Энэ сарын 26-нд буюу уржигдар “МАК” компанийн Дорнод аймаг дахь Адуунчулууны гүний уурхайд осол гарч, эксковаторын жолооч амиа алджээ. Урьдчилсан таамгаар хөдөлмөр хамгаалал, аюулгүй байдал алдагдсан хэмээн дүгнэж буй юм байна. Хохирогч нь 30 орчим настай бөгөөд хэрхэн амиа алдсан нь тогтоогдоогүй, Дорнод аймгийн цагдаа болон онцгой байдлын ажлын хэсгүүд шалтгаан нөхцлийг тогтоохоор ажиллаж байгаа аж. Харин энэ хэргийн талаар “Монголын алт” компани ихэд нууцалж байгаа гэнэ.
Category: нийгэм
Улаанбаатар хотноо “Хүний хөгжлийн илтгэл 2014” хурал эхэллээ. 1990 оноос эхлэн жил бүр НҮБ-ын хөгжлийн хөтөлбөрөөс санаачлан бэлтгэдэг хүний хөгжлийн цуврал илтгэлүүд нь хөгжлийн асуудал, чиг хандлага, ахиц дэвшил болон бодлого хөтөлбөр, туршлага судалгаан дээр үндэслэсэн дүн шинжилгээ хийж гаргадаг аж. Энэ жилийн дэлхийн хүний хөгжлийн илтгэлээр Монгол Улс 187 орноос 130-т жагссан байна. Өмнөх онтой харьцуулахад гурван байраар ахисан дүн гарчээ. Гэвч энд эмзэг байдал арилаагүй байна. Энэ нь хүн амын ядуурлын түвшин, ажилгүйдлийн түвшин, нийгмийн шинжтэй гол үзүүлэлтүүдээр ахиц дэвшил гараагүйтэй холбоотой аж.
“Шинэ бүтээн байгуулалт” дунд хугацааны зорилтот хөтөлбөрийн хүрээнд Хөгжлийн банкны санхүүжилтээр хэрэгжиж байгаа Яармагиийн гүүрнээс Богд уулын араар Баянзүрхийн товчоо хүрэх 17.1 км авто замын хучилтын ажил өнөөдөр бүрэн дуусна. Ингэснээр жолооч нар уг замаар хөдөлгөөнд оролцох боломжтой болно. Энэхүү замыг “Эсто” ХХК 2012 оны зургаадугаар сарын 25-наас барьж эхэлсэн бөгөөд Баянзүрхийн товчооноос эхлэн замын далан, ухмалын ажил, гүүрийн дам нурууны цутгалт, төмөрбетон хоолойн ажлуудыг хийж гүйцэтгэжээ. Замын зорчих хэсгийн өргөн нь 7 метр, мөн явган хүний замтай аж.
Япон Улсын Засгийн газраас Төслийн бус буцалтгүй тусламжийн хүрээнд ерөнхий боловсролын сургуулийн байгалийн ухааны хичээлд хэрэглэгдэх сургалтын хэрэглэгдэхүүн, тоног төхөөрөмжийг Боловсрол, шинжлэх ухааны яаманд хүлээлгэн өглөө. Лабораторид бага, дунд ангийн байгалийн ухааны хичээлд зориулагдсан тус бүр 10 нэр төрөл бүхий 2 багц, нийт 700 гаруй сая төгрөгийн өртөг бүхий хамгийн сүүлийн үеийн тоног төхөөрөмжүүд багтсан юм. Өнгөрсөн хичээлийн жилд Шинэчлэлийн Засгийн газраас “Бага, дунд боловсролын чанарыг дээшлүүлэх шинэчлэлийн бодлого”-ын хүрээнд ерөнхий боловсролын 100 сургуульд дэлхийн жишигт нийцсэн физик, химийн лабораторийн тоног төхөөрөмж хүлээлгэн өгсөн. Цаашид БШУЯ-аас бүх сургуулийг хамгийн сүүлийн үеийн лабораторитой болгох зорилт тавин ажиллаж байна.
Япон Улсын Засгийн газар 200 сая иенийн буюу 2 сая гаруй ам.долларын Төслийн бус буцалтгүй тусламжийг Монгол Улсын Засгийн газарт олгохоор шийдвэрлэж, манай тал энэхүү тусламжаар эмнэлгийн тоног төхөөрөмж, сургалтын тоног төхөөрөмж авахаар Японы талтай тохиролцон Ноот бичигт гарын үсэг зурсан билээ. Япон Улсын Засгийн газрын Төслийн бус буцалтгүй тусламж нь хөгжиж буй орнуудын эдийн засгийн бүтцийн өөрчлөлтийн бодлогыг дэмжих, гадаад төлбөрийн балансын алдагдлыг багасгах, нэн яаралтай импортлох шаардлагатай бараа материалыг худалдан авахад нь зориулж олгодог буцалтгүй тусламжийн хэлбэр юм.
Энэхүү тусламжийг Монгол Улс 1991 оноос хойш нийт 10 гаруй удаа хүлээн аваад байгаа, эдгээр тусламж нь Монгол Улсыг зах зээлийн эдийн засагт шилжихэд учирсан хүндрэл бэрхшээлийг даван туулах, манай орны эдийн засгийн бүтцийг сайжруулах, гадаад худалдааны алдагдлыг бууруулахад чухал дэмжлэг болж ирсэн юм.
Өмнөд Судан улсад явагдаж байгаа UNMISS ажиллагаанд Монгол Улсын цэргийн багийн III ээлжийнхэн үүргээ амжилттай биелүүлээд, эх орондоо иржээ. Тэдэнд хүндэтгэл үзүүлж, одон медаль гардуулах ёслолын ажиллагаа маргааш Чингисийн талбайд болно. Энэхүү үйл ажиллагаанд Монгол Улсын Ерөнхийлөгч Ц.Элбэгдорж оролцож, энхийг сахиулагчдад баяр хүргэх аж.
Дашрамд сонирхуулахад энэхүү багт цагдаагийн байгууллагаас 51 хүн оролцож, Өмнөд Судан улсад явагдаж байгаа UNMISS ажиллагаанд үүрэг гүйцэтгэжээ. Тэдний дундаас энхийг сахиулагч Цагдаагийн ерөнхий газрын авто баазын эмч, цагдаагийн ахмад П.Цагааннохой хүүхэд эх барьж авчээ. Тэрбээр Бентью хот дахь Нэгдсэн үндэсний байгууллагын баазад тухайн орон нутгийн гурван эхийг төрүүлж, 2 хүү, 1 охиныг эх барьж авсан байна.
“2013 оны 03 дугаар сарын 23-ны өдөр Баянгол дүүргийн 20 дугаар хорооны нутаг дэвсгэрт байрлах Шүүхийн шийдвэр гүйцэтгэх ерөнхий газрын харъяа цагдан хорих 461 дүгээр ангид Ш.Батбаяр нь цагдан хоригдож байхад тус ангийн В корпусын 2-ын 7 тоот тусгаарлах өрөөнд гал гарсан. Үүнээс болж, Шүүхийн шийдвэр гүйцэтгэх газрын харъяа Цагдан хорих 461 дүгээр ангийн албан хаагч Б.Өлзийбат, Э.Тамир, Х.Жигдэндан, Б.Цоггэрэл, В.Ганбаяр, Ц.Энхбат, Д.Батболд нарт Эрүүгийн хуулийн тусгай ангийн 272 дугаар зүйлийн 272.2 дахь хэсэгт зааснаар ял сонсгон яллагдагчаар татаж, 2014 оны 05 дугаар сарын 29-ний өдөр прокурорын яллах дүгнэлт үйлдэн хэргийг шүүхэд шилжүүлжээ. Тэгвэл дүүргийн Эрүүгийн хэргийн анхан шатны хоёрдугаар шүүх хэргийг 2014 оны 08 дугаар сарын 27-ны өдөр хянан хэлэлцээд, шүүгдэгч Б.Өлзийбат, Э.Тамир, В.Ганбаяр, Ц.Энхбат нарт холбогдох хэргийг хэрэгсэхгүй болгож, шүүгдэгч Ш.Батбаярыг бусдын эд хөрөнгийг санаатайгаар гэмтээсэн гэм буруутайд тооцож, Эрүүгийн хуулийн Ерөнхий ангийн дугаар зүйлийн -ийг журамлан Эрүүгийн хуулийн тусгай ангийн 153 дугаар зүйлийн 153.2 дахь хэсэгт зааснаар 3 жил 5 сарын хорих ялыг жирийн дэглэмтэй эрэгтэйчүүдийн хорих ангид ял эдлүүлэхээр, шүүгдэгч Х.Жигдэндан, Д.Батболд, Б.Цоггэрэл нарыг албан үүрэгтээ хайнга хандсан гэм буруутайд тооцож, Эрүүгийн хуулийн тусгай ангийн 272 дугаар зүйлийн 272.2 дахь хэсэгт зааснаар тус тус 1 жилийн хорих ялыг жирийн дэглэмтэй эрэгтэйчүүдийн хорих ангид ял эдлүүлэхээр шийтгэж, тэдгээрийн хувийн байдлыг харгалзан оногдуулсан ялыг тус тус 1 жилийн хугацаагаар тэнсэж хянан харгалзаж шийдвэрлэсэн байна.
Нийслэлийн Баянзүрх дүүргийн нутаг дэвсгэрт байрлах “Лянь-Хө” рестораны хоолноос өт гарсан тухай мэдээлэл цахим орчинд гарч эхэллээ. Сүүлийн үед Хятад ресторануудаас энэ мэт элдэв зүйл гарч ирсэн тухай элдэв дуулиан дэгдэж зарим Солонгос хоолны газруудын амтлагчийг хийдэг Хятад иргэдийн үйлдвэрлэл явуулдаг газрууд нь эрүүл ахуйн наад захын шаардлага хангадаггүй байдал иргэдийн шүүмжлэлийг хүртсээр байгаа билээ.
Харин Монгол улсын шадар сайд Д.Тэрбишдагвын мэдэлд байдаг Мэргэжилийн Хяналтын Газар хэмээг байгууллага энэ бүхэнд хяналт тавьж байх учиртай юм.
Монгол улсын эрүүл мэндийн яам, БНХАУ-ын Шанхай хотын SCIS ХХК, Эмнэлгийн инженерүүдийн нийгэмлэг хамтран “Эмнэлгийн тоног төхөөрөмжийн олон улсын анхдугаар үзэсгэлэн”-г Мишээл экспо-д нээгдлээ. Нээлтийн үйл ажиллагаанд Эрүүл мэндийн сайд Н.Удвал, Монгол улсын ерөнхий сайдын зөвлөх Э. Дөлгөөн, Шанхайн эмнэлгийн тоног төхөөрөмжийн нийгэмлэгийн ерөнхийлөгч Ву Чан Ли, Шанхайн мэдээлэл, зуучлалын байгууллагын ерөнхий захирал Чангдо Вой болон эрүүл мэндийн байгууллагуудын удирдах ажилтнууд, олон улсын байгууллагын төлөөлөгчид оролцлоо. Эрүүл мэндийн сайд үзэсгэлэнг нээж хэлсэн үгэндээ, Монгол улсын эрүүл мэндийн салбарт технологийн шинэчлэлийг хийж тодорхой үр дүнд хүрч байгааг хэлсэн. Тухайлбал, Монгол улсад эрхтэн шилжүүлэн суулгах, үргүйдлийг эмчлэх, перинаталогийн тусламж үйлчилгээг сайжруулахад технологийн шинэчлэлийг хэрэгжүүлж, эхний үр дүнгээ үзээд байна. Энэхүү үзэсгэлэнгээс манай салбарын хүмүүс эмчилгээ, оношилгооний шинэ ололт дэвшлийг олж харна гэдэгт найдаж байгаагаа хэллээ. Тус үзэсгэлэнд танилцуулагдаж буй тоног, төхөөрөмж нь зөвхөн анагаах ухааны дэвшлийг таниулаад зогсохгүй Монгол улсад суурьших, нутагших ажлын нэг хэсэг болно. Монгол улсын эрүүл мэндийн салбарт шаардлагатай тоног, төхөөрөмж байвал авч хэрэглэх талаар судлахаа мэдэгдлээ.
Гурван өдрийн турш үргэлжлэх үзэсгэлэнд Олон улсын GE Healtcare, Metdronic, Covidien, Pentax, Nihon Kohden, Belimed AG, ERBE, Kangda, Boxun, Siling зэрэг эрүүл мэндийн салбарын дэлхийд тэргүүлэгч эмнэлгийн тоног төхөөрөмж үйлдвэрлэгч 17 компани оролцож, технологийн дэвшлийг Монгол улсад анх удаагаа толилуулж байна. Энэхүү үйл ажиллагаа нь эрүүл мэндийн тусламж, үйлчилгээний оношилгоо, эмчилгээний дэвшилтэт техник, технологийн талаар олон нийтэд танилцуулан сурталчлах, төр, хувийн хэвшил, олон улсын байгууллагуудын хамтын ажиллагааг өргөжүүлэх, харилцан туршлага солилцох, нөхцөл бололцоог олгож буйгаараа онцлогтой юм.
МОХ, Нийслэлийн цагдаагийн газар, Нийслэлийн аялал жуулчлалын газар хамтран энэ оны долдугаар сарын 01-ээс наймдугаар сарын 25-ны өдрийг хүртэл “Оюутан цагдаа” нарыг ажиллуулсан юм. Энэхүү “Оюутан цагдаа” хөтөлбөр нь нийслэл хотод хүрэлцэн ирж байгаа жуулчид болон иргэдэд туслах, тэднийг гэмт халдлага, болзошгүй аюулаас урьдчилан сэргийлэх зорилгоор хэрэгжсэн юм. Хөтөлбөрийн хүрээнд нийслэлийн зургаан дүүргийн 44 чиглэлд 88 оюутан ажилласан байна. Дээрх хугацаанд Оюутан цагдаа нар нийтдээ 186 цаг ажилласан бөгөөд 600 гаруй мянган төгрөгийн цалин урамшуулал авсан байна. Манай улсыг зорин ирсэн жуулчид болон олон иргэд “Оюутан цагдаа” хөтөлбөрийн талаар ам сайтай байгаа билээ. Харин наймдугаар сарын 29-нд буюу маргааш ”Оюутан цагдаа” хөтөлбөрийн хаалтын үйл ажиллагаа болох юм. Дашрамд сонирхуулахад энэ жилийн “Оюутан цагдаа” хөтөлбөр ихээхэн амжилттай хэрэгжсэн тул тус хөтөлбөрийг ирэх жил хэрэгжүүлэхээр болж нийт 200 оюутныг хамруулан цар хүрээгээ өргөжүүлэн ажиллахаар бэлтгэж байна.
Дорнод аймгийн Булган сумын ХААН банкны тооцооны төвийн эрхлэгчээр ажиллаж байхдаа С.Гэрэлмаа нь хувийн ашиг сонирхлын үүднээс хууль тогтоомж зөрчиж, бусдад онц их хэмжээний хохирол учруулсан гэмт хэргийг үйлдсэн гэм буруутайд тооцож, анхан шатны шүүхээс 5.1 жилийн хорих ял оногдуулсан байна.
Тэрбээр тооцооны төвийн эрхлэгчээр ажиллаж байхдаа “Банк, эрх бүхий хуулийн этгээдийн мөнгөн хадгаламж, төлбөр тооцоо, зээлийн үйл ажиллагааны тухай хуулийн 21 дүгээр зүйлийн 2.3.23 дугаар зүйлийн 1, 4 дэх заалтуудыг зөрчсөн, хуурамч зээлийн хувийн хэрэг бүрдүүлэн 15 хүний нэр дээр 45.700.000 төгрөгийн зээл гарган авч бусдад онц их хэмжээний хохирол учруулсан байна. Уг гэмт хэрэгт Дорнод аймгийн Прокурорын газраас Эрүүгийн хуулийн тусгай ангийн 156 дугаар зүйлийн 156.3-т зааснаар яллах дүгнэлт үйлдэж шүүхэд шилжүүлсэн байна.