Category: спорт

ОБЕГ-ындарга, хошууч генерал Г.Ариунбуян өнөөдөр Бүгд Найрамдах Казахстан Улсын Караганда хотод Гал унтраах техникийн олон төрөлт спортын насанд хүрэгчдийн 16 дахь удаагийн дэлхийн аварга шалгаруулах тэмцээнд Монгол Улсаа төлөөлөн оролцох баг тамирчдыг хүлээн авч уулзлаа.

“Олон улсын гал унтраах техникийн олон төрөлт спортын холбоо”-ны 20 дахь удаагийн олон улсын хуралдааны шийдвэрийн дагуу 2021 оны 08 дугаар сарын 30-ны өдрөөс 09 дүгээр сарын 06-ны өдрүүдэд зохион байгуулагдах гэж байна.

Тэмцээн довтолгооны шат, саадтай 100 метр, 4х100 метрийн буухиа гүйлт, байлдааны тархалт гэсэн 4 төрлөөр зохион байгуулагдаж аваргуудаа шалгаруулна.

Гал унтраах техникийн олон төрөлт спортын шигшээ багийн ахлагчаар ОБЕГ-ын Гал түймэртэй тэмцэх газрын дарга, хурандаа Ц.Нямбаяр, ерөнхий дасгалжуулагчаар ГУТОТС-ын холбооны ерөнхийлөгч, бэлтгэл хурандаа Я.Ишжамц, дасгалжуулагчаар Чингэлтэй дүүргийн Онцгой байдлын хэлтсийн Гал түймэр унтраах, аврах 10 дугаар ангийн захирагч, хошууч Н.Адьяадорж нар ажиллаж байна.

ОБЕГ-ын дарга, хошууч генерал Г.Ариунбуян, баг тамирчдад хандан, Монгол Улсын баг тамирчдын гаргасан амжилтыг бататгаж тэмцээндээ амжилттай оролцохыг хүсч, амжилт хүслээ гэж Онцгой байдлын ерөнхий газраас мэдээллээ.

Австралийн дугуйчин Пейж Греко өнөөдөр болсон эмэгтэйчүүдийн дугуйн “C1-3” төрлийн 3000 метрийн ганцаарчилсан төрөлд түрүүлснээр “Токио-2020” Паралимпийн наадмын анхны алтан медалийг хүртлээ.

П.Греко Шизүока мужийн Изү хотод болсон уралдааны 3000 метрийн зайг 3 минут 50.815 секундийн хугацаанд туулан барианд орсон байна.

Ингэснээр “C3” ангилалд хэдхэн цагийн өмнө өөрийнхөө тогтоогоод байсан 3:52.283 минутын дэлхийн дээд амжилтыг шинэчилжээ.

Харин уг төрөлд Хятадын дугуйчин Ван Сяомэй 3:54.975 минутын амжилтаар мөнгөн медаль хүртсэн бол Германы тамирчин Дениз Шиндлер 3:55.120 минутад удаалж, хүрэл медалийн эзэн болжээ.

Олимпийн наадамд оролцсон тамирчин О.Хулан тэргүүтэй 3х3 сагсан бөмбөгийн 23 хүртэлх насны эмэгтэй шигшээ баг өнгөрсөн шөнө “Nations League”-ийн тоглолтоо эхлүүлж эхний өдрөө түрүүллээ.

“FIBA 3×3 U23 Nations League” нь “Европ-1”, “Европ-2”, “Европ-Америк”, “Африк-Ази” болон “U21” гэсэн таван бүсэд хуваагдан болж буй.

Монгол улсын эрэгтэй, эмэгтэй багууд “Африк-Ази” бүсэд Нигери, Алжир, Египет улсын шигшээ багуудтай өрсөлдөх учиртай.

Бүсийн эхний цуврал Египет улсын “Аравдугаар сарын 6” хэмээх хотод долоон өдрийн турш дундаа нэг өдөр завсарлан зохиогдож байна.

Манай улсын U23 эмэгтэй шигшээ баг хэсэгтээ Египетийн U21 насны багийг 16:13 харьцаатай хожсон боловч Египетийн U23 насны багт 17:18 харьцаатай хожигдож хэсгээсээ хоёрдугаар байраар гарсан.

Улмаар эхний өдрийн аваргын төлөө Египетийн U23 насны багтай ахин тоглож сүүлийн мөчин 19-21 харьцаагаар хожин түрүүллээ.

Харин эрэгтэй U23 шигшээ багийн хувьд Египетийн U21 багт 22-18, Египетийн U23 багт 22-16 харьцаагаар хожигдсон.

Тэмцээний хэлбэр:

Эрэгтэй, эмэгтэй тус бүр дээр Монгол, Египет, Египет U21 гэсэн гурван баг тойргоор тоглож хамгийн өндөр оноотой хоёр нь финалд тоглосноор тухайн өдрийн ялагч тодорно.

Тэмцээн уг хэлбэрээр гурван өдөр үргэлжилж гурван удаа аварга тодорсны дараа нэг өдөр завсарлаад дахин гурван удаа аваргаа шалгаруулан оноо цуглуулна.

Нийт зургаан удаа аварга тодорч оноо цуглуулснаар Үндэстнүүдийн лигийн эхний цуврал дуусна

МҮОХ-ны Гүйцэтгэх зөвлөлийн ээлжит хурал өчигдөр “Olympic house”-д боллоо. Хуралд гишүүд танхимаар болон цахимаар оролцов.

Хурлын эхэнд МҮОХ-ны ерөнхий нарийн бичгийн дарга Э.Бадар-Ууган МҮОХ-ны 2021 оны үйл ажиллагааны мэдээлэл хийсэн бол тэргүүн дэд ерөнхийлөгч, “Токио-2020” олимпын Монголын багийн ахлагч Б.Баттүшиг Токиогийн олимпын наадамд оролцсон Монголын багийн дүн, тайланг танилцуулав.

Мөн “Алтан од” одонгоор зарим хүнийг шагнах талаар хэлэлцэж шийдвэрлэснээс гадна ирэх пүрэв гарагт (VIII.26) болох МҮОХ-ны бүх гишүүдийн хурлаар хэлэлцэх асуудлыг баталлаа. Харин МҮОХ-ны гишүүнчлэлийн асуудлыг гишүүдийн хуралд оруулан шийдвэрлүүлэхээр болов.

Гүйцэтгэх зөвлөлийн хурлаар МҮОХ-ны дүрмийн өөрчлөлтийг хэлэлцэхээр төлөвлөж байсан. Гэвч нэмэлт, өөрчлөлт оруулсан дүрмийн төслийг хүлээн зөвшөөрөх талаар албан ёсны хариу ОУОХ-ноос ирээгүй тул гишүүдийн хуралд оруулахгүй байхаар шийдвэрлэлээ.

Зуны XVI дахь удаагийн Паралимпийн наадмын нээлт өнөөдөр болж тэмцээнүүд албан ёсоор маргааш эхэлнэ.

Тус наадамд манай улсын 11 тамирчин оролцох бөгөөд хэзээ, хэрхэн өрсөлдөх хуваарийг хүргэж байна.

НАЙМДУГААР САРЫН 27

09:30 цаг. Жүдо бөхийн тэмцээнүүд энэ өдөр эхэлж эрэгтэйчүүдийн -66 кг жинд А.Мөнхбат зодоглоно.

Тэрээр 2012 оны Лондонгийн паралимпад -60 кг жинд есдүгээр байр эзэлж байсан.

09:30 цаг. Жүдо бөхийн эрэгтэйчүүдийн -60 кг жинд С.Ядамдорж зодоглоно.

Тэрээр 2018 оны Жакартагийн Азийн пара наадамд долоодугаар, 2018 оны дэлхийн аваргад долоодугаар байр эзэлж байв.

08:00 цаг. Байт харвааны эмэгтэйчүүдийн ганцаарчилсан төрлийн эрэмбэ тогтоох харваанд Д.Сэлэнгээ өрсөлдөнө.

Тэрээр есдүгээр сарын 2-нд 09:00 цагаас үндсэн харваагаа эхэлнэ.

13:00 цаг. Байт харвааны эрэгтэйчүүдийн ганцаарчилсан төрлийн эрэмбэ тогтоох харваанд Н.Мөнхбаатар өрсөлдөнө.

2018 оны Азийн пара наадмын тавдугаар байрны шагналт тэрээр есдүгээр сарын 3-нд 09:00 цагаас үндсэн харваагаа эхэлнэ.

НАЙМДУГААР САРЫН 29

09:30 цаг. Жүдо бөхийн эмэгтэйчүүдийн +70 кг жинд Н.Алтанцэцэг зодоглоно.

Тэрээр 2018 оны Жакартагийн Азийн наадмаас хүрэл медаль хүртэж байсан.

НАЙМДУГААР САРЫН 30

10:00 цаг. Хүндийг өргөлтийн эрэгтэйчүүдийн -107 кг жинд Э.Содномпилжээ хүч үзнэ.

Тэрээр 2016 оны Риогийн паралимпаас хүрэл, 2018 оны Жакартагийн Азийн пара наадмаас алт, 2019 оны дэлхийн аваргаас алтан медаль хүртсэн юм.

НАЙМДУГААР САРЫН 31

11:00 цаг. Буудлагын эрэгтэйчүүдийн 10 метрийн хийн гар бууны дасгалд З.Ганбаатар өрсөлдөнө.

Тэрээр 2018 оны Жакартагийн Азийн пара наадамд тав, 2018 оны дэлхийн аваргад дөрөвдүгээр байр эзэлж байв.

ЕСДҮГЭЭР САРЫН 1

08:35 цаг. Хөнгөн атлетикийн эмэгтэйчүүдийн зээрэнцэг шидэлтийн төрөлд Д.Саруултөгс өрсөлдөнө.

Тэрээр 2018 оны Азийн пара наадам, 2019 оны дэлхийн аварга шалгаруулах тэмцээнд оролцож байсан.

10:00 цаг. Хөнгөн атлетикийн эрэгтэйчүүдийн 100 метрийн T53 уралдаанд П.Энхманлай өрсөлдөнө.

Тэрээр 2018 оны Жакартагийн Азийн пара наадамд энэ төрлөөр наймдугаар байр, 200 метрийн төрөлд долоодугаар байр, 400 метрийн төрөлд есдүгээр байр эзэлж байсан.

ЕСДҮГЭЭР САРЫН 2

07:45 цаг. Буудлагын эрэгтэйчүүдийн 25 метрийн гар бууны дасгалд З.Ганбаатар өрсөлдөнө.

09:00 цаг. Таеквондогийн эрэгтэйчүүдийн -61 кг жинд Г.Болор-Эрдэнэ өрсөлдөнө.

Тэрээр 2014, 2015, 2017, 2019 оны дэлхийн аварга шалгаруулах тэмцээнд түрүүлж байсан.

09:15 цаг. Таеквондогийн эмэгтэйчүүдийн -49 кг жинд Х.Энхтуяа өрсөлдөнө.

Тэрээр 2017 оны дэлхийн аваргын алт, 2019 оны дэлхийн аваргын мөнгөн медальтай.

ЕСДҮГЭЭР САРЫН 4

08:30 цаг. Буудлагын эрэгтэйчүүдийн 50 метрийн гар бууны дасгалд З.Ганбаатар өрсөлдөнө.

08:41 цаг. Хөнгөн атлетикийн эмэгтэйчүүдийн бөөрөнцөг шидэлтийн төрөлд Д.Саруултөгс өрсөлдөнө.

10:00 цаг. Байт харвааны холимог багийн тэмцээн эхэлж Д.Сэлэнгээ, Н.Мөнхбаатар нар цэц сорино.

Япон улсад”Токио-2020″ зуны Паралимпийн XVI наадамд өрсөлдөхөөр очоод байгаа Монголын паралимпийн үндэсний шигшээ багийн тамирчид тус тусын заал, танхим, талбайдаа очиж бэлтгэл сургуулилтаа үргэлжлүүллээ.

Өнөөдөр жүдо бөх, байт харваа болон хөнгөн атлетикийн тамирчид бэлтгэлээ хийгээд тамирчдын тосгондоо ирээд амарч байна.

Пара жүдо бөхийн төрлөөр эрэгтэйчүүдийн 66 кг-д А.Мөнхбат, 60 кг-д С.Ядамдорж, эмэгтэй жүдоч Н.Алтанцэцэг -70 кг жинд, байт харваагаар Н.Мөнхбаатар /эрэгтэй/, Д.Сэлэнгээ /эмэгтэй/, хөнгөн атлетикийн төрлөөр Д.Саруултөгс /бөөрөнцөг шидэлт/, П.Энхманлай /100 метр тэргэнцэртэй гүйлт/ нар паралимпын наадамд хүч, хурд, авхаалж самбаа, ур чадвараа сорих юм.

Жүдо бөхийн дасгалжуулагчаар Хөдөлмөрийн баатар, олимпын хүрэл медальт, гавьяат тамирчин Х.Цагаанбаатар болон Б.Нарантуяа, Т.Мөнгөнтуяа нар ажиллаж байгаа бол байт харвааны байт харвааны тамирчдыг Хөдөлмөрийн баатар, паралимпын аварга, гавьяат тамирчин Д.Баатаржав, түүний хүү Б.Золбоо нар ажиллаж байна. Харин хөнгөн атлетикийн тамирчдыг Б.Батдорж, Б.Энхбаатар нар дасгалжуулж байгаа юм.

Мөн пауэрлифтингийн тамирчин, паралимпын хүрэл медаль, гавьяат тамирчин Э.Содномпилжээгийн дасгалжуулагчаар Д.Баттулга ажиллаж байгаа бол буудлагын дасгалжуулагчаар Д.Сонгохбаяр, таеквондогийн тамирчдыг Л.Отгонбаатар, О.Хосбаяр нар дасгалжуулж байна.