Category: спорт

Буудлага спортын эмэгтэйчүүдийн хийн гар бууны 10 метрийн дасгалын урьдчилсан шат явагдаж дууслаа. Энэ шатанд 53 тамирчин онч сорьсны дотор Монголын хоёр мэргэн бууч байв. Анхны олимпдоо оролцож буй залуу тамирчин Ц.Анударь дэлхийн шилдгүүдтэй ана мана өрсөлдсөөр шилдэг наймд шалгарахад ганцхан оноо дутан есдүгээр байрт жагслаа. Тэрбээр 60 суманд 96, 97, 95, 97, 97, 94 гэж буудан 576 оноо авсан юм.

10 метрийн хийн гар бууны дасгалд БНХАУ-ын Жиан Раншин (587), Грекийн А.Коракаки (585), ОХУ-ын В.Бацарашкина (582), БНХАУ-ын Лин Ю Мэй (579), Францын М.Ламоле (578), Болгарын А.Костадинова (578), Украины О.Костевич (577), Францын С.Говервил (577) нар шигшээд шалгарч, цааш медалийн төлөө буудахаар болов.

Монголын сагсчин охид олимпийн наадмын гурав дахь тоглолтоо талбайн эзэн Японы эсрэг хийлээ.

Азийн наадмын мөнгөн медальт хүчтэй багийн эсрэг манай охид чамлахааргүй өрсөлдөж, 19:10-аар дийлдэв. Манайхан багаараа жигд тоглосон бөгөөд Б.Солонго, Э.Чимэддолгор нар гурван оноо авсан бол О.Хулан, М.Цэрэнлхам нар тус бүр хоёр оноо нэмэрлэв.

Өнөөдөр Гавьяат тамирчин М.Уранцэцэг олимпоос хүрэл медаль хүртсэн Монголын анхны эмэгтэй жүдоч, олимп, ДАШТ-ий таван медалийн эзэн боллоо.

Дэлхийн аварга болсон Монголын анхны эмэгтэй жүдоч, ДАШТ-ээс дөрвөн медаль хүртсэн анхны монгол жүдоч тэрбээр “Олимпийн медальтан болсондоо маш их баяртай байна. Намайг медаль авахад баг хамт олон маань маш их тусласан. Би олимпод гурав дахь удаагаа оролцоод анхны медалиа авлаа.

Аав, ээждээ, хамаатан садан, найз нөхөд, “Хүч” спорт хороо, туслаж дэмждэг бүх хүнд баярлалаа. Энэ медалийг авахын төлөө 16 жил хөдөлмөрлөлөө. Авсандаа маш их баяртай байна. Баярлалаа” гэсэн юм. М.Уранцэцэг Токиогийн олимпын хүрэл медалиа зүүлээ.

Эмэгтэйчүүдийн 48 кг-ын медальтнуудын шагналыг гардуулсан эрхмүүдийн дунд ДАШТ-ий хүрэл медальт, Гавьяат тамирчин Х.Эрдэнэт-Од байлаа.

Боксын эрэгтэйчүүдийн 57 кг жингийн урьдчилсан буюу шилдэг 32-ын шатанд Э.Цэндбаатар Кенийн тамирчин Николос Оконго Окоттой тоглож яллаа.

Улаан булангаас гарсан Э.Цэндбаатар эхний үед ялсан ч хоёрдугаар үед шүүгчдийн санал Кенийн боксчны талд байлаа. Харин гуравдугаар үед шүүгчид манай тамирчны талд байв.

Ингэснээр Э.Цэндбаатар шөвгийн 16-д Вьетнамын Нгуен ван Дуонтой долдугаар сарын 28-ны 18:06 цагт тулалдахаар боллоо.

Монголын шигшээ багийн залуу тамирчдын нэг Б.Болор-Эрдэнэ ширээний теннисний эмэгтэйчүүдийн ганцаарчилсан төрлийн нэгдүгээр шатанд Чилийн Мариа Паулиньа Вегатай тоглож хожигдлоо.

Дэлхийн чансааны 510-т бичигддэг манай тамирчны хувьд дэлхийн чансааны 75-д бичигддэг туршлагатай тамирчны эсрэг дөрвөн парт 11-8, 11-9, 11-4, 11-7 харьцаагаар хожигдов.

Манай тамирчин урьдчилсан шатанд дэлхийн чансааны 208-д жагсдаг Тунисийн тамирчныг ялсан билээ.

Харин Чилийн тамирчны хувьд хоёрдугаар шатанд Тайландын Сутасини Саветтабуттай тоглоно.

Өчигдөр болсон нээлтийн ёслолын үеэр зарим тамирчин, албаны хүмүүс маскгүй жагссаны дараа ОУОХ-ны зүгээс тэдэнд хатуу сануулга өгөх болно гэдгийг мэдэгдэв. Нээлтийн үеэр Кыргызстан, Тажикистаны зарим тамирчин, албаныхан маскгүй жагсаалд оролцсон нь зохион байгуулагчдын анхааралд өртсөн байна. Мөн Пакистаны туг баригч Халил Ахтар болон бадминтоны тамирчин Махуд Шахзад нар маск зүүлгүй жагсаалд оролцож байлаа.