Category: спорт

Токиогийн Олимпийн наадам танхимын цөөн үзэгчтэйгээр эхлэхэд долоо хоногийн хугацаа үлдээд байна. Японы нийслэлд коронавирусийн халдварын тархалтыг хяналтад авахын тулд үргэлжлүүлэн хүчин чармайлт гаргаж буй үед энэхүү наадам болох юм.

Өнгөрсөн долоо хоногт Олимпийг зохион байгуулагчид Токио болон тус хоттой хөрш зэргэлдээ оршдог гурван мужид болох тэмцээнүүдийг танхимын үзэгчгүйгээр зохион байгуулахаар шийдвэрлэсэн юм. Харин зарим муж дахь спортын байгууламжуудад тодорхой тооны үзэгчдийг нэвтрүүлэхийг зөвшөөрсөн билээ.

Энэ сарын 23-нд болох наадмын нээлтийн ёслолд зөвхөн улс орнууд, спортын байгууллагуудын төлөөлөгчид оролцоно. Ийнхүү оролцох хүмүүсийн тоог 10 мянга орчмоор хязгаарлахаар анх төлөвлөж байсан бол ойрын хугацаанд хэдэн зуугаар бууруулах төлөвтэй байна.

Олимпийн хотхоны хувьд хэдийнээ нээгдээд байгаа бөгөөд олон тамирчин бэлтгэлээ бүрэн базаахаар Японд ирээд буй юм. Гэвч зарим тамирчний коронавирусийн шинжилгээний хариу эерэг гарснаас үүдэн халдварын улмаас тэмцээний хуваарь өөрчлөгдөж болзошгүй гэдэгт тамирчид санаа зовних болжээ.

Иймээс зохион байгуулагчид Олимпийг аюулгүй зохион байгуулахын төлөө шаардлагатай бүхий л арга хэмжээнүүдийг авч хэрэгжүүлэх сорилттой тулгарч байна. Токиогийн Олимпийн эхний тэмцээн болон софтболын тэмцээн энэ сарын 21-нд буюу наадмын нээлтийн ёслолоос өмнө болно.

“Токио-2020” зуны XXXII олимпийн наадмын боксын төрөл долдугаар сарын 24-нөөс наймдугаар сарын 8-ны өдрийн хооронд зохион байгуулагдана.

Монгол Улсаас эрэгтэйчүүдийн 57 кг жинд үндэсний шигшээ баг, ШШГЕГ-ын харьяа “Сүлд” спорт хороо болон Ажнай корпорацийн тамирчин, МУГТ Э.Цэндбаатар, эрэгтэйчүүдийн 63 кг жинд ҮШБ, Зэвсэгт хүчний “Алдар” спорт хороо болон Капитрон банкны тамирчин, ОУХМ Б.Чинзориг, эмэгтэйчүүдийн 75 кг жинд ҮШБ, Уулын баяжуулах Эрдэнэт үйлдвэрийн “Хангарьд” спорт хорооны тамирчин, ОУХМ М.Мягмаржаргал оролцоно.

Монголын боксын холбооны ерөнхийлөгч Т.Мөнхбаяр өчигдөр /2021.07.15/ Хандгайт дахь Олимп цогцолборт зочилж “Токио-2020” зуны XXXII олимпын наадамд оролцох баг тамирчиддаа амжилт хүсэн, үдэн гаргажээ.

Олимпийн рингэд хүч, ур чадвараа сорих баг тамирчид өнөөдөр өглөө дасгалжуулагч М.Буянжаргал, О.Батхүү болон бэлтгэл хангагч тамирчдын хамтаар Япон улсыг зорьж байна. Тэд Японы Шизүока мужийн Шимада хотноо долдугаар сарын 22-ны өдрийг хүртэл бэлтгэлээ хангах юм.

Японы Нагоя хотын “Долфинс” ордонд болж буй мэргэжлийн сумо бөхийн Нагоя башёгийн 12 дахь өдөр 69 дэх Их аварга Хакухо М.Даваажаргал, Сэкиваке Митакэүми-тэй барилдаж, түүнийг ёрикири мэхээр хаяж, 12 даваатай башёг тэргүүлж байна.

Маргааш Их аварга Хакүхо, Сэкиваке Такаясү-тэй учраа таарсан байна. Харин Озэки Тэрүнофүжи Г.Ган-Эрдэнэ 12 дахь өдөр буюу өнөөдөр Комүсүби Мэйсей-тэй учраа таарч, түүнийг кимэтаоши мэхээр төвөггүй давж 12 дахь даваагаа авч Их аваргын адил нэг ч уналгүй башёг тэргүүлсээр явна. Тэрбээр маргааш Озэки Шодай-тай барилдана.

Нагоя башёг 12 даваатай тэргүүлж яваа Их аварга Хакухо М.Даваажаргал, Озэки Тэрүнофүжи Г.Ган-Эрдэнэ нарын араас хамгийн ойр буюу 9 даваатай байгаа Тамаваши /М-10/ Б.Мөнх-Оргил, Котоновака /М-12/ хоёр тэргүүлэгчдийг нэхэж явна.

Ичиножёо /М-2/ А.Ичинноров, энэ өдөр Хокүтофүжи /М-3/-тэй учраа тааран барилдаж, түүнд ёрикири мэхээр унаж 8 даваа, 4 унаатай боллоо.

Харин Кирибаяама /М-6/ Б.Лхагвасүрэн, Сэкиваке Такаясү-тэй учраа тааран барилдаж түүнийг ёрикири мэхээр хаяж 8 даваа, 4 унаатай болов. Тэрбээр маргааш Комүсүби Мэйсей-тэй хүч үзнэ. Энэ өдөр Чёошома /М-7/ Г.Мөнхсайхан, Тэрүцүёоши /М-10/-тэй таарч, түүнд коматасүкүи мэхээр унаж, 7 даваа, 5 унаатай болов.

Тамаваши /М-10/ Б.Мөнх-Оргил энэ өдөр Ишиүра /М-16/-тэй барилдаж, түүнийг ошидаши мэхээр унагаснаар 9 даваа, 3 унаатай болов. Харин Хошёорюү С.Бямбасүрэн /М-5/ 12 дахь өдрийн барилдаанд Хидэноүми/М-9/-тэй барилдаж, түүнд уватэнаге мэхээр унаж 8 даваа, 4 унаатай башёг үргэлжлүүлж байна.

Озэки Шодай энэ өдөр Окиноүми /М-5/-тэй учраа таарч түүнийг ёрикири мэхээр хаяж, 7 даваа, 5 унаатай башёг үргэлжлүүлж явна.

Энэ сарын 23-нд эхлэх “Токио 2020” зуны олимпийн наадамд зориулсан Токио хотын далайн эргийн Харуми дүүрэгт байрлах хотхон нээгдэж, тамирчдыг хүлээн авч эхэлсэн талаар бид өмнө нь мэдээлсэн.

Энэ үеэр Токиод “Ковид-19” цар тахалын халдвараас урьдчилан сэргийлэх дөрөвдэх удаагийн онц байдлын дэглэм хэрэгжиж байгаатай холбогдуулан тамирчид, төлөөлөгчдийг байрлуулах Олимпийн хотхоныг нээх ёслол зохион байгуулаагүй юм.

Токиогийн булангийн эрэгт 44 га талбайд тохижуулсан олимпын хотхоны 21 барилгад 11 мянга гаруй тамирчин, тэднийг дагалдан ирэх ажилчид байрлана.

Олимп зохион байгуулах хороо цар тахлын халдвараас сэргийлэхийн тулд тамирчдыг зөвхөн хотхон дотроо болон тэмцээн болох цэнгэлдэх хооронд зорчихыг зөвшөөрч, бусад бүх үйлчилгээг олимпийн хотхон дотроос авахаар зохион байгуулжээ.

Олимпийн хотхон нь 700 гаруй нэр төрлийн хоолоор 24 цагаар үйлчлэх ресторан, хүнсний сүлжээ дэлгүүр, шуудан зэрэг бүх төрлийн үйлчилгээний газартай. Мөн Цар тахлын халдвараас сэргийлэхийн тулд хотхонд халдварын шинж тэмдэг илэрсэн тамирчдыг шалгах тусгай түр эмнэлэгүүд 24 цагаар ажиллах юм байна.

Монгол улсаас Европ тивд мэргэжлийн тамирчин болон гэрээ хийсэн анхны тоглогч Ганболдын Ганбаяр Унгарыг орхиж Словак улсын 2-р лигийн “КФС Комарно” багт зээлээр нэгдлээ.

Тэрээр Унгарын “Пушкаш академи” багтай 2016 онд урт хугацааны гэрээ хийж байсан бөгөөд шинэ багтаа 1 жилийн хугацаанд зээлээр тоглохоор болжээ.

Довтлох чиглэлийн хагас хамгаалагчийн байрлалд тоглодог Г.Ганбаяр нь өдгөө 20 настай бөгөөд Унгарын хоёрдугаар лигт 26 тоглолтод оролцож 3 гоол оруулж, 1 гоолын дамжуулалт өгчээ.