Эрүүл мэндийн байгууллага, эмч мэргэжилтнүүд иргэдийн эрүүл байх идэвх санаачлагыг дээшлүүлж, тэдэнд эрүүл мэндээ хамгаалах мэдлэг, хандлага, дадлыг олгох замаар хамтран ажиллаж, эрүүл иргэнийг төлөвшүүлэхийн төлөө “Эрүүл мэндийн довтолгоо” арга хэмжээг өрнүүлж байна.
Энэхүү үйл ажиллагаа нь улсын хэмжээнд өрх, айл бүрт хүрэх зорилготой. Архи, тамхи, стресс, хөдөлгөөний дутагдал зэргийг амьдралын буруу дадал хэвшлээс үүдсэн өвчин, эмгэг гэж нэрлэх болсон. Манай орны хувьд төдийгүй дэлхий дахинаа амьдралын буруу дадал хэвшлээс шалтгаалсан эмгэг, өвчлөлүүд нэмэгдэж байгааг харгалзан ЭМД сангийн санхүүжилтээр өрх бүрт амьдралын буруу хэвшлээс үүдэлтэй өвчнүүдийг бууруулахад энэхүү арга хэмжээ тус болно гэж ЭМЯ найдаж байна.
Амьдралын буруу дадал, хэвшлээс үүдэлтэй өвчлөл, түүнд нөлөөлөх эрсдэлт хүчин зүйлсийг хянаж бууруулан, эрт арга хэмжээ авбал халдварт бус өвчнөөр өвчлөх, цаг бусаар нас барах, тахир дутуу болох тохиолдлыг 50 хүртэл хувиар, үүний дотор зүрх судасны өвчнийг 80 хувь, чихрийн шижин өвчнийг 90 хүртэл хувиар, хорт хавдрын тохиолдлыг 30 гаруй хувиар бууруулах боломжтой болохыг ДЭМБ зөвлөж байгаа юм. Хүний эрүүл мэндийг нөхцөлдүүлэгч хүчин зүйлсийг 100 хувь гэж үзвэл, амьдралын хэв маягаас үүдсэн хүчин зүйлс 50-55 хувийг, удамшлын хүчин зүйлс 15-20 хувийг, гадаад орчны хүчин зүйл 20-25 хувийг, эмнэлгийн хүчин зүйл 10 орчим хувийг тус тус эзэлж байгаа нь хүн бүр өөрөө эрүүл мэндээ хамгаалж чадахыг харуулж байна.
Эрүүл мэндийн салбарын эрчимтэй шинэчлэлийн хүрээнд иргэний эрүүл мэндийг сайжруулах, эрүүл мэндийн боловсрол олгосноор иргэд эрүүл мэндийн зөв дадал хэвшилтэй болж, эрүүл, урт наслах боломжийг нэмэгдүүлэх зорилготой дээрхи “Эрүүл мэндийн довтолгоо”–ны гарын авлага болох “Заавал хэвшүүлэх 21 дадал” номыг хэвлүүлэн өрх бүрт хүргэхээр аймаг, нийслэлийн Эрүүл мэндийн газруудад түгээж эхэллээ. Эдгээр газрууд хүлээн авсан гарын авлагаа өрх бүрт түгээж, Заавал хэвшүүлэх 21 дадлаа иргэдэд тайлбарлан таниулж, эдгээр дадлуудыг амьдралд хэрэгжүүлснээр ямар ач холбогдолтой болохыг ухуулан хэвшүүлэх ажлуудыг зохион байгуулах юм.
Эрүүл мэнд хэмээх энэ эрхэм баялагыг “Заавал хэвшүүлэх 21 дадал” – ыг амьдралдаа хэвшүүлснээр та өөртөө болон гэр бүлийхэндээ бэлэглэх болно.
“Монгол-Солонгосын эдийн засгийн форум” өнөөдөр “Их тэнгэр цогцолбор”-т болж байна. Форумд Монгол-Солонгосын Эдийн Засгийн Форумын дарга Г.Батхүү, Солонгос-Монголын Хамтын Aжиллагааны Форумын дарга Жүн Жан Сон, Монгол-Солонгосын Эдийн Засгийн Форумын дэд дарга, Эрдэнэс Таван Толгой ХК-ийн гүйцэтгэх захирал Я.Батсуурь, “Корейн Эйр” компанийн захирал Жи Чан Хун, Монгол Улсаас БНСУ-д суугаа Онц бөгөөд бүрэн эрхт элчин сайд Б.Ганболд нар болон хоёр улсын парламент, Засгийн газрын гишүүдийн төлөөлөл оролцож байна. 
Өнгөрсөн долоо хоногт манай орны ихэнх нутгаар бороо орсон тул голын усны түвшин нэмэгджээ. Өчигдрийн байдлаар Хангайн нурууны арын Чулуут, Хойттамир, өврийн Цагаантуруут, Богд зэрэг голын усны түвшин өмнөх өдрийнхөөс 10-30 см, Хэнтийн нурууны баруун хажуугаас эхтэй Хүдэр, Ерөө, Тэрэлж болон Туул голын нийт уртын дагууд усны түвшин өмнөх өдрийнхөөс 2-5 см, Увс нуурын сав Тэс, Намир, Хангилцаг голын усны түвшин өмнөх өдрийнхөөс 5-10 см тус тус нэмэгджээ.
Дүүргийн 2 дугаар прокурорын газраас Ц.Мянганбаярт холбогдох “2013 оны наймдугаар сараас 10 дугаар сарын 14-ний өдрийг хүртэлхи хугацаанд Өвөрхангай аймгийн Уянга сумын 6 дугаар багийн нутаг дэвсгэрт орших Бөөрөлжүүт гэх орон нутгийн тусгай хамгаалалттай газарт хууль бусаар ашигт малтмал ашиглах, олборлох үйл ажиллагааг гардан зохион байгуулж байгаль орчинд нийт 378.087.860 төгрөгний онц их хэмжээний хохирол учруулсан” хэрэгт Эрүүгийн хуулийн тусгай ангийн 214 дүгээр зүйлийн 214.2 дахь хэсэгт зааснаар прокурорын яллах дүгнэлт үйлдэж, 2014 оны зургаадугаар сарын 19-ний өдөр харъяаллын дагуу Дүүргийн эрүүгийн хэргийн анхан шатны 2 дугаар шүүхэд шилжүүлсэн байдаг.
Монгол Улсын Ерөнхийлөгчийн зарлигийн дагуу Ерөнхийлөгчийн Тамгын газрын дарга П.Цагаан өнгөрсөн баасан гаригт буюу наймдугаар сарын 8-нд ОХУ-ын Бүгд Найрамдах Буриад Улсад зочилж, Холбооны Аюулгүй байдлын албаны /ХАБА/ Хиагтын албанд Цэргийн гавъяаны одон гардууллаа. Тамгын газрын дарга П.Цагаан, Хил Хамгаалах Ерөнхий газрын дарга, бригадын генерал Ш.Лхачинжав болон албаны бусад хүмүүсийг халуун дотноор угтан авлаа.
Халхын голд ялалт байгуулсны түүхэн 75 жилийн ойн босгон дээр, ОХУ-ын Ерөнхийлөгч Владимир Путины Монголд хийх албан ёсны айлчлалын өмнөхөн энэхүү одонг гардуулж байгаадаа таатай байна. ОХУ-ын төрийн тэргүүний айлчлал манай хоёр орны найрамдалт харилцаа, бүх талын хамтын ажиллагааг шинэ шатанд хүргэх нь дамжиггүй.
Ингээд Монгол Улсын Ерөнхийлөгчийн 90 дугаар тоот зарлигийг “Тулгар төрийн 2223 жил, Их Монгол Улс байгуулагдсаны 808 жил, Үндэсний их баяр наадам, Ардын хувьсгалын 93 жил, Халх голын дайны ялалтын 75 жилийн ойг тус тус тохиолдуулан ОХУ-ын Бүгд Найрамдах Буриад Улс дахь Холбооны Аюулгүй байдлын албаны Хиагтын албыг Цэргийн гавъяаны одонгоор шагнасугай” хэмээн уншиж танилцуулснаар одонг гардууллаа.
Өнөө үед Монгол улсад явуулж буй өргөн нэвтрүүлгийн зах зээлд Монголын үндэсний уран бүтээл гадаадын бүтээлд байр сууриа алдсаар байгааг судалгаа харуулж байна. Тухайлбал: 2014 оны 3 дугаар сарын эхний 2 долоо хоногийн хугацаанд телевизийн 23 сувгаар нэвтрүүлсэн 3100 орчим цагийн хөтөлбөрт хийсэн судалгаанаас үзэхэд, уран сайхны киноны хөтөлбөрийн 29.21% нь Монгол уран бүтээл, 70,79% нь гадаадын уран бүтээл байна. Түүнчлэн БНСУ-ын уран бүтээл нийт уран сайхны киноны 37.22%-ийг дангаар эзэлж байгаа нь монгол уран бүтээлээс илүү байна. Эндээс харахад Монгол Улсын иргэн, хүүхэд, өсвөр насныхны телевизээр үзэж буй гурван кино тутмын хоёр нь гадаадынх, мөн гурван кино тутмын нэг нь солонгос кино болсон байна. Түүнчлэн Монголын радио, телевизийн өргөн нэвтрүүлгийн нийт мэдээллийн 5,9 хувийг хүүхдэд зориулсан хөтөлбөр эзэлж байгаа бөгөөд хүүхдийн нас сэтгэхүйд нийцсэн үндэсний нэвтрүүлэг хангалтгүй байна. Түүх, хэл соёл, зан заншил, хүүхэд залуучуудын ёс суртахуун, зан төлөвт сөрөг нөлөө үзүүлэхүйц агуулгыг хязгаарлах хяналтын тогтолцоо, эрх зүйн орчин хангалтгүй байгааг анхааралдаа авах цаг болсон байна.
Мэдээллийн технологи өндөр хөгжсөн өнөө үед манай иргэд боломжит бүх сувгаар мэдээлэл хүлээн авах болсон хэдий ч үндэсний уламжлалт ёс заншлaa хадгалсан, Монголын түүх, соёлын холбогдолтой бүтээлүүдийн эзлэх хувь хэмжээ бага байгаа нь хүүхэд залуучуудын төлөвшил, хүмүүжил, монголын соёлын өвөрмөц төрх байдлыг дархлаажуулахад учир дутагдалтай байсныг харгалзан үзэж Соёл, спорт, аялал жуулчлалын яамнаас “Монгол уран бүтээл буюу Монгол контент” хөтөлбөрийг боловсруулж Засгийн газрын хуралдаанаар хэлэлцүүлэн батлууллаа.
Нийслэлийн Тээврийн газар, Замын хөдөлгөөний удирдлагын төв, Нийслэлийн Замын цагдаагийн газар хамтран нийтийн зорчигч тээврийн үйлчилгээнд зөвшөөрөлгүйгээр тээвэр эрхлэгч иргэн, аж ахуйн нэгж, байгууллагуудын үйл ажиллагаанд хяналт шалгалт хийжээ. Шалгалтанд нийт 272 тээврийн хэрэгсэл хамрагдсанаас их багтаамжийн автобус 55, бага оврын автобус 192, суудлын автомашин 25 байсан байна.
Нийслэлийн Засаг даргын Тамгын газар, Сүхбаатар дүүрэг хамтран “Глобал Ивэнт” компани нь “Хичээлийн шинэ жил 2014” нэртэй нийслэлийн нэгдсэн үзэсгэлэн худалдааг ирэх сарын 16-24-ний өдрийг дуустал 9 хоног Чингисийн талбайд 100 гаруй аж ахуй нэгж байгууллага, бизнес эрхлэгчдийг хамруулан нэгдсэн асар майханаар зохион байгуулахаар болжээ. Нэгдсэн үзэсгэлэн худалдаа их, дээд сургууль, дунд сургууль, цэцэрлэг, зуучлалын төв, сургалтын төвийн өдөрлөг, хичээлийн хэрэгслийн өргөтгөсөн, номын нэгдсэн, гар утас компьютерийн худалдаа гэсэн хэсгээс бүрдэх юм байна.
2014 оны 8-р сарын 6-ны байдлаар хүнсний гол нэрийн барааны үнийг өмнөх сартай харьцуулахад 2.5 хувь, өмнөх 7 хоногийнхтой харьцуулахад 1.8 хувиар буурсан байна.
Энэтхэгийн “Фортис” нэгдсэн эмнэлгийн эмч Вивек Виж маргаашаас эхлэн энэ сарын 15-ны өдрийг хүртэл элэгний үзлэг хийх юм байна. Тэрээр гурван сар тутамд Монголд ирж, элэг шилжүүлэн суулгасан өвчтнүүдээ үзэж, хяналт тавьдаг аж. Мөн шинэ өвчтөн, доноруудад үзлэг хийж, хагалгааны урьдчилсан бэлтгэлээ хангадаг байна.