Токиогийн паралимпийн наадам зургаа дахь өдрөө үргэлжилж байна.
Энэ өдөр манай улсаас хүндийг өргөлтийн -107 кг жинд Э.Содномпилжээ өрсөлдөнө.
Жингийнхээ дэлхийн дээд амжилтыг эзэмшигч тэрээр 2016 оны Риогийн паралимпийн хүрэл, 2018 оны Жакартагийн Азийн пара наадмын алт, 2019 оны Нур-Султаны дэлхийн аваргын алт, 2018 оны Мексикийн дэлхийн аваргын мөнгөн медальтай.
“Токио-2020” зуны Паралимпийн XVI наадамд оролцож байгаа Монгол Улсын багийн албаны төлөөлөгчид, өнөөдөр Олон улсын паралимпийн хорооны удирдлагуудтай уулзлаа.
Монгол Улсын Засгийн газрын тохируулагч агентлаг БТСУХ-ны дарга Ц.Шаравжамц, Монголын үндэсний паралимпийн хорооны ерөнхийлөгч Д.Нямхүү, Олон улсын паралимпын хорооны Гүйцэтгэх зөвлөлийн гишүүн, Азийн паралимпийн хорооны гүйцэтгэх зөвлөлийн гишүүн, Спорт ба эмэгтэйчүүд комиссийн гишүүн Н.Оюунбат нар Олон улсын паралимпийн хорооны ерөнхийлөгч, Бразил улсын иргэн Эндрю Парсонс болон Олон улсын паралимпийн хорооны Спорт ба эмэгтэйчүүд комиссийн дарга, Нидерланд улсын иргэн Рита Ван Дриел нартай уулзаж, Олон улсын паралимпийн хөдөлгөөн, цаашдын хөгжлийн талаар ярилцаж,өөрсдийн явуулж байгаа үйл ажиллагааны талаар танилцууллаа.
Зуны 16 дахь удаагийн паралимпын наадам тав дахь өдрөө үргэлжилж байна.
Өнөөдөр триатлоны тэмцээнүүд эхэлсэн бөгөөд эмэгтэйчүүдийн ганцаарчилсан PTVI төрлийн триатлонд Сусан Родригез алтан медаль хүртлээ.
33 настай Испани тамирчин Риогийн паралимпад тавдугаар байр эзэлж байсан бол өнөөдөр ийнхүү амжилттай ахиуллаа.
Пара триатлоны дэлхийн аваргын гурван алт, хоёр мөнгө, хоёр хүрэл медальтай тэрээр Испанид эмчээр ажилладаг.
Испанийн Компостелагийн их сургуулийг физик эмчилгээ, эмийн чиглэлээр төгссөн Сусана Англи, Испани, Португал, Франц хэлийг маш сайн эзэмшсэн.
Чөлөөт цагаараа аялах, дуу сонсож зугаалах дуртай тэрээр төрөлхийн альбино бөгөөд алсын хараа нь 5-7 хувийн чадвартай аж.
Паралимпийн наадмын жүдо бөхийн эмэгтэйчүүдийн +70 кг-д барилдсан ОУХМ Н.Алтанцэцэг хүрэл медалийн төлөөх барилдаанд дийлдэж, шагналт тавдугаар байр эзэллээ.
Азийн пара наадмын хүрэл медальт тэрбээр медалийн төлөө ДАШТ-ий хүрэл медальт Бразилын Мег Эммерихтэй өрсөлдсөн.
Манай бөх өмнө нь түүнтэй гурав таарч, гурвууланд нь ялагдаж байв.
Энэ удаа барилдаан эхлээд минут орчим өнгөрч байхад өрсөлдөгчийнхөө хөмрөх мэхэнд цэвэр буучихав. Ингэснээр манай гурван жүдочийн хоёр нь VII байр, нэг нь V байрт шалгарсан амжилтаар паралимпын наадмыг өндөрлүүлэв.
Маргааш Э.Содномпилжээ паралимпийн наадамд бяр чадлаа сорих болно.
Токио-2020″ зуны XVI дахь паралимпийн наадамд анх удаа Монгол шүүгч оролцож байна.
Триатлоны Олон Улсын шүүгч, Монголын триатлоны холбооны ерөнхий нарийн бичгийн дарга, Монголын спортын сэтгүүлчдийн холбооны дэд ерөнхийлөгч Бямбаагийн Цагаанбаатар өмнө нь Азийн наадмыг шүүж байсан туршлагатай.
Тэрээр өнөөдөр эхэлсэн триатлоны спортыг дэнсэлсэн гэж Монголын паралимпийн хорооноос мэдээллээ.
Сонирхогчийн боксын өсвөр, залуучуудын Ази тивийн аварга шалгаруулах тэмцээн АНЭУ-ын Дубай хотноо үргэлжилж байна.
Тус тэмцээний өсвөрийн ангилалд -48 кг жинд Нийслэлийн ерөнхий боловсролын 7-р сургуулийн сурагч О.Түвшинзаяа аваргын Алтан медалийн төлөө тоглохоор боллоо.
Тэрээр Энэтхэг улсын тамирчин Рохит Чамолитой Улаанбаатарын цагаар 18:00 тулалдана.
Паралимпийн жүдо бөхийн эмэгтэйчүүдийн +70 кг жинд зодоглосон Нямаагийн Алтанцэцэг эхний шатанд Казахстаны Зарина Байбатинад цэвэр ялагдлаа.
Ингэснээр тэрээр дагах барилдаанд АНУ-ын тамирчин Кэти Дэвистэй барилдахаар болов. Хэрэв ялбал хүрэл медалийн төлөө барилдах эрхтэй болно.
Н.Алтанцэцэг нь 2018 оны Жакартагийн Азийн пара наадмаас хүрэл медаль хүртэж байсан.
“Ардын хүү” хочит О.Пүрэв өчигдөр Сингапурт “ONE FC” холбооны анхны тулаанаа хийлээ. Түүний өрсөлдөгч Их Британийн тамирчин Бен Ройл байсан юм. Хоёр тамирчны тулаан ердөө 49 секунд үргэлжилж, О.Пүрэв хүнд цохилтоор өрсөлдөгчөө яллаа.
“One FC” нь Азийн төдийгүй дэлхийн шилдэг мэргэжлийн холимог тулааны холбоо юм. Өдгөө 30 настай О.Пүрэв холимог тулааны замналдаа есөн тулаан хийж, найм ялж, ганц ялагдсан үзүүлэлттэй боллоо. Тэрээр замналдаа анх удаагаа нэгдүгээр үед өрсөлдөгчөө ялжээ.
Японы харааны бэрхшээлтэй паралимпийн тамирчин Китазоно Арамицү тамирчдын хотхон дунд автомат жолоодлоготой тээврийн хэрэгсэлд мөргүүлсний улмаас гэмтжээ.
Цагдаагийн ажилтнуудын мэдээлснээр, Японы жүдоч пүрэв гаргийн үдэд тээврийн хэрэгсэлд мөргүүлсний улмаас толгой, хөлөндөө гэмтэл авсан байна. Осол гарах үед тэрбээр явган хүний гарцаар гарч байжээ.
Өдгөө 30 настай К.Арамицү тамирчдын хотхоны эмнэлэгт эмчлүүлж байгаа бөгөөд хоёр долоо хоног эмчилгээ хийлгэх төлөвтэй байна. Харин тээврийн хэрэгсэлд зорчиж явсан долоон хүн гэмтэж бэртээгүй байна.
Энэхүү цахилгаан тээврийн хэрэгслүүдийг хотхон дунд тамирчид, төлөөлөгчдийг тээвэрлэхэд ашиглаж буй юм.
К.Арамицү эрэгтэйчүүдийн жүдо бөхийн 81 килограммын жинд өрсөлдөх байжээ.