Буудлагын эмэгтэйчүүдийн 10 метрийн хийн урт бууны финалын тоглолт болж Хятадын тамирчин олимпийн анхны алтан медалийг хүртлээ.
Өдгөө 25 настай Чиан Яан 251.8 оноо авч олимпын дээд амжилтыг шинэчлэн тогтоосон бол мөнгөн медалийг хүртсэн ОХУ-ын Анастасиа Галашина 251.1 оноо авчээ.
Харин хүрэл медалийг Швейцарын Нина Кристен 230.6 оноотой хүртлээ. Тус төрөлд Монголын тамирчин О.Есүгэн 624.0 авч 25-р байранд бичигдсэн юм.
Олимпийн наадмын боксын спортын оноолт өчигдөр болж, манай гурван тамирчны учраа тодорлоо. Эмэгтэйчүүдийн 75 кг жинд М.Мягмаржаргал Их Британийн Лорен Прайстай таарсан бөгөөд дараагийн шатанд Австри болон Панамын тамирчдын ялсантай тоглоно. Тоглолт долдугаар сарын 28-нд болно.
Маргааш олимпийн нээлтээс хойших хоёр дахь өдөр манай улсын 11 тамирчин олимпийн таван төрөлд өрсөлдөнө.
07:30. Хамгийн түрүүнд буудлагын эмэгтэйчүүдийн 10 метрийн хийн урт бууны төрөлд О.Есүгэн өрсөлдөх бөгөөд тус төрлийн медалийн тоглолтууд 09:45 цагт эхэлнэ. (UBS, SBN, VTV)
08:00. Харин түүний араас Монголын шигшээ багийн залуу тамирчдын нэг Б.Болор-Эрдэнэ манай улс анх удаа оролцож буй ширээний теннисний спортоор өрсөлдөнө. Тэрээр эхний буюу урьдчилсан шатанд Тунисийн Фадва Гарситай тоглоно. Тэдний хэн ялсныг нэгдүгээр шатанд Чилийн Мариа Паулиньа Вега хүлээж байна. (NTV, TV8, TM)
09:30. Мөн ширээний теннисний эрэгтэй ганцаарчилсан төрлийн урьдчилсан шатанд Э.Лхагвасүрэн АНУ-ын Никил Кумартай тоглоно. Тэдний хэн ялсныг нэгдүгээр шатанд Эквадорын теннисчин Альберто Мино хүлээж буй. (NTV, TV8, TM)
10:00. Бага үдэд жүдо бөхийн эрэгтэйчүүдийн -60 кг болон эмэгтэйчүүдийн -48 кг жингийн барилдаанууд эхэлнэ. Эрэгтэй -60 кг жингийн эхний барилдаан манай жүдоч Д.Амартүвшин болон Нидерландын Цякадоеа Торник нарын хооронд болох бол -48 кг жингийн 15 дахь барилдааныг М.Уранцэцэг хийнэ. Тэрээр эхний тойрогт гоц мөргөсөн бөгөөд Германы Катарина Менц, Чилийн Мэри Ди Варгас Лей нарын ялсантай хүч үзнэ. Хоёр жингийн медалийн барилдаанууд 16:00 цагаас эхэлнэ. (EDU, STAR, TV9)
12:00. Буудлагын эрэгтэйчүүдийн 10 метрийн хийн гар бууны урьдчилсан шат үдэд эхлэх бөгөөд Э.Даваахүү цэц мэргэнээ сорино. Тус төрлийн медалийн буудлага 13:30 цагт эхэлнэ. (UBS, SBN, VTV)
16:30: Өдөр түр завсарласны дараа Монголын баг тамирчдын тэмцээн 3х3 сагсан бөмбөгөөр эргэн ирнэ. Энэ удаа О.Хулан, М.Цэрэнлхам, Э.Чимэддолгор, Б.Солонго нараас бүрдсэн 3х3 эмэгтэй баг Италийн хүчирхэг багтай тоглоно. (NTV, TV8, TM)
17:51. Дараа нь боксын эрэгтэйчүүдийн 57 кг жингийн урьдчилсан шатанд Э.Цэндбаатар Кенийн Николос Оконго Окоттой тулалдана. (NTV, TV8, TM)
20:00. Ингээд Монголын багийн 24-ны өдрийн сүүлийн тэмцээн 3х3 сагсан бөмбөгийн баг АНУ-ын шигшээ багтай тоглосноор дуусна. (NTV, TV8, TM)
Энэ өдөр медальтнууд тодрох спортууд:
Энэ өдөр эхлэх бусад спортууд:
“Токио-2020” зуны 32 дахь удаагийн олимпийн наадмын тэмцээн, уралдаан 40 гаруй спортын байгууламж, цэнгэлдэх хүрээлэнд болох аж.
Токио хотын бүсэд олимпийн 33 объект байгаагаас 20 нь олимпийн тосгоноос 8 км дотор байрладаг гэнэ. Бүсчлэлийн хувьд гол объектууд нь “Төвийн бүс” болон “Токиогийн булангийн бүс” гэсэн хоёр үндсэн кластерт төвлөрчээ.
Олимпийн нээлтийн болон хаалтын ажиллагаа Токио хотын шинэ Үндэсний цэнгэлдэх хүрээлэнд болно. Тус стадионыг 2015 оны тавдугаар сард буулгасан 1964 оны олимпийн “Ёёги” цэнгэлдэх хүрээлэнгийн буурин дээр барьжээ. Токиогийн олимп болон паралимпийн наадамд зориулсан шинэ цэнгэлдэх хүрээлэнг 2016 оны арванхоёрдугаар сараас буюу төлөвлөсөн хугацаанаас 14 сарын дараа эхлүүлсэн байна. Ийн хоцорсон шалтгаан нь 2012 онд Ирак гаралтай Их Британийн архитектор Заха Хадидын танилцуулсан анхны төсөл хэт өндөр өртөгтэй байна гэж Японы архитектор, албан тушаалтнууд эсэргүүцсэнтэй холбоотой аж.
Харин Японы архитектор Кенго Күмагийн танилцуулсан шинэ төслийг Японы Засгийн газар 2015 онд баталжээ. Анхны төсөлтэй харьцуулахад шинэ төслийн өртөг 2.1 тэрбум ам.доллароос 1.2 тэрбум ам.доллар болж буурсан ба суудлын тоо мөн 80 мянгаас 68 мянга хүртэл цөөрүүлжээ.
Олимпийн үндэсний цэнгэлдэх хүрээлэнгийн гадна тал бүхлээрээ Японы бүх 47 мужаас авч ирсэн модоор хийгдсэн аж. Архитектор өөрөө энэхүү бүтээлээ “Амьд мод” хэмээн нэрлэжээ. Цэнгэлдэх хүрээлэнг сүм дуган барих Японы уламжлалт аргаар барьсан ба нийт 157 тэрбум иен зарцуулсан байна. Байгууламжийн дизайн, агааржуулалтын хамгийн сүүлийн үеийн систем нь Токиогийн зуны 40 хэмийн аагим халуунаас хамгаалах гэнэ. Олимпийн нээлт болон хаалтаас гадна энэхүү цэнгэлдэх хүрээлэнд хөнгөн атлетикийн тэмцээнүүд болох аж.
Токиог энэ сарын 21-нд зорьсон үндэсний шигшээ багийн тамирчид өнөөдрөөс Кодоканд бэлтгэлээ хийж эхэллээ.
Хуваарь ёсоор жүдо бөхийн тэмцээнд 24-нөөс эхэлж, 31-нд холимог багийн төрлийн барилдаанаар өндөрлөнө.
Монголын багийн салхийг хагалж эрэгтэйчүүдийн -60кг жинд гавьяат тамирчин Д.Амартүвшин, эмэгтэйчүүдийн -48кг жинд гавьяат тамирчин М.Уранцэцэг нар барилдана.
Монголын байт харвааны тамирчид 1260 оноо цуглуулж, 64 орноос 27 дугаар байрт жагслаа хэмээн Монголын байт харвааны холбооны ерөнхийлөгч П.Цагаан мэдээллээ.
Байт харвааны эрэгтэй ганцаарчилсан төрлийн чансаа тогтоох тэмцээн явагдаж дууссан бөгөөд Монгол Улсаа төлөөлөн оролцсон Б.Отгонболд 646 оноотой, 54 дүгээр байрт жагсав.
Тэргүүн байрт БНСУ-ын тамирчин Ким Жэ Док шалгарч, хоёрт АНУ-ын тамирчин Брэди Эллисон, гуравт БНСУ-ын тамирчин О Жин Хьёк нар удаалжээ. Манай тамирчин Б.Отгонболд энэ сарын 27-нд Хятадын тамирчинтай өрсөлдөнө.
Өнөөдөр эрэгтэй, эмэгтэй байт харвааны ганцаарчилсан төрлүүд мөн холимог багийн төрлүүд явагдлаа. Эрэгтэй, эмэгтэй тамирчдын оноог нийлүүлэн холимог багийн оноог гаргахад Монголын тамирчид нийлээд 1260 оноо цуглуулжээ.
Олимпийн байт харвааны эрэгтэйчүүдийн ганцаарчилсан төрлийн эрэмбэ тогтоох тойрог өнөөдөр 12:00 цагаас эхэлсэн. Нийт 64 тамирчин оролцож байгаа уг шатанд Монголын тамирчин Б.Отгонболд 54 дүгээр байранд жагслаа.
Тэрбээр хоёр үеийн 12 гараанд тус бүр зургаа нийт 72 сум тавьж 646 оноо авсан байна. Харин чансааны эхний гуравт Өмнөд Солонгос, АНУ-ын тамирчид жагсжээ.
“Токио 2020” олимпийн наадмын байт харвааны тэмцээн үргэлжилж буй. Өглөө болсон байт харвааны урьдчилсан шатны тэмцээны үеэр ОХУ-ын тамирчин Светлана Гомбоева ухаан алдан унаснаар эмнэлгийн тусламж авсан гэх мэдээлэл гадаадын сайтуудад мэдээлэгджээ.
Энэ тухай Олимпийн медальт тамирчин Ксения Перова хэлэхдээ:
“Тэр надтай урьдчилсан шатны үр дүнгийн талаар ярилцаж байхдаа ухаан алдаж унасан. Энэ үйл явдал хэдхэн секунтын дотор л болоод өнгөрсөн. Гадаа маш халуун, асфальтан зам халж, амьсгалахад ч бэрх болоод байна. Эмч нар хэлэхдээ Светланаг наранд цохиулсан байж магадгүй гэсэн” гэв.
Ухаан алдсан гэх ОХУ-ын шигшээ багийн тамирчин Светлана Гомбоева нь тэмцээний хамгийн хүчтэй өрсөлдөгч хэмээгдэж буй.
Олимпийн наадмын үеэр коронавирусийн халдвараас сэргийлэхийн тулд хатуу чанга дүрэм журам мөрдүүлж буй. Үүний нэг нь 15 минутын дүрэм. Тамирчид, төлөөлөгчид зайлшгүй шаардлагаар зочид буудлаасаа гарах бол 15 минут л явах ёстой гэсэн утгатай. Гэхдээ тамирчид богинохон энэ хугацаанд дэлгүүрээс хоол ундны юмаа цуглуулах юм уу эмийн сангаас эм авахад хэцүү байгаа талаар гомдоллох болсон. Тэгвэл зохион байгуулагчдын зүгээс 15 минутын дүрмийг цуцлахаар төлөвлөж буйгаа мэдэгдлээ.
Австралийн морьтон 66 настай Мэри Ханна Токиогийн олимпод оролцсон хамгийн ахмад тамирчин болно. Мөн тэрээр олимпийн түүхэд хоёр дахь ахмад тамирчин болж бичигдэх юм.
Өмнө 1972 онд Их Британийн морьтон Лорна Жонстон 70 насандаа олимпод оролцож байв.
Зургаа дахь олимпдоо (1996, 2000, 2004, 2012, 2016) орох Мэри Ханна Австралийн хамгийн ахмад олимпийн тамирчин бөгөөд түүнээс өмнө 62 настай Жеймс Күинн энэ амжилтыг эзэмшиж байжээ.
Австрали улс энэ удаагийн олимпод 472 тамирчинтай ирсэн бөгөөд бүх төрлийн спортод оролцож байна. Мөн нийт тамирчдын 254 нь буюу 53.8 хувь нь эмэгтэй байгаа нь олимпод орж бусад улсыг эмэгтэйчүүдийнхээ хувиар тэргүүлэх үзүүлэлт юм.