Category: спорт

“Токио 2020” олимпийн наадмын жүдо бөхийн эрэгтэйчүүдийн 73 кг-ийн жингийн хэсгийн барилдаанууд явагдаж байна.

Тэмцээний “B” хэсэгт орсон ОУХМ Ц.Цогтбаатар хэсгийн хоёрдугаар тойрогт эхний барилдаанаа хийж, Гвинейн тамирчин Самба Мамадоуг иппон үнэлгээгээр яллаа. Ингэснээр тэрээр шөвгийн 16-д шалгарч байна.

Ц.Цогтбаатарын хувьд 2021 онд Олон улсын жүдо бөхийн холбооны Ташкент болон Тиблисийн гранфри тэмцээнүүдэд дараалан түрүүлж, маш сайн формтой Токиогийн олимпод хүрэлцэн ирсэн. Тэрээр 73 кг-ийн жингийн дэлхийн чансаанд 6-д эрэмбэлэгдээд байгаа юм.

Олон улсын олимпийн хороо /ОУОХ/ Токиогийн Олимпийн медаль хүртсэн тамирчдыг гэрэл зургаа авхуулахаар шагналын тавцан дээр зай барин зогсож байхдаа амны хаалтаа 30 хүртэлх секундын хугацаагаар тайлахыг зөвшөөрчээ.

“Токио-2020” наадмын оролцогчдод зориулсан халдвараас урьдчилан сэргийлэх гарын авлагад тамирчид шагнал гардуулах ёслолын үеэр амны хаалт зүүх ёстой хэмээн тусгасан байсан юм.

Ийнхүү ОУОХ-ноос гаргасан шинэ шийдвэрийн дагуу ням гарагт Олимпийн медаль хүртсэн тамирчид ёслолын үйл ажиллагааны үеэр амны хаалтаа түр тайлан зургаа авхуулсан байна.

“Токио-2020” зуны олимпийн XXXII наадамд АНУ-ын үндэсний сагсан бөмбөгийн эрэгтэйчүүдийн баг өчигдөр Францын багт 83-76 харьцаагаар ялагджээ.

Энэ нь АНУ-ын багийн хувьд 2004 оноос хойших анхны ялагдал байв.

2008, 2012, 2016 оны буюу сүүлийн гурван олимп дараалан аварга болж байсан түүхтэй Америкийн баг олимпод 1936 оноос хойш 15 удаа алтан медаль хүртэж байжээ. Тус улс 1972 онд мөнгө, 1988 болон 2004 онд хүрэл медаль хүртсэн байна.

Өөрөөр хэлбэл олимпын 144 удаагийн тоглолтод Америкийн баг зургаан удаа л ялагдаж байжээ.

Энэ удаагийн олимпын наадамд Кевин Дюрант, Дэмиан Лиллард тэргүүтэй NBA-ын шилдэг тоглогчдоос бүрдсэн баг оролцож байгаа юм.

Багийн бүрэлдэхүүн:

Бам Адебайо /Майами Хит/
Девин Букер /Финикс Санс/
Кевин Дюрант /Брүүклин Нетс/
Жерами Грант /Детройт Пистонс/
Дрэймонд Грийн /Голден Стэйт Уарриорс/
Жрю Холидэй/Милуоки Бакс/
Келдон Жонсон /Сан Антонио Спөрс/
Зак Лавин /Чикаго Буллс/
Дамиан Лиллард /Портлэнд Трэйл Блэйзерс/
Жавэйл МакГи /Денвер Наггетс/
Крис Мидлтон /Милуоки Бакс/
Жейсон Татум /Бостон Селтикс нар багтжээ.

Тэд лхагва гарагт Ираны багтай тоглоно.

Маргааш буюу долдугаар сарын 26-ны өдөр манай улсын 6 тамирчин спортын хоёр төрөлд өрсөлдөнө.

09:40. 3х3 сагсан бөмбөгийн эмэгтэй баг олимпийн тав дахь тоглолтоо Румын улсын шигшээ багтай хийнэ. Олимпод анх удаа орж буй манай багийн хувьд эхний дөрвөн тоглолтдоо хожигдоод байгаа юм. (NTV, TV8, TM)

10:00. Жүдо бөхийн эмэгтэйчүүдийн -57 кг жинд дэвжээний 9 дэх барилдаанд Д.Сумъяа зодоглоно. Тэрээр эхний шатанд Словенийн Кая Кайзертай барилдана. Тэдний хэн ялсныг шөвгийн 16-д Тайванийн Чен-Лин Лиен хүлээж байна. (EDU, STAR, TV9)

Жүдо бөхийн эрэгтэйчүүдийн -73 кг жинд дэвжээний 11 дэх барилдаанд Ц.Цогтбаатар зодоглоно. Тэрээр Гвинейн Мамаду Самба Бахтай барилдах бөгөөд ялсан нь шөвгийн 16-д Куба болон Молдавын бөхчүүдийн нэгэнтэй таарна. (EDU, STAR, TV9)

16:30. 3х3 сагсан бөмбөгийн баг өдрийн хоёр дахь тоглолтоо хүчирхэг Францын шигшээ багтай хийнэ. (NTV, TV8, TM)

“Токио-2020” олимпийн наадмын жүдо бөхийн тэмцээн үргэлжилж байна. Энэ удаагийн олимпийн наадамд Японы алдарт жүдочид болох ах, дүү хоёр Абэ түрүүлэх зорилготой ирснээ хэвлэлд өгсөн ярилцлагадаа хэлж байв.

Эхлээд эмэгтэйчүүдийн 52 кг-д дэлхийн хошой аварга, дүү Үта Абэ нь түрүүлсэн. Тэрбээр аваргын төлөөх барилдаанд ДАШТ-ий хошой хүрэл медальт А.Бушардыг ялсан. Эл барилдааныг Монголын шүүгч Т.Энхцэцэг шүүсэн юм. Абэ Үта 21 настай.

Дараа нь эрэгтэйчүүдийн 66 кг-д дэлхийн хошой аварга, Абэ Хифүми аваргын төлөө барилдсан. Түүний өрсөлдөгч нь Гүржийн бөх байлаа. Эл барилдаанд 23 настай Абэ Хифүми өрсөлдөгчөө вазари үнэлгээгээр ялав. Ингэснээр төрсөн ах дүү хоёр жүдогийн хоёр өөр жинд нэг өдөр олимпын аварга боллоо.

32 дахь удаагийн “Токио-2020” зуны олимпийн наадам үргэлжилж байна.

Ээлжит зуны олимпийн наадмын боксын төрлийн тэмцээнийг Олон улсын боксын холбооны гурван одтой буюу олимпийн зэрэглэлийн шүүгч Ц.Цогтгэрэл, О.Мандахбаяр нар шүүх юм.

Ташрамд дурдахад, “Токио-2020” наадмын боксын шүүгчээр ажиллаж байгаа Ц.Цогтгэрэл зургадугаар сарын 28-нд Монгол Улсын Ерөнхийлөгч асан Х.Баттулгын зарлигаар төрийн дээд Алтан гадас одонгоор шагнуулсан билээ.