуулаад ухаангүй хэвтэж байхад хэн ч намайг өмөөрөөгүй, хэн ч зодооныг салгаагүй болохоор гомдсондоо хэдхэн секундийн лайв хийчихсэн юм. Хоёр гуравхан хүн л үзсэн. Хэн яаж татаж авсан юм мэдэхгүй. Гэртээ хариад унтаад сэрэхэд бөөн асуудал үүссэн.
–Та өөрийн биеэр цагдаад дуудлага өгсөн байна лээ.
-Тийм. Цагдаа нар ирээд хоёр ахыг баривчлаад эрүүлжүүлэх байр руу аваад явсан. Би ч гэртээ хариад амарсан. Асуудал ингэж өндөр авна гэж үнэндээ төсөөлөөгүй. Эргээд бодоход ах нартай архи уусан нь миний буруу. Хэрэв би эрүүл байсан бол асуудлыг тойроод л гарах байсан.
–Чамайг зодсон хүмүүс эргэж холбоо барьсан уу?
-Эрүүлжүүлэхээс гараад л надтай ирж уулзаад “Дүүгээ баллаад хаячихлаа” гэж хэлээд уучлалт гуйсан. Хоёр ах маань холбоонд хандаж намайг ДАШТ-д оролцуулах талаар хүсэлт хүргүүлсэн байна лээ. Миний зүгээс ах нарт гомдоод байх асуудал алга. Хууль шүүхээр яваад байх сонирхол надад алга.
–Холбооны зүгээс удаа дараа сахилга бат зөрчсөн талаар онцолж байна лээ. Сүүлд л гэхэд Эрдэнэтэд багшийгаа зодсон гээд л. Яагаад удаа дараа асуудал үүсгээд байдаг юм бэ?
-Эрдэнэтэд зохион байгуулагдсан олимпийн эрхийн тэмцээний сорилын үеэр болсон асуудал л даа. Эхний даваанд гол өрсөлдөгч Х.Энх-Амар ахтай оноолт таарсан юм. Тоглолтын сүүлийн үед хөлөө бэртээчихсэн юм. Алхахад хүртэл зовуурьтай байсан ч шүд зууж байгаад ялчихлаа. Тулааны дараа холбооны н.Батнасан ах надад хандаж “Гол өрсөлдөгчөө ялсан юм чинь тэмцээнээ дуусгачих. Олимпийн эрхийн тэмцээнд чи яваарай” гэж хэлсэн юм. Тэмцээн дууссаны дараа найзтайгаа паб орж хоёр лааз шар айраг уучихаад буудалдаа амрахаар явж байсан юм. Ингэж яваад өнөөх багтай тааралдаад мэндлэхэд “Чи муу уучихсан байна” гээд л алгадаж авсан. Би ч нэг их тоогоогүй. Өнөөх маань сүржигнээд л “Маргааш чамайг байхгүй болгоно” гээд л занаад эхэлсэн. Уур хүрээд эргэж хараад цохих гээд халтираад уначихсан юм. Миний толгой руу өшиглөөд л чирж гулдраад л бөөн юм болсон. Тухайн үед цагдаа ирж салгаснаар би өрөөндөө ороод унтаад өгсөн. Маргааш нь цагдаад мэдүүлэг өгөөд л өнгөрсөн. Надад ч гэмтлийн зэрэг тогтоогдоогүй учраас гомдол гаргаагүй өнгөрсөн. Багшийгаа зодсон гээд л мэдээлэл цацагдсан. Хүн тэгээд арьсаа хамгаалаад л өнгөрдөг юм билээ. Би багшийгаа зодоогүй.
–Та гудамжаар нүцгэн гүйсэн. Үүний ард хар тамхи хэрэглэсэн гэх асуудал хөндөгдсөн…
-Одоо үнэхээр харамсдаг юм. Тухайн өдөр найзууд маань дуудсан. Очоод аяга юм уугаад л цаашаа юу болсныг санахгүй байна. Эмнэлэгт л сэрсэн. Хоёр хөл маань хөлдчихсөн, үнэхээр аймшигтай. Тухайн үед гэр бүлийнхэн минь л миний дэргэд байсан даа. Би хар тамхи хэрэглэх нь бүү хэл барааг нь харж байгаагүй. Найзууд миний уух зүйлд мансууруулах бодис хийсэн юм болов уу даа. Эмнэлгээс гарахдаа би амиа хорлохоор шийдчихсэн байлаа. Одоо бодоход ээж, ааваас заяасан эрүүл саруул бие байна, эхнэр, хоёр охин минь байхад тийм бодол толгойд минь орж ирдэг. Үнэхээр тэнэг байж. Одоо би гэр бүлийнхээ төлөө зөвхөн урагшаа хараад л зүтгэнэ. Архи гэж зүйлийг жигшлээ.
–Э.Бадар–Ууган мансуурагч гэх утгатай мэдэгдэл хийж байна лээ.
-Надаас мансууруулах төрлийн бодис илэрсэн нь үнэн. Би хариуцлагаа хүлээж 20 хоногийн баривчилгаанд явсан. Энд нэг зүйлийг онцлоход, би хар тамхинд донтчихсон хүн биш. Миний бие өнөөдөр дэлхийн чансааны дэд байрт эрэмбэлэгдэж байна. Хоёр долоо хоногт нэг удаа допингийн шинжилгээнд хамрагддаг. Ийм хяналт дор байгаа хүн хар тамхинд мансуураад явах боломжгүй.
–Олимпийн наадмын тулаануудын талаар ярилцмаар байна.
-Би 10 орчим кг-ыг хасч олимпийн наадамд оролцсон. Эхний даваанд Кенийн тамирчинтай оноолт таарсан. Өмнө нь хэд хэдэн Кенийн тамирчинг хялбархаан ялж байсан юм. “Дутуу гаргачихна даа” гэх ухааны юм бодоод л гарлаа. Гэтэл өнөөх маань хурдтай, тэсрэлттэй, үнэхээр хэцүү өрсөлдөгч байсан. Энд тэнд гараад л бужигнуулаад байдаг. Би ч бүр шоконд орчихсон. Тоочны цохилтуудаа оноо болгосны ачаар ялалт байгуулсан. Олимпийн дэвжээнд өрсөлдөгчөө дутуу үнэлж том алдаа гаргасан шүү. Буугаад иртэл дасгалжуулагч “Наад Кенийгээ арай муухай хийчихлээ дээ, чи” гэж шар малтдаг юм. Шигшээ багийн дасгалжуулагчийн амнаас тийм үг сонсоод үнэхээр гайхсан. Чи Кенийг луйвардчихлаа гэх зүйлийг хэлж байгаа юм.
–Хачирхалтай юм. ОХУ–ын тамирчинтай хийсэн тулаан ямар болов?
-Эхний үед би илт илүүрхсэн. Хоёрдугаар үед тэнцүүхэн тулалдсан. Завсарлагаанаар ялж байгаа эсэх талаар дасгалжуулагчаас лавлахад надад тоймтой хариу хэлээгүй. Гуравдугаар үед урагшаа ажиллаад харамсалтай нь ялагдсан. Хэрэв буланд суусан дасгалжуулагч ялж байгаа талаар тодорхой хэлчихсэн бол би Бадар-Ууган ах шиг бүжиглээд л амархаан ялчих байсан. Ялагдаад буугаад иртэл дасгалжуулагч “Арчаагүй хар пизда” гэхээс өөр зүйл надад хэлээгүй. Намайг луйвардсан Орос энэ удаагийн ДАШТ-нд мэдүүлгээ явуулсан байна лээ. Одоо очоод хэн нь олимпийн медальтан бэ гэдгийг мэдрүүлмээр байна.
–Сахилга батын асуудал гаргаж ДАШТ–д өрсөлдөх боломжоо бараг үгүй хийчихлээ. Одоо яах вэ?
-Холбооноос хүсэх ганц л зүйл байна. Надад сүүлийн боломж олгооч, дэлхийн аварга болоод ирье. Би үндсэн жин болох 60 кг-д бүх өрсөлдөгч нараа хожно. Бүрэн итгэлтэй байна.
–Та Дэлхийн аварга болно гэж амлаж байна. Хэрэв ялагдвал таныг газар дор ортол л дэвсэх байх даа?
-Би дахиад онцолъё. Үндсэн жингийн бүх тамирчдаа би ялна, итгэлтэй байна.
Монголын Залуучуудын холбооноос МУГТ Э.Цэндбаатарыг батлан дааж дэлхийн аваргад оролцуулах хүсэлтийг МБХ-нд хүргүүлж байна.
МЗХ-ны гишүүн боломж олгож, хүсэлт тавив. Тэрээр, Э.Цэндбаатар өөрийн буруутай үйлдэлээ хүлээн зөвшөөрч, Монголчуудаасаа уучлалт гуйж, хоёр охиныхоо нэрээр амлалт өгсөн. Тиймээс бусад байгууллагынхаа дотоод журмыг хүндэтгэж хүсэлт гаргаж байгаа юм. Дэлхийн аваргад явах хүртэл нь МБХ-той хариуцлагын гэрээ байгуулж, бэлтгэл сургуулилтыг нь хийлгэж батлан даана” гэв.
МҮОХ-ны Тэргүүн Дэд Ерөнхийлөгч
Б.Баттүшиг мэдэгдэл хийлээ.
Тэрээр “Сүүлийн өдрүүдэд хэвлэл мэдээллийн байгууллага, олон нийтийн сүлжээгээр Монгол Улсын гавьяат тамирчин Э.Цэндбаатартай холбоотой сөрөг мэдээллүүд тархаж байгаа тул энэхүү мэдэгдлийг гаргаж байна.
Миний бие “Токио 2020” Олимпын наадамд багийн ахлагчийн хувиар оролцох үедээ тухайн тамирчныг бүх талаар дэмжин ажиллаж, холбогдох байгууллагуудад шаардлагатай мэдээллийг цаг алдалгүй хүргэн, үүссэн асуудлуудыг шийдвэрлэх чиглэлд анхаарал хандуулан ажилласан билээ.
МҮОХ-ны дүрмийн дагуу МҮОХ нь спортын холбоодын дотоод үйл ажиллагаанд оролцдоггүй ч олимпизмын үзэл санааг дэлгэрүүлэх, тамирчдын эрх ашгийг хамгаалах үүрэгтэй байдаг.
Үүсээд буй асуудалтай холбогдуулан МҮОХ-ны тамирчдын комиссын дарга Д.Отгондалай тамирчдын эрх ашгийг хамгаалан дэмжиж ажиллахыг хичээнгүйлэн хүсье.
Спорт холбоодын үйл ажиллагаа, шийдвэр нь ямагт тамирчдад ээлтэй байдлыг эрхэмлэн гардаг, тив, дэлхийн хэмжээний уралдаан тэмцээнд зөвшөөрөгдсөн хүрээнд олон тамирчин оролцож, үнэтэй туршлага хуримтлуулах үндэс болдог гэдэгт миний бие бүрэн итгэдэг.
Мөн дээрх асуудалтай холбогдуулан ирэх арваннэгдүгээр сард товлогдсон МҮОХ-ны чуулгантай холбоотой одоогийн удирдлагуудыг харлуулах, хуурамч мэдээлэл түгээх, үндэслэлгүйгээр дайрч давшлах үйлдэл ихээр гарч байгаад харамсаж байгаагаа илэрхийлье. Спорт, олимпзмын төлөө ажиллаж байгаа хэн бүхэн шударга, ёс зүйтэй өрсөлдөхийг хүсэж байна” гэлээ.