Category: спорт

Монголчууд “Токио-2020” паралимпийн наадамд 11 тамирчинтай оролцож, нэг алтан медаль хүртсэн амжилтаар багийн дүнгээр 59 дүгээр байрт жагссан билээ. Тэгвэл паралимпийн наадамд түрүүлж, төрийн дууллаа эгшиглүүлсэн гавьяат тамирчин Э.Содномпилжээг МҮОХ-ны удирдлагууд хүлээн авч уулзан хүндэтгэл үзүүллээ.

Энэ үеэр Э.Содномпилжээг МҮОХ-ны дээд шагнал “Алтан од” одон болон мөнгөн шагналаар урамшуулсныг ерөнхийлөгчийн үүрэг гүйцэтгэгч Ч.Наранбаатар, ерөнхий нарийн бичгийн дарга Э.Бадар-Ууган нар гардуулж өгөв.

Мөн Э.Содномпилжээгийн дасгалжуулагч Д.Баттулгыг “Алтан очир” одонгоор, дасгалжуулагч Б.Энхбаярыг “Олимпийн алдар” одонгоор тус тус шагналаа.

Энэ үеэр Э.Содномпилжээ “МҮОХ-ны удирдлагууд паралимпийн наадмаас медаль хүртсэн тамирчнаа урамшуулж, дээд шагналаа гардуулсанд маш их баяртай байна. МҮОХ, Монголын паралимпийн хороо, БТСУХ-ны удирдлагуудад баярлаж талархсанаа илэрхийлье. Миний хувьд “Парис-2024” олимпод амжилтаа бататгах хэтийн зорилго тавиад бэлтгэл сургуулилтаа базааж байна” гэв.

Засгийн газрын ээлжит хуралдаанаар, МУГТ Э.Содномпилжээд 120 сая, түүний дасгалжуулагч Д.Баттулгад 60 сая төгрөгийн мөнгөн урамшуулал олгохоор тогтоол баталсан билээ.

Мэргэжлийн сүмо бөхийн Аки башё буюу есдүгээр сарын барилдаан Токио хотын “Рёогокү Кокүгикан” ордонд өчигдөр 12 дахь өдрөө үргэлжлэв. Энэ удаагийн башёг Хакүхо болон түүний “Мияагино” дэвжээнийхэн цар тахлын улмаас өнжиж байгаа бол шинэхэн ёкозүна Тэрүнофүжи Г.Ган-Эрдэнэ өчигдөр секиваки Мэйсэтэй барилдаж өвдөг шороодлоо. Улмаар 10 даваа, хоёр унаатай болсон ч Аки башёг ганцаар тэргүүлж буй хэвээрээ байна.

Энэ башед комүсүби цолтойгоор барилдаж байгаа Ичиножо А.Ичинноров өчигдөр озеки Шодайтай барилдаж давлаа. Улмаар зургаан даваа, зургаан унаатай болсон бөгөөд өнөөдөр түүний өрсөлдөгч маэгэширагийн 8-аас барилдаж байгаа Окиноүми юм.

Аки башёгийн дээд макүүчи зиндаанд дараах Монгол бөхчүүд зодоглоно.

• Ёкозүна Тэрүнофүжи Г.Ган-Эрдэнэ 10-2
• Комүсүби Ичиножо А.Ичинноров 6-6
• М-1 Хошорюү С.Бямбасүрэн 3-7 /2 өдөр гэмтсэн/
• М-2 Кирибаяама Б.Лхагвасүрэн 7-5
• М-4 Тамаваши Б.Мөнх-Оргил 5-7
• М-5 Чиёошома Г.Мөнхсайхан 3-9

ОУОХ-ны ивээл дор зохион байгуулагддаг дэлхийн наадам болон тив дэлхийн тэмцээнд амжилттай оролцож медаль хүртсэн тамирчин түүний дасгалжуулагчийг шагнаж урамшуулж мөнгөн шагнал олгодог.

Үүний дагуу өнгөрсөн наймдугаар сард ОХУ-ын Уфа хотод болсон залуучуудын ДАШТ-ий мөнгөн медальт Б.Энхзул, хүрэл медальт М.Мөнхгэрэл болон тэдний дасгалжуулагч Т.Сүхбаатар, П.Чулуунбаатар нарт нэг удаагийн мөнгөн шагнал олгохоор болсныг Монголын чөлөөт бөхийн холбоо мэдээллээ.

Токио хотноо үргэлжилж байгаа сумо бөхийн намрын тэмцээн буюу Аки башёгийн 12 дахь өдрийн барилдаанд 73 дахь Их аварга Тэрүнофүжи Г.Ган-Эрдэнэ, Сэкиваке Мэйсейтэй барилдаж, түүнд шитатэнагe мэхээр унаж, 10 даваа, 2 унаатай боллоо.

Аки башёгийн 11 дэх өдөр Кирибаяама /М-2/ Б.Лхагвасүрэн, Окиноүми/М-8/-тай хүч үзэж, түүнд уватэнагe мэхээр унаж, 7 даваа, 5 унаатай болов

Хошёорюү С.Бямбасүрэн /М-1/, Дайэйшо /М-4/-той учраа таарч барилдан, түүнд ошидаши мэхээр унаснаар 3 даваа, 7 унаатай /тэр гэмтлийн улмаас 2 өдөр өнжсөн/ боллоо. Комүсүби Ичиножёо /М-2/ А.Ичинноров, Окэки Шодай нар өнөөдөр таарч барилдан Ичиножёо хатакикоми мэхээр давснаар 6 даваа, 6 унаатай башёг үргэлжлүүлж байна.

Тамаваши /М-4/Б.Мөнх-Оргил энэ өдөр Комүсүби Такаясү-тэй таарсан боловч, тэр өчигдөр гэмтэл авсан учраас өнжиж, Тамаваши 5 даваа, 7 унаатай башёг үргэлжлүүлж байна.

Харин энэ башёд 2 даваатай яваа Чёошома /М-5/ Г.Мөнхсайхан, Вакатакакаге /М-3/-тэй барилдан, түүнд ошидаши мэхээр унаснаар 3 даваа, 9 унаатай боллоо.

Аки башёгийн 12 дахь өдрийн байдлаар 10 даваатай шинэ Их аварга Тэрүнофүжи Г.Ган-Эрдэнэ энэ башёг ганцаараа тэргүүлж байна. Харин Их аваргын араас Миёогирюү, Окиноүми нар 3 унаатай нэхэж явна.

ОХУ-д болж буй боксын спортын армийн ДАШТ-ий медалийн төлөөх тоглолтууд өчигдөр эхэллээ. Өчигдөр манай дөрвөн тамирчин хүрэл медалийн төлөө тулалдсанаас гурав нь ялж, хүрэл медалийн болзол хангав.

Эмэгтэйчүүдийн -57кг жинд Т.Болортуул Кенийн боксчинг ялж хүрэл медалийн болзол хангасан бол эрэгтэйчүүдийн 52 кг-ын жинд Х.Энхмандах Азербайжаны боксчинг, 56 кг-ын жинд Х.Энх-Амар Замбийн боксчинг ялж тус, тус хүрэл медалийн болзол хангав.

Харин ирэх сарын 3-нд МУГТ Э.Цэндбаатартай сорил тулаан хийх О.Тулга эрэгтэйчүүдийн -60кг жинд хүрэл медалийн төлөөх тулаанд Алжирын боксчинд ялагдлаа. О.Тулга эхний үеийг авсан ч сүүлийн хоёр үед дутуу тоглож хожигдлоо.

Манай гурван боксчин цаашид мөнгөн медалийн төлөө тоглох эрхээ авлаа.

Мэргэжлийн боксын найман өөр жинд дэлхийн аварга цол хүртсэн, Филиппиний алдарт боксчин Мэнни Пакьяо спортын замналаа өндөрлүүлсэн гэдгээ сэтгүүлчдэд мэдэгджээ. Тэрээр зодог тайлах мэдэгдэл албан ёсоор хийгээгүй байсан болохоор дахиад тулаан хийж магадгүй гэсэн хүлээлт хүмүүст байсан юм.

Сэтгүүлч түүнээс спортын замналынх нь цаашдын төлөвлөгөөний талаар асуухад “Миний спортын цаашдын замнал аа. Дуусчихсан шүү дээ. Бүр дууссан. Би олон жил боксоор хичээллэсэн. Сүүлдээ гэр бүлийнхэн маань хэлсэн, “Одоо хангалттай” гэж. Би энэ спортод үнэхээр дуртай учраас л үргэлжлүүлэн тулалдаж байсан юм шүү дээ. Одоо бол нутгаасаа сайн боксчин гаргахад тусална” хэмээн хариулсан байна.

Мэнни Пакьяо хамгийн сүүлд Кубын боксчин Йорденис Угастай WBC холбооны бүсийн төлөө тулалдаад ялагдсан юм.

Олон улсын хэмжээний мастер, “Алдар” спорт хороо, Малайзын “Terengganu” багийн тамирчин С.Жамбалжамц Азид 158 оноогоор гуравдугаар байрт, баг нь тэргүүн байранд жагсаж байгаа бөгөөд дэлхийн аварга шалгаруулах тэмцээний бөөн гараат уралдаанд оролцох эрхээ авсан Монголын цор ганц дугуйчин болсон билээ.

Тэрбээр энэ сарын 18-нд ДАШТ-д оролцохоор Бельги улсыг зорьсон бөгөөд бөөн гараат уралдааны тамирчид энэ сарын 26-нд Антверпен хотоос Лөөвен хот хүртэл 268,3 км-т уралдана.

Харин олон улсын хэмжээний мастер Э.Болор-Эрдэнэ ганцаарчилсан гараат тэмцээнд оролцох байсан боловч вакцинтай холбоотой асуудлаас үүдэн виз олгоогүй байна.

Бээжингийн 2022 оны өвлийн олимп, өвлийн паралимпийн уриаг албан ёсоор зарлалаа.

Тодруулбал айсуй олимп “Ирээдүйн зүг хамтдаа” буюу “Together for a Shared Future” гэсэн уриан дор болохоор болжээ. БНХАУ-ын тал үүнийгээ: “Олимпизмын үзэл санааны дагуу дэлхийн ард түмэнтэй хамт урагшилж, харилцан туслалцаж, сайн сайхан ирээдүйгээ хамтран цогцолъё гэсэн Хятадын 1.4 тэрбум ард түмний хүлээлт, дэлхий дахинд тавьсан чин сэтгэлийн урилга” гэж тайлбарласан байна.

Бээжингийн өвлийн олимпийг зохион байгуулсан зорилгоо бүрэн илэрхийлэхийн тулд Бээжингийн Өвлийн олимпийн зохион байгуулах хороо 2020 оны 5-р сараас холбогдох байгууллагууд болон мэргэжилтнүүдийн олон мянган саналыг авч, мөн олон улсын олимпын хороо, Олон улсын паралимпийн хороотой зөвшилцсөний дүнд “Ирээдүй зүг хамтдаа” -г сонгон, Бээжингийн өвлийн олимп, Паралимпийн уриа болгохоор шийдвэрлэжээ.

Дэлхий нийтээрээ цар тахлын эсрэг тэмцэж буй өнөөгийн нөхцөл байдалд Бээжингийн Өвлийн олимпийн уриа нь төвлөрөх, хуваалцах ба ирээдүйн төлөө зүтгэх дуу хоолойг ийн дамжуулж байна. БНХАУ-ын тал уриагаа задалж тайлбарлахдаа: ““Хамтдаа” гэдэг нь хүн төрөлхтөн бэрхшээлийг даван туулж, ирээдүйгээ цогцлох амжилттай замналыг тодорхойлсон юм. “Ирээдүй зүг” гэдэг нь сайн сайхан маргаашийн тухай хүн төрөлхтний хүсэл эрмэлзлийг илэрхийлж, итгэл найдвар төрүүлж байна. “Ирээдүй зүг хамтдаа” гэдэг нь байр суурь, санаачилга төдийгүй үйл ажиллагааны төсөл юм. Товчхондоо бол сайн сайхан ирээдүйн төлөө хамтран тэмцэх дэлхий нийтийн хүсэл мөрөөдлийг илэрхийлсэн юм.” гэсэн байна.