Category: нийгэм

Нийслэлийн алслагдсан гэр хорооллуудын ажилгүй иргэдэд хүрч ажиллах зорилгоор Залуучуудын Хөдөлмөрийн Төв Биржээс санаачлан, Хөдөлмөр эрхлэлтийн үйлчилгээний төвийн дэмжлэгтэйгээр ажиллуулж байгаа Явуулын Хөдөлмөрийн бирж маргааш  Чингэлтэй дүүргийн 14 дүгээр хорооны нутаг дэвсгэр болох 7 буудалд ажиллана.

Өнгөрсөн хугацаанд явуулын хөдөлмөрийн бирж Сонгинохайрхан, Баянзүрх, Сүхбаатар дүүргүүдийн алслагдсан хороод, автобусны эцсийн буудлууд, оюутны Б хотхон зэрэг газруудаар ажиллаж 650 гаруй ажил хайгч иргэнийг бүртгэж 198 ажил хайгчийн шууд ажлын байранд зуучилж, 107 иргэнд ажил мэргэжлийн чиг баримжаа олгох сургалт зохион байгуулжээ. Мөн намрын ургац хураалтын ажил эхэлсэнтэй холбогдуулан “Намрын ажил- Залуус” төсөлд ажиллаж түр ажлын байраар хангагдах сонирхолтой ажил хайгч, залуучуудыг бүртгэж байгаа юм байна.

Иргэд та бүхэн Явуулын хөдөлмөрийн биржээр үйлчлүүлж байнгын, цагийн болон түр ажлын байранд үнэ төлбөргүй, шууд зуучлагдахын зэрэгцээ ажил мэргэжлийн чиг баримжаа олгох сургалтанд хамрагдах боломжтой юм.

ШӨХТГ-ын
Улсын нэгдүгээр төв эмнэлэгт 10 сая төгрөгийн торгууль оногдуулжээ. Тус
эмнэлэгт  жилд дунджаар 160-180 хүн бөөрний архаг дутагдалтай гэх
оноштойгоор хэвтэн эмчлүүлдэг байна. Бөөрний архаг дутагдалтай өвчтнүүд долоо
хоногт 2-3 удаа бөөр шүүх аппаратад орох ёстой байдаг аж. Гэтэл нэгдүгээр төв
эмнэлэг эмчлүүлэгчдийн 10 хүн тутмын хоёроос нь төлбөр авч, өвчтөн бүрээс 280
мянган төгрөг авч байсныг өнгөрсөн долоо хоногт хийсэн шалгалтаар илрүүлжээ.
Улсын эмнэлэг өөрсдийн дураар төлбөрийн систем тогтоосон нь хууль зөрчсөн
асуудал хэмээн үзсэн байна.

Мөн
аппаратад орж байгаа өвчтөнүүд уух ёстой эм бэлдмэлийг зөвхөн тогтсон нэг эмийн
сангаас авахыг шаардаж байгаа нь Өрсөлдөөний тухай хуулийг зөрчиж байна гэж үзэж
байгаа учраас дээрх хоёр зөрчлийг нэн даруй арилгах үүрэг бүхий албан бичгийг
эмнэлгийн удирдлагуудад хүргүүлж, 10 сая төгрөгийн торгууль ногдуулжээ.

Улс
төрийн хилс хэрэгт хэлмэгдэгсдийн дурсгалыг хүндэтгэх өдөр энэ сарын 10-ны өдөр
тохионо. 19 дахь удаагаа тэмдэглэн өнгөрүүлэх тус өдөр уламжлал ёсоор
хэлмэгдэгсэд болон тэдний гэр бүлийнхэнд хүндэтгэл үзүүлэх аж. Энэ талаар
Цагаатгах ажлыг удирдан зохион байгуулах улсын комиссоос мэдээлэл хийлээ.

Улс
төрийн хилс хэрэгт хэлмэгдсэн иргэдийг цагаатгах ажил анх 1939 оны дөрөвдүгээр
сарын сүүлчээс өнөөдрийг хүртэл 31 мянга гаруй хүнийг цагаатгаж, нэр төрийг нь
сэргээсэн байна. УИХ-аас 1998 онд баталсан “Улс төрийн хилс хэрэгт
хэлмэгдэгсэдийг цагаатгах, тэдэнд нөхөн олговор олгох тухай” хууль хэрэгжиж
эхэлснээс хойш өнөөдрийг хүртэл 18036 хүнд 16 тэрбум 247.4 сая төгрөгийн нэг
удаагийн нөхөн олговрыг төрөөс олгоод байгаа аж. Энэ оны эхний найман сарын
байдлаар 34 иргэнд 33 сая төгрөг олгосон байна.

Одоогоор
цаатгах асуудлыг нь судалж байгаа 6000 гаран хүний баримт материалтай танилцаж
байгаа ба амь насаа алдсан иргэдийн нөхөн олговор бага байгаа гэж үзэн
нэмэгдүүлэхээр хуулийн төсөл боловсруулсан. Гэвч мөнгөн дүн өндөр байгаа тул
эдийн засгийн хямрал арилж, эдийн засаг сайжиртал  хичнээн төгрөгийн нөхөн
олговрын тоог мэдээлэхгүй хэмээн тус комиссын дарга Л.Цог мэдээллээ.

Элэгний
хорт хавдрын өвчлөлөөр манай улс дэлхийд тэргүүлдэг ажээ.
Тиймээс уг өвчнийг бууруулах зорилгоор “Эрүүл элэг” үндэсний хөтөлбөрийг
хэрэгжүүлэх болсон талаар өнөөдөр сэтгүүлчдэд мэдээлэл хийлээ.

Уг
хөтөлбөрийг Хөгжлийн төлөө “Оном”
сан гардан хэрэгжүүлэх аж. Ингэхдээ мэргэжлийн бусад байгууллагуудтайгаа
хамтран хэрэгжүүлж, 2030 он гэхэд 45825 иргэнийг элэгний хавдар, нас баралтаас
урьдчилан сэргийлээд зогсохгүй, элэгний хавдрыг үүсгэдэг вирусгүй орон болно
гэсэн зорилт тавьжээ.

Хөтөлбөрийг
гурван үе шаттайгаар хэрэгжүүлэх юм байна. Нэгдүгээрт, Урьдчилсан сэргийлэлтийн
дэд хөтөлбөр хэрэгжүүлнэ. Энэ хүрээнд иргэд элэгний өвчлөл түүнтэй холбогдох үр
дагавар, нийгэмд учруулж буй хор уршиг, уг өвчинтэй яаж тэмцэх, өөрсдийгөө
болон гэр бүлээ хэрхэн хамгаалах талаарх ойлголтыг дээшлүүлэхэд чиглэнэ. Мөн
хепатит В вируын эсрэг вакцинжуулалтыг хийнэ.

Хоёрдугаарт,
эрт илрүүлэлтийн дэд хөтөлбөр хэрэгжүүлнэ. Иргэн бүрийг
вируст гепатитын шинжилгээнд хамруулж, вируст гепатитын
халдвартай хүмүүсийг үндэсний хэмжээнд бүртгэж эмчийн хяналтанд оруулахаар
төлөвлөжээ.  Ийм арга хэмжээ авснаар эмчилгээг цаг алдалгүй хийж,
 элэгний хавдар хатуурлаас урьдчилан сэргийлэх боломжтой юм байна.

Гуравдугаарт,
эмчилгээний дэд хөтөлбөр хэрэгжүүлнэ. Вируст гепатитын
эсрэг олон улсын стандарт нийцсэн эмчилгээ үйлчилгээг нэвтрүүлнэ. 2020 он гэхэд
хепатит С вирусын архаг халдвартай 147.700 иргэнийг бүрэн эмчилж эдгээн улсын
хэмжээнд С вирусыг устгана. Мөн хепатит В вирусын архаг халдвартай 128.000
иргэнийг эмчилгээнд хамруулж элэгний өвчлөлийн нас баралтыг 50 хувиар бууруулна
гэж үзэж байна.

Өнөөдөр
Чингисийн талбайд Засгийн газрын агентлагуудын нээлттэй өдөрлөг болж байна.
Энэхүү өдөрлөг 18:00 цаг хүртэл үргэлжлэх бөгөөд Мэргэжлийн хяналтын ерөнхий
газар, Онцгой байдлын ерөнхий газар, Оюуны өмчийн газар, Худалдан авах
ажиллагааны газар, Стандартчилал, хэмжилзүйн үндэсний төв зэрэг Засгийн газрын
10 гаруй агентлаг иргэддээ нээлттэй үйлчилж буй юм. Стандартчилал, хэмжилзүйн
үндэсний төв Монгол Улсын стандартуудыг үнэгүй мэдээлдэг вэб сайтын талаар
танилцуулж, стандартуудын тухай мэдээлэл өгч байна Мөн жин хэмжүүр болон цусны
даралт хэмжигч механик аппаратуудыг зөв ажиллаж байгаа эсэхийг шалгаж өгч
байна. Иргэдэд үнэт чулуу, түүгээр хийсэн эдлэлүүдийг таньж, шинжлэн өгөх
үйлчилгээ үзүүлэх аж.

Мөн
Монгол Улсын Шадар сайдын эрхлэх асуудлын хүрээний агентлагууд, Засгийн газрын
хэрэгжүүлэгч агентлаг-Худалдан авах ажиллагааны газар, Нийслэлийн Засаг даргын
дэргэдэх-Нийслэлийн худалдан авах ажиллагааны газар, Дүүргийн худалдан авах
ажиллагааны албадтай хамтран Засгийн газрын худалдан авах ажиллагааг иргэд,
олон нийтэд ил тод сурталчлан таниулж буй юм. Өдөрлөгийн үеэр худалдан авах
ажиллагаанд төрөөс хэрэгжүүлж буй бодлого, мэргэжлийн байгууллагуудын зүгээс
нэвтрүүлж буй дэвшилтэт алхмуудыг иргэд, олон нийтэд тайлагнаж байгаа аж. Мөн
энэ үеэр тендерт оролцогч аж ахуйн нэгжүүдэд зориулсан Засгийн газрын худалдан
авах ажиллагааны хоёр өдрийн үнэ төлбөргүй сургалтад бүртгэнэ. Үүнээс гадна,
иргэд байгууллага хууль зүйн зөвлөгөө, мэдээ мэдээлэл авах зэрэг олон боломжийг
нээжээ.

Хан-Уул
дүүрэгт баригдаж буй “River Stone” хотхоны барилга дээр ажиллаж
байсан гурван залуу амь насаа алдсан хэрэг өчигдөр гарчээ.

Есдүгээр
сарын 7-ны өдрийн 13.30 цагийн үед барилга дээр ажиллаж байх үедээ 17, 19, 23
настай гурван залуу унаж, амь насаа алджээ. Тодруулбал, тус барилгын гадна
талын өнгөлгөөг хийж байсан гурван залуугийн зогсч байсан дүүжин хавтангийн
тросс тасарч өндрөөс унасан байна. Ослын улмаас хоёр нь газар дээрээ амиа
алдаж, нэг нь эмнэлэгт хүргэгдэх замдаа амьсгал хураажээ.

Талийгаачдын
ар гэрийнхний өгч байгаа мэдээллээр энэхүү барилгын үйл ажиллагааг зогсоогоод
байсан байна.

Оюутолгой
төслийн хэрэгжүүлэгч “Рио Тинто” групп болон Монгол Улсын Засгийн Газар
хоорондын яриа хэлэлцээ энэ сарын сүүлээр эцэслэх хүлээлттэй байгаа. “Рио
Тинто”-гийн гүйцэтгэх захирал Сэм Уолш 130 сая ам.долларын
татварын акттай холбоотой асуудлыг шийдэх хүртэл гүний уурхайн хоёрдугаар шатны
бүтээн байгуулалтын ТЭЗҮ-ийг хүлээлгэн өгөхгүй гэдгээ мэдэгдээд байгаа юм. Мөн
зургадугаар сард 200 гаруй ажилтандаа мэдэгдэл хүргүүлсэн “Оюу толгой” компани
энэ талаар нааштай шийдвэрүүд гаргасан байна. Тухайлбал, лхагва гарагт тус компани ажлын ростердоо өөрчлөлт
оруулж, уурхайн ажилчид 28 хоног ажиллаад 14 хоног амардаг байсныг өөрчилж 14
хоног ажиллаж, долоо хоног амрахаар болгожээ. Түүнчлэн хэвийн бус нөхцөлд
ажиллаж байгаа 500 гаруй ажилчиндаа өнгөрсөн сараас нэмэгдэл олгож эхэлсэн
байна.

Нийслэлийн
Засаг даргын Тамгын газраас “Төлбөрийн чадварт нийцсэн орон сууцны зорилтот
бүлгийг оновчтой тодорхойлох нь” сэдэвт нэгдсэн зөвлөгөөнийг маргааш Нүхт корпорэйт цогцолборт зохион байгуулах гэж байна. 
Зөвлөгөөн нь төлбөрийн чадварт нийцсэн орон сууцны зорилтот бүлгийг оновчтой
тодорхойлж, хууль эрх зүйн орчныг бүрдүүлэхэд оролцогчтой байгууллагуудтай
хамтран ажиллах зорилготой юм. Зөвлөгөөнд яамд, Төрийн орон сууцны корпораци,
Үндэсний статистикийн хороо болон холбогдох төрийн болон төрийн бус
байгууллагууд оролцоно. Энэ удаагийн зөвлөгөөнөөр орон сууцны эрэлт,
нийлүүлэлтийн судалгаа, төлбөрийн чадварт нийцсэн орон сууц ба зорилтот бүлэг,
өрхийн амьжиргааны түвшинг тодорхойлох судалгаа, өрхийн орлого, зарлагын
статистикийн мэдээллийг холбогдох албаныхан өгөх аж.
Мөн Нийслэлээс орон сууцны хөтөлбөр, эрчим хүчний хэмнэлттэй төлбөрийн чадварт
нийцсэн орон сууцны нийлүүлэлт зэрэг сэдвээр илтгэл тавина. Зохион байгуулагчид
зөвлөгөнөөр тодорхой шийдвэрт хүрэх зөвлөмжийг гаргахаар төлөвлөж байгаа юм байна.