Олимпийн наадмаас Монголын багийн дөрөв дэх медалийг зүүсэн Б.Болортуяа медалиа гардаж авлаа.
Түүний медалийг Монголын багийн ахлагч, МҮОХ-ны тэргүүн дэд ерөнхийлөгч, ОУОХ-ны гишүүн Б.Баттүшиг гардуулан өгөв. Хүсэн хүлээсэн медалиа Монголын багийн ахлагчаасаа гардан авч буй мөч тун ч сэтгэл хөдөлгөм байв.
Б.Болортуяа хүрэл медаль авснаар Монголын баг нэг мөнгө, гурван хүрэл медальтай болж, багийн дүнгээр 69 дугаарт бичигдэж байна гэж МҮОХ-ноос мэдээлэв.
Эмэгтэйчүүдийн хамгийн хөнгөн жинд буюу 50 кг-д зодоглосон Ц.Намуунцэцэг дагах барилдаанд Эквадорын залуу бөх Люсиа Иепстай хүч сорино. Хэрэв түүнийг хожвол хүрэл медалийн төлөө дэлхийн хошой аварга, олимпын хоёр мөнгө, нэг хүрэл медальт Азербайжаны Мария Стадниктай барилдах юм.
Харин эрэгтэйчүүдийн 65 кг-д зодоглож буй Т.Тулга мөн дагах барилдаанд Унгарын нэр дээр барилдаж буй орос бөх Исмаиль Мусукаевтай халз тулна. Түүний өрсөлдөгч 2019 оны ДАШТ-ээс хүрэл медаль хүртсэн аж. Хэрэв Исмаиль Мусукаевыг хожвол хүрэл медалийн төлөө ДАШТ-ий алт, мөнгөн медальт Оросын Гажимурад Рашидовтой өрсөлдөнө. Т.Тулга медальд хүрэхийн тулд хоёр орос бөхийг ялах хэрэгтэй.
Сонирхуулахад, Монголын хоёр бөхийн эхний барилдаан Токиогийн цагаар 18:45 цагт А, Б дэвжээнд зэрэг эхэлнэ.
Өнөөдөр өглөө 05.00 цагт (Улаанбаатарын цагаар) Хоккайдо мужийн Саппоро хотын Одори паркт эхэлсэн олимпийн марафон гүйлтийн эмэгтэйчүүдийн төрөлд манай Баярцогтын Мөнхзаяа хурд, хүч, тэсвэр хатуужлаа сорив.
Чөлөөт бөхийн эмэгтэйчүүдийн -53 кг жингийн хүрэл медалийн төлөө Б.Болортуяа Африкийн наадмын аварга Камеруны Жозеф Эмилиенне Эссомбе Тиакотой барилдаж, 14:4 харьцаагаар ялж, хүрэл медаль хүртлээ.
Б.Болортуяа шөвгийн дөрөвт 2018 оны дэлхийн аварга, 2017, 2019 оны ДАШТ-ий мөнгөн медальт Японы Маю Мукайдад 6-3 харьцаагаар ялагдаж хүрэл медалийн төлөө барилдахаар болсон.
Б.Болортуяа нь 2019 оны дэлхийн аваргын хүрэл медальтай.
Чөлөөт бөхийн эрэгтэйчүүдийн +125 кг жингийн хүрэл медалийн төлөө М.Лхагвагэрэл Риогийн олимпийн аварга, дэлхийн хошой аварга Туркийн Аха Акгултай барилдан 5:0 харьцаатайгаар ялагдаж, тавдугаар байрт орлоо.
М.Лхагвагэрэл шөвгийн дөрөвт 2021 оны Пан Америкийн аварга АНУ-ын Габль Дан Стевесонд 5-0 харьцаагаар ялагдаж хүрэл медалийн төлөө барилдахаар болсон.
М.Лхагвагэрэл нь 2019 оны залуучуудын дэлхийн аваргын хүрэл медальтай.
Японы Такүто Отогүро шөвгийн дөрөвт Оросын бөхийг ялснаар Т.Тулга маргааш дагаж барилдахаар боллоо.
Тэрээр маргааш 17:45 цагаас дэлхийн аваргын хүрэл медальт Унгарын Измайл Музукаевтай барилдана. Хэрэв ялбал хүрэл медалийн төлөө Европ болон дэлхийн аварга ОХУ-ын Гажимурад Рашидовтой барилдана
Сүүлийн 24 цагт “Токио-2020” олимптой холбоотой коронавирусийн халдварын 29 шинэ тохиолдол бүртгэгдлээ гэж зохион байгуулах хорооноос мэдээлжээ.
Шинээр батлагдсан тохиолдлууд нь гэрээт байгууллагууд болон хэвлэл мэдээллийн төлөөлөгчид, зохион байгуулагчид болон сайн дурын ажилтнууд байна.
Ингэснээр, долдугаар сарын 1-нээс хойш олимптой холбоотой халдварын тохиолдлын нийт тоо 387 хүрснээс 251 нь Японы иргэд, 136 нь гаднын иргэд байна.
Чөлөөт бөхийн эмэгтэйчүүдийн -50 кг жинд зодоглосон Ц.Намуунцэцэг эхний шатанд дэлхийн хошой аварга, Азийн аварга Японы Юи Сүсакид 10:0 харьцаагаар ялагдлаа.
Хэрэв Юи Сүсаки финалд шалгарвал манай бөх дагаж барилдан хүрэл медалийн төлөө өрсөлдөх боломжтой болно.
Өдгөө 25 настай Ц.Намуунцэцэг 2018 оны дэлхийн цомд хүрэл медаль хүртсэн билээ.
Чөлөөт бөхийн -65 кг жинд зодоглосон Т.Тулга эхний шатанд 2018 оны дэлхийн аварга, Азийн хошой аварга Японы Такүто Отогүро 6:2 харьцаагаар ялагдлаа.
Барилдаан эхлээд удалгүй Такүто ард нь гарч 2 оноо авсан бөгөөд хоёрдугаар үеийн эхлэлд мөн ард нь гарч онооны харьцаа 4-0 болсон.
Үеийн төгсгөлд Т.Тулга идэвхтэй барилдан нэмж 2 оноо авсан ч цаг дууслаа.
Хэрэв Такүто Отогүро финалд шалгарвал манай бөх дагаж барилдан хүрэл медалийн төлөө өрсөлдөх боломжтой болно.
Өдгөө 23 настай Т.Тулга 2019 оны ДАШТ-ээс тавдугаар байр эзэлж энэ жил Ром хотноо болсон чансаа тогтоох тэмцээнд мөнгөн медаль хүртсэн.
Өнөөдөр буюу наймдугаар сарын 6-ны өдөр манай улсын дөрвөн бөх чөлөөт бөхийн дэвжээнд зодоглоно.
10:44. Чөлөөт бөхийн -65 кг жинд Т.Тулга зодоглоно. Тэрээр эхний шатанд 2018 оны дэлхийн аварга, Азийн хошой аварга Японы Такүто Отогүротой барилдана.
Тэдний хэн ялсан нь шөвгийн наймд Пан Америкийн хошой хүрэл медальт Аргентины Агустин Алехандро Дестрибатс болон дэлхийн аваргын хүрэл медальт Унгарын Измайл Музукаев нарын ялсантай 11:33 цагаас барилдана.
10:44. Чөлөөт бөхийн эмэгтэйчүүдийн -50 кг жинд Ц.Намуунцэцэг зодоглоно. Тэрээр эхний шатанд дэлхийн хошой аварга, Азийн аварга Японы Юи Сүсакитай барилдана.
Тэдний хэн ялсан нь шөвгийн наймд Эквадорын Лусиа Яамилет Епез Гузман болон дэлхийн аваргын хүрэл медальт, Азийн аварга Казахстаны Валентина Иванова Исламова нарын ялсантай 11:33 цагаас барилдана.
19:10. Чөлөөт бөхийн эрэгтэйчүүдийн +125 кг жингийн хүрэл медалийн төлөө М.Лхагвагэрэл Киргизийн Айал Лазарев болон Риогийн олимпын аварга, дэлхийн хошой аварга Туркийн Аха Акгул нарын ялсантай барилдана.
20:05. Чөлөөт бөхийн эмэгтэйчүүдийн -53 кг жингийн хүрэл медалийн төлөө Б.Болортуяа Африкийн наадмын аварга Камеруны Жозеф Эмилиенне Эссомбе Тиако болон дэлхийн аваргын хүрэл медальт, Европын аваргын хошой мөнгөн медальт Польшийн Роксана Марта Засина нарын ялсантай барилдана.